ዩኒቨርስቲዴስ ዳቔርስትካማ ፋንኩ ወታትካዋ ኬፄራንትካ አችትካሊ ታምትጝፅጝስ እንፃኽስስታማጌኽ

ሰለሞን ስንታየሁ

ባርዳር ዩንቨርስቲ ዳቔርስትካማ ፋንኩ ወታትካዋ ኬፄራንትካ አችትካሊ ታምትጝፅጙሳ እንፅኼ እሊኩ አችትካሊ ፃምርትጚስ እንፃኽስታማጊ አኽⶓ አቕፁኻ::

ባርዳር ዩንቨርስቲ ደረጀስታ ይትዮ ጆብስ እንፃኽስታንትካውስታ እንፃኽስታንትካዋ ታምትጝፃንኩ አችትካሊ ቴቤቤርጚው እንፅኺውሳ ድሎ ፌቴርጝስ ካሊፃውሳ ሼውቴ ፊቲርፄ አውደ ርዮ ባርዳር ኬቴምዳ ካስጝፃ::

አውደ ራይዳ አግስቱንኩ ባርዳር ዩንቨርስቲዳ ትክላሊ ፃንኩቱ ቺፅጝፂው ኤክስኪዩቲቭ ዳይሬክተር አንደርጋቸው ሞገስ (ዶ.ር) ኑኑውስታጊ ዲጊ ጊዝዴስ ናቲ ዩንቭርስትካዴስ ዳቔርሰትካማ ፋንኩ ወታትካስ እንፅኺው ድል ፌቴርስትጝሾዴስ ማልጜ ችግር ዝኩኽ አኽጝስ ደረጀ፣ከፍታስታ ይትዮ ጆብ እስታንኩ እንፃኽስታንትካዋስታ እንፃኽፃንትካዋ ታምትጝፃንኩ አችትካሊ ፃምርትጚስ እንፃኽስትⶓ ጄሜሩኒዴስ ሲዚ አሜታሳ ቼፍፅካ::ጋያኪላ ቴክኖሎጂው፣ኢንጅነሪንጉ ክንቲው ዜርፍካስ ዳቔርስታንኩ ክንታንትካ እንፅኼ አግፅጙ ድል ማልጜ ፅባብ አኽጝስ አችትካሊ ፃምርትጝጝ ፋይፃዊያኽ ንካ::

ባርዳር ዩንቨርስቲ አማኻሪ ክልልዳ አግስታንኩ ዩንቭርስትካዋጊ አቡቕጝስ ጋያኪላ እንጃቢሪ ዩንቨርስቲ፣ደብረ ማርኮስ ዩንቨርስቲ፣ደብረ ታቦር ዩንቨርስቲስታ ጎንደር ዩንቨርስቴጊ እምፕል ክላሰተሩ አካልካ ፄውጝስ እንፃኽስስታማጊያኽ ንካ::

_ካስጙኽ ፎረምኪላ እንፅኺውሳ ድሎ ፌቴራንኩስታ ኬፄራንኩ አችትካስ ቤዴርካማ ማሊጝ ቱስታንኩ ጉዳይካዋ ማሌካማ ሼውቲ ፌቴርስታማ ቴግባርሾ ቱዋንታ ፄዋው አኽⶓ ዙሙንኩ ዶክተር አንደርጋቸው፤ዩንቨርስትካ ዳቔርፅጝዴስ ይጎ ክንታንትካ ዋኑሳ ታምቡን፣ዋሺኒ ኾት ኬፄርኹ፣ዳማሱ አችዳ አግስታኑ ናውሳ ጋማጋማኒስ እሼካኽ ናካ ኩፂ ፅናትዳ ስራ ፄውጝስ ንቫርካዋ እምናናጊ ዳቔርስቱንኩ ዳማሱ አችዳ አግስታንኩ አኽⶓ ማሊጝስ ካሊናናጊያኽ ኑኑ::ባርዳር ዩንቨርስቲኪላ ሲፍጙንኩ ሱኺቲ አሜታሳ ፄውኹ ፅናትስ ካንትስታኒ እኒ ታምትጝፃንትካ አችትካሊ ፃምርትጚ ክችክቺስታ ቱስታው ዳድ አኽⶓ ጌሌፅካ::

ዶ/ር አንዳርጋቸው ኑኑውስታጊ አጌር አቡቑ አችስ ኬፄርስትጙ ድል ካንትስታኒ ባርዳር ዩንቨርስቲዴስ ዳቔርስቱንኩ ክንታንትካው ኬፄርስትጙ ታምብ 79 ታፋ አኽⶓ ፄውስትኹ ፅናትስ ቼሜትጝፅጝስ ካሊስታኽ:: እን አኽጝስ ካሉኽ ዩንቨርስቲ እንፅኺውሳ ድሎ ፌቴራንኩ አችትካሊስታ ዩንቨርስቲ እይኹሳ ትኩቶ ካንትፃዊያኽ ንካ:: ፍንሾስኪላ እሳ ፄጌራው ቴግባሮ ኬፄራንትካሊ ታምትጛማጊ ኩስጝጝስ እምፕልታ እንፃኽስታው አኽⶓ ቶኬምካ::

2016 ም.አ ምንግስትሾስ ስቪል ሰርቪስ ኮሚሽን እንፅኺው ክፅር እላኬኽ እስታማ አዌጅስትጝ ክችክቺ ጋቲዊያኽ ኑንኩ ዳይሬክተር፤አሜት ቺፋ ዳቔርስታንኩ ወታትካስ እንፅኺውሳ ድሎ ብስጝ ምንግስቱጊ አላፍቴኽ ንካ::እን ያኻውላስ ይጉኒጊ እንፅኼ አቱኽ ወታት አጌሩሳስታ ዙራሙሪውሳ ሰላሞ አዌክጝዴስ እንግርግራ ናላኬኽ ንካ::ውላጊ ጛርቱ አችትካ፣ምንግስቱ ኾትካ ሚሊዮንስ ዳቔርስታንኩሳ ፖለቲካውስታ ፓርቲው ቴኬምፂ ፄውጝ ቱስታላኬኽ ናኒስ ቶኬምካ::

አፍሪካው እንፅኺው ኔትወርክዳ  ፕሮጀክቱ ሶሻል ኢንትርፕራይዝ ፕሮጀክቱ ዳይሬክር አቶ አሸናፊ ብርሃኑ ጛሾስ አምሊ 23/2016 ም.አ ባርዳር ዩንቨርስቲዳ ካስጙኽ እንፅኺው አውደ ርይስ ብስፂስ ቴኬማንኩ ጉዳይካዋ ኬፄራንትካ አችትካሊ ፕሮግራሙሳ አላሜ ካንትኹስ ሼውቴ ፌቴርጝስ ታክስስታማ ቴርትኹ አኽⶓኪላ እርዳትፅካ::

ደረጃ እስታው ኬፄራንትካዋስታ ኬፄርስታንትካዋ ታምትጝፃው አችት ማስተር ካርድ ፋውንዴሽንዴስ አግፃው እርዳቲስ እንፅኺውስታ ካሌቕቱ ሚንስቴርሊስታ ክንቲው ሚንስቴርሊ እምፕልታ ቴቤቤርጚስ ባርዳር ዩንቨርስቴ ዴሜካማ 18 ያኻንኩ ዩንቨርስትካሊ አብርታ ሚንችካ እንፅኽካዋ እንፃኽስታማጊ አግስቴ ንካ::

ዩንቨርስቲው ክንትፃንትካስታ 100 ሻይዴስ ጃላ ዳቔርስቱንኩ ወታትካስ ስልታኔ እይጝስ ኬፄራንትካ አችትካሾዳ  ስልታኔ ካፁንኩ ዳቔርስታንትካ ፋይስታንትካ ያኻንታ ድሎ ብሱንኩ አኽⶓኪላ ዳይሬክተር ጌሌፅካ:: ስልታኔ ካፁኒዴስ ወታትካ ክቸዴስኪላ 90 ሻይ ዴስ ጃላ እንፅኺዳ ኬፄርስትⶓ ፄውስትኹ ፅናትስ ቼሜትጝፅጝስ ካሊⶓ አቶ አሸናፊ እርዳትፅካ:: ናካ ፄውስቱኹ ሼውቴ ፌቴርጙ አውደ ርዕይ ኬፄራንትካ አችትካ ባርዳር ዩንቭስቴ ዴሜካማ እሊኩ ዩንቭስትካዴስ ዳቔርስቱንኩ ወታትካስ እንፅኺውሳ ድሎ ፌቴራንታ(ኬፄራንታ) ትኩቶ እይካማ እንፃኽስታንታ ፄውጝስ ካሊፃውሳ ክርፄ ድሎ ፌቴራዊያኽ ንካ::ፍንሾስኪላ ኬፄራንትካ ዳቔርስቱንኩስ ቴክኒኩሳስታ ካሌቕቱሳ ስልታኔ እንቲታኪላ እሊኩ አክሞ ሌጌፃንኩ እርዳትካ ፋይፁኒጊ እይጝስ ኩርፄንካ አኽⶓ ጌሌፅካ::

ኢስት አፍሪካው ቦትሊንግ ሼር ካምፓኒዳ ኮካኮላው ፋብሪኪዳ ባርዳር ፋብሪካው ቢዝነስ ዜርፉ አላፊ አቶ አየነው ሽመካች ፋብሪኪታ ደረጃስታ ይትዮ ጆብሊ ፃምርትጚስ ዳቔርስትካማ ፉንኩ ክንታንትካ ካምፓኒሾ አሌቔትጛንታ ኬፄራንቲ አችትታ እብርታ እንፃኸስትካማጊ አኽⶓ ጌሌፅካ::እኒ አችትካ ሊሊትጙንኩ አክሞ ሌጌፃንኩ ስልታንካዋ እዩንኩ ወታትካ ካምፓኒሾ ቱዋኒ ዋይምስቴ እንፅኼ እንፃኽስታንኩ አኽጝስ ጛው ካማፓኒኪላ እንስ ዳድስ ፌዩንኩ ወታትካ ኬፄርስትካማ ኬሽኹሳ እንፅኼ አኮሜችካማጊ አኽⶓ ዙሜካ::

እንፃኽስታንትካዋስታ እንፃኽፃንትካ አችትካዋ ታምትጝፃው ዳምብታ ቴኬማንኩ አችትካ አኹኪ ካምፓንካ ዝኩዋኒ ዳቔርስታንትካ ጊዞ ካፃኑላስ እሜ እንፅኺሾ ቱኒዴስ ፋሌንጋ ዋይሚስታ ያኻንታ ካሊፃው አክም ፌቴርስታይኒጊ ካምፓኒኪ ሌጌሴ አጌራስኪላ ፊትጛኑ ታምብ ኬፍቲኒ ያኼ ንካ አቶ አየነው::

ናካ ፌቴርስትኹ ሼውቲስታ ኩስጚኪላ ኬፄራንትካ ኾትካስ ማልጜ ቴኬማውስታ ጉዳይዳ ትኩቶ እያንታ ካሊፃው አኽጝስ ይሳማ ሲፍጝ ዝኮ ኪላ ንካ::

ሃብታሙ መኮነን ባርዳር ዩንቨርስቲዴስ ሜካኒካል እንጅነሪንጉ ንጙዊኒ ዳቔርስታንቲ ያኹስ ደረጀስታ ካንትኹስ ሊሊትጙንኩ አንኮሌ ሌጌፃውሳ ስልታኔ እይጝስ ኬፄራንትካሊ ክርፂ ቱትጚ ዝኩዋታ ካሊፃውሳ እዩንኩ አኽጝስ አችትካ ፋያኑ አኺኒታጊ ኬፄርስትጝስ ቴርታኩኼኽ ና::አሜት ቺፋ ዳቔርስታንኩ ሚንችካ ክንታንትካዴስ እያ ሊሊታ ፄዋው ዳማጚ፣ጎሌልስትጝስ ዳማሳ አንኮሊስስታ ካሌቕትስ እሚጝ ዝኩኽ ናውሳ ሺሻታ ፄውኽ ስልታኔ እኒ አችትካ እይካኽ ንኹ ዳቔርስታንቲ ሃብታሙ:: ኬፄራንትካ አችትካኪላ ስልታኔ አግፁንኩሳ ወታትካዋ ሳሴርፅካማ ካንታኑላስ ጛው አችትዳጊ ኬፄራንታስታ እንፅኺውሳ ድሎ ፌቴርካያንታ ካሴ ዲግሳ::

ዜጌቫንቲ፡-ሰሎሞን ስንታየሁ