ሴንስታ ምሳሊ ዙማ

ዘውዴ በካሉ

አቕ እምፕሎ አሳቦ ዴዴጝስስታ ልቓ ጊዝስ እንፅኼንቶ ፌያፌይጝፅጝስ ሴኖስታ ምሳሊ ዙማስ ቴኬምስታና:: ምሳሊ ዙማኪ ያኻ ሴን እምፕል ዴብቴርት ሚንቾ አሳቦ አኹኪ እንፅኼንቶ ፌያፌይጝፅጝስ ግርብ አኹኪ አይልያኽ  ሴንኪ ያኻ ምስሊ ዙማ ሴንቲዳኪ፣ ዴስቲዳኪ፣ ልማትዳኪ ንጝኪ እርሺውዳ ወክትዳ፣ ኪዱ ወክትዳ፣ አሪሚው ወክትዳስታ እፅዱ አኹኪ አሬ ኩፕፃኑ ወክትዳስታ ሊሊትጙንኩ ማይቤራዊ ኩምችንካዳ ጚውሳ ጊዞስታ ብቴ ማንዳማ ዙሚስቴ:: ሴን ስታ ምሳሊ ዙማ ፁፍ ፅንታስ እንኩርስታውላስ ይጉኒኪላ ካል ፅንታስ ክምንትዴስ ክምንትሾ ፌያፌይጛና:: ቹዋ ታብል አምፕሎ ቴግባሮ አኮሜችጝስ አኹኪ ውላቱዊ ልቕልቕትካዳ ዲቦ ፄዋንትስጝስ አኹኪ እንፅኼንት ቹኒታንቲው ሼውዳ እንኩዋኽስታታ ቴኬምስታኑ ዙሚትጜኽ::

ጋዚቲኒ ምንይችል እንግዳ ሴኖስታ ምሳሊ ዙማሳ ካንትኹስ ሴን ስታ ምሳሊ ዙማ ጚው ያኹኽሳ ወክቶ ማንዳማ ዙሚስታው አኽⶓ ጌሌፃ:: እንጚኪላ እርሺው ወክትዳ፣ አቕ ጌውስጛኒ፣ አራኹና ክቻዳ አኹኪ አቕ ክቻዳ አምኽጚ አታኒ፣ ጌቤልዳስታ ፄጌርጙንኩ ልቕልቕትካዳ ፁፍፅንታስታጊ ፃፊስታውላስ ይጉኒኪላ ምሳሊ ዙማ እምፕልታቑላዳ ዴስስታማጊ ክምንትዴስ ክምንትሾ ፌያፌይጛማጊ አኽⶓ ጋዚቲኒ ምንይችል ድኹዋ::

ምሳሊ ዙማሳ ሹማጌልትዳ ቴኬምስታኒስ እምፕል አቒ ድፄ ቴግባሮ አኮሜቻማኪ ያኻ አሳብስ ቱትጜ አታማ እሊው አቒሊ አሚኽጜ አታኒ ሹማጌል አቖ አሬክጝፅጝስ አኹኪ አሜኽጝፅጝስ

ዙራዙርፅካማ ካንታኒ ሽምብሪዴስ ሳን አግስቴ::

ላጛሴና ክቻዳ ቱዋዊ፣ ዝር ጁኹዋውሳ ያቒኹዊ

አራኹና ክቻዳ ቱዋዊ፣

ታንጌል ድኹዋውሳ ያቒኹዊ፣ ንካማጊ ምስሊ ዙማሳ ቴኬምስትካማ አቑሳ አንኩሌስታ ሼዎ አሜኽጝፅጝስ አኹኪ እርክስ ጅትጛንታ ፄውስታው አኽⶓኽ  ጋዚቲኒ ምንይችል ጌሌፅኹ::

ጋያኪ እምፕል አቒ አቑሳ ዲቦ ቹኒታላ ናኒስታ ጚውሳ አሳቦ ይቢቼ ዲብሳማጊ ቼጌርፃኒ

አብራ ኹዋናጉ  አብራ ዲብሳላ

ሜልሳኒ ጉሻቲው  ብብርፃኒ ካንታላ

ጌውስጛንቲ አቒ ፅኻራ፣ ጌውስጛማ አሬክጛቲው አቒ ድኹዋራ

ንካማጊ አቖ አሚኽጝፅጝስ ጐሌሌስቱንኩ ታብል አሳቦ ዴዴጝስስታ ምሳሊስ ጌሌፃንኩ አኽⶓ ጋዚቲኒ ምንይችል ድኹዋ:: እንቲታኪ ኹን ዋትጛ ጝኖ እሚጝ ፋይፃው አኽⶓስታ እምፕላ እምፕላ ኹና ጝኖ ቺፅጝፅጝዳ ችግር ዝኩዋኒ፡-

አሱ ጐፈሬዋ ቲሪፄላ፣

ጝኖ ጋቢቲ ኮርፄታ

ታፋ ፉሪቲት ዚኪቲኹሳ

ልኩ ፉራቲት ድጙቴ

ጚው ጌፌሩስ  ትቡሳ ዝንግስቴ

እናማ ጄሮ ጉሽታቲ

ፅንግል ቡቕንምባ ቱሽታቲ….

ንካማጊ ዙራሙሪኩ ማቤር አቕ ምሳሊ ዙማሳ ቴኬምስትካማ አቖ ክንትፅጝስ፣ ድኪ ቴግባርዴስ ክብስታንታ ፄውጝስ፣ አቕ እንካንጝጜ፣ ኪቤቢርጜስታ እምፕልቶ ይስጝፃንታ ፄውጝስ፣ ክብስⶓ ባይል ፄዋንታ ፄውጝስ እንቲታኪ አቕ ማይቤራዊ፣ ይኮኖማያዊ፣ ፖለቲካዊስታ ልማቱ ልቕልቕትካዳ አኮሜችስታንኩሳ ኩምችንካዋ ጌሌፅጝስ ቴኬምስታንኩ አኽⶓኪላ ጋዚቲኒ ዙማ:: እኒጛ ምሳሊ ዙምካ ድሳቲንታስታ ክምንትስ ፌያፌይጝፅጝስ አቕ ዙራሙሪዳ ዙማንኩሳ ፅፍስ እሚጝስ፣ ሹማጌሎ አግፁኑ አጋታሚስጊ ቴኬምስትጝስ ታብል ዙማንኩሳ ፁፍሾ ኪሳማ እትሜትስ ቢኪፅጝስታ ክንቲው ጊቢቲዳ እሼንታ ፄውጝስ ውላጊ አላፍቶ ፊትጛንታ ጋዚቲኒ ምንይችል እንፅኼንቶ ፌያፌይጝፃ:: ወዚታ ዲብስስታንኩ ምሳሊ ዙምካ እንፅኼንቶ ፌያፌይጝፃንኩ አኽⶓ ቶኬምኹ ጋዚቲኒ ምንይችል ካልስ እምስትኹ ዜኔግሰታው አኽጝስ ግትምስኪ ያኻ ፁፍ ፅንታስ ሌጌሳማ ምሳሊ ዙማኪ ያኻ ሴን ክምንትስ እሳንስ ፌያፌይጛታ እንፃኽስትጝ ቱስታው አኽⶓኪላ እምትጝፄካማ ዙሜካ::

ጉዋንጉዊ ወረዳ ስጋዲ ትክላሊ ላጛንቲ አች ክንቲ ጝናሱ አውጚ ኮንኪው ክንትፃንቲ አበበ ስሜነህ ጛሾስ ምሳሊ ዙማ ስታ ሴን ባኩንካኪ ያኻ ድክካ እስትካስ ዴዴጝ ጊዝስ አሳቦ ጌሌፅጝስስታ እንፅኼንቶ ፌያፌይጝፅጝስ ቴኬማው አኽⶓ ጌሌፅካ::

ምስሊ ዙማ አኹኪ ሴን ጊዞ ክብስጝስስታ አሳቦ ጌሌፅጝስ ግርብ ዝኩኽ አኽⶓኪላ ዙሜካ::  ማቤር አቕ ዙራሙሪ ቺፋ ቴኬምስታንኩ እስትካ ክቻዴስኪላ እምፕል አቒ እሊው ዙራሙሪሾ ካሳኒ ታምባውሳ ቻኒስቶ ቻኒስት አኹኪ ቤዴል ታምባኒ ካሊጝ ፋይፃው አኽⶓ ጌሌፃኒስ፡-

ትብኾ ፉኽ አቒ ቻናኒኪ ድኹዋሪ ዲብሳኒኪ ችንጉሪ

ትብኾ ፉኽ አቒ ስሞኪ ሌዌቴ ጉዝጐኪ ሴማቴ…. ናና::

እምፕልታቕ ሽምግልኒው ቴርትዳኪላ ምሳሊ ዙማስ ቴኬምስትካማ አሜኽጝፅጝስ ፋያኒ አቕ ክቻዳ ፌቴርስትኹሳ ጋቻዋ አስሜምጜ አቴካማ ሹማጊሌ አሬክጝፅጝ ፋያካማ እንጅኩካማ  ዙማኑሳ እንኩዋኻላ ናኒ፡-

ባሊጊኪ ኩስጝፁኑታዋ፣

ፃኺንፂኪ አንጌፋኑታዋ  ባሴ

አቒ ካንትኹሳ ድባን ካንቴ

ንካማ አሜኽጛማ ዝኮታ ፄዋንኩ አኽⶓ ጌሌፅካማ እምፕል አቒ ዴሜካ ሹማጌሎ ዱንፃላ ናማ አሬኽጛውጃማ ሼውዴስ ታምትጛቲው ያኹኒ ዴሜካ “ሴግ ዚጋማስታ ዝኩና”

ንካማ አሳቦ ዴዴጝስ ጌሌፃኑ ያኹስ ዲቦ ያኻው ናንኩ አቕስ ዴሜካ “ኻሬቲው ታምታላ”

“ውን ዲባስታ ብቲ ቺጛ “

ንካማጊ ዙማኑ አኽⶓ ድኹንኩ ክንትፃንቲ አበበ እምፕል አቒው ትክምስታ ጉዳት ክችክቺ ያኻኒ ቤዴሉኒስኪ ቴኬማና ፤ቴኬማኒስኪ ቤዴላና ንጝስ “ሴባኒስ ይምባና” እስታው አኽⶓ ዙሜካ::

ክንትፃንቲ አበበ ምሳሊ ዙማ እንስታ አሳቦ ጌሌፅጝስ ቴኬማው አኽⶓ ጌሌፅካማ ካልፅንታ ጜዋና ዝኩዋታ ፄውጝስ ካልስ ዙሚስታማ ፌያቲታ ታምብ ዌን ውላጊ አላፍቶ ፊትጛንታስታ ፁፍ ፅንታሾ ኪስስታማ ክምንትስ ፌያፌይጛታ እንፅኼንቶ ፌያፌይጝፅካ:: ፁፍፅንታሾ ሌጌፃውሳ አቔ ዴሜካ ውላጊ እርዳትጝ ፋይፃው አኽጝስ ትኩት እይስታማ እንፃኽስታታኪላ እንፅኼንቶ ፌያፌይጝፅካ::

እንጃቢሪ ዩኒቨርስቲው ባይሉስታ ኮንኪ ፅናቱ ክንትፃንቲ አቶ አሱባለው ክንዴኪላ አውጚው ቴርት ቤናሊ ፄውኑ እጂጚዳ ምሳሊ ዙማ እምፕልታቕ ዝኩዊኔ ጄሜሩኒዴስ ጄሜራማ አኮሜችስታንኩሳ ሊሊትጙንኩሳ ማይቤራዊ፣ ይኮኖሚያዊ፣ ፖለቲካዊ፣ ባይሉ፣ እምኔትኩስታ አይቱ ኩምችንካዋ ዴዴጝስስታ ይሴን ካልስ እንፅኼንቶ ፌያፌይፃኑ ዳድ አኽⶓ ጌሌፅካ:: ምሳሊ ዙማ አቕ ድፂ ቴግባርዴስ ክብስስታንታ ጛስጛዋ አሜኽጜካማ ዝኩዋንታ፣ ሴኔፍ ይሳታ፣ ይሴን ዴሜካ ይሴንቶ ሲፍፃታ ቴኬምስታንኩ ዙምካ አኹኪ ካል ፅንታስ ፌያፌይጛንኩ ምሳሊ ዙምካ ዝኩⶓኪላ ቶኬምካ:: እንቲታኪ ዴስቲዳ፣ እዝንዳ፣ እንክሪዳ፣ እንፅኺዳስታ ሊሊትጙንኩ ስፍርካዳ ጛው ፋይፃኑ ጊዝታጊ ትክምዳ እሼንኩ አኽⶓኪላ አቶ እሱባለው ዙሜካ::

አቶ እሱባለው ምሳሊ ዙማ እንፅኺዳ እሺጝስ እንኩዋኻው አቒ ዝኩጝ ፋይፃው አኽⶓ ጉሽካማ እምፕሎ አቔ ቑዋሊጝስ፣ ክንትፅጝስ፣ ድኪ ቴግባርዴስ ዙርፅጝስስታ ፄጌርጙንኩሳ ቴግባርካዋ አኮሜችጝስ ዴዴጝስ አሳቦ ፌያፌይጝፅጝስ ካሊስታው አኽⶓ ጌሌፅካ:: እንፅኼ አቕትጝፅጝስስታ እምፕሎ ዲቦ ጋሺጝስ አኹ ዜርቕፅጝስ ቴኬምስታንኩ ምሳሊ ዙምካዴስኪላ፡- “ቻዊዴስ ሻሙኔ እንካኔ

ታሳማ ሴይፃውሳ እንኩዊኔ”

እምፕል አቒውሳ እንፅኺ ዜርቕፃውሳ ዴሜካ፡- “

እንኩዋ ካንቲስ ድባንኾ ዲጊ”

ንካማጊ አሳቦ ምሳሊስ ጌሌፅጝስ ቴኬምሰታኑ አኽⶓ አቶ እሱባለው ዙሜካ::

አቶ እሱባለው ፁፍፅንታስ ዲጉንኩዴስ ጃላ ካልስ ዙሚስታንኩ ባይሎ፣ ታሪኮ፣ ወጐ፣ አይቶስታ እሊኩሳጊ ልቕልቕትካዋ ጌሌፃንኩ ካል ፅንትካ ዝኩⶓ ጌሌፅካማ እን ካል ፅንታ ክንቲዳ እሼታ፣ ሚዲያዳስታ ፁፍ ፅንታዳ እሼታ ፄውጝ ዝኩኽ አኽⶓ ጌሌፅካ::

ሊሊትጙንኩ አችካዳ ዝኩንኩ አቕ ኮንኬ ሌጌፅጝዴስ ድምክና ካል ፅንታ ድሳቲታ ምርምሬስታ ፅናቶ ፄውጝስ ካል ፅንታ ኬፍ ናማ ፁፍ ፅንታሾ፣ ፊልምሾ፣ ድራማሾ፣ ግትምሾስታ ሊሊትጙንኩ ማይቤራዊ ሚዲያሾ ሌጌስታ እንፃኽስትጝ ውላውላጊ አላፍት አኽጝስ ታምቦጊ ፊትጛንታኪላ አቶ እሱባለው እንፅኼንቶ ፌያፌይጝፅካ::