“ወባውሳ ቑንዜ ካላከልጚው እንፅኺ አኮሜችስታማጊያኽ” አማኻሪ ክልሉ እምፕልታቑ ቲኒ ኢንስቲትዩት

ዘውዴ በካሉ

ወባውሳ አኹኪ ምንድራሺውሳ ቑንዜ ካላካልጚስ ውላ አቡቔ እንፅኼ እንፃኽስታማጊ አኽⶓ አማኻሪ ክልሉ እምፕልታቕ አቡቑ  ቲኑ ኢንስቲትት ጌለፅኾ::

አንኩሩሳ ወክቶ ሲፋማ ኬሴትስታውሳ ምንድራሺው ሚቓያውሳ  አኹኪ ወባውሳ ቑንዜ ካላካልጚው እንፅኺ እንፃኽስታማጊ አኽⶓ አማኻሪ ክልሉ እምፕልታቕ አቡቑ ቲኑ ኡንስቲትዩቱ ቹዋ ዳይሬክተር በላይ በዛብህ አቕፄካ:: ክልልዳ አንኩሩሳ ወክቶ ሲፋማ ኬሴትስታውሳ ወባውሳ ቑንዜ ካላካልጚስ ኬፍቲኒ ወባው ቑንዚ  ዝኩክ ዙራሙርካዳ ዞኑስታ ወረዳው እምፕልታቕ አቡቑ ቲኑሳ አዲጌ ካላካልጚውስታ ወባውሳ ቑንዜ ካላካልጚው ፕሮግራምዳ ውማይቴንካ ወባውሳ ቑንዜ ካንትኹስ ጐቤናንኩ አኽⶓ ዙሜካ::

ወባው ቑንዚው ምልኻት ካንትስቱክ አቕ ቲኑ ኾትሾ ካስካማ አኪምስታንታስታ እምፕልታቕ ኻጉሳ አጐበሮ ቱስቲስ ቴኬምስታንታ ክንትፄካማጊ አኽⶓኪላ ቹዋ ዳይሬክተር ጌሌፅካ::

ሊኽዴስ 90 ታፋዴስ ጃላ ያኻንኩ ወባው ቑንዚስ ፂኪስታንትካ ያኹንኩ ምራብ አማኻሪ ኩሉ ዙራሙርካ ወባው ቑንዚስ ፂኪስታንትካ አኽⶓ ቹዋ ዳይሬክተር ጌሌፅካ::

እኒጛዴስኪላ 30 ያኻንኩ ወረድካ ክልሉሳ ሊኽዴስ 65ዴስ 70 ያኻንኩ ወባው ቑንዚ ሾፌናው አኽⶓ እርዳትፅካ:: አኽጝስኪላ ትኩት እይስታማ እንፃኽስታው አኽⶓ ቶኬምካ:: ሚዲቢኒ እንፅኺዴስ ድምክና ቲኑ ቢሩ፣ እምፕልታቕ አቡቑ ቲኑ ኢንስቲትዩትስታ እርዳታንቲ አችትካ ሪፖርቶ ገመገምጝስስታ ስልታኔ እይጝስ ቑንዚ ይዝኩዌ አኹኪ ባስኹሳ ጉዳቶ ታምፃቲታ እንፃኽስስታማጊ አኽⶓኪላ ጌሌፅካ::

ክልልዳ ወባው ቑንዚውሳ ችግሮ ባስጝፃንኩ ችግርካዴስ እምፕል ኩሉ ዙራሙሪዳ እርሺዳ አሴሜርጙንኩ  ሚንችካ ጌርክኩ እንፃኽስታንትካ ቱስታውሳ ዝኩፄ ጝኖ አግፃኑላስ ይጉጝስ አኽጝ ጌሌፅስታ:: ቑንዚስ ሳሴርስ ፂኪስታንትካ አኽⶓኪላ እርዳትፅካ:: ቑንዚስ እምስቱኒዴስ ፋሌንጋ ቑንዚሊ ኩላ ዲሪኺ ዙራሙሪሾ ዙርካማ አኹኪ ይንትካማ ቑንዜ እሳንጝፃቲንታ ትኩትስ እንፃኽስትጝ ቱስታው አኽⶓ ቹዋ ዳይሬክተር ጌሌፅካ:: እጁሳ ዲግስጝጜ ሌጌፅጝስ እንፃኽስትካማጊ አኽⶓኪላ ዙሜካ::

ሚሊዮንስ ቼፍስታንኩሳ አቖ ወባው ቑንዚዴስ ኬሽፅጝስ ጝንዳ ኬሚካል አሬችስትጝ ቱስታኩ ጝንካ ጐሌልሰትካማ ጐሌልስቱንኩ ወረድካዳ አሬችጝስ እምፕልታቕ፣ ምንግስትስታ ምንግስታዋ ያኼካያስኩ አችትካ ቲቢቢርጜ ፄውጝ ቱስታው አኽⶓ ታክስፅካ:: አንኩሩ እሪ ወባው ቑንዚው ፌያፌይጝፂ ወክት አኽⶓ ጉሽንኩ አቶ በላይ ውላጊ ቲኑ ሜዋክር ይሳማ እንፃኽስትጝስ ኬሴትስታውሳ ኬፍቲኔ ወባውሳ ቑንዜ ናካዴስ ኔኬትጝ ቱስትው አኽⶓ ትኩትስ ዙሜካ:: ቑንዜ ኬፍቲኒ አኺኒስ ኔኬትጝ፣ ቑንዚስ እምስቱንኩሳ አኪምጝ፣ ወባው ምልኻት ካንትስታኒ እምቢትንካማ እክምኒሾ ካስጝስታ ወባው ሩብፂ ያኹኹሳ ብቴ ፃንኩትፅጝ እንቲታኪ ውማይቴንካዴስ ፌያፌይጛንኩ እንፅኼንትካዋ ቴግባርዳ እሽፅጝስ እምፕልታቕ ወባዋ ካላካልጛንታ እንፆኼንቶ ፌያፌይጝፅካ::

አዊ ብሄረሰቡ ቺፅጝፂ ጉዋንጉዋ ወረዳ ወይከላ ኬቤሊው ቲኑ ውማይቴና አስሬ አስፋው ወባው ቑንዚ ጊዝዳስ ጊዝሾ ዴሜካማጊ አኽⶓ ጌሌፅካ::

አንኩሩ ወክትዳ ዋሺኒኪ ወክትዴስ ጃላ ወባው ቑንዚ ዴሜክⶓ ጉሹንኩ ቲኑ ውማይቴና እምፕልታቕ ቑንዜ ካላካልጛንታ ሼውቴ ፌቴርጙሳስታ ኻጉሳ አጐበሮ ቤንጝፅⶓ እንቲታኪ ቴኬምስታንታ ሼውቴ እይⶓ ዙሜካ::

ወይከላ ኬቤሊዳ ሹኻ ጐትካ ኩላዲሪኺ አይሩ አኺኒ ዝኩኽ አኽጝስ ሚንቺትስ ወባው ብትንት ሚንቻኩ ዙራሙርካ አኽⶓኪላ ጌሌፅካ:: ወባውሳ ብትንቶ ኔኬትጝስ ዙራሙሬ ፃንኩፅጝስ አኹ ቲሬውሳ ስፍሬ ዴፌንጝስ፣ አኾ ቲሪፃውሳ አክኼ ዱንፅጝስስታ አጐበሮ ቴኬምስታንታ ፄውⶓ እንፅኺ አኮሜችስታማጊ አኽⶓ ቲኑ ውማይቴና ጌሌፅካ::

ወባው ቑንዚስ ሚንቺትስ ፂኪስታንኩ ወትትካ አኽⶓ ጉሹንኩ ቲኑ ውማይቴና ወታትካ ቤሪኺሾ ካስካማ ቑንዜ ኻስካማ ይንታንኩ አኽጝስ አኽⶓኪላ እርዳትፅካ:: ቑንዚስ እምስቱንኩ አቕስ ቲኑ ጉትፕሾ ይንትካማ እክምኔ አግፃንታ፣ ፃንኩቶ ማንዳንታስታ ኻጉሳ አጐበሮ ቱስቲስ ቴኬምስታንታ ሼውቴ ፌቴርካማጊ አኽⶓ ድኹዌካ::

እምፕልታቕ ቑንዚዴስ ካላካልጛንታ አጐበር አንኩዋ አሜታዴስ እምፕላኒ እይስትጝ ችግር አኽⶓ ጉሹንኩ ቲኑ ውማይቴና አስሬ ምንግስት ወክትስ አጐበሮ ዲግስታ፣ ጝንዳ ኬሚካል አሬችስስታታ ኬሚካሎ ዲግሳታስታ እምፕልታቕ ዙራሙሬ ፃንኩትስ ማንዳንታ እንፅኼንቶ ፌያፌይጝፅካ::