ታደለ አጋጄ
ቤዴራሱ ጊዝዳ አትሌቲክሱ ዜርፍስ ይቶፒያንካው ይሴን ዊፅጙ ሼው ፅንታ ሚንችካ ስፖርቴንካ አትሌቲክሱ ዜርፍዳ አሴቴፍጛንታ ፄዋ። ሻለካ ሃይሌ ገብረ ስላሴ፣ከነኒሳ በከለ፣ ትሩነሽ ዲባባስታ እሊኩ አትሌትካ ልኺትጚ ቺፋ ካንትፃኑ ኬፍ ንኹ ዊፅጙ ፋይ ጋሺፃው አኽⶓ ዜርፍኩ ውማይቴንካስ ካቢትጝጛማ ጁዌ። እኒጛ ይቶፒያንካ ጄግንካ አትሌትካ ይስኹ ዊፅጙ ፋይስታ ሼው ፅንታ ዝኩክ አኽጝስ ጛጂሱሳ ካሌቕቶ ልኺትጚዳ ቴኬምስትጝስ ቼጌርስትካያ።
ስፖርቱ ዜርፍስ ዋይሚስታ አኽጝስ ሴሌቴንፃንትካውስታ ሴሌቴናትካው ዊፅጙ ፋይ ማልጛ ፋይፃንቲያኽ። ይሴን ዊፅጙ ሼው ፅንታ ስፖርቴንካስታ ውማይቴንካ ማይቤራዊ ታምትጜ ኬሽጝፅጝስ፣ ጛርቱስታ ኬቹ እንፅኺስ ዋይሚስታ ያኻንታ ኬፍቲኒ ፍሺ ዝኩኽያኽ። መክዳላ አምባ ዩንቨርሲቲዳ ስፖርት ሳይንሱ ክንትፃንቲ ሰለሞን አሳዬ ይሴን ዊፅጙ ሼው ፅንታ ንጝ ስፖርቴንካ ሴሌፍስቱኑ አላሚስ ዝኩኽ ፃሪትጚ፣ ኩርፄንትስታ ኬያኑ ሜሳዋቲስ ጌሌፅስታዊያኽ ንካ። ይሴን ዊፅጙ ሼው ፅንታ ውላ ስፖርትኩ አይኔትካስጊ ኽሳንቲ ዊፅጙ ስርኩኒ አኹኪ ሜሳሪ ያኹኒውላ እን አጌራዳ ኩፂ ሼውቴ ፌቴርጙ ችግርስ ትኩት እይስታያ ንካ።
ዊፅጝ ዋይሚስ ይቢቺስ ያኻውላስ ሚንች ዲብስ ጌሌፅስታዊያኽ ኑንኩ ክንትፃንቲ አሳዬ ስፖርቴንካው ካሌቕትስታ ኬችካ እንዜጛኑ ዳድስጊ ጌሌፅስቴ ንካ። ይሴን ዊፅጙ ሼው ፅንታው ጁፂ ጛርቱ ጁትጚስታ ፃሪትጚ አኽⶓ ቶኬሙንኩ ውማይቲኒ ምሳሊታ ፖርቹጋል አጌሩ ክርስቲያኖ ሮናልዶዳ ዝኩኽ ዊፅጙ ሼው ፅንታ ስፖርቴንካስ ምሳላ አኽጝስ ካሌ ንካ። ቤዴራሱ ጉድ ታሪክ እሊው ይሴን ዊፅጙ ሼው ፅንታው ጁፂ አኽስ እን አጌራው አትሌቲክሱ ዜርፍዳ ምሩፅ ይፍተር፣ ሻላካ ሃይሌ ገብረ ስላሴ፣ ከነኒሳ በከለ፣መሰረት ደፋር፣ ትሩነሽ ዲባባስታ አልማዝ አያናዋ ፄጌርጛንኩ አትሌትካ ዝቤን ሻራቲውሳ ታሪኮ እንፃኽስቱኑ ኽሳንትካውሳ ጌሬምፃውሳ ጌድሎ ካንትጝስ አኽⶓ ዙማኒስ ካንትስቴ ንካ። ጝን አቑ ልግስኒ፣ ኬቹ አፄብ፣ ዴጌፋንትካስታ ኬችኩ ጉሳንትካ ይሴን ዊፅጙ ሼው ፅንታው ጁፂ አኽⶓ ጌሌፅካ። ይሴን ዊፅጙ ሼው ፅንታ ስፖርቴንካው ማይቤራዊ አኺኒሊ ታምትጚ ዝኩኹ አኽⶓ ቶኬምካማ ስፖርቴንካሊ ዝኩንኩ አቕ፣ጄርካ፣ ሴሌቴንፃንትካሊስታ ኬችኩ አፄብካሊ ዝኩኽ ማይቤራዊ ታምትጚስ ዊፅጙ ፋይሊ ታምትጚ ዝኩኽያኽ ንካ። ስፖርቴንካ፣ ክሌብካስታ ብሄራዊ ኬች ካቢትጝጚስ ዋይሜ ሜዜጌብፃኑላ ይጉዋኒ ፤አኹኪ ታክሱኑ ክችክቺስ ሳኪትጛውላ ይጉዋኒ ይሴን ዊፅጙ ሼው ፅንታ ኔኬትጝስ ካላው አኽⶓ ጉሹንኩ ስፖርቱ ውማይቲኒ ጛርቱ አችስ ችግር ኬሴትስታኒ፣ ኬችዳ ዝኩኽ እምፕልቱ ሜንፌስ አሬቤሽስታኒ፣ ወክታዊ አኺኒ ዜሬቕቲኒ ያኻኒ፣ ቲቺጝስታ ማይቤራዊ ሚዲያው ቴኬምስትጝጚ ይሴን ዊፅጙ ሼው ፅንታሳ ዜሬቕፃንኩ አኽⶓ እርዳትፅካ። ዳሞዚስስታ ትክምስ ዴሴቴንካ ያኻኑላ ይጉጝ፣ ሴሌቴንፃንካ ስፖርቴንካዋ እሜኑ ዳድ ጉድ ያኻውላ ይጉጝ፣ ስፖርቴንካ ዴስጝጚዴስ ፍናስታ ፋሌንጋ ዝኩኽሳ እንኩዋኽስቶ ቼፍጝጛኑላ ይጉጝ ዋፅጙ ፋይ ኔኬታታ ምክኒያታ ያኼ። ዊፅጙሳ ሼው ፅንታ ሲፍፅጝስ ጉዶ ታክስጝጜ ይስጝፅጝ ፋይፄ።
ክንትፃንቲ ሰለሞኑ ጊሊፂታ ክሌብካ አኹኪ ብሄራዊ ኬችካ ቤዴራሱሳ ስሞስታ ታሪኮ ሲፍፅጝስ ካሊፃው አኺኒዳ አግስታኑላ ይጉጝ ዊፅጙሳ ፋዮ ማልጛ ኔኬቴ። ይሴን ዊፅጙ ፋይ ሌጌሳታ ስፖርቱ ሼው ፅንታ ስፖርቴንካስታ ውማይቴንካውሳ ፅኹሮስታ ታክስጝጜ ፂኒሳው አኽጝስ ሼው ፅንታስ ክቼንታ እርዳቴ። ስፖርቴንካው እሼኑስታ ዴንብስስታ ቴርትስ ጉስስታንታ ፄውጝ ፋይፄ። ሴሌቴንፃንትካ ኬች ዋሺኒኪ ችግርዳ እቱኒውላ ሴሌቴንፃንትካስ ፌያፌይጝፃኑ እንፅኼንት ቴስፌ እያው አኽጝ ቱስቴ ናኒስ አቶ ሰለሞን ኩስጝፃና። ዊፅጙ ሼው ፅንታሳ ሌጌፅጝስ ናቕትዳ እንዳማይ ዝኮ? ውማይቴንካሳ አጂይ? እንዳራይ እንፃኽስታኑ? ዋትጜይ እንፃኽስታኑ ናንኩሳ ካስካ ኻልትስ ማራማርጝ ፋይፄ ንካ ዜርፉ ውማይቲኒ::