ፅንኩት ዝቒው አኹ

ዘውዴ በካሉ

እምፕል አቒው አካላታኻዳ ላጛ ሹኻንቴ ቤኖ እሚኹ አኹ አኽⶓ ማራማርጛንትካ ዙማና:: እን አኽጝስኪላ አቒ ዝኩጝስ ፋይፃንኩ ዲብካዴስ እምፕል ፅንኩት አኹኽ:: አጌራው አችስኪላ አኹ ፃንኩቱ ችግርስኪ ያኻ ታምብስታንቱ ችግርስ ሚንቾ ጊዞ ክሬቲ ጁዌ:: ይቶፒያዳ አኹ ችግር ያኻውላስ ፅንኩት ዝቒው አኹ ችግር ዝኮ:: ፅንኩት ዝቒው አኹሳ ችግሮ ኔኬትጝስ ምንግስትኪ ያኻ ምንግስታውካ ያኼካያስኩ አችትካ አኹሳ ኾቶ ጋምቢጝስ፣ ኬሚካሎስታ አኾ ፃንኩፃንኩሳ ዲግስጝስ እንፃኽስትካማጊ አኽⶓ ሊሊትጙንኩ ንባርካ ቶኬማና:: ፅንኩት ዝቒው አኹ አቲጙ ችግርስ አቕ ሊሊትጙንኩ ቑንዝካስ ፂኪስታና:: ጋያኪ ችኹ ወክትዳ ጌፄሩ ዙራሙሪዳ አኾ ሚንቺትስ ቴኬምስታኑ እንዜጛው ብንዴስ አኽጝስ አኹ ስንክርስቴ:: አኹ ስንክርስታኒ ዴሜካ ሊሊትጙንኩ አኹስ ይንታንኩ ቑንዝካ ኬስትስታና::  እንሳ ችግሮ ኽይጝስኪላ አኳ ፎር ኦል እስታው ባኮ እንፃኽስታው አችት አምፕልታቕ አኾ ፃንኩፃውሳ  ማሽኖ አኹኪ አኾ ፃንኩፄ ሜሳሬ ቴኬምስትካማ ፅንኩቶ አኾ ጝንዳ ቴኬምስትጝስ ካሊፃውሳ እንፅኼ አኮሜቻማጊ አኽⶓ ንባርካ ቶኬማና::

ፅንኩት ዝቒውሳ አኾ አቲⶓ ችግር ይንታንኩ ሚንችካ ቑንዝካ ዝኩና:: እኒጛ ክቻዴስኪላ እንጅኩዊ፣ ኮሌራ፣ አሜባ፣ ትራኮማ፣ ታይፎይድስታ እሊኩኪላ ቶኬምስታና:: እኒ ቑንዝካ አቒዳ ኬሴትስታቲንታ ዳራ ፄውጝ ዝኮ? አኹ ዋትጛይ ቑንዚስ ታምፄ ናውሳስታ እሊኩሳጊ አሳብካዋ ካንትኹስ ዶክተር ይርሳው ትላሁንሊ ፄውንኹሳ እጂጜ እንቶጂሱላ ታምፅጝስ ፋኑኻ::

እንጃቢሪ ትክላሊ ሆስፒታልዳ ትክላሊ አክም ዶክተር ይርሳው ትላሁን ፅንኩት ዝቒው አኹ ችግርስ እምፕል አቒ ቲኖ አቲጝስ ካላው አኽⶓ ጌሌፅካ:: አኹ ፃታው ብንዳ አኹኪ ቦንቢዳ ይቢቺ ጋቲው አኽⶓ እንቲታኪ ጝንዳ ቴኬምስታንኩ አክኽካው ፃንኩቱ ችግርስኪላ አኹ ፃንኩት ስንክርስታው አኽⶓ ዙሜካ:: እምፕል አቒ ቲንዌናሳ ዝኩዊኔ ዝኩጝስ ፃንኩቶ ማንዲጝ ቹዋ ዲብ አኽⶓኪላ ዲብስካ::

አኹ ቤኬልስታው ሚንቺትስ ችኹ ወክትዳ አኽጝስ አኹስ ይንታንኩ ቑንዝካ አቑዳ ይኮኖሚያዊ፣ ማይቤራዊስታ ፖለቲካዊ ልቕልቐቲዳ ጉዳቶ ታምፃው አኽⶓ ዶክተር ይርሳው ጌሌፅካ:: አቕ ቻኺ ጝናሳ ውታኺዳ ቴኬምስታንኩ አኹኒጊ እንቲታኪ እምፕል አቒ ውታኺዳ ድኽራው ያኹኒጊ እን ድኽሪ ኩሪሊ ብንሾ ጌማማ አኾ ስንክራው አኽጝስ ቴኬምስታኑ አኹ ስንክርስታኒ ቑንዜ ያጋው አኽⶓኪላ ቶኬምካ::

አኹ ስንክርስትጝስ ይንታንኩ ቑንዝካ ባክቴሪያስ፣ ፕሮቶዝዋስታ ኢንተስታይናል ፓንክረት እስታንኩስ ቑንዝካስ ፂኪፃው አኽⶓ ጉሹንኩ ዶክተር ይርሳው ባክቴሪያስ ይንታንኩ ቑንዝካ ኮሌራ፣ ኤች ፓይሎሪስስታ እሊኩጊ ያኻኒስ ፕሮቶዝዋ ዴሜካ ጀርዲያ፣ አሜባስታ እሊኩጊ አንዲፅካማጊ እንጅካዋ ፄዋንኩ ቑንዝካዋ ያጋው አኽⶓ እርዳትፅካ::

ፅንኩት አኹ ችግርስ ቑንዚ ኬሴትስታኒ ሊሊትጙንኩ ምልኻትካ ካንትስታንኩ አኽⶓ ዶክተር ይርሳው ዙሜካ:: እኒጛ ምልኻትካኪላ እንጅኩዋ ፄውጝ፣ አካላት እንኩዊንትጝ፣ ጉዝጐ አኹኪ ሼዎ ቑንዳፅጝ፣ ጃላ እፅጝ  ምግብ አስሜምጛላ ንጝ፣ ምግቡ ፋይ ኔኬትጝስታ ሳኹዌ ፄጌራውሳ ፍቼ ዲቦ እንጅኩፅጝ አኹ ችግርስ ይንታንኩ ቑንዝካው ምልኻት አኽⶓ ዶክተር ይርሳው ትላሁን እርዳትፅካ::

እኒጛ ምልኻትካ ካንትስታኒ እክምኒው ኾትሾ ካስካማ አግልግሎቴ አግፅጝስ ቑንዚዴስ ኬሽጝ ፋይፃው አኽⶓኪላ ጌሌፅካ::

ብሬ እንጅኩፃው፣ ሳኹዌ ፄጌራውሳ እንጅኩፃው እምፕል አቒዳ ባክቴሪያ ዝኩዋኒ አኽⶓ ጌሌፁንኩ ዶክተር ይርሳው ዳንቴንካ አኹኪ ትላትል ያኹኒ ዴሜካ አቒውሳ ኪሎ ኔኬታው አኽⶓኪላ እርዳትፅካ::

አኹ ፃንኩቱ ችግርስ ይንታንኩ ቑንዝካዋ ካላካልጝስ ቤዴራማ ፄውጝ ዝኩኽ ቤዴራ ትንካኪ ሚንቺትስ እን ቑንዚ ኬሴትስታው ጌፄሩ ዙራሙሪዳ አኽጝስ ቲንኩ አክስቴንሽንካኪ ያኻ ውማይቴንካ  እምፕልታቕስ ቤዴራማ ክንትፅጝ፣ ቻኺ ጝናሳ ቱስቲስ ቴኬምስታንታ ሼውቴ ፌቴርጝስታ ሲፋሲፍጛማ ቻኺ ጝና ዝኩⶓስታ ቴከምስታንኩ አኽⶓ ቼሜትጝፅጝ፣ ቻኺ ጝናዳ አኾ እንኩሬካማ ቴኬምስትካማ ፋኒስ ታፎ ቑሴንታ ክንትፅጝ፣ አኾ ፃንኩፃውሳ ማሽኖ አኹኪ ሜሳሬ ግብርኒው ቢሩዴስ ካፅካማ ቴኬምሰታንታ ሼውቴ ፌቴርጝ፣ ቦንቦዋ ቴኬምስታንታ ክንትፅጝ፣ ብኑሳ አኾ ቴኬምስታንኩሳ ዴሜካ አኾ ጌፌርፅካማ ቴኬምስታንታ ክንትፅጝስታ ጝኑሳ ፃንኩቶ ማንዳንታ ፄውጝ ማንዲስታው አኽⶓ ዶክተር ይርሳው ጌሌፅካ::

እኒጛ ቤዴራ ትንካክካዋ ፄዌካማ ቑንዚስ ፂኪስታኒ ዴሜካ እክምኒ ዝኩኽ አኽⶓ ዶክተር ይርሳው ድኹዌካ:: ቑንዚው ይዝኩትስታ አኺኒታ እንቲታኪ ድሚው አችታ እንቲታኪ ቑንዚው አይኔትታጊ እክምኒ እይስታው አኽⶓኪላ ጌሌፅካ:: ዶክተር ይርሳው ስራስሪ አኹስ ይንታንኩ ቑንዝካስ ቑንዳስታኒ እምቢት ንካማ እክምኒው ኾትዳ እክምኒ እይስቱስ ስራስሪ ጃላኩክራ ንካማ አካልታኻዳ ዝኩኽ አኹት ዊድስታማ ስራስሪ ጉዲስታቲንታ ORS እስታው እጁ ቑንዚው ሜቴንታ አንኩዋ ጌርክዴስ ላጚቲ ጌርካሳ ኺስታ እይስታው ያኹስ ዚንክ /ZINK/ ዴሜካ ላጛ ሶኼታሳ ኺስታ እይስታው እጁ አዜዝስታው አኽⶓ እርዳትፅካ:: ስራስሪዳ አሜባው ቑንዚ ካንትስታኒ ዴሜካ ሜትሪንዳዞል እስታው እጁ ስጙስታውስኪ ያኻ ሽሮፕስ እይስታው አኽⶓኪላ ዙሜካ::

ውላጊ አኹስ ይንታንኩ ቑንዝካ ጛው ያኹኽ እክምኒ ዝኩኽ አኽጝስ ቑንዚሊ እጄማ ባሱኒዴስ ፋሌንጋ እክምኒው ኾትሾ ካስጝዴስ ኪቻ ቑንዚው ምልኻት ካንትስቱታ እምቢት ንካማ እክምኔ አግፃንታ ዶክተር ይርሳው ድኹዌካ:: እኒ ቑንዝካ ኬሴትስትጝዴሰ ቤዴራማ ቴንኬክስትጝ ዝኩኽ አኽⶓ ጉሹንኩ ዶክተር ይርሳው አኹ ስንክርስታው ጌፄሩ ዙራሙሪዳ ይቢቺ ያኻውላስ ኬቴምዳኪላ ጝኑ ፃንኩቱ ችግር ዝኩዋኒስታ ቴኬምስታንኩ አክኽካ እንቲታኪ ጛርቱ ፃንኩት እላቲው ያኹኒጊ ዋሺኒዳኪ ስፍሪዳስታ አቒዳ ቑንዚ ኬሴትስታው አኽⶓ ጌለፅካ::

ዶክተር ይርሳው አኹስ ይንታንኩ ቑንዝካ ኩቲስኪ ያኻ ኩታጋው ዳድስ አቒዴስ አቕሾ ፌያፌይጝጝስ ካላንኩ አኽⶓ ጌሌፅካ:: ኮሌራ እሰታው ቑንዚ አቕ ሰላምቴ ኪስጛኒስ ታፉ ስስቒስ እምፕል አቒዴስ አሊው አቒሾ ፌያፌይጛው ያኹስ እሊኩ ዴሜካ እምፕል አቒ ፃንኩቶ ማንዳያሱ ታፍስ ቴኬምስታንኩሳ አክኽካዋ እሜሺኹሳ እሊው አቒ ቑፃውላስ ቴኬምስታኒ፣ ፊኹዊስስታ ስስቒስ ፌያፌይጛንኩ አኽⶓ እርዳትፅካ::

እኒ ቑንዝካዋ ካላካልጝጝስ ውላጊ አቒ ቤዴራማ ቴንኬክስትጝስታ ፃንኩቶ ማንዲጝ ፋይፃው አኽⶓ ጉሹንኩ ዶክተር ይርሳው እምፕልታቕ ቲንኩ ውማይቴንካውሳ ኩስጜ ቻቤላንታ፣ ዝቓኑሳ አኾ ጌሌፅካማ ቴኬምስታንታ፣ ቻኺ ጝናሳ ቱስቲስ ቴኬምስታንታ፣ ጛርቱሳ ፃንኩቶ ማንዳንታ፣ ጝኑሳ ፃንኩቶ ማንዳንታስታ ቴኬምስታንኩሳ አክኽካዋ ንጝኪ አኹ እንኩርስታውዴስ ጄሜራማ ዝቕናኩሳስታ ኹናኩሳ አክኽካዋ ፃንኩትስ እሚጝስ ቑንዜ ካላካልጛንታ እንፅኼንቶ ፌያፌይጝፅካ:: ቑንዚኩ ምልኻትካ ካንትስታኒ ዴሜካ እምቢት ንካማ እክምኒው ኾትሾ ካስካማ እክምኔ አግፃንታኪላ እንፅኼንቶ ፌያፌይጝፅካ ዶክተር ይርሳው::