ፋዝጋው ባል

ዘውዴ በካሉ

ክስታንቱሳ እምኔቶ ሲፋንትካ ኢየሱስ ክርስቶስ አቒያሳ ኬሽፃኻ ናማ ጌሬፍስታማ፣ ሴኬልስታማ፣ ክራማ ሜካብርዴስ ጁኽሳ ጌርኮ ኬቤርፅጝስ ላጛ አርፋሳ ፁሜካማ ፋዝጋውሳ ባሎ ኬቤርፅጝስ እንጉስ ማንዳና:: ፋዝጋው ባል ኬቤርስቱስ ድባን አቒያስ እሺኹሳ ውለቴ፤ አዳሞስታ ሄዋኖ ኬሽፅጝስ ቱኽሳ ካልኪዳኖስታ ቻቤልኹሳ ሜኬሬ ታክስጝ ፋይፄ::

ኪቢርስቲንኻ ቺርቤዋ ጋዚቴ አንቤብታንኻስታ ሲፍጝታንኻ ውላጊ ፊይኹ እትሜትዳ ፋዝጋውሳ ፁሞስታ ሶኼትካውሳ ስሞ እንቲታኪ ጛውሳ ኽዮስታ  ድባን እንፃኽስቱክሳ እንፅኽካዋ ካንትኹስ አንቤባንትካስ ታምፅና:: ናካ ዴሜካ አንቤብፅጝስ ፋናው ሆሳዕናዴስ ፋዝጋዋኺስታ ዝኩኽሳ ታሪኮ ጌሌፃንታ ሌንጌዳ ፄውንኽኪላ ሊካ አይላፍ ተስፋ ሚካኤል ሽታሁን አዮ ጉዋጉሲ ወረዳ ቤተ ክነቱ ቹዋ ቺፅጝፃንቴኽ::

ሊካ አይላፍ ተስፋ ሚካኤል ሽታሁን ሆሳዕና ንጝ እንዳርማጚ? ማማቲው ኽይስታ ፋዝጋውሳ ባሎ ኬቤርፅጝስ ይቶፒያ ኦርቶዶክስ ብሽታናስታ እምፕልታቑላዳ ዋትጛይ ኬቤርስታው? ናውሳ ካንትኹስ:: ባሉሳ ኽዮስታ ታሪኮኪላ ሲፋውስታ ጌሌፃና::

ሆሳዕና ንጝ ግዙ ኮንኪ ያኹስ እጁ ንጝያኽ:: ክዱስ ያሬድኪላ “ሆሳዕና በአርያም” ሰማይዴስ አኹኪ አምፕዴስ ይንቱኽ እጁ ናማ አሜሴጌና:: ሆሳዕና  ድባን ደብረዘይት ኬቴሞ ታምብጝዴስ ፍና ቤተ ፋጌዳ ያኻማ ድኹዋራ ግልጌላዋ አቒ ማቻያስትሳ  ኻታዋን ናማ ድኹዋራ ግልጌላዳ ማቻማ እየሩሳሌማ ካስኾ::

ቢታኒያው ካርጝ፣ ስራስሪስታ ሹማጌል ውላጊ ድባንዴስ ቲንቱት ዳዊትቲ ምንግስታ ቲንቱኻ ንካማጊ ድባኖ ሜሴጌንፁና:: አንኩቲውሳ ኻፄ ፣ ቼርኮ ቤፅካማ ድባኖ ቻቤሉና:: ድባን አቒ ማቻያስትሳ ድኹዋራ ግልጌላዋ ኻታዋን  ንኹኪላ እንዴስ ፍና እሽቲያስትሳ ወንጌልትስ  እጋዋ አቒያስ እያው አኽⶓ ጌሌፅጝስ አኽⶓኪላ ሊከ አይላፍ ጌሌፅካ:: ድባኖ አሜሴጌንፅጝስ አንኩቲውሳ ኻፄ ወታኻኒ ጐሌሉኑ ናውሳ ካሴ ካንትኹስ ሊከ አእላፍ ኽይትጝፄካ::

አንኩቲው ኻፂ ካንቲስ ዴስፃው ሜልክ ዝኩኽ፣ ኬውጝስ አኹኪ ክችስ ኮቺጝስ ፋኑኒ ኬውስታቲው ይሴን አኽጝስ፣ ጋያኪ ቲሬ ፓኽኔጃጊ ክችስ ኬውስታቲው አኽጝስ፣ ዙራዙርፅኑኒ ዙራዙሪው ለስላሲ አኽጝስ እንቲታኪ ኬፓኻ ኑኒ ሴባው አኽጝኽ ድባንኪላ ኦሪቱ እግ ሻሪስታማ ወንጌሉ ላስላሲ እግ ይንቱኻ  ንጝስ ጋያኪ ድባኑሳ እጐ ፍሬስፅኑኒጊ አንኩቲዴስ ኪቻ ሴባው አኽⶓ ጌሌፁስ አኽⶓ ሊከ አይላፍ እርዳትፅካ::

ሆሳዕናታዋ አንኩቲውሳ ኻፄ ጊቢቴካማ ታፍዳ ሚፃኑኪላ ድባኑሳ እጐ ሻሪናላ ፌሬስፅናላ ታፍዳ ቲባኒታ ሚትንኹ አንኩቲ ምስክሪያኽ ናኒስ አኽⶓኪላ ጌሌፅካ:: ሆሳዕናታዋ ድባን ድኹዋሪዳ ማቹኽ ናኪስትኹስ ኬቤርፅጝስ፣ ዜርቕ ንኹስ ኬፍፅጝስያኽ:: ይቶፒያ ኦርቶዶክስ ብሽታና ሆሳዕናታዋ ሲፋው ሶኼትዳ ይዎቶ ፌያው አኹኪ ክሪው አቒስ ፆሌቶ ፄዋኒስ፣ አይማኖቱ ታብሊ ንፋስኩ ጄርካሊ ታምትጜካማ ባሬካማ ሶኼታኻዳ ምንጊዴስኪቻ ሴጌዳንታ፣ ፁማንታስታ ፆሌታንታ ክንትፃና:: ማማታኻዳ አቒ ክራኒ ፍታት ኽይስታላ አኹኪ ፆሌት አኽስታላ:: ጄር ካሜንስታማ 40 ጝርጂ ጌርኮ ኹን 80 ጌርኮ ዋኹኒ ማማታኻዳ ፄሜቕጝ ካሊስታላ:: ፋዝጋታዋ ፄሜቕፃና:: እንጚኪላ ያኽስታው ማማቲ ድባን አቒያስ ናማ ቑንዳስታው ሜካሬ ቻቤላው ሶኼት አኽጝስያኽ ናኒስ ሊከ አይላፍ ጌሌፅካ::

አድጉዊስ ሆሳዕናውሳ ባሎ ኬቤርፁኒዴስ ማቺስ ጄሜራማ ማማቲ ላኹ ኔ:: ህማማት ንጝ ግዝስ ያኹስ ቑንዚ ንጝያኽ:: ህመማት ናውሳ አዋኾዳ ማማቲ ንካማ  ቱዋው ኮንኪስ ቴኬምስታና:: ማማታኻዳ ድባን ቑንዳስትኹ አኽጝስያኽ:: እንጚ ሶኼትዳኪላ አይሁድካ ድባን ቑንዳስትኹሳ ኬሽፁስ፣ ላጛ አሲስታ አንኩዋ አንኪስ አንኩዋ ጌቤልዴስ ጃላ ያኻውሳ አቔ ሜጌቡሳ ካንትካማ ድባኖ ጛጂዴስ ኽሳታቲ ፋይና:: አይሁድካኪላ አድጉዌ ሻራማ ቑንዳስቲኔ ኬሽፁኹ ንካማ ኬሴሱና::

ማቺስ ድባኖ ዋታ ፄውካማ እሜኑ አኽⶓ ኩስጙና:: ኩስጚዳኪላ ውሳኔ አግፃኑላስ ፕን ኑና:: ውፍቺስ አኹኪ ሳፊቲስኪላ ኩፔካማ ኩስጛኒስ እሺካማ እሚጝስ አሜቻላ ናኒ ፕን ኑና:: ይሚስኪላ ኩፕ ኑና:: ይሚስ ኩፂ ድባኖ ጛጂስ ፌይፃማ እያውሳ አቔ አግፁና:: እንጚ ድባኖ ፌይፃማ እያው አቒኪላ ኦሪቱ ዝቤንዳ ነብይ ይንታኒ እሊኩ አቕ ጁዌካማ ቻቤላኒስ እንጅኩዋማ ይጉኽሳ አቔ ነብይ ክዴስ ካሜንስታው ጄር ድባኖኪ ዋዬ፣ ኮዋኪ ኩዌ፣ ቹዋዋኪ ዴፌሬ ናማ ኻኼርኹ አቒዴስ ካማንስትኹ ይሁዳ እስታውያኽ::

እን ኻኺሪስ ካሜንስትኹ ይሁዳ 12 ድባንኩ ክንታንትካዴስ እምፕልያኽ:: መክደላዊት ማሪያም ድባንስ ሽቶ ታጋታ ልኩዳ፣ ታፍዳ፣ ጛሪዳ ውላዳ አካላትዳ ስንኪስ ይሁዳ ካንትኹዋ:: እን ሽቱ ድባን ሳንክታውዴስ ዋይስቱኒ 30 ብር ይው ታምብ ጋማ ናማ ታክስኾ:: ነብይ ዲብስኹ ትንቢት ይጉዋላ ይሁዳኪላ 30 ብሮ አግፅጝስ ኑስ ድባኖ 30 ብርስ አይሁድካስ ዋይጝስ አስሜምጙኻ:: ይሁዳኪላ ድባኖ ፌይፃማ አይሁድካስ እይጝስ ዮሃንስ ወልደ ነጐድጐዋድ ሜልክስ ድባኖ ፄጌራው አኽጝስ ዮሃንሶ እሜቲንታ ድባኖ ኩፅጛማ አይሁድካስ ካንትፃው አኽⶓ ድኹኻ::

ይሚስ እንስታ አስሜምጜካማ ኬውጙና:: ጃናይስ ድባን ክንታንትካዋ ኩፕፃማ ይሁዳ ጜዋ ወይጝስ አስሜምጜ ማላማ እንቶጂዴስ እምፕል ቻ እያዋ አይሁድካስ ፌይፃማ እያው ዝኮ ንኾ:: ውላጊ እንቶጂ እን ቻቤላውሳ ሜካሬስታ እንግልቶ ካንቲካማ ካዴና ንኾ::

ውላ አንካ ካታላ ኑና:: ፔትሮስ ዴሜካ ውላ ካዳኒ እን ኩዋ ካታላ ንኾ:: ድባን ኩፂ ሼዎ ማራማራማ ማላው አኽጝስ ፔትሮስ ጋያውላ እንት ዱሪ ኩዋያውላስ ሹኺኒ ካዲ ንኾ:: ጃናይስ ክማኒ ድባን ኦሪቶ ሻራማ ወንጌሎ ሹማማ ሃወሪያትካስ እይጝስ ክንታንትካስ ቱሼ ዱንፃማ ቻ ይዴስ ኬውስታው እሺ እኔኽ፤ ወይኖ ዱዋማ ቻ ይዴስ ክቤው ብሬኽ ናማ እይኾ:: እንጚኪላ ስጋወ ዳሙ  ምስሌኽ ኑስያኽ::  ናካ አቕ ጃናይስ ዴሬካ ቱሺ ንካማ ቱሼ ቱሻኑኪላ እንጚዴስ ይንቱኼኽ:: ጃናይስ ብሽታንዳ አይማኖትኩ ታብል ኽሳንቲ እንፃንቴ ልኮ ቑፃኑ ባኮ ክንትፅጝስያኽ:: ድባንኪላ ሃወሪያትካውሳ ልኮ ቑፅኹ እንጜዋ ክንትፅጝስያኽ::

አርብ፡- ስክለቱ ባሌኽ:: ኢየሱስ ክርስቶስ አቒያሳ ኬሽፅጝስ ጌሬፍስቱኹ ሴኬልስትኹ ጌርክያኽ:: ድባኖ አይሁድካ ጃናይስ ክማኒ እሚካማ አርብስ ሹኻ ሳታስኺስታ ቼርክ ቔድቔድናማ እሺ ዊድስታማ ጛፅ ካንትስትምባ ጌሬፍና:: ሄሮድስዴስ ፒላቶስሾ፣ ፒላቶስዴስ ሃናሾ፣ ሃናዴስ ካያፋሾ ዙራዙርፅካማጊ ሚስኪሌ ቡፅካማ እታ ጁስ ጃኚስ ፍርዶ እይፃና:: ዳኝካዴስኪላ ፒላቶስ ድባንዴስ ዳራኪ ቤዴሎ አግፃያላ ናማ ፍርዶ እይኾ::

አይሁድካ ኩፂ ድባን ሴኬልስታታ ፋዩና:: አይሁድካው ዴስስ ፋዝጋታዋ እንፂዊ ጝናዴስ ባይፃንኩ አቕ እሺና:: በርባን እስታው ወንጂሊኒ ሚንች ቤዴሎ እንፃኽስቱኹ አቒ እንፂዊ ጝናዳ እሺኹ አኽጝስ በርባን ባይስትስ ድባን እንፄውስትስ ንካማ አይሁድካ ፌሬዱና:: አርብስ ዋልቲ ሳታስ ድባኖ ሚስኪሊዳ ማቺፁና:: አንኩዋ ችንካርስ አኹኪ ሚስማርስ ሚስኪሊሊ እምፕልስካማ ታሱና:: እኒጛ አንኩዋ ችንካርካኪላ ሳዶር፣ አላዶር፣ ዳናት፣ ሮዳስስታአደራ፣  እስታና:: ድባን ሚስኪሊዳ ማቻኒ አዋ ድባኑሳ አካላቶ ካንትፃላ ኔታ ልኻኽትኾ:: አርፋኪላ አዋ ልልኽታኒ ብሬ ሴትኾ:: ቤዋ ብቲሾ ጌምትኾ:: እን ጊዛይ ልኻኽ ያኹኻ:: አርብስ ሲስቲ ሳታስ ድባኖ ሚስኪሊዴስ ጌምፃኒ ጌርክ ያኹኻ:: አዋ ብራኖ ይትኾ:: አርብስ 11 ሳታስ  ዮሴፍስታ ኒኮዲሞስ ድባኑሳ አካላቶ ውታኺዳ ዝጉናላ ንካማ ስካዊ ሜካብርዳ ዴውና::

አረብስ ክማኒ ዙራሙሪዳ ሌጌሳታምብካ ዘንቖሮ ዝንጉርጉርስካማ ሙሬ ሙሻና:: ዘንቖሩ ዝንጉርጉርትኹ ድባኑ አካላት ጌሬፍስታኒ እሺ ዊድስታማ ጛፅ ካንትስታኒ ዝንጉርጉርትኹሳ   ታክስጝስ አኽⶓኽ ሊከ አይላፍ ተስፋ ሚካአል እርዳትፁኑ:: አጐላጐሌ ንካማ ጅማኑኪላ ድባን ሀወሪያትካስ ስጋወ ዳሞ እዩስ “ለእጋሌ” ንጝ ቒማንፂስ ንኹሳ እጋሌ እጋሌ ንኹሳ አጐላጐሌ ኑኑ አኽⶓኽ ጌሌፁኑ::

ድባን አርብስ እሺስታ ንፋስ አግሌልጙኒዴስ ንፋሳ ሲኦላ ቲያታ ሲኦልዳ ዝኩንኩሳ ንፍስካዋ ገነትሾ ሚፅኹ ጌርክያኽ::

ክዳሚስ፡- ክዳማ ስኡር አኹኪ ክዳማ ሹር እስቴ:: ክዳማ ሹር ንጝኪላ ሻሪስትኹ ክዳማ ንጝያኽ:: ሻሪስትኹ ክዳሚ አስትኹኪላ ድባን ፍትሬትካዋ ፊቴርⶓ ጄሜርኹ አድጉዊስ ያኻማ ክዳሚስ እንፅኺዴስ ፉሩኽ ጌርክ እስታማ ክዳሚ ባል እሺኾ:: ድባን አቒያሳ ኬሽፅጝስ ሴኬልስታማ ሹኻ ኻሬ ሹኻ ጌርኮ ሜካብርዳ እጄማ ጁኽ አድጉዊ አኽጝስ አቒያስ ኬሽፅኹ፤ አድጉዊ ጌርክ ክብሩ ጌርክያኽ ክዳሜ ሻራታ አድጉዌ ሹሙኻ ኑስ ክዳማ ሹር እስታ:: ክዳሚስ ስግላ አይማኖትኩ ታብል ኪታሜ እምፕልታቕስ ቤናኒስ ድባን አቒያሳ ኬሽፅጝስ ይንቱኹ አኽጝ ማሊስትኾ ሳይታን አቒያሳ ድፅጝስ ይንትኹ አኽጝ ጌሌፅስትኾ እንኩዋን ዴስፁናስ  ንካማ ቤናና:: ኬታሚው ኽይኪላ ኬታሚ ሴጐ ካንትናኒ ፃርኪ አኽ ዴሜካ ፍቼኽ:: ሳሴርስ ፓኽ ናው፣ አሬ፣ ጐርፎ ካላው አኽጝስ ድባንኪላ አቒያስ ናማ ሜካሬ ቻቤልኹ አምንኹስ እጁ አኽⶓ ጌሌፅጝስያኽ::

አድጉዊስ፡- ፋዝጋ አኹኪ ትንሳኤ እስቴ:: ትንሳኤ ንጝ ጁጝ ንጝያኽ:: ፋዝጋውሳ ባሎ ኬቤርፅናውኪላ ድባን ሜካብርዴስ ጁⶓ ዴስቴ ጌሌፅጝስያኽ:: ድባን አርብስ 11 ሳታስ ዴውስታማ አድጉዊስ ኻራ ዋልቲ ሳታስ ጁኻ:: አድጉዊስ ኬቤርፅናው ዴስቴኽ:: ሊከ አይላፍ ተስፋ ሚካኤል ሽታሁን ሆሳዕናዴስ ትንሳኤዋኺስታ ዝኩኽሳ ታሪኮ እሳንስ ጌሌፅካ:: ፋዝጋውሳ ባሎ ኬቤርፅኑስ ዴሜካ ናኪኒ ሰላሙ አኺኒስ ጝንዴስ ፌኔኬልጜካማ ውታኺዳ ዝኩንኩ ወጌንካሊ አክማ ጋቲንኩሊ እምፕልትስ ኬቤርናታኪላ እንፅኼንቶ ፌያፌይጝፅካ::