ፊቲ እስቲት ንፍሳ

ዘውዴ በካሉ

እስራኤል አይሩ ፅካትስ ክቱት ቹዋው ማይፄናኻዴስ ስራ አኹኪ ጄራ ይዎትስ ፍያ::

ጋዛ ራፋ ኬቴምዳ እስራኤል ታምፂኹ አይሩ ፅካትስ ጜራሊስታ ኹና ጄራሊ ይዎቶ አቲት ቹዋው ማይፄንዴስ ጄር ይዎትስ አግስትⶓ ፍልስቴሙ ቲኑ  ውማይቴንካ  ዲብስⶓ ሮይታርስ ዜጌባ ኑስ አላ አይንዴስ አግስትኹ ንባር ቶኬሜ::

አይሩ ፅካትስ ክቱት ቹዋ ክርጝዴስ ፍና አይሩ ፅካትስ ትክላሊስ 19 አቕ አይሩ ፅካትስ ይዎቶ አቴካ:: ውታድርካዋ ካን ዩኒስዴስ ፍሽፂት እስራኤል ራፋዋ ትያውሳ ጌርኮ ዋሴንታ:: ስልታን ዌንካ ጌሌፁኑስታጊላጛ ጝንካዳ ታምብኹ አይሩ ፅካት እምፕል ጝን አቕ አባልካ ያኹንኩ 13 ጄርካ ይዎቶ አታንታ ፄዋ::

1 ትኩሚ 4 ኪሎ ግራሞ ሚንዛንታትስታ ሲ- ሴክሽንስ ይዎቶ አቲት ቹዋው ማይፄንዴስ ይዎትስ አግስቲት ስራው አኺኒ ኬሽጛማጊ አኽⶓ ሲፍጝጜ ፄዋንኩ ዶክተር ሞሀመድ ሰላማ ዲብⶓ አል አይን ዜጌባ::

ስራ እሊኩ ስራስሪሊ ራፋዳ አግስታው ሆስፒታልዳ ኢንኩቤተር አኹኪ እንኩዊንቶ እያው ማሽናኻዳ እጂቴታ ያኽስትጝ ጌሌፅስታ:: አይሩ ፅካትስ ይዎቶ አቲት ክራንታ ሳብሪን ሰካኒስ ኹና ጄራ ማሊክ ስካዋ ሴናዋ ሮህ ኔታ ስሞ ፍሽⶓ እንጉስቴሽቲኾ፤ ሮህ ንጝ ሜንፌስ ንጝ ጜጋ ራሚ አል-ሼክ ጌሌፅካ:: ዶክተር ሰላማ ኑኑውስታጊ ስራ ሹኻዴስ ሴዛ ሶኼትካዋ ሆስፒታልዳ እጂቴት አኽⶓ ጌሌፅካ::

ጄራ ይዎትስ ካሚንስቲኒኪላ ቹዋ ታብሊ እላቲት አኽጝኪላ ጌሌፅስታ:: ፍልስቴማዊያንካው ቲኑ ስልታን ዌንካ  አብደል አልኩ ጝን አቕ ዝኩዋኑ ላጛንቲ ጝንዳ ፌፄምስትኹ ፅካትስ 13 ስራስሪ  ይዎቶ አቴካ::

ትክምቲ ላጜታውሳ ሃማሱሳ ፅካቶ ሲፋማ እስራኤል ጋዛዳ ታምፄታጊ አግስቴው ይሴን ብቲውስታ አይር ፅካትስ 32 ሻይዴስ ጃላ ፍልስቴማውያንካ ክርⶓ ጋዛው ቲኑ ስልታንዌንካ ዙሜካ::