ክንታንትካዋ ክንቲው ማንድዴስ ሴጋ ፄውኽ….

ዘውዴ በካሉ

እምፕላ አጌራው ልማትስስታ ልግስኒስ ሰላም ዋሺኒዴስኪ ጃላ ፍሺ ዝኮ:: ጛርት አቕዴስ ቻሱሳ ኪሴስታ ልግስኔ አግጝስ እክዶ ጄሜራማ አጌሮ ኺሰታ ሰላም አቱኒጊ ዋሺኔኪ አላሜስታ ግቦ ሳኪትጝፅጝስ ካሊስታላኽ::

ሰላም አቲጝስ ጉዲስቱንኩ ዜርፍካዴስኪላ ክንቲው ዜርፍ እምፕልያኽ:: አማኻሪ ክልልዳ ናማኪ ዙራሙሪ ቺፋ ፌቴርስትኹ ሰላሞ አቲጝ ክንታንትካ ክንቲው ማንድዴስ ሴጋ ያኻንታ ፄዋ:: 2016 ም.አሜትዳ ዋልታ ትኩሚ ላጛ ሚሊዮን ክንታንትካዋ ክንትፅጝ  አማኻሪ ክልሉ ክንቲው ቢሩ እክድ እሺኹ አኽⶓ ክንቲው ቢሩዴስ አግስትኹ ንባር ቶኬሜ:: ያኼስጉ ክልላኻዳ አምሊ አርፊው አሊዲዳ ጄሜራማ ኬሴትስትኹ ጋቻ ክንታንትካ ሜዜጌብስታቲንታስታ ወክትስ ክንትጝ ክንትፅጙስ ቴርቶ ካስጝፃቲታ ፄዋ::

አማኻሪ ክልሉ ክንቲው ቢሩ  ጌሌፅኹስታ 2 ትኩሚ 6 ሚሊዮን ያኻንኩ ክንታንትካ አማኻሪ ክልልዳ ክንቲው ማንድዴስ ሴጋ አኽⶓ ጌሌፃ::

ክንታንትካ ክንቲ ጝና ካስⶓ ኔፌክካማ፣ አፄብካሊ እንክራሺኑሳ እንክሬ ኔፌክካማ፣ ክንትፃንትካዋ ጋሼስታ እትዬ ንካማጊ ቤናኻዳኪ ያኻ ቤንዴስ ሴጋ ጛስጛዋ እሺኹ ታምትጚስታ ክንቲው ሜንፌስ ቴስፌ እታ:: ቻ አጌሮ አሬኬብስትጝስ አኬዳሺኑ እክድ፣ አቕቶ ጌቤልትካማ ቻ ኬሽኹ አችዳ ታምብጝስ አኬዱና እክድ ፍታናኻዳ አታ:: ጄርካ ጝንዳ እሼንታ ጌዴድስትካ:: አማኻሪ ክልልዳ ፌቴርስትኹ ፄትቲው ችግር ክንታንትካዋ ክንቲዴስ ሴጋ ፄዋ:: አዊ ብሄረሰቡ ቺፅጝፂዳ አግስታንኩ 561 እምፕላንቲ አች ክንቲ ጝንካስታ 42 ላጛንቲ አች ክንቲ ጝንካዳ 2016 ም.አሜት ክንቲው ዝቤንዳ ላጛ ሊኻ ሻይዴስ ጃላ ክንታንትካዋ ሜዜጌባማ ክንትፅጝስ እክድ እምስታሺኾ:: ያኼስጉ አጌርዳ ናማኪ ዙራሙሪ ቺፋ ፌቴርስትኹ ሰላሙ ችግርስ ሊኽዴስ 50 ታፋ ያኻንኩ ክንታንትካ ይቢችካ ክንቲው ማንድዳ አግስትⶓ ክንቲው ሜምሪዴስ አግስትኹ ንባር ቶኬሜ::

አዊ ብሄረሰቡ ቺፅጝፂዳ ዳንግሊ ኬቴም ቺፅጝፂ፣ ዳንግሊ ዙሪ ወረዳ፣ ጉዋጉሲ ሽኩዳድ ወረዳ፣ ጃዊ ወረዳስታ ባንኩ አዩ ጉዋጉሲ ወረዳኩ ዙራሙርካዳ እን አሜትስ ክንቴ ክንትጝ ቱስታኩ ክንታንትካ ክንቲዴስ ሴጋ ያኼካ:: አውጚው ቴርትቤናሊ እጂጜ ፄውንኩ ክንታንትካስታ አዊ ብሄረሰቡ ክንቲው ሜምሪው ትክትሊ አላፊ እንቲታኪ እንጀቢሪ ዩኒቨርስዳ በይሪ ፅንታሱ ክንትፃንቲ ፌትርስትኹ ሰላሙ ችግር ክንቲዳ ታምፅኹስ ቻኒስቶ ዙማና::

ክንታንቲ እንድሪስ ሰይድ አምቢሊ ክንቲ ጝናዳ 12ንቲ ቤኑ ክንታንቴያኽ:: 2016 ም.አሜትዳ 12ንቲ ቤኑስ አጌር አቡቑሳ ፍታኔ ፌቴንስታንኩ አኽⶓ ድኹዋማ ፌትርስትኹ ሰላሙ ችግርስ ክንቴ ክንትⶓ አቲⶓ ድኹዋ:: ፍታኒስ ቴሪትጝስ ጁትጝጝ ቱስቱስ ዎሬምስ ቴርትጝ አንኩዋሊው ጉዳት አኽⶓኪላ ክንታንቲ ዙማ::

ናካሱ ወክትዳ ክንቲ አሌድስታማ ፍታኒስ እርዳታንኩ ሜፃፍካዋስታ ሊሊትጙንኩ አሜትካስ ፌቴንስቱንኩሳ ካስካዋ እንፃኽስትጝ ቱስቱስ ጌና 12ንቲ ቤኑ ክንቲው ፋንቲቲ ጌና ጄሜሪያሱውስታ ልቓ ሰላም ዝኩክ ዙራሙርካዳ ዴሜካ ጌና ኪንዲዳ አኽⶓ ክንታንቲ እንድሪስ ድኹዋ:: ክንታንትካኪላ ሴላሙ ችግርስስታ ጋቻ ባስጛማጊ ካስኹ ዙራሙርካዳ እሺኑ ዙራሙሪዴስ ፌኔኬልጝስ አላሚዴስ ሴጋ አኽⶓኪላ ዙማ ክንታንቲ እንድሪስ::

ክንታንቲ ኑርልኝ ባንቴኪላ ሌማ ክንቲ ጝናዳ 12ንቲ ቤኑ ክንታንቲያኽ:: አማኻሪ ክልልዳ ናማኪ አዊ ብሄረሰቡ ቺፅጝፂዳ ሊሊትጙንኩ ዙራሙርካዳ ፌቴርስትኹ ሰላሙ ችግርስ ክንቴ ቱስቲስ ክንታማ ፍታኒስ ቴርትጝስ ቼጌርስትⶓ ዙማ:: ክንቲ አንኩሊው ልማት አኽⶓ ጉሽኹ ክንታንቲ ኑርልኝ ክንቲዴስ ሴጋ አኽጝስታ ክንቲ ጝናዳ ፌይፃሺኑስ ጊዞ ጝንዳ ፌይፅጝ እንቲታኪ ጋቻው አብኖስታ ድምፆ እንኩዋኽጝ ሼውፅንታዳ ቤዴሎ ታምፅⶓ ዙማ:: ክንታንትካ ክንትካማ ታምብጝ ቱስታው አላሚዳ ታምባቲንታ ፄውⶓኪላ ክንታንቲ ኑርልኝ ድኹዋ:: ናካኪላ 2016 ም.አሜት ክንቲው ዝቤኑ ክንትጝ ክንትፅጙ ቴርት ጌና አሌድስታያሱ አኽጝስ እዝብስታ ምንግስት ሰላምስ ኩርፄንትስ እንፃኽስትካማ ኬውጙኽ ክንቲው ቴርት ጄሜራታ ፄዋንታኪላ ክንታንቲ ኑርልኝ እንፅኼንቶ ፌያፌይጝፃ::

አዊ ብሄረሰቡ ቺፅጝፂው ክንቲ ሜምሪው ትክትሊ አላፊ ወንድማገኝ ማኔ አዊ ብሄረሰቡ ቺፅጝፂዳ ፌቴርስትኹ ሰላሙ ችግርስ ላምቡሳኺስታ 100 ሻይ ዴስ ጃላ ያኻንኩ ክንታንትካ ክንቲ ጝናሾ ዙርካያስኩ አኽⶓ ጌሌፅካ::

2016 ም.አ አዊ ብሄረሰቡ ቺፅጝፂዳ 563 እምፕላንቲ አችስ፣ 47 ላጛንቲ አች ክንቲ ጝንካዳ 200 ሻይዴስ ጃላ ያኻንኩ ክንታንትካ ሜዜጌብስቱኒኪላ  ፌቴርስትኹ ሰላሙ ችግርስ ክንቲው ማንድዳ አግስታውሻንኩ ሊኽዴስ 50 ታፋ አኽⶓ አቶ ወንድማገኝ ጌሌፅካ::

2016 ም.አሜትዳ 210 ሻይዴስ ጃላ ላጛንቲ አች ክንቲ ጝናዳ ክንታንትካዋ ሜዜጌባማ ክንትፅጝስ እክድ እምስትⶓ ጌሌፁንኩ አቶ ወንድማገኝ ፌቴርስትኹ ሰላሙ ችግርስ 100 ሻይዴስ ጃላ ክንታንትካ ክንቲዴስ ሴጋ ያኼካ፤ ጋያኪ 12ንቲ ቤኑሳ ክንቴ ክንትጝ ቱስታኩ 19 ሻይ ክንታንትካዴስ 6ሻይ 69 ክንታንትካ ክንቲው ማንድዳ አግስትጝ አጌር አቡቑስ ፍታኔ ፌቴንስታንኩ ክንታንትካዳ ቻኒስቶ ታምፅⶓ ጌሌፅካ::

ትክላሊስ ብሄረሰቡ ቺፅጝፂዳ ሊኽዴስ 50 ታፋዴስ ኩክራ ክንታንትካ ክንቴ ሲፍጛውሻንኩ አኽⶓ ጌሌፁንኩ ትክትሊ አላፊ እንግርቴካማ ክንቴ ጄሜሩንኩ ክንታንትካ አሜቱሳ ክንቴ ዋልቲ አርፋስ አሌዳንታ ዳብዚ እንኩርስታማ እንፅኼ ጄሜርⶓ እርዳትፅካ:: ሰላም ቼሜትጛያሱ ዙራሙሪዳ ዴሜካ ቢዲሬ እንኬ ፊቲስጙሳ እንፅኼ እንፃኽስታንታስታ ፌኔኬልጜካማ ዋሺኒዳኪ ዙራሙርካዳ አግስታንኩ ክንታንትካ ሰላም ቼሜትጛማ ዙሪኒምባ ኺስታ ዝኩኑዳጊ ክንታኑ አኺኒ ፌቴርስታው አኽⶓ ትክትሊ አላፊ ጌሌፅካ::

እንጃቢሪ ክንትፃንትካው ኮሌጅዳ ባይሪ ፅንታሱ ክንትፃንቲ ያኹንኩ አቶ ወርኩ ገበየሁ አማኻሪ ክልልዳ ናማኪ ዙራሙሪ ቺፋ ፌቴርስትኹ ጋቻ አቑዳ አንኩሊዳ ቤዴሎ ታምፅⶓ ጌሌፅካ:: ሰላሙ ችግርስ ጉዲስቱንኩ ዜርፍካዴስ እምፕል ክንቲው ዜርፍ አኽⶓ ጉሹንኩ ባይሪ ፅንታሱ ክንትፃንቲ ድሚስኪ ያኻ አካልስ ሌጌሳካያስኩ ስራስሪ ክንቲ ልምትጙ ምክንያትስ አንኩሊውሳ ፉሬ አቴካማጊ አኽⶓ እርዳትፅካ:: ሚንቾ ጊዞ ክንቲ ጝናዳ ፌይፃሺንኩ ክንታንትካ ክንቲው ማንድዴስ ሴጋ ያኼካማ ጝንዳ እሺጝ፤ ጌርክ ቺፋ ዎሬም ዙሚስቱስ እንኮኽጝስታ ችኻ ፉሪው ጊዝዳ ልምታማ ብስስትምባ ኔፌካንኩ ስራስሪ ክንቲ ጝና ልምታኒ አንኩሊው፣ አካሉ፣ ባይሪውስታ እሊውጊ ኪስ አኹኪ ቤዴል ታምባው አኽⶓ ባይሪ ፅንታሱ ክንትፃንቲ አቶ ወርኩ ጌሌፅካ::

ክንቲ ልምትጝ ክንታንትካ ቻሱሳ ቴስፌ ማንዳቲንታ፤ ጛጛርጛሳ፣ ጝን አቖ ጋያኪ አጌሮ አሬኬብስትጝስ እሺኹሳ ፍንሾሱሳ አላሜስታ እክዶ አታንታ ፄውⶓኪላ አቶ ወርኩ ጌሌፅካ:: ክንቲ ልምትጙ ምክንያትስ ቹዋታብል ጄርካዋ አርቴን አጌር ሰላማ ያኻኒ ክንቴንኻኽ ንጝ ቱስቱስ እንዴስ ጌና ክንቲ እላኽ ንካማ ድሚ ቱትጚስ ታምባውላስ ኹን ጄርካዋ ኽይፄካማጊ አኽⶓ ባይሪ ፅንታው ክንትፃንቲ እርዳትፅካ::

አጌር ሰላሞ አቲጝስ ክንቲ ልምትጝስ ጉዲስትኹሳ አንኩሌ ዙርፃኑላስ ታክሳኑላስስታ አላሚዴስ ሴጋ ኽይፅጝ ጄርካውዳ አንኩሊዳስታ ባይሪ ፅንታዳ እሊው ቤዴል አኽⶓ ክንትፃንቲ ጌሌፅካ:: እን ሰላሞ አቲጝ ዙራማ ሰላሞ ቼሜትጛኒ ክንትጝ ክንትፅጙ ካሰት ሲፋው አኽጝስ ቹዋ ታብል ጄርካውሳ አላሜ አቤለሻቲንታ፣ ድማጋቲንታ፣  ኺፃቲንታስታ ውላጊ ሰላምስ ዜቦ ቲሬንታ ባይሪ ፅንታው ክንትፃንቲ እንፅኼንቶ ፌያፌይጝፅካ::