ፋዝጋው ፁም

ዘውዴ በካሉ

ይቶፒያ ኦርቶዶክስ ብሽታና ክስታንቱሳ እምኔቶ ሲፋንትካስ ላጜታ አዋጅኩሳ ፁምካዋ ዴንጌግታ:: ፁም ንጝ አቕ ድኪ ቴግበርዴስ ክብስስትካማ ድባኖ ፁም፣ ፆሌት፣ ስግዴትስስታ ምፅዋቲስ ይማኑ ንጜኽ:: ብሽታና ክንትፄውስታጊ ፁምደ አቕ እሺስ ባይካማ ንፍስስ እንፃኽስትኑ፣ ባኮ ቴግባሮ አኮሜቻኑ ወክትያኽ:: ሜፃፍ ክዱስዳ ፃፊስትኹስታስታ አይማኖትኩ ታብል ክንትፃኑውስታጊ እምፕል አቒ ክስታንቱሳ እምኔቶ ሲፋንቲ ላጜታ አዋጅኩሳ ፁምካዋ ፁሜ:: እኒጛኪላ ፋዝጋው ፁም፣ ሴኒው አኹኪ ፍልሴታው ፁም፣ ጊኒው ፁም፣ አምሊ አቦው ፁም፣ ጋዱ ፁም፣ ይሚስታ አርቡ ፁምስታ ኒውኒዋ ፁምካ ቶኬምስታና:: እኒጛ ፁምካዴስ እምፕልስታ ቹዋ አኹኪ ኽሳንቲ ፁም ያኹኽሳ ፋዝጋውሳ ፁሞ ካንትኹስ ናካስ አንቤብፅጝስ ፋኑኻ:: ናኪኒ ፋዝጋውሳ ፁሞ ካንትኹስ ቴርትኹ ቴርትዳ ሌንጌዳ ፄውንኹኪላ አዮ ጉዋጉሲ ወረዳ ቤተ ክነቱ ቹዋ ቺፅጝፃንቲ ያኹንኩ ሊካ አይላፍ ተስፋ ሚካኤል ሽታሁንሊያኽ::

ሊካ አይላፍ ተስፋ ማካኤል ሽታሁን ፁም ንጝ አበላምቲዳ ድባኑ እግስ ጄውስትጝ፣ ፁምዴስ ፍና ጌውስጙኽሊ አሬክጝጝ፣ ድኪ ፂዊዴስ ክብስስትጝስታ ባኩ ፋያሱሳ እንፅኼ አኮሜችጝ ንጝ አኽⶓ ጌሌፅና:: ፁም ፁሚስቱስ ኹዋሺዴስ፣ እሺዴስ፣ ትክላሊስ ንሴስካዴስ አግስታው ዋይሚዴስ ክብስስትጝ ንጝ ጋቲው አኽⶓ ጉሽንኩ ሊካ አይላፍ ፁምዳ አል ድኬ ካንትጝዴስ፣ ኽምቢ አኹኪ ፃጝ ድኬ ዲብስጝዴስ፣ ታፍ ድኬ እንፃኽስትጝዴስ፣ ልኩ ድኪሾ ካስጝዴስ፣ እንኩዋኺ ድኬ አንኩዋኽዴስ ክብስስትጝ ንጝ አኽⶓኪላ እርዳትፅካ::

ፋዝጋው ፁም ኽሳንቲ ፁም እስትኹ ምክንያት ድባን አምፕዴስ ጌማማ ድንግል ማርያምዴስ ካሜንስታማ አዳሞስታ ሄዋኖ ኬሽፅጝስ ፁሙኽ አኽጝስ አኽⶓ ሊካ አይላፍ ጌሌፅካ::

ድባን አቒ ይሪሶ ኬሽጝፅጝስ 33 አሜቶስታ ሹኻ አርፋሳ ብቲዳ ዙራዙራማ ክንትፃሺኹ ወክትዳ ፁሞ አቒያስ ክንትፅጝስ “ገዳመ ቆሮንጦስ” አኹኪ ዮርዳኖስ ጌዴምዳ ፁሙኹ ፁም አኽⶓኪላ ሊከ አይላፍ ተስፋ ሚካኤል ጌሌፅካ::

ፋዝጋው ፁሙኻዳ ሶኼታ ሶኼትካ ዝኩና፣ እኒጛ ሶኼትካኪላ ጛው ያኹኽ ስያሚ ዝኩኽስታ ድባን ታምሮ እንፃኽስቱክ ጌርክካ አኽⶓ ድኹዌካ:: እኒጛ ሶኼትካዋስታ ጛውሳ ኽዮ ካንትኹስ ሊከ አይላፍ ተስፋ ሚካኤሎ ካስናና  ሲፋውስታ ጌሌፃና::

አባላምቲ ሶኼት “ዘወረደ” እስቴ:: ዘወረደ ንጝኪላ አቕ ድባን ሰማያ ሰማያትዴስ ጌምኹሳ አቕ ይሪስ ኬሽፅጝስ ቻቤልኹሳ ሜካሬ ታክስጝስ ፁማና:: አባላምቲ ሶኼትዳ አቕ እንፃኽስታሺኑስ ድኬ ቴግባሮ ባይካማ ፁም፣ ፆሎት፣ ስግዴትስ ቴርታኑ ሶኼቴኽ::

ላጛንቲ ሶኼት “ምኩራብ” እስቴ::  ምኩራብ ንጝ አደራሽ ንጜኽ:: ኦሪቱ ጊዝዳ አደራሽ ንጝ ዴሜካ ብሽታኔኽ:: እን ሶኼትዳ ድባን ድኹዋሪ ግልጌልዳ ማቻማ እንዜጙስ አቕ ብሽታኖ ጌቤላ ፄውካማ ዋይጛኒስ ጄውጛኒስ አግፁኻ:: ድባንኪላ እን ብሽታን ፆሌት ጝናጉ ጌቤል ጋቲውያኽ ናማ ፆሎትስ፣ ምስጋኒስ፣ ይምስ ቴኬምስታንታ ክንትፁኽ ጌርክያኽ::

ሹኻንቲ ሶኼት “መፃጉ” እስቴ:: መፃጉ ንጝ ሚንች ጊዞ ቑንዳስታማ ኻግዳ እሺኹ አቒ ንጝያኽ:: ድባን እንሳ አቔ ካንታማ ኬሽⶓ እንጉስቴማ? ናማ ካሴኒ መፃጉ ኬሽⶓ ፍቴ እሽቱኻ ዲብኩፂ ፄቤልዳ ካፃው አቒ እላ ናኒ ድባን ጁ ኻጎ ብያኻታታ ካ ናማ ዳርኪ ፄበላ ጋቲት ካልስ ይቢቺስ መፃጐዋ ኬሽፅኹ ጌርክያኽ::

ሴዛንቲ ሶኼት “ደብረ ዘይት” እስቴ:: ደብረ ዘይት ንጝ ዋይራው ካኒ ሚንቺትስ አግስታው ስፍሪ ንጝያኽ:: እንጚ ስፍሪኪላ እየሩሳሌምዴስ ምስራክሾ 70 ሜትሮ አቺት ናማ አግስቴ::

ድባን ደብረ ዘይቱ ካንዳ እንጅኩዋኩስ ሀዋሪያትካ ድባኖ እን አሌም ወትጛይ ፌያው ንካማ ካሴኒ ሀዋሪያትካስ ምልኻቶ ድኹኽ ጌርክያኽ ደብረ ዘይት:: ናካ ብሽታናኪላ እሳጜዋ ባሎ ኬቤርፂስ ድባን ሀዋሪያትካሊ አኹኪ ጚኩ ክንታንትካሊ ታምትጛማ አሌም ፌያውሳ ምልኻቶ ክንትፅኹ ጌርክ አኽጝስ ኪሳኪሳ ንፍስኩ ጄርካሊ ታምትጛኑ ጌርክያኽ:: ንፍስ ታብላስታ ንፍስኩ ጄርካ አሜትዴስ እምፕላኒ እምፕልትስ ኩፕ ንካማ አይማኖቱሳ ክንቴ ክንትጛኑ፣  አሜቶ እንፃኽስቱኑሳ ቤዴሎ ንፍሱ ታብሊስ ድኹዌካማ ኑዛዜ አግፃኑ፣ ኪሲ ጄርካስ ፆለቶ ፄዋኑ ጌርክያኽ::

ዋልታንቲ ሶኼት “ገብር ሄር” እስቴ:: ገብር ሄር ንጝ አምንስትኹ እንፃኽስታንቲ ንጜኽ:: አምንስትኹ እንፃኽስታንቲ ኑስኪላ ድባን ሹኻ አቖ እቑዌማ እንፃኽስትካማ ፊቲሳንታ እምፕልስኪ 5 ብሮ፣ እምፕልስኪ ላጛ ብሮ፣ እምፕልስኪ እምፕሎ ብሮ እያማ እንፃኽስቲካማ ፊቲሳን ንኾ:: እኒጛ አቕኪላ አንኩዋ ብሮ ካፅኹ እንፃኽስታማ 10 ብር ፄዋማ ዙርፅኾ:: እንጜዋ አቔ ድባን አምንስቲኾ እንፃኽስታንቲ ንኾ:: ላጛ ብሮ ካፅኹኪላ ሴዛ ብር ፄዋማ ዙርፅኾ:: ድባን እንጜዋኪላ ፅሊስ አምንስቲኾ ሚንችስ ሹማኽ ንኾ:: እምፕሎ ብሮ ካፅኹ ኩፂ ብቲዳ ዴዋማ እጂፃማ እምፕላ ብራዋ ዙርፅኾ:: ድባንኪላ ሴኔፋ፣ ድኪ እንፃኽስታንቲ ንኾ:: እንሳ ሜፃፍ ክዱስ ኽይኹ አምንስትኹ አጌላጌላንቲ ንጝስ አኽⶓ ሊካ አይላፍ ጌሌፅካ::

ላጜታንቲ ሶኼት ዴሜካ “ኒኮዲሞስ” እስቴ:: ኒኮዲሞስ ንጝ አይሁድካው አላፊያኽ:: እን ኒኮዲሞስ ጌርካ ጌርካ አይሁድካሊ ጛውሳ እንፅኼ እንፃኽስቱስ፣ ጛውሳ ኩስጜ እንኩዋኹስ እሺ:: ኻራ ኻራ ዴሜካ ድባን ሀዋሪያትካዋ ክንትፁስ አብርታ ድባኑሳ ካሎ፣ ትዛዞ እንኩዋኹስ ቼ:: ድባንኪላ ኒኮዲሞስ ፄሜቕስታያሱ አኹኪ ክስታንቱሳ እምኔቶ ሲፋንቲ ጋቲው አኽጝስ ምንግስታሰማያታ ቱዋታ ፄሜቕስትጝ ፋይፃው አኽⶓ ክንትፅኹ ጌርክ አኽⶓ ሊከ አይላፍ ተስፋ ሚካኤል እርዳትፅካ:: ፋዝጋው ፁምካውሳ ሶኼቶስታ ጛውሳ ኽዮ ካንትኹስ ጌሌፁንኩ ሊከ አይላፍት ፁም ንጝ አቒ ኹጝ ዝቒዴስ ልቓ ሳቶ ክብስስትጝ ይቢቺ ጋቲው አኽⶓ ዙሜካ::

አቕ ፁማኑ ወክትዳ ምንጊዴስ ኪቻ ድባንሾ ዲግካማ ይማኑ፣ ፁማኑ፣ ሴጌዳጉ ጊዝያኽ ኑንኩ ሊከ አይላፍ ናካ ዝኩኹስ ሳላም ዙርፃማ ዊዳፊ ሴላሞ ቼሜትጝፅጝስ አቕ ሼውዴስ ድባኖ ይምጝ ቱስታው አኽⶓ ጌሌፅካ:: አቕ ፁሙ ወክትዳ እንካንጚ፣ ኪቤቢርጚ፣ እርዳትጝጚ፣ ቤዴልስትኹስ ማሪ ንጝ፣ እንቲታኪ ይሴን ታምትጚ እምፕልታቑላዳ ዝኩዋታ ሊካ አይላፍ ተስፋ ሚካኤል እንፅኼንቶ ፌያፌይጝፅካ:: ዊዳፊ ሰላሞ ቼሜትጝፅጝስኪላ ሼውዴስ እምፕልትስ ድባኖ ይማንታኪላ እንፆኼንቶ ፌያፌይጝፅካ::