ግርሚው እንኩላሊቲ ኪስስታይኹ አቒ ሆስፒታልዴስ ፉኻ

ዘውዴ በካሉ

ሳይንሳዋ ያኹኽ ዳድስ ኬሽጙኽስ ግርሚውሳ እንኩላሊቴ አባላምቲ ጊዝስ እይስትኹ ጛርት አቒ ሆስፒታልዴስ:: 62 አሜቱ ሹማጊሊ ማሳቹሴትስ ትክላሊ ሆስፒታልዳ ላጛ ሶኼትዴስ ፍኖ ቔድፃማ አኪምጙ እንፅኺ ያኽስታያንዴስ ፋሌንጋ ጝንሾ ዙራ::

እንዴስ ፍና ዘረመል ምንድስኒዳ አኹኪ ጄኔቲካል ሞዲፋይድ እስታውዳ ኬሽጙንኩ ግርሚኩሳ አካልኩሳ ቤንካዋ አቕስ ፄውስቱንኩ ሙኬርካ ሳኪትጛኑላስ ይጉዌካ:: ናኪኒ እንኩላሊቴ ኪስጙ ሳኪትጚ ሳይንስኩ ሊካውንትካውላዳ ታሪካዊ ፋንቲቲ እስታማ ካፅስታ::

አሜሪካ ቦስተን ኬቴምዳ አግስታው ሃርቫርድ ሜዲካሉ ክንቲ ጝና አብኖ ዲጊስ ጋዚቲው ጊሊፂዳ ታምፃ::ሆስፒታል ጊሊፂዳ አቕፁኽስታጊ ማሳቹሴትሱ  ዝኩዋንቲ ያኹኽ ሪቻርድ “ሪክ” ሰላይማን አሊዴ አቾ ታምብኹ እንኩላሊቲው ቑንዚሊ ቡንክትጛማጊ እሺኹስታ እንኩላሊቴ ኪስጝ ፋይፃው እሺኹ አኽⶓ ጌሌፃ::

ዶክተርካ ሴዛ ሳቶ ካፅኹ ቔድፃማ አኪምጝ ዘረመል ምንድስኒዳ ክችጙኽ ግርሚውሳ እንኩላሊቴ ሳኪትጙኽ ዳድስ ኪስካ::

ስላይማኑ እንኩላሊቲ ልግዲ ያኹኽ ዳድስ እንፃኽስታማጊ አኽጝስ ዲያሊሲስ አኮሜቻማጊ ጋቲውያኽ ኑስኪላ ጊሊፄ ቶኬማ::

ሆስፒታልዴስ ፊጝስታ ጝንሾ ካስⶓ ካሊጝ ይዎትዳ አይሎ ዴስፃንኩ ጊዝካዴስ እምፕል አኽⶓ ስላይማን ዙማ:: “ሚንችካ አሜትካዋ ይዎቶ ጉስⶓ ካላቲታ ቻኒስቶ ታምፅኹ ዲያሊስስዴስ ኔፃ አኽጝስ ጝን አቕሊ፣ አፄብካሊስታ እንካናኩ አቕሊ ጊዞ ፌይፅጝስ ካሊጝስ ዴስቴኒያኽ” ኑስኪላ ጌሌፃ ስላይማን::

አውሮፓው ዝቤኑ ቼፍታ 2018ዳ ይዎትስ እላቲው ጛርት አቕዴስ እንኩላሊቲ ኪስስቱኒኪላ ፌይንኩ አሜትካዳ ጄሜራማ ቑንዚ ባስጝ አቕስታ:: እን ወክትዳ እክምኒኩ ውማይቴንካ ግርሚውሳ እንኩላሊቴ ኪስጝስ አሳቦ ዲግሱኑ::

“እያ እርዳትጝስ ይቢቺ ያኻውላስ ይዎቶ ይጉፅጝስ ኪስስትጝ ቱስታኩ ሻይስ ቼፍስታንኩ አቕስ ቴስፌ እያው ጉላሊ ፄፓታ ቼፋ” ና ስላይማን::

ኪስስትኹሳ እስካዌ ግርሚውሳ እንኩላሊቴ እንጅኩፄ ካምብሪጅዳ ፄውኽ ኢጀነኒስ እስትኹ ፋርማሲዩቲካሉ ኩባንያ “ጉዳንትካ ያኹንኩ ግርሚኩሳ ዜርካዋ ድፅጝስስታ አቕሊ እምፕልታንታ አኹኪ አሌቔትጛንታ ፄውጝስ ልቓ ዘረመልካዋ ዴሜክጝስ” ኬሽጝጝፃ:: እንኩላሊቴ ኪስⶓኪላ አሜሪካዳ ምግቡስታ እጁ ቺፅጝፂ ፍካዶ እያ::

እንጅኩፄ አሜሪካዳ ፄውኽስታ ፊቲስ ቲሪትጛያሱ ዩናይትድ ኔትወርክ ፎር ኦርጋን ሼሪንግ ፍሽኹ ንባርስ 100 ሻይዴስ ጃላ አማሪካውያንካ ይዎቶ ይጉፅጝስ አካሎ ኪስጝ ፋይፄ::

አሜሪካኻዳ ጌርክቺፋ 17 አቕ አካሉ ኪስጝ /ቲኪጝ/ ማንዲስቱስ ይዎት ፌያው አኽጝ ጌሌፅስታ:: እንኩላሊቲ ዴሜካ ኪስጝ ፋይፃው አካሉ ቤኔኽ:: እንኪላ አባላምቴ ጊዞ አቒስ ኪስስትኹ ግርሚው እን ኩላሊቲ ያኹኒኪላ፤ ኪስጝ አቒስ አባላምቲ እይስትኹ ግርሚው አካል ጋቲዊያኽ::