ስፖርት ሰላምስስታ ልማትስ

ታደለ አጋጄ

ስፖርት ሰላሙ ግንባቲስ ዝኩኹሳ ታምቦ ሌጌፅጝስ ዜርፎ ይስጝፅጝ ቱስቴ እስትኾ።

አዊ ብሄረሰቡ ቺፅጝፂ ወታትካውስታ ስፖርቱ ሜምሪ እንጃቢሪ ዩኒቨርስቲሊ ቴቤቤርጝስ ቴርሱኑ ስፖርት ሰላምስታ ልማትስ ዝኩኹ ታምብዳ ትኩቶ ፄውኹ ኩስጚ እንጃቢሪ ኬቴምዳ ካስጛ። ኩስጚውሳ ፁፎ ዲግሱንኩ እንጃቢሪ ዩኒቨርሲቲው ስፖርት ሳይንሱ ክንትፃንቲ አማረ መብራት ሰፖርት ሰላሞ ቼሜትጝፅጝስ አኹኪ ሴፌንፅጝስ ዊዳፊው ልማቱ ግብካዋ ሳኪትጝፅጝስ ኬፍቲኒ ታምብ ዝኩኼኽ ናኒስ ጌሌፅካ።

ክልላኻዳ ፌቴርስትኹ ሰላሞ አቲጙ ችግር ወታትካ ስፖርቱ ልቕልቕቲዳስ እቺስጝስ ስፖርቱ ጝን አቕ ክቻዳ ላጛሴንት፣እምፕልትስታ ቴቤቤርጝ አንቓማጊ ይንትⶓ አቶ አማረ ዙሜካ። ኩስጚ እንጃቢሪ ኬቴምስታ ዙራሙሪዳ ዝኩኹ ሰላም ኬሽጛታ ሲፋውስኪላ ቓቓፃማ ይንቱኹሳ ስፖርቱሳ ልቕልቕቴ ሲፍፅጝስታ ሰላሞ አግጝስ እርዳታው አኸⶓኽ ጌሌፁኑ። ኩስጚዳ አግስቱንኩ አዊ ብሄረሰቡ ቺፅጝፂው ትክትሊ ቺፅጝፃንቲስታ ኬቴሙ ስሩ ልማቱ ሜምሪው አላፊ አቶ አይተነው ታዴ ኑኑውስታጊ ስፖርት አካልስ ኬሽኹ፣ ካንቲስ ክቺኹስታ ምግባር ፅንታስ ጋሺስትኹ እንቲታኪ ምክኒያቲስ አምናውሳ ክምንቶ ፌቴርጝስ አጌሩ ልግስኒስ ታምብ ኬፍቲኒ አኽⶓ ዙሜካ።

እንዴስ ድምክና ስፖርት ሰላሙ ግንባቲስ ዝኩኹሳ ታምቦ ሌጌፅጝስ ዜርፎ ይስጝፅጝ ቱስታው አኽⶓ ትክትሊ ቺፅጝፃንቲ ሼውፅካ። ብሄረሰቡ ቺፅጝፂው ወታትካውስታ ስፖርቱ ሜምሪው ዌኬልስታንቲ አላፊ ማረልኝ ሁነኛው ጛሾስ ክልልዳ ፌቴርስትኹ ሰላሞ አቲጙ ችግር ስፖርቱሳ ዜርፎ ማልጜ ጉዳኽ ንካ።

ናኪኒ ወክትስ ብሄረሰቡ ቺፅጝፂታ ውላጊ ስፖርቱ ልኺትጚ ኬውጝⶓ ጌሌፁንኩ አቶ ማርልኝ እን አኽጝ ወታትካ ጊዞ ቱስታ ጋቲው ብቲዳ ፌይፃንታ ፄዋማጊ አኽⶓ ዙሜካ።ሰላም ኬሽጙኩ ዙራሙርካዳ ስፖርቱሳ ልኺትጜ ፄውጝስ ቓቓፅኹሳ ስፖርቶ ልቕልቕፅጝስ እንፅኽካ አኮሜችስታንኩ አኽⶓ አላፊ ጌሌፅካ።

አጌር አቡቑ አችስ 4ንቲ ጊዝስ “ስፖርት ሰላምስስታ ልማትስ” ናው ቹዋ እንፅኼንትስ ኬቤርስታማጊ አግስታው አሌም አቡቑ ስፖርቱ ጌርክ ብሄረሰቡ ቺፅጝፂታ ሜጋቢት 23ዴስ 29/2016 ም.አሜቶኺስታ ሊሊትጙንኩ አኼንካስ ኬቤርስታው አኽⶓ ሜምሪዴስ አግስትኹ ንቫር ቶኬሜ።