ዘውዴ በካሉ
12 ንቲ ቤኑ ብሄራዊ ፍታኒ ዩንቨርስቲዳ አይስትⶓ ጄሜሩኒዴስ አሜትካዋ ቼፍፃ:: ክንቲውሳ ፃንኩቶ ማንዲፅጝስስታ ቻ አጌሮ አሬኬብስታውሳ ክምንቶ አፌርጝስ ብሄራዊ ፍታኒ ዩኒቨርስቲዳ እይስትጝ ፍይፃው አኽⶓ ክንቲው ሚንስቴር አቕፃ:: ክንታንትካ ጛው አክምስ ፍታኔ እንፃኽስታንታ ፍታኒው ችምብትጚ ዝኮቲታ ዩኒቨርስቲዳ ፌቴንስትጝ ፍታኔ እንፃኽስታው ክንታንቲስ ድሎ ብሴ:: ሊሊትጙንኩ ክንቲ ጝናዴስ ይንታንኩ ክንታንትካሊ እምፕልታ ፌቴንስትጝ ዴሶኪላ ኪስጛንታ ፄዌ::
2016 ም.አሜትዳኪላ 12ንቲ ቤኑ ብሄራዊ ፍታኒ አኹኪ ዩኒቨርስታ ሚፅፂ ፍታኒው ቤዴራ ቴርት ፄውስታማጊያኽ:: ክንታንትካኪላ ፍታኒስ ፄውጝ ቱስታውሳ ቤዴራ ቴርቶ ፄዋኑ ጊዚያኽ:: ናካስ አንቤብፅጝስ ፋኑኽኪላ አዊ ብሄረሰቡ ቺፅጝፂ ጉዋንጉዊ ወረዳ ፂሪጊ ትክላሊ ላጛንቲ አች ክንቲ ጝናዳ ብሄራዌ ፍታኔ ፌቴንስትጝስ ዝኩኽሳ ቤዴራ ቴርቶ ካንትኹስ አውጚው ቴርት ቤናሊ ፄውኑሳ እጂጜኽ::
ፂሪጊ ላጛንቲ አች ክንቲ ጝናዳ 12ንቲ ቤኑ ፍትሬቱ ሳይንሱ ክንታንቲ ደርበው አይችሉም ዩኒቨርስታ ሚፅፄ አኹኪ ብሄራዊ ፍታኔ ፌቴንስትጝስ ቤዴራ ቴርቶ ፄዋማጊ አኽⶓ ድኹዋ:: ፂሪጊ ክንቲ ጝናታጊ 12ንቲ ቤኑ ክንቲ አሌድስታማጊ አኽⶓ ጉሹኹ ክንታንቲ 12ንቲ ቤኑ ሜፃፍዴስ ድምክና ሴስታዴስ 12ዋኺስ ዝኩንኩሳ ፍታኔ ፌቴንስታንኩሳ ሜፃፍካዋ ካቤካማጊ አኽⶓ ዙማ::
ክንትፃንትካኪላ ክንትፂ ሜፃፍ ፋንቲቲ አሌድስታኒ ክንትፁኒዴስ ካሴ ቴርስትካማ ክንታንትካስ እይካማጊ ኽስትስ ፍታኒስ ቴርታንታ ፄውካማጊ አኽⶓ ክንታንቲ ደርበው ዙማ:: 12ንቲ ብሄራዊ ፍታኒ እይስታው ዩኒቨርስቲዳ አኽጝስ ክርፄ ዋይሜ ሜዜጌብፃታ፣ ሳቶ ቱስቲስ ቴኬምስታማ ፂኒሳታ ቹዋ ታብል እንፂኺው ቻኒሲስት ዝኩዋቲታ ዶርሞ ክራይጛማ ክንታንታ ፄውⶓ ክንታንቲ ጌሌፃ::
አጌርታ ናማኪ አማኻሪ ክልልዳ ፌትርስትኹ ስላሙ አኺኒ ክንቲዳ ትኩቶ ፄውካማ ፂኒስቲንታ ፅንጋኻ አኽⶓ ክንታንቲ ደርበው ዙማ:: ሰላሙ አኺኒ ክንቲዳ ፅንጋኻ ያኹኒኪላ አላሜ ሳኪትጝፅጝስ ካላው አክምስ ቴርታማጊ አኽⶓኪላ ዲብሳ:: ክንቲው ፍኖታ ካርቲ ኪስስትጝሊ እምትጛማ ሜፃፍ ክንቲ ጝናዳ እላቲው አኽጝስ ፍታኒስ ቴርትጝስ እሊው ቻኒስት አኽⶓኽ ክንታንቲ ድኹዋ::
ክንትፃንትካ Soft Copy (ሶፍት ኮፒስ) ይንቱኹሳ ታቾ አኹኪ Smart Phone /ሞባይል ዝኩክስኪ ስልኪስ ሶፍት ኮፔ እንፃኽጝስ ሞባይል እላቲኩስ ዴሜካ ኮፒ ፄውካማ ላይብራሪዳ እንኩርጝስ ቴኬምስትካማጊ አኽⶓ ክንታንቲ ዙማ:: ክርፄ ዋይሜ ሜዜጌብፅጝስ፣ አጌሮኪ ያኻ ክንቲ ጝናሳ ክርፂ ዋይሚስ እቑፅጝስ ክንታንትካሊ፣ ክንትፃንትካሊስታ እርዳትፅጝስ ካላንኩሊጊ አብርታ አኽጝስ ፂኒስካማጊ፣ ግልፃ ያኻያሱሳ ካሴ እርዳትጜካማጊስታ እንዴስ ፍና 12ንቲ ቤንኩ ክንታንትካ ፌቴንስቱኑሳ ሽቶ እንፃኽስቴካማጊ አኽⶓ ክንታንቲ ደርበው ድኹዋ::
ሰላሙ ችግርስ ፍታኔ ካፅናላ ናው ካሲ አንኩሊውሳ ፍሬ አቲሳሺኹ አኽⶓ ድኹኽ ክንታንቲ ውላጊ ክንታንትካ እንሳ ፄጌራው ካሲዴስስታ ችንኬትዴስ ሴጋ ያኼካማ ፍታኒስ ቴርታንታ እንፅኼንቶ ፌያፌይጝፃ:: ሜፃፍ ይንታው አሜትኩ ክንታንኩ ክንታንትካስ ዋኽትጛያታኪላ ክንታንቲ ደርበው ካሴ::
ክንታንታ ሰናይት አድማሱ ፂሪጊላጛንቲ አች ክንቲ ጝናዳ 12ንቲ ቤኑ ክንታንታኽ:: 12ንቲ ቤኑሳ ዩኒቨርስታ ሚፅፄ ፍታኔ ፊቴንስቴታ ክርፄ ዋይሜ ሜዜጌብፅጝስ ቤዴራ ቴርቶ ፄውታታጊ አኽⶓ ዙሜ::
ክንታንታ ሰናይት 12ንቲ ቤኑሳ ክንቲውሳ ፍንቲቴ አሌድጝዴስ ቤዴራ ፋንቲቲሊ እምትጛውሳ ሴስታዴስ 11 ዋኺስታ ዝኩንኩሳ ሜፃፍካዋ አንቤብታጊ አኽⶓ ድኹታ:: ክንቲ ጝናስታጊ ስካዊ ፍኖታ ካርቲስ ቴርትኹ ሜፃፍ እላቲው አኽጝስ ሶፍት ኮፒስኪ ያኻ ሃርድኮፒስ ላይብራሪዳ እንኩርስታማ ፂኒስካማጊ አኽⶓኪላ ዙማ:: አፄብካኪላ እርዳትጝጚስ፣ ካንትፃንትካ ቤናኻዳ ክንትፃኒስ ቱዋያሱሳ ካሲጝስ እንቲታኪ ፂንስቱስ ግልፃ ያኻያሱሳ ካሲጝስ ፍታኒስ ቴርቴታጊ አኽⶓ ዙሜ:: ላይብራሪዳ ኮፒ ያኽስታማ እንኩርስትኹሳ ሜፃፎ ጝና ካፅካማ አንቤብካማ ዙርፃንታ ፄውጝ ፍታኒስ ቴርትጝስ እርዳትኹ አኽⶓኪላ ድኹታ::
ኹን ክንታንትካዳ እንፅኺው ቻኒስት ዝኩኹ አኽⶓ ዙሚት ክንታንታ ሰናይት አፄብካሊ ቤናኻዳ እርዳትጝጚስ፣ ፊቲ ጊዝዳ እክድስ ፂኒስጝስ ዋይሚስታ አኽጝስ ቴርቴታጊ አኽⶓ ዲብስታ:: አጌርዳ ፌቴርስትኹ ሰላሙ አኺኒስ ክንቲዴስ እንግራ ይጉዋቲንታ ሳይኮሎጂው ክንትፃንቲው እርዳቲ ኬፍቲኒ አኽⶓ ክንታንታ ድኹታ:: ፍታኒስ ኽስትስ ቴርታንታ ክንትፃንትካ ዜርቕቲኒ ዋይሜ ሜዜጌብፁንኩ ክንታንትካስ ቲቶሪያልስ እርዳትጝ፣ ካሴ እንፃኽስትጝስታ ክርፄ ዋይሜ ሜዜጌብፃንኩ ክንታንትካስ ሽልማቴ ቴርስጝ ክንታንትካ ፅናትስ ጁትጛንታ እርዳትኹ አኽⶓ ክንታንታ ሰናይት ዙሜ::
ፌይኹ አሜትዳ ፌቴንስቱንኩ 12ንቲ ቤንኩሳ ክንታንትካዋ ካንትጝስ ጛጂ ሜዜጌብፁኑ ዋይሚስ አንኩሌ ጉዲጝ ያኻውላስ ፌይኹ አሜትዴስ ጃላ ሜዜጌብፅጝስ ቲጌታጊ አኽⶓ ዙሚት ክንታንታ ውላጊ ክንታንትካ ፌይኹዴስ ዴስጝጉ ፌይኹሳ ካንታማ ቴስፌ ኬውጝ ፋይፃቲው አኽጝስ ቱስታውሳጊ ቤዴራ ቴርቶ ፄዋንታ እንፅኼንቶ ፌያፌይጝፄ::
ፂሪጊ ትክላሊ ላጛንቲ አች ክንቲ ጝናዳ ባይሎጂው /Biology/ ክንትፃንቲ ንጋቱ ካሳሁን 12ንቲ ቤኑሳ ብሄራዊ ፍታኔ ፌቴንስታንኩ ክንታንትካስ ሊሊቲ ትኩት እይስታማ እንፃኽስቴካማጊ አኽⶓ ጌሌፅካ:: ስካዊ ክንቲው ፍኖተ ካርቲስ ቴርትኹ ሜፃፍ ክንቲ ጝናዳ ዋኽትጛያሱ አኽጝስ ሃርድ ኮፔ ላይብራሪዳ እንኩርጝስ፣ ዋኽትጙኽ አኺኒዳ ክንቱንኩ ክንታንትካሊ ልኺትጛንኩ አኽጝስ ክንትፃንትካ ካላኑ አክምስ ካሴ ፍሽካማስታ ቤዴራሱሳ ፍታኔ እንፃኽስትጝስ ክንታንትካዋ እርዳትካማጊ አኽⶓ ዙሜካ:: ሰላሙ አኺኒ ክንትጝ ከንትፅጝዳ ፅንጋኻ አኽⶓ ጉሽንኩ ክንትፃንቲ ንጋቱ ችግራኻዳ ያኻካማኪላ ክንታንትካኪ ያኻ ክንትፃንትካ እርዳትጜካማጊ አኽⶓ ጌሌፅካ:: 2016 ም.አሜቱ ክንቲው ዝቤን አሌድስታማጊ ያኹኒኪላ 2017 ም.አሜትዳኪላ ሜፃፉ ችግር ሲፋቲታ ትኩታኩ አካልካጊ እንፃኽስታንታ ክንትፃንቲ ንጋቱ ካሲካ::
ክንትፃንቲ ደሳለው ምንግቱ ፂሪጊ ትክላሊ ላጛንቲ አች ክንቲ ጝናዳ ይሳቡ ክንትፃንቲያኽ:: 12ንቲ ቤንኩ ክንታንትካስ ፍታኒስ ቴርታንታ ሜፃፍሳ ጛሬ አኹኪ ፋንቲቴ ሾፌንካማ ፍታኒስ እርዳታንኩሳ ሜፃፍካዋ ጋምቢጙሳ፣ ሽቶ እንፃኽስትጙሳ እንፅኼ እንፃኽስቴካማጊ አኽⶓ ጌሌፅካ::
ፂሪጊ ትክላሊ ላጛንቲ አቾ ክንቲ ጝናስኩ ክንታንትካ ዳርኪ ዋኽትጛያሱዳ ክንቴካማ ልኺትጛኑ ውላ ዋኽትጙኽ ክንቲ ጝናዳ ክንቱንኩ፣ ሰላሙ አኺኒ ቼጌርፃቲው ዙራሙሪሊ ክንቱንኩ ክንታንትካሊ አኽⶓ ጉሹንኩ ክንትፃንቲ ደሳለው ፂሪጊ ክንቲ ጝናዳ ላብራቶሪ እላቲው፣ ሜፃፍ ዋኽትጛያሱ አኽጝስ ትኩታኩ አካልካ ዳንጉኽሳጊ ዋኽፅጝስ ትኩታኩ አካልካ አላፍትስ እንፃኽስታንታ ካሲካ::
ፂሪጊ ትክላሊ ላጛንቲ አች ክንቲ ጝናሱ ጛሪ ያረጋል ታደለ 2016 ም.አሜትዳ 225 12ንቲ ቤንኩሳ ክንታንትካዋ ፌቴንፅጝስ ቴርትⶓ ጌሌፅካ:: ውላጊ ክንታንትካ ኦንላይንስ ፌቴንስታኑሳ ፎርም ዋኽፅⶓኪላ ጌሌፅካ::
2016 ም.አሜትዳ ክርፄ ዋይሜ ሜዜጌብፅጝስ ክንታንትካሊ፣ ክንትፃንትካሊ፣ ወመህሊስታ ክንታንትካኩ ቹዋ ታብልሊ ኩስጜካማ እንፅኼ ጄሜርⶓ ክንቲ ጝናሱ ጛሪ ጌሌፅካ:: ሰላሙ አኺኒ ክንትጝ ክንትፅጙሳ ካስቶ ፌሬስፃቲታ ሶኼቶ ልሙኒኪላ ዙርካማ ክንቴ ጄማራንታ ፄውጝስ ክንቲ ወክትስ አሌድስታማ እሊኩሳ ሜፃፍካዋ ጋምባንታስታ ካስካዋ እንፃኽስታንታ ፄውⶓኪላ እርዳትፅካ::
ሜፃፉ ችግር ዝኩⶓ ጉሽንኩ ክንቲ ጝናሱ ጛሪ ችግሮ ኽይጝስ ሜፃፎ ኮፖ ፄውካማጊ ጛርትስኪ ኬችስኪ ፂኒሳንታ ላይብራሪዳ እንኩርስትⶓ ጌሌፅካ::
ፂሪጊ ክንቲ ጝናዳ ላብራቶሪ እንውስታ እምፕልታቕ ጊቢቱኑ አኽⶓ ጉሹንኩ ክንቲ ጝናሱ ጛራ አቶ ያረጋል እንሳ ችግሮ ክንቲው ሚንስትር ቴርስኹዳ ሜንድሬኽዳ አግስቴካማ ጉሽⶓ ታክስፅካማ እንዳርማኪ ኽይ አግስታያሱ አኽⶓ ጌሌፅካ:: እምፕልታቑ እርዳቲስስታ ክንቲ ጝናሱ ባጄትስ ጄውስትኹ ኬሚካል ትክምዴሰ ሴጋ አኽⶓኪላ ጉሽካ:: እንሳ ችግሮ ኽይጝስ አጌር ሹማጌል፣ እምፕልታቕስታ አዊልማ እርዳታንታ ካሲካማ ፄትቲው ችግሩ ምክንያትስ እንግራ ይጉⶓ እርዳትፅካ::
ስካዊ ክንቲው ፍኖታ ካርቲስ ቴርትኹ ሜፃፍ ጐንዴርዳ ዝኩⶓ ጉሹንኩ አቶ ያጋል ዝኩኽ ሜፃፍ ውላስ ታምብስታንታ ያኻታ፣ ፍታኒ እምስትኹ ጊዝ ቤናስ ፌቴንስታስታ ክንታንትካ ፍታኔ እንዳርማኪ ስጋት ጋቲታ ፌቴንስታንታ ውላጊ ታምቦ ፊትጛንታኪላ እንፅኼንቶ ፌያፌይጝፅካ::