ባኩ እንጛርጛሲያኽ

ዘውዴ በካሉ

ባኩ ፋዩ አግልግሎት ንጝ አቕ ፍካዴና አኽጝዳ ትኩታማ እርዳቴ ፋያንኩሳ እምፕልታቖ ግርብስኪ ያኻ ጌንዜብስ እንቲታኪ አሳብስ እርዳትጛኑ ቴግባርያኽ:: ባኩ ፋዩ አግልግሎቲ ሊኪስታው ጌንዜብስ አኹኪ ሳትስ ያኻውላስ ፋዩ ጁትጚስያኽ:: ጌንዜብስ ጄውስትጝስ ካላቲው እን ባኩ እንፅኺ ሚንችካ እምፕልታቕኩሳ ቤንካዋ ቴኬምስታንታ ፄዋው ቴግባርያኽ:: ይቶፒያዳ እርዳትጝጚው ባይል ፕሮግራም እምስታማ እንፃኽስታውላስ ይጉኒኪላ ዴስስትኹ ቴግባር አኽጝ አቕስቴ:: ባኩ ቴግባር 2016 ም.አሜቱ ችኹ ባኩ አግልግሎቲኪላ “ባኩስታ እምፕልት ይቶፒያው ኬፍቲስ” ናው ጉሳንቲ እንፅኼንትስ ሊሊትጙንኩ አጌርኩ ቤንካዳ አኮሜችስታማጊያኽ::

ችኹ አርፊዳ 14 ዜርፍካስ 34 ሚሊዮንዴስ ጃላ ባኩ ፍካዴንካ አሴቴፍጛንኩ ያኻኒስ 49 ሚሊዮንዴስ ጃላ እምፕልታቕኩ ቤንካዋ ቴኬምስታንታ ፄዋው አኽⶓ  ቤረሰቡ ቺፅጝፂ መንግስት ኮምኒኬሽንዴስ አግስቱኹ ፍሽኹ ንባር ምልኻቴ:: እንጚኪላ ጌንዜብስ ኪስስታኒ 26 ቢሊዮን ብሮ ፍሻውሳ አግልግሎቴ እይጝስ አኬድስትጝኪላ ጌሌፅስታ::

2016 ም/አሜቱ ችኹ ወክትዳ ሊሊትጙንኩ አጌርኩ ቤንካዳ አግስታንኩ ወታትካ ባኩ እንፅኺዳ አሴቴፍጛንኩ አኽጝኪላ አቕስቴ:: ችግኞ ቴኬልጝስ፣ ብሬ እይጝስ፣ ኬቴምዳ ትራፊኩሳ ዴንቦ ኬቤርፅጙ አግልግሎቲስ፣ ችኹሳ ይስጝፄ ክንቴ ክንትፅጝስ፣ አክማ ጋቲንኩሳ እምፕልታቕኩሳ ቤንካዋ እርዳትጝስስታ እሊኩሳጊ ቴግባርካዋ አኮሜቻና::

አማኻሪ ክልልታኪላ ችኹ ባኩ ፍዩ አግልግሎቲ 8 ትኩሚ 2 ሚሊዮን ያኻንኩ ባኩ እንፃኽስታንትካ 14 እንፅኺው ዜርፍዳ አሴቴፍጜካማ እንፃኽስታንኩ አኽⶓ ክልሉ ስፖርት ቢሩ አሚኮስ ጌሌፅካ::  እን ጊዝዴስ ጊዞ  እሳንጛማጊ ይንትኹ ባኩ ፋዩ ቴግባር  አዊ ብሄረሰቡ ቺፅጝፂዳ እንጃቢሪ ኬቴምዳ ብሬ እይጝስ አኹኪ ሌጌስጝስ  ፌይኹ ሶኼትዳ አግልግሎቲ ጄሜርስታ::

ባኩ ፋይስ ብሬ እይኹስታ ስልኪስ ዙሚትጝንኹ ክንታንቲ ተሻለ አዳል ብሬ እይጝ ሹኻንቲ ጊዝስ አኽⶓ ዙማ:: ክንታንቲ ፍንሾስኪላ እምፕል አቒውሳ ይዎቶ ኬሽፅጝስ ብሬ እይጝስ ቴርትⶓ ዲብሳ:: “ቲኪስታውስ ብሪስ ቲኪስታቲውሳ አቒውሳ ይዎቶ ይጉፅጝ” ሚንቾ ሜስዋቴ ካሴቲው አኽጝስ እን ቴግባር ይስጛማ ሲፍጝ ፋይፃው አኽⶓኪላ ዲብሳ::

እሊው እንጃቢሪ ኬቴሙ ዝኩዋንትካ አቶ በወከት ቢተው 2016 ም.አሜቱ ባኩ ፋዩ አግልግሎቲ ብሬ እይጝስ ጄሜርጝ ክርፂ ቴግባር አኽⶓ እንክርፄካ:: ብሬ እይጙሳ ቴግባሮ ኪላ ሴዛንቲ ጊዝስ አኽⶓ ድኹዌካማ ፍንሾስኪላ ብሬ ፋያውስ አቒስ ብሬ እይጝስ ፍካዴንካ አኽⶓ ድኹዌካ::

ፌይንኩ ሚንችካ አርፍካዳ ክልልታ ናማኪ ብሄረሰቡ ቺፅጝፂታ ፌቴርስትኹ ሰላሙ ችግርዳ ሚንችካ ቹትካስታ እምፕልታቕኩ ቤንካ ብሬ አቴካማ ይዎቶ አቲⶓ እንክርፁንኩ አቶ በውከት ውላጊ እምፕልታቕኩ ቤንካ ብሬ እይጝስ አኹኪ ሌጌስጝስ አቑሳ ይወቶ ይጉፅጝስ እንፃኽስታንታኪላ እንፅኼንቶ ፌያፌይጝፅካ::

አዊ ብሄረሰቡ ቺፅጝፂው ወታትካውስታ ስፖርቱ ሜምሪው አላፊ አቶ ካልአብ ካሃሊው 2016 ም.አሜቱ ችኹ ባኩ ፋዩ አግልግሎቲ እሳንስ አኮሜችስታማጊ አኽⶓ ጌሌፅካ:: አኮሜችስታንኩ ቴግባርካ ክቻዴስ ብሬ እይጝ እምፕል አኽⶓ ቶኬምካ:: አቶ ካልአብ ኑኑውስታጊ ክልልታኪ ያኻ ብሄረሰቡ ቺፅጝፂታ ካንትስታማጊ ዝኩኽሳ ብሪውሳ እንፂⶓ ይጉፅጝስ ሰላም ያኹኽ  ዙራሙሪዳ እን ችኹ ወክትዳ ኬቴም ቺፋ 500 ዩኒት (ክሪፂቴ) ብሬ ኩፕፅጝስ አኬድስትⶓ እርዳትፅካ:: ብሬ እይጙ ጂሚርፂ ፕሮግራምዳኪላ እንጃቢሪ ኬቴሙስታ ዙራሙሪኩ እምፕልታቕ ጁትጝጚስ ብሬ እይⶓኪላ አቶ ካልአብ ጌሌፅካ::

“እምፕላ ቹዋ ብሬ አቲጙ ምክንያቲስ ክርጝ እላኽ” ኑንኩ አላፊ እን ብሬ እይጙ ቴግባር እሊኩ ኬቴምካዳኪላ ይስጛማ ሲፋው አኽⶓ ጌሌፅካ:: ብሬ እይጙ ቴግባር አገው ግምጃቤት ኬቴምዳስታ፣ ዳንግሊዳ፣ ክላጅዳ፣ ፋንድካዳስታ እሊኩዳጊ ዙራሙርካዳ እንፃኽስታማጊ አኽⶓኪላ እርዳትፅካ::

ባኩ ፋዮ አግልግሎቲ አጌርታጊ ሴኒ 28 ጌርክ 2016 ም.አሜትዳ ጄሜራማ አኮማችስታማጊ አኽⶓ ጌሌፁንኩ አላፊ ብሄረሰቡ ቺፅጝፂታኪላ 13 ዜርፍካስ እንፃኽስትጝስ እክድ እምስታማ እንፃኽስትካማጊ አኽⶓ እርዳትፅካ:: ባኩ ፋዩ ቴግባር ፍንሾስኪላ ይስጛማ ሲፋው አኽጝስ ትኩታኩ ቤንካ አብርታ አኽጝስ ዋይሚስታ ፄውጝ ቱስታው አኽⶓ ጌሌፅካ::

እንጃቢሪ ኬቴሙ ቺፅጝፂዳ ወታትካውስታ ስፖርት ፅፌትጝናዳ ወታትካዋ አቺትጝፅጙ ውማይቲኒ አቶ ብርሃኑ ወለሊ 2016 ም.አሜቱ ችኹ ባኩ ፋዩ አግልግሎቲስ ኬቴሙ ቺፅጝፂታጊ 12 ሻይ 653 ወታትካዋ አቺትጝፅጝስ እንፃኽስቴካማጊ አኽⶓ ጌሌፅካ:: አክማ ጋቲንኩስ አቕስ ጝኖ ፄጌንጝስስታ ጊቢትጝስ፣ ሰላሙስታ ዴክቱ ዙሪዳ ሼውቴ ፌቴርጙ እንፅኺስ፣ አምሉ አሻሪው እንፅኺስ፣ ብሬ እይጝስ፣ ዳምቦ ፄጌንጝስስታ ፋይፃው ስፍሪዳኪ ጊቢትጝስ፣ ትራፊኩሳ ዴንቦ ኬቤርፅጝስ፣ ክንታንትካስ ችኹሳ ይስጝፄ ካንቴ ክንታንታ ፄውጝስስታ አሊኩሳጊ ባኩክሳ ቴግባርካዋ አኮሜችጝስ እንፃኽስትካማጊ አኽⶓ አቶ ብርሃኑ ጌሌፅካ::

ኬቴሙ ቺፅጝፂታጊ ብሬ እይጙ ቴግባር አኮሜችስትⶓ ጌሌፁንኩ አቶ ብርሃኑ 30 ባኩ ፋዩ እንፃኽስታንትካዴስ 30 ዩኒት አኹኪ 10 ሻይ 500 ሚሊ ሊትር ብሪ ኩፕንⶓ እርዳትፅካ:: እንጃቢሪ ኬቴምታጊ ሆስፒታልዳ ብሪው እንፂጝስ ሚንችካ ካሜናንትካ ቹትካስታ ቑንዳስቱንኩ አቕ ይዎቶ አቴካማጊ አኽጝስ ብሬ እይጝ ይስጛማ ሲፋው ቴግባር አኽⶓኪላ ጌሌፅካ::

እን ቴግባር ችኹ ወክትዳ ይቢቺ  ያኻውላስ ዋሺኒኪ ጊዝስ ፋይፃንቲ አኽጝስ ባኩ ፋዩሳ አግልግሎቴ ውላጊ ማቤር አቕ አላፍትስ እንፃኽስታንታኪላ እንፅኼንቶ ፌያፌይጝፄካ::