እምፕሎ አሜቶ ቼፍፅኹ ሱዳኑ ዎሬም

ዘውዴ በካሉ

ሱዳኑ ዎሬም ጄሜርስቱኒዴስ ድፍኖ እምፕሎ አሜቶ ቼፍፃ:: አውሮፓውያኑ ዝቤን ቼፍጚታ ማንዚ 15 ጌርክ 2023ዳ ሱዳኑ ዎሬምስታ እምቢታ ታምባንቲ አይል አኹኪ ፈጥኖ ደራሽ አይል ክቻዳ ጄሜርስትኹ ዎሬም ባስጛማ ሲፉታኽ:: አጌራ ላጛ ስልታና ፋይካ አይልካስ ባፃባፅስቴታጊ አግስቴ:: ፌይንኩ 12 አርፋኻዳ ይስጝጛማ ሲፍኹ ዎሬምስ ሜንች አቑስታ ንብሬቱ ውድሜት ታምባ:: ሻይስ ቼፍስታንኩ ይዎቶ አቴካ:: ሚሊዮንስ ቼፍስታንኩ ፌኔኬልጜካ::  ማሊዮንስ ቼፍስታንኩ እምቢትንኹ ምግቡሳ እርዳቴ ፋያንኩ አኽⶓ ኢንተርናሽናል ክራይስስ ግሩፑ ንባር ምልኻቴ::

ኢንተርናሽናል ክራዩስስ ግሩፑ ንባርታ ሜንችካ ሱዳኑ ዙራሙርካ ፌሬስካ:: ላንጊጊ ሴብትጛንትካ አይልካ አጌራዋ ላጛሾ ቤንጝፄካ:: ጄኔራል አብዱል ፈታህ አል ቡርሃንስ ጉስስታው ሱዳኑ ዎሬም አጌራውሳ ምራቡሳ ቤኖ ቼፍጝጛ:: መሃመድ ሃምዳን ደጋሎው ዎሬሞ ዴሜካ ምስራኩሳ ቤኖ ቼፍጝጛ:: ላንጊሱ ዎሬምቴኑ ስልታኑ ፋይ እጂኹ ያኻችኹኒላ እርኮ ጌምፅጝስስታ ካይጝጚውሳ ምንግስቶ ቲሪትጝጛታ አውሮፓው ዝቤን ቼፍታ 2021 ም.አሜትዳ ሴላሙሳ ዳራዳርጜ ጄሜራሺጝ ታክስስቴ::

ያኼስጉ እምቢታ ታምባንቴ አይሎ ብሄራዊ ዎሬምሊ አሌቔትጛታ ፄውጝስ ጌርኮ ጐሌሌስታሺኹ አኽⶓ ሲፋማ አል ቡርሃንስታ ሃምዳን ደጋሎ ዎሬምሾ ቱዌካ:: 2019ዳ ኡመር ሀሳን አልበሽሮ ስልታንዴስ ጌማታ ፄውኒዴስ ላጛ አሜትዴስ ፋሌንጋ ዎሬም ጉሽካማ ጛስጛዋ ድኽጚዳ አግስታና:: ዎሬም ላንጊዴስ አይ ቤዴራማ ጄሜርኹ አኽⶓ ግልፃ ያኻውላ ይጉዋችኹኒ ሜንችካ ሱዳናውያንካዋ ኩፂ ችግራኻዳ ቱዋንታ ፄዋ:: እንሳ ፄጌራው ድኪ ችግር ሱዳንዳ ላምቡ ታምባ ያቓያ ናና ሜንችካ ታሪክቴን::

ናስኪላ እን ጋቻስ ሜንችካ እምፕልታቕ ችግርዳ እቴካ:: ኬቴምካ ታንኬንካ:: ሚሊዮንሰ ቼፍስታንኩ ፊኔኬልጜካ:: ጊፁስታ ግብርኒው ልቕልቕቲ ቲሬ አጌራኻዳ ምርቱ እንፂት ፌቴርስታ:: እንሱ ጉሽፂስ ሱዳን ናካ ሲኦልታ ቼፍስቲ:: እን ዋሬምስ 14 ሻይ ሱዳንኩ አቕ ይዎቶ አቴካ:: ሶኼታ ሚሊን አጌራው አቕ ፌኔኬልጜካ:: እኒ ፊኔኬልጛንትካ ክቻዴስ እምፕል ትኩሚ ሶኼታ ሚሊዮን ያኻንኩ ኹንስታ ስራስሪያኽ:: ድንቤሮ ካይካማ ዋልቴን አጌርካሾ ሴዴድስትካ:: 25 ሻይዴስ ጃላ ያኻንኩ አጌር አቕ አቕቱሳ እርዳቴ ፋያንኩ ያኹስ 18 ሚሊዮን አጌር አቕ ዴሜካ እምቢትንኹሳ ምግቡሳ እርዳቴ ፋያንትካ አኽⶓ ኢንተርናሽናል ክራይስስ ግሩፕ ምልኻታ::

ሱዳንዳ ብብራንቲውስታ ወርኩሳ አብቶ ዜሬፍጝስ ቴርቱንኩ ባርኾቼው አይልካ ጋቻዳ አሴቴፍጙንኩ አኽጝ ቶኬምስቴ:: እን ክችዳ ቱጝ ዴሜካ ዎሬም እምቢት ናማ እሻቲታ ፄዋ:: ሳውዲ አረቢያ፣ ግብፅስታ ኢራን ሱዳኑሳ ወሬሞ እርዳታንኩ ያኹስ ቴቤቤርጙንኩ አረብ ኤምርትካ ዴሜካ እምቢታ ታምባንቴ አይሎ ዴጌፋንውስታ ጌሌፅስቴ:: ኤርትራስታ ይቶፒያኪላ እምቢታ ታምባንቲውሳ አይሎ ዴጌፍና እስትካማ ልውስታና:: ሩሲያኪላ ታኹኒ ሱዳኑ ጋቻዳ ታፎ ሚፄት አኽⶓ አሜሪካን ካቢትጚስ ኬሴስቴ:: ዋግነሩ ኬች ሃምዳን ደጋሎውሰ ዎሬሞ ዴጌፋውስታ ዙሚስቴ::

ካቢትጚስ ላንጊ ዎሬምቴንስ አምኽጚዳ ታምባንታ ፅሬት ፄውስታ:: ዲጊስ ዴሜካ አሜሪካ፣ ሳውዲ አረቢያ፣ ቴቤቤርጙንኩ ምንግስትካው አችት፣ አፍሪካው እምፕልትስታ ኢጋድ ቶኬስጚ ቲሬታ ላንጊ ወሬምቴን ዙሚትጛንታ ሃሳቦ ዲግስካማጊ አግስታና:: ያኼስጉ ዲጊዴስ ናቴ ዎሬሙ ድል ፄጌራማ አግስታው አልቡርሃኑ ስራዊቱ ፍካዴና ያኻቲው እስታማ ጋሚስቴ:: እን ስጋት ዴሜካ ሱዳን አሬኬዝቲት እስታማ ስጋት ሚንቻ::