ስር ልማቱ እንፅኺዳ ፅንጋኻ ያኹኽ ፄትቲው ችግር

ታደለ አጋጄ

ኬቴምካ ኬፍቲኒ አችስ እሳንጝጚሊ እምትጛማ ግንባቲውስታ ስሩ ልማቱ እንፃኽስትጝጚ ኬቴምካውሳ እሳንጝጜስታ ልግስኔ ሜቴናው አችስ ዝቤናዋ ያኻታ ፄውጝ ሚንችካ አስሜምጛኑ ጉዳዬኽ:: እን አጌራኩ ኬቴምካዳ ዝኩኹ እንግራ ይጉዊ አግልግሎቴ እይጝስታ ስሩ ልማቱ እንፃኽስትጝጚ ቴክኖሎጂስ እርዳትስታውላስ  ይጉጝዳ ኩፂ ሚንችካ ካሴ ጉሻና::

ኬቴምካዋ ሌጌፅጝዳስታ እሳንጝጚዴስ ፌይኹስ እምፕልታቕስ ዜርፋ ሚንቼ ፋዮ ዋኽትጝፅጝስ ኬቴምኩ አመራርካ፣ እምፕልታቕ ታምብዌንካ አካልካስታ እሊኩሳጊ አሴቴፍጝፅጝስ ውላጊ ኬቴሙ ስር ልማቱ እንፃኽስትጝጚዳ ጜዋንቶ ካፅጝስ ኽስኹስ ቴኬምስታንታ ያኻንታ ቲቢቢርጚስ እንፃኽስትⶓ ካሴዊያኽ::

አማኻሪ ክልልዳ አግስታንኩ ኬቴምካዳ አግልግሎቴ እይጜ ኬሽጝፅጝስ፣ ኬቴሙ ልግስኒስታ ስር ልማቱ እንፃኽስትጝጚ ኬሽጝጛታ እንቲታኪ ኬቴምካ ልኺትጛንትካስታ ዝኩዋንትካስ አሜቹንኩ ያኻታ እንፃኽስትጝዳ ክልሉ ምንግስት ዳብዜ እንኩራማ እንፅኺሾ ቱዋ:: ያኼስጉ ኬቴምካ ልኺትጛንትካስታ እምፕልታቕስ አሜቹንኩ ያኻንታ ፄውጝስ ኩፂ ክልልዳ ሰላም ሴፌንጝ ፋይፄ::

አማኻሪ ክልልዳ ፌቴርስትኹ ሰላሙ ችግር እዝቡሳ ካሴ ዙርፅጝስስታ ኬቴምካው ስር ልማቱ እንፃኽስትጚ 2016 ም.አ ክልልታ ዜሬቕቲኒ ፊፂምጜ ካንትፅⶓ አማኻሪ ክልሉ ኬቴምካው ስር ልማቱ ቢሩ ፍሽኹ ንባር ቶኬሜ::

አዊ ብሄረሰቡ ቺፅጝፂ እንጃቢሪ ኬቴም  ፌቴርስትኹ ሰላሙስታ ፄትቲው ችግርስ ኬቴሙሳ ስር ልማቱሳ ካሴ ዙርፅጝስ ፅንጋኻ አኽⶓ አውጚው ቴሌቪዥንሊ እጂጜ ፄውንኩ ኬቴምኩ ዝኩዋንትካ ዙሜካ:: አቶ ትላሁን ሞላ እንጃቢሪ ኬቴሙ ዝኩዋንትካኽ:: “እንጃቢሪ ኬቴምዳ እንፃኽስትጝስ ቱስታው ሚንች ልማት ዝኮ:: ዲች ባይ ግቢስታው፣ ዳድ ፄሬግስታው፣ ኮብልስቶን ግቢስታው እኒጛጊ ውላ ኬቴምስ ፋይፃንኩ እሺና:: ያኼስጉ ወክታዊ ሰላሙስታ ፄትቲው ችግሩ ምክንያቲስ ግቢስታያላ” ናኒስ ዙሜካ:: ኬቴምዳ ስሩ ልማት ዋኽትጛታ ኬቴምኩ ዝኩዋንትካ ኬቴሙ ቺፅጝፂስ ካቢትጝፄካማ ካሴ ጉሻሺንኩ አኽⶓ ቶኬሙንኩ አቶ ትላሁን ክልልዳ ሰላሙስታ ፄትቲው ችግር ስር ልማት እክዱ ስሬትስ ግቢስታቲታ ፅንጋኻ አኽⶓ ዙሜካ::

አምቢ ማርያምዴስ ኬቴሞኺስታ እምፕልታቑ ቴሳትፍስ ፄፄሩ ዳድ ግቢስትጝ ጄሜርስትⶓስታ ባጄቱ እንፂት እንቲታኪ ፄትቲው ችግርስ ጄሜርስቱንኩጊ ቲሬንታ ፄውስትⶓ ዲብስካ::

እሊው እንጃቢሪ ኬቴሙ ዝኩዋንቲ ያኹንኩ አቶ ጌታቸው ታደሰ ኬቴሙ ስሩ ልማቱ ግቢስትጝዳ ክልልታ ፌቴርስትኹ ችግር ኬፍቲኒ ቻኒስቶ ታምፅⶓ ድኹዌካ:: “እን ችግር አቕ ፌካማ ቱዋቲንታ፣ እሊው ኬቴምሾ እንዜጝትጜካማ እንፃኽስታቲንታስታ አክኽካዋ እሊውዴስ ስፍሪዴስ ይንታቲንታ ዳዱ ልምትጝ ኽሳንቲ ችግር ፌቴርⶓ ዙሜካ::

አቶ ጌታቸው ኬቴሙ ቺፅጝፂዳ እንዴስ ቤዴራ ግቢስቱንኩ ስር ልማትካ ፃንኩቱ ዳንጉዊኒስ ፌሬሳማ ትክሞ እይጝዴስ ሴጋ አኽⶓ ቶኬምካማ እንዴስ ቤዴራ ጄሜርስቱንኩ ልማትካጊ ቲሪⶓ ዙሜካ::

“አቕ እንዜጛኑ ዳድዳ አሻዌስታ ካርⶓ ክብፅጝስ ዝኩዋንትካ እንዜጛኑሳ ዳዶ አቲⶓ ቶኬምካማ ኬቴምኩ አመራርካ እንሳ ክችክቺስ ቼፍጝጝ ቱስታው አኽⶓ እርዳትፅካ:: ሴፍቲኔትስ አቺትጜካማ ፃማ ክብፂ እሺኹሳ ብቴ ሊሚፁኒውላ ሊሙኽ ብቲዳ እምፕልታቕ ፃሜ ክብፅካማጊ አኽⶓ ዲብስካ:: እምፕልታቕስ አሜችኹ ስሩ ልማት ግቢስትጝ ፋይፄ” ናኒስ ካንቴ ታምፅካ::

“ኬቴምዳ ዳንጉኽ ሚንች ዲብ ዝኮ:: ውላጊ እርዳትጝጝና እንፃኽስትኑኒ ኬቴማ ሌጌስቴ:: ጄሜርስትኹ ዊድስታማ ጄሜርስታያሱ ዴሜካ እምቢታማ እንፅኺ ጄሜርጝ ዝኮ” ናኒስ ዙሜካ::

ክልልታ ፌቴርስትኹሳ ሰላሙሳ ችግሮ ምክኒያታ ፄውጝስ ግብር ኩፒጝዳ ችግር ዝኩⶓ ቶኬሙንኩ አቶ ጌታቸው ግብር ወክትስ ኬይስታውላ ይጉኒጊ ስርኩ ልማትካስ ያኻው በጄት እንፃው አኽጝስ ቱስታው ዳድስ ግብር ኩፒጝ ፋይፃው አኽⶓ ዲብስካ::

“ብሄረሰቡ ቺፅጝፂታ ኬቴሙ ስሩ ልማቱ ሜምሪ 2016 በጀት አሜትዳ ኬቴምኩ ዝኩዋንትካስ ስሩ ልማቱሳ ፋዮ ዋኽትጝፅጝስ እንቲታኪ ኬቴምካስ ሜቴናውሳ ስሩ ልማቶ አኮሜችጝስ እሳኖ እክዶ እሜሺኹ ያኹኒውላ ሰላሙ ችግሩ ምክንያቲስ ቴግባርሾ ቱስታያ” ኑንኩ ዴሜካ ብሄረሰቡ ቺፅጝፂው ትክትሊ ቺፅጝፃንቲስታ ኬቴምካው ስሩ ልማቱ ሜምሪው አላፊ አቶ አይተነው ታዴኽ::

ፍታዊስታ ታምብስታንታ ዝኩኹሳ ስሩሳ ልማቶ እንፃኽስትጝስ፣ ኬቴምካው አግልግሎቴ እይጝጜ ዝቤናዋ ፄውጝስስታ ኬሽጝፅጝስ እንቲታኪ ዝቤናዊ ያኹኽ ኬቴሙ ብቲው ቺፅጝፂውሳ ሴሎ ቴግባርዳ እሽፅጝስ እክድ እሺⶓ ቶኬሙንኩ አቶ አይነው ኬቴሙ ስሩ ልማቱ ሜምሪ እንሳ እክዶ ሳኪትጝፅጝስ እንፅኺሾ ቱስቱኒውላ ፄትቲው ችግርስ ኬውጝⶓ ዙሜካ::

ኬቴምካው ስሩ ልማቱሳ ዲግስጝጜ ካንታውስ 2016 በጄት አሜትዳ አሌሙ ባንኩ እርዳቲስ አኮሜችስታው ልማቱ እንፅኺስታ ሚዲቢኒ በጄትስ እንቲታኪ እምፕልታቖ ቴሳትፍስ ኬቴሙ ስሩ ልማት እሺኹ ያኼስጉ ናሲ አርፊዴስ ጄሜራማ ፌቴርስትኹ ሰላሙስታ ፄትቲው ችግሩ ምከኒያቲስ ኬቴሙሳ ስሩ ልማቱሳ ፋዮ ዋኽትጝፅጝስ ካሊስታያላ ንካ::

ብሄረሰቡ ቺፅጝፂታኪላ ሴዛ ኬቴሙ ቺፅጝፅካዳስት ሴዛ ወረድካዳ አግስታንኩ ማዘጋጂ ጝንካዳ ዋኽስ ዋኾ አግልግሎቴ እይጝስ ካሊስታያሱ አኽⶓ ቶኬምካማ ሰላሞ አቲጝ ኬቴምካው ስርኩ ልማትካው ልቕልቕቲዳ ይቢቺ ያኺትየስ ኾትካው ውላቱዊ ልቕልቕቲዳጊ ኬፍቲኔ ቻኒስቶ ፌቴርኹ አኽⶓ ዙሜካ:: አኽጝስኪላ እዝብ ካሴውሳ ስሩ ልማቱሳ ፋዩ ዋኽትጝፅጝስ ካሊናያላ ንካ::

እንጃቢሪ ኬቴሙ ቺፅጝፂው ከንቲባ አቶ በውከቱ መኩሪያ ጛሾስ ሰላሙስታ ፄትቲው ችግርስ ኬቴሙ ቺፅጝፂዳ ሚፂ ኩፓያሱ አኽጝስ ምንግስትኩ እንፃኽስታንትካስ ደሞወዜ ኬይጝስ ቺጊርፂ አኺኒዳ አኽⶓ ቶኬምካ::ፋይስታውሳ ሚፂ ኩፕፅናውላ ይጉጝ ዴሜካ ስርኩ ልማትካ ግቢስታቲታ ፄውኽ አኽⶓ ዙሜካ::

“ልማትስኪ ያኻ እሊው እንፅኺስ ያኻው በጀቱ እንፂት ካንትስታ:: ኬቴምዳ እንዳርማኪ ስሩ ልማቱ እንፅኺ ጄሜርስታያ:: ሴፍቲኔትስ 01 ኬቤሊዳ ግቢስትኹ ድኻ ድኽስ ጝን ዝኮ:: አምቢ ማርያምዴስ ኬቴሞኺስታ እምፕልታቑ ቴሳትፍስ ግቢስትኹ ፄፄሩ ዳድ ጄሜርስታ” ናኒስ ኬቴምዳ ዝኩኽሳ ልቕልቕቴ ጌሌፅካ::

“ፄትቲውሳ ሜዋክሮ አቺትጝፅጝስ ኬቴሞ ማንዲፅናናጊ አግስትኔ ኑንኩ አቶ በወከቱ ፄትቲው ሜዋክርስ ፋይፃውሳ ዲቦጊ ዋኽትጝፅጝስ ልማትስ እሽፅናው ጌንዜብ እላኽ” ንካ::

ሰላም ሴፌኑኒዴስ ፋሌንጋ ዋሺኒኪ ልማቶ

እንፃኽስትጝ ካሊስታው አኽጝስ ናካዳ ኩፂ ሰላሞ ሴፌንፅጝስ ሊሊትጙኽሳ ፅሬቶ ፄውናናጊ አግስትኔ ንካ::

ሰላሞ ሴፌናማ ጄሜርስትኹ ልማት ሲፍታ እምፕልታቕ ፋያና:: ልማትዴስ ቤዴራ ኩፂ ውላጊ ቲቢቢርጜ ፋያው ጉዳይ ሰላሙስታ ፄትቲው ጉዳዬኽ:: ሴላም ይንቱኒዴስ  ዋሺኒኪ እንፅኺ አኮሜችጝ ካሊስታዊያኽ::

እምፕልታቕ ካሴኑ ልማቱ እንፅኺስ ዙርሜ እይጝስ ሰላሞ ሴፌንጝ አኽጝስ ውላጊ ሴላምስ ዜቦ ቲሪጝ ቢዲሪዳ እይስታው ጉዳዬኽ: