ሰላሙ ዳንጉዊኒስ ጉዲስትኹ

ታደለ አጋጄ

ማድኑ ኢንዱስትሪ እምፕልታቑ እሌት ቺፋሱ ዝኩዊኒዳ ኽሳንቴ ታምቦ ፊትጛው ዜርፍያኽ:: ሌጌሱንኩ አጌርካ ዝቤናዌ ቴክኖሎጄ ቴኬምስትጝስ ናካ ታምቡኑ ልግስኒው አችዳ ታምባንታ ካሊፅኹ ማድኑ ዜርፍስ አኽጝ አቕስቴ:: እኒ አጌርካ ፍትሬቱሳ አብቶ ቱስታው ዳድስ ቴኬምስትጝስ ኽሳንቲ ኢኮኖሚው ልግስኒው አችዳ ታምባንታ ፄዋ::

አሜሪካ፣ ቻይና፣ ደቡብ አፍሪካስታ ካናዳ ማድኑ ምርትስ ዋይሚስታ ያኹንኩስታ ኬፍቲኒ አችስ ማድኑ ኩፕቲ አግስታኩ አጌርካዴስ ቢዲሪዳ ቶኬምስታንኩ አኽⶓ ንባርካ ካንትፃና::

አሌሙ ጊፅዳ ኽሳንቴ ስፍሬ እሜው ማድን ያኹስ ጌቤልዳ እሳንስ ልቕልቕናንኩ ኪላ ማድንዴስ አግስታንኩ ዋይምካኽ::

አሌምዳ አሜት ቺፋ 10 ቢሊዮን ቶንዴስ ጃላ ማድንካ አሜሬትስታና:: እኒጛ ክቻዴስኪላ ሊኽዴስ 75 ታፋ ኢነርጂስ እሼው ማድን፣ ሊኽዴስ 10 ታፋ ቤራቤርካስታ 15ታፋ ዴሜካ ኢንዱስትሪስ እሼንኩ ማድንካኽ:: ሚንችካ ፅናትኩስታ ምርምሪኩ ፁፍካ ምልኻታኑውስታ ማድን እሌት ቺፋሱ አቒያሱ ዝኩዊኒሊ ኩታ ታምትጚ ዝኩⶓ ካንትፄ:: እምፕልታቑ ማድኖ ቴኬምስትጙ አክም ሌጌሳኒ እምፕልታቑ ዝኩዊኒው አችኪላ አብርታ ሌጌሴ::

እን አጌራ ይቶፒያዳኪላ ሚንችካ ማድንኩ አይኔትካ አግስታና:: እኒ ማድንኩሳ አይኔትካ ቱስታው ዳድስ ትክምዳ እሽፅጝዳ ኩፅኒ ሚንችካ ዳንጉንካ ጁዋና:: አማኻሪ ክልልታኪ ያኻ ብሄረሰቡ ቺፅጝፂታ ዎታትካዉ እንፅኼ አቲጙሳ ችግሮ ኽያንኩ ሊሊትጙንኩ ማድንኩ ዜርፍካዳ አሴሜርጙኒ ናካዳ ካንትስታው ሰላሙ ችግር ካንትስታላ እሺኾ:: አዊ ብሄረሰቡ ቺፅጝፂዳኪላ ሊሊትጙንኩ ማድንካ አግስታንኩ አኽⶓ ንባርካ ቶኬማና::

ማድኑሳ ዜርፎ ሊሊትጙንኩ ኾትካዴስ ዳቔርስቱንኩ ዋታትካስ እንፅኺ ዜርፋ ፄውጝስ እንፅኺው ድል ፌቴርስታታ ፄዌካማጊያኽ:: ማድን አጌሩ ኢኮኖሚው አግፅፂ አኽጝታጊ ፍትሬትስ እይስትኹሳ አብቶ ትክምዳ እሽፅጝስ እምፕልታቑሳ ዝኩዊኔ ኬሽጝፅጝስ ካሊስቴ::

ብሄረሰቡ ቹፅጝፂዳ ማድኑ ዜርፍስ እንፅኺው ድል ፌቴርስታይኩ ዎታትካ ክቻዴስ ኪስ ዘላለም አስረሴኽ:: እንዴስ ፍና እሊው እንፅኺው አይኔትዳ እንፃኽስታኒስ እሺካ:: ናካ ኩፅኒ ማድኑ ዜርፍስ እንፅኺው ድል ፌቴርስታይጝስ ቴኬምስታንታ ያኼካ::

ሊሊትጙንኩ ማሽንካውሳ ስልታኔ ካፅጝስ እንፅኺዳ ይስካማ እንፃኽስትጝስ  ዝኩዊኔ ጉሳና:: ፍንሾስኪላ እን እንፅኺው ዜርፍስ እንፃኽስትጝስ ኬሽኹ አችዳ ታምብጝስ እክዶ እሚⶓ ዙሜካ::

እሊው እንፅኺው ድል ፌቴርስታይኹ ዎታት ትላዬ ሰውየው እን እንፅኺሾ ቱኒዴስ ላጛ አሜታ አኽⶓ ዙማ:: እንፃኽስታማ አግፃው ጌንዜብስኪላ  ዝኩዊኔ ጉሴ:: ዎታት ትላዬ ዳቔርስትኹ እንፅኺው ዜርፍስ እንፅኼ አቲጝስ ማድኑ ዜርፍዳ እንፃኽስታታ ፄውⶓ ዲብሳ:: ማድኑ እንፅኺዳ አሴሜርጝጝ ጚጛርትጛሱ ዝኪዊኒስ ያኻውሳ ጌንዜቦ አግፅጝዴስ ፌያማ እሊኩ አቕሊ አቕትጝፅጙሳ ድሎ ፌቴራይኹ አኽⶓኪላ ዲብሳ::

አቶ መሉአለም አማረ ማድኑ ዜርፍዳ አሴሜርጙንኩ አብት ዌናኻ:: ማድኑ ዜርፍዳ አሴሜርጜካማ ሶኼታ እንፃኽፃንትካዋ ኬፄርካማ እንፃኽፃንኩ አኽⶓ ዙሜካ:: እንፅኼ ጄሜሩኑ ጊዝዴስ ጉሽፃማ ጉድ ፊፂምጚዳ አግስታንኩ አኽⶓ ዙሙንኩ አቶ መሉአለም ናካ ላጛ ሚሊዮንዴስ ጃላ ካፒታል ዝኩክ አኽⶓ ዙሜካ::

ማድኑ ዜርፍዳ አሴሜርጙኽ አብት ዌና አቶ ሙሉአለም አማረ አሜሬቱኑሳ ማድኖ እንዝርናንትካ ካፃቲንታ ሰላሙ ችግር ፅንጋኻ አኽⶓ ዲብስካ:: “ጌቤሉ ታምትጚዉ ችግር ዝኮ::ሰላም ያኹኽ ዙራሙሪ ያኹኒ ታምትጚዉ ችግር   ፌቴርስታላ እሺኾ:: ናካ እንፅኺው ልቕልቕቲ ማልጛ ኔኬታ:: ዙራሙሪ ቺፋ እንፃኽስሽታሺኹ ስሩ ልማቱ እንፅኺ ማልጛ ኔኬታ::  አሜሬትንኹሳ ምርቶ ጌቤልስ ዲግስጝስ ካሊናያ” ናኒስ ሰላሙ ችግር ጌቤሉ ታምትጚዳ ችግሮ ታምፅⶓ ጌሌፅካ::

አቶ ሙሉአለም አሴሜርጙኑ ዜርፍዳ ኪሴ ሜዜጌብፅጝስ ጛጛርትጛሳስታ አጌር አቖ እንፅኺው ድልስ ቴኬምስታንታ ፄውጝስ ዜርፍዳ ፅንጋኻ ያኹንኩ ጉዳይካስ ኽይ እይስታታ ካሲካ:: አማኻሪ ክልልታ ፄትቲው ችግርስ ማድኑ ዜርፍዳ አሴሜርጙንኩ አብትዌንካስ ጌንዜቡ ጉሺ እይሰታማጊ ጋቲው አኽⶓ ጌሌፅካማ ማድኑሳ ምርቶ ትክምዳ እሽፅጝስ ካሊስታያሱ አኽⶓ ዙሜካ::

ኬፍቲኒ አችስ ማድኑሳ ምርቶ ዲግስጝስ አሬሳቻንትካሊ ቴቤቤርጜካማ እንፃኽስቴካማጊ አኽⶓ ዙሙንኩ አቶ ሙሉአለም አብትዌንካዋስታ አሬሳቻንትካዋ ቴኬምስታንታ ፄዋው ዜርፍ አኽጝስ እንዴስ ጃላ እንፃኽስትጝስ ቴርትⶓ ዙሜካ::

አቶ ብዙነህ ቦጋለ ማድኑ ዜርፍዳ አሴሜርጙንኩ አብትዌንካው ዎኬልስታንቲያኽ:: ማድኑ እንፅኺ ዋይሚስታ ፄዋው ዜርፍ አኽⶓ ቶኬምካማ እንፅኼ ጄሜሩኑ ልቓ ጊዝ ያኹኒውላ 84 እንፃኽስታንትካስ ጊዛዊስ 13 እንፃኽስታንትካስ ዴሜካ ቲሬንቲስ እንፅኺውሳ ድሎ ፌቴርኹ ዜርፍ አኽⶓ እርዳትፅካ:: ፍንሾስኪላ ሚንችካ እንፃኽስታንትካዋ ኬፄርጝስ ታክስⶓ ዙሜካ::

እሊኩ እንፅኼ ፋያንትካ ዎታትካስ እንፅኺውሳ ድሎ ፌቴርጝስ እክዶ እሚⶓ ቶኬምካማ ዙራሙሪዳ አግስታንኩ እንፅኼ ፋያንትካዋ ኬፄርካማ እንፃኽፅካማጊ አኽⶓ ዙሜካ::

አጌር ሰላማ ያኻኒ አብትዌን፣ ጛርት አቕስስታ ሊሊትጙንኩ ኾትካ ማድኑሳ ምርቶ ጄውጙስታ ቴኬምስትጙ ፋይ ኬፍናው አኽⶓ ቶኬሙንኩ አቶ በዛብህ ሰላሙስታ ፄትቲው ችግር ጌቤሉ ታምትጚ ፌቴርስታቲታ ቻኒስቶ ታምፅⶓ ዙሜካ:: ፍንሾስ ግንባቲው ዜርፍሰ ፋይስታው ግባቶ አሜሬትጝስ ቴርትⶓ እርዳትፅካ::

አዊ ብሄረሰቡ ቺፅጝፂው ማድኑ ሜምሪው አላፋ ዊዛሩ ታየች ዘለከ ብሄረሰቡ ቺፅጝፂዳ ሚንች ማድን አግስታው አኽጝታጊ አጌር አቖ ቴኬምስታንታ ፄውጝስ ማድኑ ዜርፍዳ አብት ዌንካ እንፃኽስቴካማጊ ጛጛርትጛሳስታ እምፕልታቖ ቴኬማንታ ቢኪፅጝስ እክድስ እንፅኺሾ ቱንኩ ያኹኒውላ ሰላሙ ችግር ኩፂ አኬድስትኹሳ ሳኪትጝፅጝስ ፅንጋኻ ያኻ ንካ:: ማድኑ ዜርፍስ እንፅኺሾ ሚፅጝስ አኬድስትኹ 12 ወረድካዴስ ሰላሙስታ ፄትቲው ችግሩ ምክኒያቲስ 7 ወረድካዳ ይቢቺ እንፅኼ ጄሜርፅⶓ ዲብስካ::

ማድኑ ዜርፍስ 2 ማሊዮንዴስ ጃላ ሚፄ ኩፕፅⶓ ዙሜካ:: 2ሻይ 700ዴስ ጃላ ዎታትካስ እንፅኺው ድል ፌቴርስትⶓ ጌሌፅካ:: 53 አችትካ ባይሉ ዳድስ እንፃኽስታንታ ፍካዶ አይⶓ ቶኬሙንኩ አላፋ ሰላሙ ችግራኻዳ ያኼካማ ዴዴጝ ጊዝስ ጉድ እንፅኺ እንፃኽስስትኹ አኽⶓስታ ዎታትካስ እንፅኺው ድል ፌቴርስታታ ፄውስትⶓ ዙሜካ::

ማድኑ ዜርፍዳ አሴሜርጙንኩ አብትዌንካ ሊሊትጙንኩ ወረድካሾ ቱጝስ እንፃኽስትጝስ ካሌካያሱ ሰላሙስታ ፄትቲው ችግር አኽⶓ ዙሙንኩ ማድኑ ሜምሪው አላፋ ኩፒጝስ ካሊስታው እሺኹ ሚፂዳ ቻኒስቶ ታምፅⶓ እርዳትፅካ:: ማድኑ አብትዳ አሴሜርጙንኩ አብትዌንካ ምንግስትሰ ኬያኑ እሺኑሳ ጌንዜቦ ዶንጌታንትካ አይልካስ ኬይጝስ ምንግስት አግፃው እሺኹሳ ሚፄ አቲⶓ እርዳትፅካ::

ማድኑ ዜርፍ እሳንስ እንፅኺ እንፃኽስስታው ዜርፍ ያኹኒውላ ሰላሙ ችግርስ እንፃኽስትጝስ ካሊናያ ንካ::

አብትዌንካ ፄትቲውሳ ችግሮ ምክኒያታ ፄውጝዴስ ኪቻ እንፅኺሾ ቱዌካማ እንፃኽስትጝ ቱስቴ ንካ:: ናካዳ ብሄረሰቡ ቺፅጝፂታ ጉድ ሰላሙ አኺኒ ዝኩኽ አኽጝስ ችግሮ ፌቴራንኩ አካልካ ልማትስ ፅንጋኻ ያኻኑላስ ሰላምስ ኩስጝጝ ቱስቴ ንካ::

ማድኑ ዜርፍስ ምንግስት ሊሊቴ ትኩቶ እያማ እንፃኽስታው አኽⶓ እርዳትፅካ:: ይቶፒያ ዝኩኽሳ ማድኑሳ አብቶ ቱስታው ዳድስ ቴኬምስትጝስ እንፅኻ ጋቲታ ዝኩንኩ ሚንችካ ዎታትካዋ አሴሜርጝፅጝስ ናካ ዝኩንኹ ሰላሙሰታ ፄትቲው ችግርዴስ ፊጝስ ካሊስታታ ሊሊቲ ትኩት እይስታማ እንፃኽስቱኒ ጛርትስኪ ያኻ አጌርታ ኽሳንቴ ኪሴ ካንትፃው ዜርፍ አኽⶓኪላ ጌሌፅካ::