ባርዳር ከነማው ኹኑ ልኩ ኩታው ኬች ይቶፒያው ፕሪሚየር ሊግሾ ካይጝኾ

አይሸሽም አባተ

ባርዳር ኬቴም ቺፅጝፂው ኹኑ ልኩ ኩታው ኬች አኹኪ ጊዮኑ ንግስትካ እስትኹ ስምስ እቑስታንኩ ይቶፒያው ኹኑ ፕሪሚየር ሊግሾ ፌይጝስ ዴስቴንካ አኽጝ ማሊስታ።

ኬቴም ቺፅጝፂው ቤዴራንቲ ትክትሊ ከንቲባ ጎሹ እንዳለማው  ኬቹሳ ፌይⶓ ካንትኹስ እንፅኼንቶ ፌያፌይጝፄካ።

ባርዳር ኬቴሞ ሊሊትጙንኩ ኽሳንትካ ድልካስ ኬቴሙሳ አቾ ምንጊስታ ብሩታ ሲፋታ ኬቴም ቺፅጝፂ ይሳማ እንፃኽስታማጊ አግስቴ ንካ። ጝሺ ኬቴም ቺፅጝፂ ይቶፒያዳ ካስጝጛንኩ ስፓርቱ ልኺትጝካዳ ዋልታ ኬችካስ ዎኬልስታማ እንክራማጊ አግስቴ።

እኒ ኬችካኪላ ጝርጃው ልኩ ኩታ፣ኹኑ ልኩ ኩታ፣ ሌጌሳ ታምብካው ልኩ ኩታ፣ኹኑ ችኻሊ ኩታ (ቅርጫት ኳስ)፣ ጝርጃው ታፉ ኩታስስታ ጝርጃው ይኺው ኩታስ (ሜሬብስ) ያኹስ ናካ ጊዮንኩ ንግስትካ እጂኑ አባላምቲ ዲቪዚዮንዴስ ኹኑ ልኩ ኩታው ፕሪሚየርሊግሾ ሌጌስጝ ዴሜካ እሊው ኽሳንቲ ሳኪትጚስታ ዋይሚ አኽⶓ ከንቲባ ጎሹ ቶኬምካ።

ጊዮኑ ንግስትካስ አግስትኹ ድል ባርዳር ኬቴሞ ስፓርቱ ቱሪዝም ዜርፍስ ኬፍ ንኹስ ቴኬምስታንታ ፄውጝዴስ ፌይኹስ ውላጊ ኬቴም ቤንካዳ አግስታንኩ ሌጌሳንትካ ክሌብካዋ ይስጝጛንታ ፄዋው ያኹስ ኬቴምዴስ ሜንችካ ኩታዋእንክራንትካ ኹን ፋንታ ፄዌ ንካ።

ጊዮኑ ንግስትካ ሜዜጌብፁኑ ድል ኬቴም ቺፅጝፄ ስፓርቱ ዜርፍዳ ፄዋው ቴሳትፉስታ ፅሬት ኩፔ ኩፓማጊ አኽⶓ ቼሜትጝፃው አኽⶓ ቶኬምካ። ጊዮኑ ንግስትካ ሜዜጌብፁኑ ዋይሚ ድልስ አጄብስታማ ሲፋታ ኬቴም ቺፅጝፂ ክብስስታይሱሳ እርዳቴ ይስጝፃማ ሲፋው አኽⶓ ከንቲባ ጎሹ ጌሌፅካ።

ባርዳር ኬቴም ቺፅጝፂው ኹኑ ልኩኩታው ኬች አኹኪ ጊዮኑ ንግስትካ እጂኑ አባላምቲ ዲቪዚዮንዴስ ኹኑ ፕሪሚየርሊግሾ አሌቔትጚ ባርዳር ኬቴሙ እዝብስስታ ስፓርቱ እምፕልታቕስ እንቲታኪ ዴጌፋንትካስ እን ዋይሚ ሜዜጌብስታታ ይስካማ እንፃኽስቱንኩ ባርዳር ኬቴም ስፓርቱ ክሌብ እንፅኺው አመራርስታ ቦርዱ አባልካስ እንቲታኪ ሊሊትጙንኩ አመራርካስ ባርዳር ከነማው ስፓርት ክሌቡ ዴጌፋንትካው ማባርካ ሴሌቴንፃንትካው ኬቹ አባልካስታ እንክራንትካ እንኩዋ ዴሲናሱሳ እንፅኼንቶ ከንቲባ ፌያፌይጝፄካ።

ንባር:- ባር ዳር ከነማ ስፖርት ክለቡያኽ