“ታምብኹ እርዳቲ ልቓኽ ” ፌኔኬልጛንትካ

ታደለ አጋጄ

እምፕሎ አሜቶ ቼፍፅኹ አማኻሪ ክልልዳ ኬሴትስትኹ ጋቻ ሚንችካ እምፕልታቕዳ ኬፍቲኔ ቻኒስቶ ታምፃማጊ አግስቴ::  እምፕልትስ እሺንኩሳ እምፕልታቖ ኮንኪስ፣ ዜርስ፣ እምኔትስስታ ብሄርስ ጎሌልጝፅጝስ ሚንችካ አቑ ይዎት ድሳ:: አብትስታ ንብሬት ዎዴማ:: ሚንችካ ዴሜካ ዝኩፂ ጝንዴስ ፌኔኬልጜካማ ባስኹ ችግራኻዳ ቱዌካ:: ሊሊትጙንኩ  ወረድካዴስ ሚንችካ ጛርት አቕ ፌኔኬልጜካማ ኬፍቲኒ ጉዴት ታምባ:: አዩ ጉዋጉሲስታ ዚጋሚ ወረዳዴስ  ሚንችካ እምፕልታቕ ፌኔኬልጛሺና:: ናካዳ  ፌኔኬልጛሺንኩ እምፕልታቕ እሺኑ ዙራሙሪሾ ዙርካማ ዝኩⶓ ጄሜርካ::

አቶ አላምነህ አዳል ዚጋሚ ወረዳ አካኩ አርጃ ኬቤሊው ዝኩዋንትካኽ:: ፌይኹዳ ፌኔኬልጜካማ እሊዉ ስፍሪዳ እሺካ:: ናካ ኩፂ እሺኑ ዙራሙሪዳ ዙርካማ ዝኩⶓ ጄሜርካ:: ፌኔኬልጛሺንኩ  እምፕልታቕዳ ሚንች ቤዴል ታምብⶓ ዙሙንኩ አቶ አላምነህ አይኪ አቒ አሴባውላ ታክሲሎ ችግር ኬሴትስታማ ሚንች ጝን ሌግስ ድጙስትⶓ ዙሜካ:: አብትስታ ንብሬት ሌግስ ድጙስታ:: አቕ ኩፂ እሊው ዙራሙሪሾ ካስጝስ እንኬ ፌቴስⶓ ዙማ:: ናካ እሺኑ ዙራሙሪሾ ዙርካማ ግብርኒውሳ እንፅኼ አኮሜችካማጊ አኽⶓ ቶኬሙንኩ አቶ አላምነህ ፌኔኬልጙንኩ እምፕልታቕስ ግብርኒው እንፅኺስ ያኻው ግባት እይስትⶓ ዙሜካ::

ሹኻ ኩንታል ግባት እይስታማ ሹምቤ ዜርⶓ ድኹንኩ አቶ አላምነህ ዜርስትኹ ሹምቢ ጉድጛ ዋጋማ ናካዳ ሻኬካማጊ አግስታንኩ አኽⶓ ቶኬምካ::

“ሹምቢ ዜርስታማ አሌድስቱኒዴስ ፋሌንጋ ዴሜካ አሊኩ ዜርስቱንኩ ሴብልካ ዝኩና:: ዳጉፂ፣ ታፊስታ ፄጌርጛንኩ ሴብልካስ ግባት ፋይፄ” ናኒስ ድኹዌካ:: ጛራጛራ ፌኔኬልጛሺንኩ እምፕልታቕስ  50 ኪሎ ግራም ሹምቢ እይስትⶓ ዙሙንኩ አቶ አላምነህ ኬቤሊዳ ካብስ ፌኔኬልጚ ኬሴትስታማ እንዳርማኪ አብትስታ ንብሬት እላቲው አኽጝስ እርዳቲ ይስጛማ ሲፋታ ካሲካ::

ጝን ሌግስ ድጙስቱንኩ ጛርት አቕስ ኮርኮሩ ጄውስታ እስቱኒውላ ላንቡሳኺስታ ታምብኹ እላቲው አኽⶓ ዙሜካ:: ፌኔኬልጛሺኩ ጛርት አቕ ኩፂ ሻራ ቤቴርካማጊስታ ጝኖ ክራይቴካማጊ ዝኩዋና:: ናካዳ ግብርኒው እንፅኺ እንፃኽስስታው ጊዝ አኺኒ ባንታ ሰላሞ ማንዲፅጝዴስ ኬምፕስ ኬምፖ ግብርኒውሳ እንፅኼ አኮሜችካማጊ አኽⶓ ዲብስካ::

ሌግስ ድጙስትኹ ጝን ግቢስታታ ምንግስት እርዳቴ ፄዋያታ ካሲካ::

“ናካስ ፋይፃው ዲብ ኩፂ እሌቱ ምግብያኽ” ኑንኩ አቶ አላምነህ ይንታው አሜትስ እንፃኽስትጝስ ናካዳ እሌቱ ምግብ ፋይፃንቲ አኽⶓ ቶኬምካ::

አቶ ዳኛው መላኩ   አካኩ አርጃ ኬቤሊው ቹዋ ቺፅጝፃንቲያኽ:: ፌይኹ ማንዚ አርፊዳ ጄሜራማ ጌቴምኹ ችግርስ ኬቤሊታ ሚንች አብትስስታ ንብሬትዳ ጉዴት ታምባ ንካ:: ዶንጌትካማ ልቕልቕናንኩ አይልካ ታምፁኑ ፅካትስ ሚንችካ እምፕልታቕ ፌኔኬልጛሺናኽ ኑኑ:: ናካ ኩፂ እሺኑ ስፍሪሾ ዙርካማ ግብርኒው እንፅኺ አኮሜችካማጊ አግስታና ንካ:: ወረዳው አችስ ፌኔኬልጙንኩ እምፕልታቕ  ያኻውሳ እርዳቴ ኩፕፅካማጊ አኽⶓ ጌሌፅካ::

እምፕልታቑሳ ችግሮ ኽይጝስ  ወረዳዳ ዝኩንኩ እምፕልታቕ ሴዛስ ሴዛስ እምፕሎ ዚንጐ ኮርኮሮ ጄዌካማ እርዳቴ ፄዋንታ እንፃኽስስታማጊ አኽⶓ ዙሜካ::

ፌኔኬልጙንኩ እምፕልታቕ እሺኑ ዙራሙሪሾ ዙርካማ ዝኩዋኑ ጊዝዳ ምድራሺስ ፂኪስትⶓ ዙሙንኩ ቹዋ ቺፅጝፃንቲ እክምኒኩ ውማይቴንካ ኬቤሊዳ እንፅኼ ጄሜራንታ ካሲካ::

እሊው አዩ ጉዋጉሲ ወረዳዳ አምቢሊ ኬቤሊዴስ ፌኔኬልጛሺንኩ ናካዳ እምቢሊሾ ዙርካማ ግብርኒውሳ እንፅኼ እንፃኽስትካማጊ አኽⶓ ዙሙንኩ ዴሜካ አቶ ጋሻው አየለ ጛሾስ ፌኔኬልጛሺኩ እምፕልታቕስ ጋያኪ ማልጛ ባስኹ ጉዳት ታምቡክስስታ ድኻ ድኻስ  እቲኒስታ ሹምቢው እርዳቲ እይስታማጊያኽ ንካ:: እንዴስ ፍና ታምብኹ ችግር ማልጛ ይዝኩዊ ያኹኒውላ ናካ ኩፂ ዙራሙሪሾ ዙርጝስ ዴስቴንካ አኽⶓ ዲብስካ::

ሚንችካ እምፕልታቕ ዙርካማጊ አኽⶓ ቶኬምካማ ግብርኒው እንፅኺዳ ቱጝስ ሹምቢውሳ ሴብሎ ዜርⶓ ጌሌፅካ::  ናካዳ እሺኑ ዙራሙሪሾ ዙራኑ ጉዝማ ወባው ቑንዚ ኬሴትስታማ ሚንችካ አቕ ክርካማጊ አኽጝስ ምንግስት እጁሳስታ እክምኒውሳ እርዳቴ ፄዋያታ ካሲካ::

ግብርው እንፅኺዴስ ኬምፕስ ኬምፓ ሰላሞ ማንዲፅጙሳ እንፅኼ እንፃኽስትናናጊያኽ ኑንኩ አቶ ጋሻው ሰላሞ ማንዲፃው አይል ሜዴብስታማ አምቢሊ ኬቤሊዳ ዝኩⶓ ዙሜካ::

አዊ ብሄረሰብ ቺፅጝፂው ፌኔኬልጛንትካስ ሚፄ ኩፕፃንቲ ኮማቴ አቶ መለስ አዳል ሊሊትጙንኩ ዙራሙርካዴስ ፌኔኬልጙንኩ እምፕልታቖ ኩስጝፅጝስ  እሺኑ ዙራሙሪሾ ዙራንታ ፄውጙ እንፅኺ እንፃኽስስትⶓ ዲብስካ::

“ፌኔኬልጙንኩ እምፕልታቕ እሺኑ ዙራሙሪሾ ዙራኑ ጉዝማ ሚንች ዲብ ፋይፄ” ኑንኩ አቶ መለስ ሰላም ዝኩክ ዙራሙርካዳ ዝኩንኩ እምፕልታቕ እርዳቴ ፄዋንታ እንፃኽስትናናጊያኽ ንካ::

“ፌኔኬልጛንትካስ ያኻውሳ ጌንዜቦ ኩፕፅና:: ጝኖ ግቢትጝስ ያኻውሳ ሚስማሮስታ ኮርኮሮ ኩፕፅና:: ምግብስ ያኻው አሬ ኩፕፅናናጊያኽ” ንካ አቶ መለሰ::

ላንቡሳኺስታኪላ 5 ሚሊዮን 6 ሊኻ ሻይዴስ ጃላ ያኻው ጌንዜብ ፌኔኬልጛንትካስ ኩፓኽ ኑኑ::

4ሻይዴስ ጃላ ዚንጎ ኮርኮሮስታ 7 ሊኻ ኩንታልዴስ ጃላ አሬ ኩፕፅና ንካ::ትክላሊስ 14 ሚሊዮንዴስ ጃላ ሚፂ ኩፒⶓ ዲብስካ::

ፌኔኬልጛንትካ ዝኩኑ ወረዳዳ ቲሪትጙኽ ኮሚቴ እምፕልታቕዳ ታምብኹሳ ችግሮ ክችክቺስ ንባሮ ኩፕፁኒዴስ ፋሌንጋ ወረድካስ እርዳቲ ታምባታ ፄውስታ ንካ::

እንጃቢሪ ዩንቨርስቲስታ እንጃቢሪ ሆስፒታል እንቲታኪ እሊኩጊ እርዳቴ ፄዌካማጊ አግስታና ንካ::

ወረዳዴስታ ኬቤሊዳ ዝኩኹ እዝብ ፌኔኬልጛንትካስ እርዳቴ ፄዌካማጊ አኽⶓ ቶኬምካማ ፌኔኬልጛንትካዳ ቑንዚ ኬሴትስትኹ አኽጝስ እጁስታ እክምኒው እርዳቲ ችግር ዝኩክ ኬቤልካዳ ታምባታ ፄውስታ:: ድምክኔ እንፅኼ ኩፂ ፋዬ ንካ::

ፌኔኬልጙንኩ ጛርት አቕ እሺኑ ዙራሙሪሾ ዙራኑ ጊዝዳ ቲንኩ ውማይቴንካዋስታ ፄትቲውሳ አይሎ ስፍሪሾ ካፅፅⶓ ዙሜካ::

አዊ ልማቱ ማቢሪ 3 ትራክተሮ እይጝስ አሬሳቻንትካ እርሼ አሬሳንታ ፄውስታ:: “ያኼስጉ እንዴስ ጃላ እንፃኽስትጝ ማንዲስታው እንፅኼ ዝኮ” ንካ አቶ መለሰ::

አዊ ብሄረሰቡ ቺፅጝፂው ፌኔኬልጛንትካዋ ዙርፃማ ቲሪትጝፃንቲ ግብረ አይል ፌኔኬልጛንትካዋ ዙርፃማ ቲሪትጝፅጙ እንፅኺ ዝኩኹሳ ፌፄምጜ ጋማጋምኹ ወክትዳ ውላ ታምብ ዌን አካልካው አሬቤሬብጚስታ ይስጙኹ ፅሬትስ ክርፂ ዋይሚ አግስታኽ እስታ:: ናኪኒ ወክትስ ዜርስታንኩ ሴብልካስ ኔፃስ ጉሺስ ማዳባሪ ፌኔኬልጛንትካስ እይስትጝ ክርፂ ቴግባር ያኻማ ጋማጋምስትኹ ያኹስ ሲፋውስ ዜርስታንኩሳኪላ ቴግባርካ አኮሜችስታንታ ዳብዚ እንኩርስታ:: አድማስ ዩኔዬንስታ ባኩ ፍካዴንካ አብት ዌንሊ ያኽጝስ ብብራንቲ እይስታማ ትራከትርስ 112 ትኩሚ 5 ሄክታር ብቲ ፌኔኬልጛንትካስ እርሺ ኔፃስ አሬስስታታ ፄውስትጝ ኽሳንቲ ቴግባር አኽⶓ ኮሚቴ ጋማጋማ::ሲፋውስ ዜርስታንኩ ሴብልካዳኪላ ይሳማ ሲፍጝ ቱስታው አኽጝዳ ዳብዚ እንኩርስታ::

እሺኑ ዙራሙሪሾ ዙርካማ ችኹሳ እርሼ ጄሜሩንኩ እምፕልታቑሳ ዴክቶ ማንዲፅጝስ አኺቲ ስታ አምቢሊዳ አሴሜርጙኹ ፃምርትጙኹ አይል ዝኩኹ አኺኒ አች ቺፋ ዝርዝርስ ጋማጋምስታማጊ ዲጊስ እርዳትጝስታ ሲፋሲፍጚ ፄውስታታ ዳብዚ እንኩርስታ:: እርዳቴ ኩፕፃንቲ ኮሚቴስታ ኬሴቶ ካላካልጚው ኮሚቴስ ኩፑኹሳ አይኔቱሳስታ ጌንዜቡሳ እርዳቴ ዝርዝርስ ሪፖርት ኮሚቴስ ዲጋማ ኩስጚ ፄውስታ:: ላምቡሳኺታኪላ ብሄረሰቡ ቺፅጝፂው እዝብዴስ፣ ክልሉ ምንግስትዴስ፣ ብሄረሰቡ ቺፅጝፂዴስ፣ እርዳቴ እያንትካ አችትካዴስ፣ ኾትካዴስስታ እሊኩ ባኩ ፍካዴንካ አካልካዴስ አብት ኩፓኽ እስታ::

ኮርኮሩ፣ ሚስማር፣ አሪ፣ ሹምቢስታ አካላቶ ቡዚሳንኩ ምግብካ፤ጝኖ ጊቢትፂ ካኒ(ፕርሲ)፣ ጌንዜብ፣ እጁ፣ ጝኑ አክኽካ፣ ሲይካ፣ ቦንዳው ሲይካ፣ ኮባርቲ፣ ፃንኩቶ ማንዲፂ ፌኔኬልጛንትካስ ኩፒጝስ ዲጉንኩ እርዳትካ ክቻዴስ ቶኬምስታና:: እን ክርፂ ቴግባር ይሳማ ሲፍጝ ቱስቴ ኑስ እርዳቴ ኩፕፃንቲ ኮሚቴ ታክስፁኹ ያኹስ ፍንሾስኪላ ልቕልቕቲስ ይሳማ ሲፍጝ ዝኮ እስታ::