ፌኔኬልጛንትካው ሴንቲ

ታደለ አጋጄ

ሰላም እምፕልታቕ አይምሩሳ ፉሬ አግፄካማ ጋቻዴስ ፣ጅፍንትዴስ፣ ሲኪኪኒዴስስታ ባፃባፅስትጝዴስ እቺጝስ  እንካንስ እምፕልትስ፣ ቲቢቢርጚስስታ አስሚምጚስ ዝኩጝስ ካሊፃው ዳድያኽ::

ሰላም እምፕልታ ዝኩዋንኩ ማቤርአቕ ክቻዳ ቱትጜ አቲጝ ፌቴርስታኒ ታክስጝጚስ፣ እርዳትጝጚስ፣ኩስጝጝስታ ኬቤቤርጚስ እምፕልዳ ዝኩጝስ ችግሮ ኩስጝጜካማ ኽይጙ አችዳ ታምብጝያኽ::

እንፃኽስታማ ኹጝስ፣ ካሜናማ ሌጌፅጝስ ዜራማ አሜሬትጝስ፣ ፋማ ቱጝስ አቒያ እሌት ቺፋ አኮሜቻኩሳ ቴግባርካዋ ፌፄምጝስ ፊኹናው አየርዴስ እንፃቲው ዋይሚ ዝኩኽያኽ:: ቻስ አኬድጝስ ካሊስታውኪላ ሰላም ዝኩዋኒያኽ::

አኽጝስኪ ሰላም ፖላቲካው፣ ኢኮኖሚውስታ ማይቤራዊው ዝኩዊኒዴስ ፌይኹስ አቕ አቕሊ፣ ፍትሬትሊስታ ዙራሙሪሊ ዝኩኽሳ ታምትጜ ይስጝፅጝስ ሰላም ውላ አቡቕ ኽይ ዝኩኽ ንጝያኽ:: ትክላሊስ ሰላማ ጋቲታ ዝኩጝ ካሊስታላኽ::

ሰላም እላቲውዳ አጌርዳ አችቱ ሜብት ኬቤርስታላ:: አቕቱ ሜብት ኬቤርስትጝስ ሰላሙ ዝኩጝ ፋይፃንቲ ጉዳዬኽ:: አቕቱ ሜብት ኬቤርስትጝ ሰላም ሴፌናታ ኬፍቲኒ ፍሺ ዝኩኽያኽ:: እንሱ አኺኒስ እጉ ሴግቴንት ኬቤርስትጝ ውላ ዲቦ እጉ ስሬትስ ፌፄምጝሊ ታምትጙኽያኽ::

እጉ ሴግቴንት ኬቤርስታታ ዎንጄሌንካ እግስ ካሲስትጝ ዝኮ:: ፍት ዳንጉዋኒ፣ እጉ ሴግቴንት ክቼውላ ይጉዋኒ ፍት ድሴ፤ ሰላሙ ችግር ኬሴትስቴ:: እምፕልታቑዳስታ ምንግስቱ ክችዳ ዝኩኽ ታምትጚ ኔኬቴ:: ሰላም ዝኩዋኒ ኩፂ እምፕልታቕ ሰላምስ ዝኩዊኔ ጉሳና::

ሰላም እላቲው ዙራሙሪዳ ልማቱሳ እንፅኽካ እንፃኽስትጝስ ታክስስታላ:: ሰላሙ ድስጝ ሲፍፃው ድፄጃ ልማቶ ጋቲዊያኽ:: ሰላምስታ ልማት እላቲው አጌርዳ ዲሞክራሴ ታክስጝስ ካሊስታላ:: ሰላም እላቲው ስፍሪዳ ልቓ አቑ ትክምዴስ ይጎ አግስታው ፊቲ እላኽ::

ያኼስጉ እን አጌራ ይቶፒያዳ ዲጊ ጊዝዴስ ናቴ ብሄርስ፣ ኮንኪስ፣ አይማኖትስስታ ፖላቲካው ሊሊትትስ ፌቴርስታማጊ አግስታው ጋቻስ ሚንችካ እምፕልታቕዳ ቼፍስታማ ዊዲስታቲውሳ ቤዴሎ ታምፃ::

ጋያኪ አማኻሪ ክልልዳ ፌይኹ አምሊ አርፊዳ ጄሜራማ ካስጙኽ ሴብትጚስ ሜሳሬ ዶንጌትካማ ልቕልቓንኩ አይልካ ጎሌልጛቲንኩሳ ላጛ ሴንካ ኮንኪስ፣ ብሄረሰብ፣ አይማኖትስስታ ፖላቲካው ሊሊትትስ እምፕልታቖ ኩጝ፣ አብቶስታ ንብሬቶ ሌግስ ድጙፅጝ፣ እምፕልታቕ እሺኑ ዙራሙሪዴስ ፌኔኬልጝፅጝስ ሚንቾ ጉዳቶ ታምፅካ::

ናካ አማኻሪ ክልልዳ ካስጛማጊ ዝኩኹ ጋቻ ላጛርጛ እምፕላንቲ  ዝቤን ቤናስ ሜቴናቲው ምክኒያታ ጋቲው፤ አብቶስታ ንበሬቶ ድፅጝዴስ  ይጎ ዋሺኒስኪ ሊኪፂስ ሊኪስታቲው ኽይ እላቲው ድፂው ቴግባርያኽ::

አዊ ብሄረሰቡ ቺፅጝፂዳ አግስታንኩ ሊሊትጙንኩ ወረድካዳ ፅንፌንካ አይልካ ታምፁኑ ችግርስ ሚንችካ ዙራሙርካዴስ እምፕልታቕ ፌኔኬልጛንታ ፄዋ:: አብቶስታ ንብሬቶ ዜሬፍካ:: ኬቴሞ ሌግስ ዎዴምፅካ::

ፅንፌንካ አይልካ እሳንስ ልቕልቕናንኩ ወረድካዴስኪላ አዮ ጉዋጉሲ ወረዳ እምፕሊያኽ:: አዮ ጉዋጉሲ ወረዳ አምቢሊ ኬቤሊኩ ዝኩዋንትካ ፅንፊኒ ኬች ታምፅኹ ችግርስ ባስኹ አኺኒዳ አግሰታንኩ አኽⶓ ዙሜካ::

እንዴስ ቤዴራ አምቢሊዳ ፅንፊኒ አይሉሳ ፅካቶ ካላካልጛኒስ እጂⶓ ቶኬሙንኩ ዝኩዋንትካ ይዝኩዊ ሜሳሪስ እምፕልታቕዳ ብሱኑ ሴብትጚስ እምፕልታቖ አክምዴስ ጃላ ያኻማ እሊው ዙራሙሪሾ ፌኔኬልጝⶓ ድኹዌካ::

አክም ዝኩክ እምፕልታቕ እንጃቢሪሾ፣ ቻግኒሾስታ እሊኩ ኬቴምካሾ ካስⶓ ቶኬሙንኩ ፌኔኬልጛንትካ  አክም እላቲንኩ እምፕልታቕ ኩፂ ናቔኑሳ አቴካማ ካዌን ካዌናዳ ናቒካማ አግስታንኩ አኽⶓ ሴንቲ ላሌቕኹ እንኮኽስትስ ሜሬርፅካማ ድኹዌካ:: እምፕልታቕ ምርኪስስታ ቑንዚስ ቤዴልስትⶓ ዲብስካ::

“አምቢሊ ናካዳ አቒ እሺያሱሳ ስፍሬ ፄጌሬ፣ ፅንፌንካ አቺትጜካማጊ ይንትጝስ እሊው ኬቤሊዳ ኪላ ችግሮ ታምፅጝስ ልቕልቕንካማጊያኽ ኑንኩ ፌኔኬልጛንትካ አጌሩ ካላካልጚውሳ ሴራዊቲ ስፍሪዳ ሜዴብጝስ እሽንኹሾ ዙርናታ ፄዋይስ” ናኒሰ ካሲካ:: ፌኔኬልጛንትካ ናቔኑ ዝኩፂ ጝን እላቲው አኽጝስ ናቔኑሳ ጝኖስታ እክምኒውሳ እርዳቴ ፋያና:: አምቢሊ ኬቴምዴስ ፌኔኬልጙንኩ እምፕልታቕ ሌማዳስታ ቻጂዳ ዝኩዋንኩ አኽⶓ ቶኬምካማ ፅንፌንካ አይልካ ጛጂ ዝኩኑሳ ዙራሙሬ ይንታና ናው ስጋት ዝኩⶓ ድኹዌካ::

ፌኔኬልጛንትካስ ታምብኹ እንዳርማኪ እርዳቲ እላቲው አኽⶓ ዙሙንኩ ፌኔኬልጛንትካ ምንግስት ምግቡሳስታ ዝኩፂ ጝኑሳ እርዳቴ ፄዋያታ ካሲካ::

ፌኔኬልጙኑ ዙራሙሪዴስ እምፕልታቕ ምርኪትጝሊ እምትጛማ ሊሊትጙንኩ ቑንዝካስ እምስትካማ ችግራኻዳ አግስታንኩ አኽጝ ቶኬምካማ እንጃቢሪዴስ አዚኒ-አምቢሌ ኺስታ ዝኩኽ ዳድ ልምታማ ቑንዳስቴንካዋ እክምኒ ጝና ታምፅጝስ ካሊስታያሱ አኽⶓ ድኹዌካ::

ጋቻ ፌቴርስትኹ ጊዝዳ አጌር ሹማጌልካስታ አይማኖትኩ ታብል እንቲታኪ ምሁራንካ አኽጝስ አሬክጝፁኒ  እርክ ፂናውላ ይጉጝስ እንታኮው ችግርዳ ታምባታ ፄውⶓ ዲብስካ::

አዮ ጉዋጉሲ ወረዳው ቹዋ ቺፅጝፃንቲ አቶ ገበየሁ በሪሁን ክልልታ ፌቴርስትኹ ፄትቲው ችግሮ ሲፋማ አዩ ጉዋጉሲ ወረዳዳ ፅንፊኒ አይል ታምፅኹ ፅካትስ ሰላማዊ እዝብዳ ቻኒስቶ ታምፅⶓ ዲብሳካ:: እምፕልታቕ እሺኑ ዙራሙሪዴስ ፌኔኬልጜካ:: አብቶስታ ንብሬቶ ዜሬፍካ:: ጝኖ ሌግስ ድጙስታታ ፄዌካ ንካ::

አምቢሊ፣ ጐሪ፣ ኩፓርስታ ኢናባሪ ኬቤልካዴስ ፌኔኬልጙንኩ እምፕልታቖ እሺኑ ስፍሪዴስ ፌኔኬልጜካማ ሊሊትጙንኩ ዙራሙርካዳ አግስታንኩ እኽⶓ ዲብስካ::

ምንግስት ፌኔኬልጙንኩሳ እምፕልታቕ እሺኑ ዙራሙሪሾ ዙራንታ ፄውጝስ ፅሬቶ ፄዋማጊያኽ ኑንኩ ቹዋ ቺፅጝፃንቲ እሺኑ ዙራሙሪዳ ዋኽስ ዋኾ ስላም ሴፌናያሱ አኽጝስ እምፕልታቖ እሺኑ ዙራሙሪሾ ዙርፅጝስ ካሊስታያ ንካ:: ኩፓር ኬቤሊኩ እሺኑ ዘራሙሪሾ  ዙርካማጊያኽ ንካ:: ዊዳፊ ሴላም ቼሜትጛማ እሺኑ ስፍሪሾ ቱዋንታ ፄውጝስ ሊሊትጙንኩ እንፅኽካ እንፃኽስትናናጊያኽ ኑኑ::

ክልሉ ምንግስትዴስ እርዳቴ ካስናና 560 ኩንታል ያኻውሳ ምግቦ አግፅⶓ ዙሙንኩ አቶ ገበየሁ ወረዳዴስ ኩፑኹ 750 ከንታልዴስ ጃላ ሹምቤስታ እቲኔ ፌኔኬልጛንትካስ ታምፅⶓ ጌሌፅካ:: ያኼስጉ ፌኔኬልጛንትካስ ዳላው ጋቲዊያኽ ኑኑ::

አዮ ጉዋጉሲ ወረዳዴስ ፌኔኬልጙንኩ እምፕልታቕስ ያኻውሳ እርዳቴ ኩፕፅጝስ ውላ ይቶፒያንካ እርዳቴ ፄዋንታ እቑዌ ፌያፌይጝፅካ ቹዋ ቺፅጝፃንቲ::

ሌማ ኬቴምዳ ሻራ ግቢቴካማ ፌኔኬልጛንትካ ቱዋንታ ዝኩፄ ግቢትኑኒውላ ፌኔኬልጙንኩ ቱጝስ ኩፂ ካሌካያ ንካ::

አምቢሊዳ ጝን ሌግስ ድጙስቱንኩ እምፕልታቕስ ሻራስ ዝኩፄ ግቢትጝስ ካኔ ኩፕፅናናጊያኽ ንካ:: ሊሊትጙንኩ ስፍርካዴስ ፍንጅስትኹ ፅንፊኒ አይል ቤሬኺስ ልቕልቓንኩ አኽጝስ እምፕልታቕዳ ጉዳቶ ታምፅጝ  ናካዳ አጌሩ ካላካልጜው ሴራዊቴ ሚኒሻስታ ፖሊስ ፅንፌንካዋ ድፅጝስ እንፃኽስትካማጊ አኽⶓ ዙሜካ::

ልጄስ

እምፕልታቕ ፌኔኬልጙኑዴስ እሺኑ ዙራሙሪሾ ዙርካማ አቺትጜካማ ጛጛርትጛሳ ማንዲጝስስታ እርዳቴ ታምፅጝስ እሺኑ ስፍሪሾ ቱጝ ቱስቴ ንካ::

አጌሩ  ካላካልጛው ሴራዊቲ፣ ሚኒሻ ፖሊስስታ እንቲታኪ ዚጋሚ ወረዳው እዝብሊ እምፕልትስ ሰላሞ ሴፌንፅጙሳ እንፅኼ እንፃኽስስታንኩ አኽⶓ ቶኬምካ::