አሌም ኪሰስትኹ ክንቲስያኽ!

ፍትሬት አብታሳ ቴኬምስታማ አቒጄራሱሳ ዝኩዊኔ ኬሽጝፅጝስ ካሊፃው ካሌቕትስታ አቕት አግስትጝስ ካሉኽ ክንቲውስ ጁኽሲያኽ።

ክንቲስ ምግባርስታ አጌራስ ኮሬኮርስታንቴ ክምንቶ አፌርጝስ ካሊስትጝዴስ ጃላ አቕት ክምንትዴስ ክምንቶ ፌያፌይጝጝስ ካሌ፣አሌም አቡቑ አኺኒ ኪስጝጛኒ እስጜ ኪስጝጜ ቲሪትጝጝስ ካሊፃው ካሌቕት አግስታው ክንቲዴሲያኽ።

እን አጌራኪላ ዝኩዊኔ ኬሽጝፅጝስ ካሊፃውሳ ካሌቕቶ አድርፅግስ ኽታዋዴስ ጉሽፄታ ጚውስ ዳድስ ክንቲውሳ ቴርቶ ፌቴርካማ ጋሳጋሱንኩ ክቻዴስ እምፕላ ታኻታ አግስቴ።

ልቡስ ልቡኪ አሌማው ታምትጚሊ እምትጝኹስ ዝቤናዊ ክንቲው ቴርት እስታው አውሮፓው ክንቲ ቴርታሳ ጄሜርታታ ልቡስ ልቡ እሳንጝፄታጊ ናካ አግስታውዳ ታምቤ።

እንጊ ያኹስ እዝብ ሚንቾ ፍሼ ፄዋ።ጌንዜቦ ፍሻማ ክንቲጝናሳ ግቢትግዴስ ድምክና ዳንጉኽሳ ዋኽፃማጊ ክንትኹ ክምንት አፌርስታታ አይጛዴስ ናካሳ አጌራዋ ኬፄልፃ።

እንማቻ ኪላ አጌራቡቑሳ ፍታኔ ክንታንትካ ፌቴንስታንታ ጚውሳ ታምቦ ፊትጛ።ጋያኪ እንክልላዳ ጁኽ ጋቻ ሚንችካ ክንታንትካ ክንቴ ኬውጝፃንታ ፄውኽ አኽጝስ ችግርዳ ችግሮ ዴሜካማ ሚንቾ ዲቦ ፅንጋኽፅኹ አኽጝ እሳንስ አቕስትኹዊያኽ።

እን ክቻዳ ቱትጝጚ ቼጌራማ ክንቲ ካስጛቲታ ፅንጋኼ ኬኼርጝስታ ዳዶ ሼቤርፅጝ ሚንቻሺኾ።

እንጊ ችግራኻስ ዩኒቨርስቴ ቱዌካማ ፌቴንስትጝስ እንዜጛንኩሳ ክንታንትካዋ ዳድዳ ይጉፅጝስኪላ ፌያፌያማ ሞኬርስታ።

ውላጊ ጉዶ ታክሳቲው አኽጝ ማሊስትኹ አኽጝስ ምንግስትስታ ጉዶ ቴሜናንኩ እምፕልታቕ ፄውኑ ፅሬትስ አጌራቡቖ12ንቲ ቤኑ ፍታኒ ዴክስ ካስጛማ አሌድስታ።

ቑፂ እምፕልታኒ ስቬቶ ዱንፄ ናኒስታ እምፕልታማ ችግሮ ዱንፅጝስ ካሊስታው አኽጝ ካንትስታ።

ክንቴ ጋቲታ ኬሾ አግጝስ ካሊስታቲው አኽጞ ካንፅፅኹ ቴግባር ዋኒኪ ያኹኒ አኮሜችስታታ እምፕላ ሼውትጝ ፋይፄ።