ኢንዱስትርካውሳ ችግሮ ኽይጝስ አሜሬትጝሾ ካይጝጛንታ ፄውስትኾ

አይሸሽም አባተ

አማኻሪ ክልል “ይቶፒያ አሚሪቲስ” ልቕልቕቲዳ 312 ኢንዱስትርካውሳ ችግሮ ኽይጝስ አሜሬትጙ ቴግባርሾ ካይጝጛንታ ፄውስትጝ ጌሌፅስትኾ::

አማኻሪ ክልልዳ “ይቶፒያ አሚሪቲስ” ልቕልቕቲዳ 312 አብትዌን ኢንዱስትርካዋውሳ ችግሮ አቺትጝኹ ዳድስ ኽይጝስ አሜሬትጙ ቴግባርሾ ካይጝጛንታ ፄውⶓ ክልሉ ቺፅጝፂ ጛራ አረጋ ከበደ አቕፁና::

አቶ አረጋ ከበደ ይቶፒያው አብኑ አግልግሎቲስ እይኑ ጊሊፂዳ “ይቶፒያ አሚሪቲስ” ልቕልቕቲ ሊሚፃንትካ አብትዌንስታ ምንግስቱ ኾትካ ክቻዳ ዝኩኽሳ አቺትጙኽሳ እንፃኽስትጜ ይስጝፅጝስ ዋይሚ ሜዜጌብስታታ ካሊፃ:: እንጚስኪላ 2015 ም.አሜትዴስ ጄሜራማ አኮሜችስትኹ እንፃኽስትጚስ 312 ኢንዱስትረካዋ እንፅኺው ካስትዳ ጌቴማሺኹሳ ችግሮ ኽይጝስ ካሊⶓ ዙሜካ::

ኢንዱስትርካውሳ ችግሮ ኽይጝስ አሜሬትጝሾ ካይጝጛንታ ፄውⶓ ዙሙንኩ ቺፅጝፂ  ጛራ እንስኪላ ባርኾቼዴስ ቱዋንኩሳ ምርትካዋ ቲኪጝስ ባርኾቼውሳ ምንዛሬ ሌጌፅጝ ኬፍ ንኹሳ ታምቦ ፊትጝጜ ጌሌፅካ:: ኢንዱስትርካ አሜሬትጝሾ ካይጝጙኑ ብቲዴስ፣ ጉሺዴስስታ ስሩ ልማትካሊ እምትጙንኩ ካስካዋ “ይቶፒያ አሚሪቲስ” ልቕልቕቲስ ኽይጝስ ኽሳንቴ እርምጄ ካፅጝስ አኽⶓ ጌሌፅካ::

አሜሬትጝሾ ካይጝጙንኩ ኢንዱስትርካኪላ 82 ሻይ 300 ዴስ ጃላ እንፅኻ ፋይካ ወጌንካስ ቲሬንቲስ እንፅኺውሳ እድሎ ብስጝስ ካሊⶓ እርዳትፅካ:: “ይቶፒያ አሚሪቲሱ” ልቐልቐቲ ክልልዳ ጌቴምኹ ፍትሬቱስታ አቓ ግብሪ ችግር ፌቴርኹ ጉዳትዴስ እምቢት ናማ ፊጝስስ እዝቡሳ ቴኬምስታንቶ ቼሜትጝፅጝስ እርዳትኹ ዋይሚ ሜዜጌብስታታ ካሊፅⶓ ቺፅጝፂ ጛራ ቼሜትጝፄካ::

ክልልካዳ አግስትኹሳ ዋይሜ ይስጝፃማ ሲፍፅጝስ 2016 ም/አሜትዴስ ጄሜራማ ሲፍጝጙንኩ ሹኻ አሜትካኻዳ ቴግባራዋ ያኻው ክቻክቺው እክድ ቴርታማ እንፅኺሾ ቱⶓ አቕፄካ:: ጌቴማንኩ ችግርካዋ ሺሻማ ኽይጝ እሊኩ ቹዋ ቹዋ እንፅካዴስ ሴጋ ያኹኽ ዳድስ አቺትጜ ፊቴርጝስ አቒውሳ አይሎ ሜዴብጝስ እንፃኽስትጚዳ አግስታውስታ ኽይትጝፄካ::

ትክላሊስ ክልልዳ ግብርኒስ፣ ማእድንስ፣ ቱሪዝምስስታ እሊኩ ይኮኖሚው ዜርፍካስ ኽሳንቲ ፄጊ ዝኩⶓ ቶኬሙንኩ አቶ አረጋ፣ ክልሉሳ ፄጌ ሊሚፅጝስ ይኮኖሚውሳ ልግስኔ አሬኽፅጝስ እዝቡሳ ቴኬምስታንቶ ቼሜትጝፅጝ ቱስቴ ንካ:: ቺፅጝፂ ጛራሱ ጊሊፂታ አሜሬታንትካ ኢንዱስትርካዋ እንፅኺሾ ሚፅጝስ ክልልዳ ይሴኖስታ አሬኹኽሳ ይኮኖሚያዌ ልግስኔ ሜዜጌብፅጝስ 10 አሜታሱ ፍኖተ ካርቲ ኬሬፅስታማ ቴግባራዋ ያኻማጊ አኽⶓ ጌሌፅካ::

እምንኹ አሜትዳ 28 ኢንዱስትርካዋውሳ ዙራሙሬ 3 ሻይ 200 ሄክታርዴስ ጃላ ብቴ ጐሌልጝስ እንቲታኪ ስሩሳ ልማትካዋ ዋኽትጝጛንታ ፄውጝስ “ይቶፒያ አሜሪቲሱሳ” ልቕልቕቴ ይስጝፅጝስ ካሊፃንኩ ቴግባርካ አኮሜችስትⶓ ዙሜካ::

ክልሉ ምንግስት ኢንዱስትሪው ዙራሙርካዳ ስሩሳ ልማትካዋ ዋኽትጛንታ ፄዋማጊ አኽⶓ ቶኬሙንኩ ቺፅጝፂ ጛራ አብትዌና ሼዶ ግቢቴካማስታ ማሽኖ ቴኬልካማ እምቢትንካማ አሜሬትጝሾ ካይጝጛንታ ካሊፄ ንካ::