“እንቹ፣ እንታሊ፣ እኖጂሶይ ካሜኑን?”

ናካ ጛሬ ጌጌርስናናስታ ኩሪናና እንዜጝናታ ካሊፅኹ አይጛ ጄግንካ እንቹ እንታሊ ቡንክትጜካማ እንኬ ጌቤርካማ፣ ብሬ ክብፅካማ፣ ጛፆ ኻሻኻሽስትካማ እንፃኽስቱኑ ጌድሊያኽ:: ባሮ ካያ ይንታማ ዎሬርኹሳ፣ ፉቼ /ታሊያኖ/ እንግልብስካማ፣ አርኔቶ ማንዲትሳ አጌራዋ እን ክምንትስ አሬኬብፁን፣ ታምባሲያኽ:: እሊኩ አፍሪካኩ እዝብካዳ ታምብኹ ቤዴልጊ ታምባውላስ ኔፃ አኽናና ኔፃ ብቴ አሬኬብስትና::

እን ይቢቺ  ያኻውላስ እሊኩ አጌርካጊ አርኔቶ አግፃንታ እን አግራ ቡንክትጝታ:: አኽጝስኪላ አፍሪካ ዲባዳ ኬፍኔታ እቑስትጝስ ቢኬ:: እሊውሾስ ኩፅኒ ውላዴስጊ ኩክራ አኽናና ድኽትስ አቕስትንኹዋ አጌርካ ክቻዴስ አባላምቲዳ አቕስታንትካ አኽና:: ብቲኪ አኹኪ ግርብኪ ዝኩዋስኩስ ኬሻ ካንትስትጝዴስኪቻ ይማንትካ አኽናና ሴሜራ ጋቲንኻ አኽና:: እንቹ እንታሊ ካንፅፁኑውሳ ይሴንቶ ድኽቶ ዊፃማ ካንፅፅጝሰ ቲቢቢርጜ ባናና እኑስ እኖ ቕንቺስጝኑስ እንግርትዳ እንግርቶ፣ ድኽትዳ ድኽቶ ዝባትዳ ዝባትቶ ዴሜሜክናናጊስታ አሌምስ እኹኽፃ አኽናናጊያኽ:: ታፍስ ታፎ እምትጝናና ድኽትዳ ዜሜችጝታ ድኽጚዳኽ አግስትናው::

እንቹ እንታሊ ሴብትጛኒስ አርኔቶ ማንዲፅጝስ ቢኩኑው ካያ ይንትኹ አዲጊ ፅላትሊ ጉራርስ ጉራሮ /ታራጃዋ/ እምትጙኑው አርቴን ናንቲ ንጉስ አጌራው ባይካማ ቡካ ካሱኑውዳ ዝራፌስታ ዳዲኼ ይጉፃንቲ አይኪ እላቲውዳ ጉምዳኽ:: አን ያኻማኪላ ናካስታ ቴክኖሎጂ ዲጊዳ እላቲውዳ ይስካ አሬስካማ ኬምፕስ ኬምፖ ምርቶ አሜርትካማጊያኽ:: ፅላቶ ፍሽፅጝስ ቢኩኑው:: እኖጂሱ ክምንትስ እን ክምንት ድርብርቤ አላፍቶ ቡዋማ አሸራዊያኽ:: ላኹኪ ፅላትካ ኽታዊኒታ ኩቲስ ኩታ ውራሬ ባይካማ እኑስ እኑ ድጙትጝናታ ሞፄዱኑውሳ ሙፅዶ ታንኩታንኩፃማ ዝኩዊጙሳ:: ላጛንቲኪ ቼፍ ሚንቻማጊ ይንትኹሳ እዝቦ እሳንስ እንፅኼ ፌቴራታ ፄውጝስ ምርኪዴስ ፋማ አሌም አቡቕ አቻስ ኬሻንትካ አጌርካውሳ አቾ ታምብትስ አጌራዋ ግቢትጙሳ::

እኒ አላፍትካዋ ሳኪትጝፅጝስ ዴሜካ አሬኬዛማ ዙሚትጝጝ ሲፍፃማኪ ሼውዴስ አምኽጛማ እምፕልታ ጁጝ ፋይፄ:: እንሳ ፄዋኒያኽ “ታብሊያ ጄር” እስትጝስ ካላው:: አጌራዋ ማንዳማ ክምንትስ ቻቤልፅጝስ ካላው ድኽትዳ ማቔችንስ “ውንስ እንቹ እነታሊ እኖጂሳይ ካሜኑን?” እናና ማቔችንስ::