ሲዚኒ አውሮፓው ሻምፒዮና ስፔን

ታደለ አጋጄ

17ንቲ አውሮፓው ዋንቺው ልኺትጚዳ ስፔን ሻምፒዮና ታኹኻ::

17ንቲ አውሮፓው ዋንቺው ፍፃሚው ልኺትጚዳ ስፔን እንግሊዞ 2-1 ያኹኽ ዋይሚስ ዊፄታ ሻምፒዮና ታኹኻ::

በርሊን ኦሊምፒክ ስታዲየምዳ ካስጙኹ ፍፃሚው ልኺትጚዳ አባላምቲ ፉሪው እንክሪ ጎላ ጋቲታ አሌድስታሺኾ:: ልኺትጚዳ ኮኬብ እንክራንቲ እስትኹ ሮድሪ ፉሪዴስ ፋሌንጋ ጉዳትስ ሴሌፍስታውላ ይጉዋ:: ፉሪዴስ ፋሌንጋ ላሚን ያማል ክችክቺስ ቻቤልጝፁትሳ ኩታ ኒኮ ዊሊያምስ ይኺሊ ታምትጝፃ::

ልኺትጚዳ ዋይሚስቲ ያኽጝስ ካላያሱ ሃረኬን ፍፃሚው እንክሪዳ ጉድ እሺያ እስታ::

ኮቢ ማይኑስ ኪስስታማ ቱኹ ኮል ፖልመር 73ንቲ ደኪካዳ ቼፍፁት ጎላ ኬቾ ክቻ ፄውታሽቲኾ::

እንክሪ ክቻ አሌድስታማ ላንጊ ኬችካ ድምክኒ ሳትሾ ካሳና እስታማ ማንዲስቱስ ማርክ ኩኩሬያ ቻቤልፁትፃ ኩታ አያርዛብል ኩታ ይኺሊ ታምትጝፅጝስ ስፔን ጉስታታ ፄዋ::

እንግሊዝ ዴክላን ራይስስታ ማርክ ጉሄስ ጎሎ ቼፍፅጝስ ፅሬቶ ፄውኒውላ ስፔኑ ጎላ ማንዲ ኡናይ ሳይመንስታ ዳኒ አልሞስ ጎል ቼፍስታዉላ ይጉጝስ ካላ:: እንክሪ 2 1 ያኹኽ ዋይሚስ አሌድስትጝስ ስፔን አውሮፓውሳ ዋንቼ ሴዛንቲ ጊዝስ ጉሽጝስ ካሌ::

ስፔን አሊዲ ሳትዳ አያርዛባል ጎሎ ቼፍፅጝስ ዋንቼ ጉሽታታ ቼሜትጝፅጝዴስ ፍና ያማል፣ ዳኒ አልሞስታ አምበል ሞራታ አግፁኑሳ አጋታሜ ቴኬምስታኑላ ይጉዌካ ::

እንግሊዝ ዴሜካ ኽሳንቴ ዋንቼ ጉሽጝስ 58 አሜታሳ ማንዴታ ያኻ:: ልኺትጚዳ ጐቤዝካ ሰፔንኩ ዋታትካ እንክራንትካ  አውሮፓው ሜድሬኽዳ ኔጌስካ::

17 አሜቱ ልዴቶ ኬቤርፅኹ ያማል ጎልስ ያኻውሳ ኩታ ቻቤልፅጝዴስ ፌያማ ጎሎ ቼፍፅጝስ ፅሬቶ ፄዋሺኾ:: እንክሪ አሌድስቱኒዴስ ፋሌንጋ ያማል ልኺትጚው ጐቤዝ ዎታት እንክራንቲ እስታማ ጎሌልስታ::

እሊው ስፔኑ ዋታት እንክራንቲ ኒኮ ዊሊያምስ ዴሜካ እንክሪዳ ጎሎ ቼፍፅጝዴስ ፌያማ ካንትፅኹ ክርፂ ልቕልቕቲስ እንክሪው ኮኬብ እንክራንቲ እስታማ ጎሌልስታ::

እንክሪውሳ አባላምቲ ፍሬ ይኹቼ እንክራማ ጉዳትስ ፊጝስ ጌዴድስትኹ ሮድሪ ዴሜካ ልኺትጚው ኮኬብ እንክራንቲ እስታ::

ንባር፡ቢቢሲ አማኻርጚዴሲያኽ