ይቶፕያስታ ኦሎምፒክሱ እንዝጚ

ደመላሽ መለሰ

ይቶፕያ ኦሎምፒኩ ልኺትጚዳ ንⶓሳ ዴሜካማ ፅክራ አንኩዊኒ ልኺትጜ ቤንጝታ።

ኦሎምፒኩሳ ልኺትጜ 1956 ቤልቦረንዳ ላኹ ኔታ ፅክራ ላጛ አትሌትካስ ልኺትጜ ጄሜርቱት እን አጌራ ይትዮፕያ ልኺትጚዳ ዋይሜ አቴታ ድላ ጋቲታ ዙርታ።

ሜዳልያ ጋቲታ ዙርጝስ ማቒቼታ1960 ሮምዳ ካስጙኽሳ ልኺትጜ ፅካ አትሌትካስ ቤንጝቱት ይቶፕያ አባላምቴ ኦሎምፒኩሳ ሜዳልያዋ አበበ ቢኪላስ ሜዜጌብፅጝስ ካሌ።

ቻማ ጋቲታ ናኺሲ ልኩስ ጊጝጝስ ሻምፕዮና ያኹኽ አበበ ቢኪላ ኦሎምፒክስዳ ወርኮ ኬፍፅጝስ አባላምቲ አፍሪካዊ አኽጝስ ካላ።

1964 ኦሎምፒኩሳ ልኺትጜ ካብስ ቤንጙኽ አበበ ቢኬላ ማራቶኑሳ ልኺትጜ ድልስ ፊጝስ ላጛንቴ ወርኮ ሜዜጌብፃ። አሌሙ ፍንዳ ድኽትስ አቕስቴፃ ይቶፕያዋ ጊጚስ ስሞ ኪሳማ እን አጌራ ይቶፕያዋ አሌም ጊጚስ ያቓታ ፄዋ።

1968 ሜክሲኮውሳ ልኺትጜ አትሌትካውሳ ቼፎ ኪፍፄታ 18 አትሌትካስ ልኺትጜ ቤንጝቱት ይቶዮፕያ ቤዴራ አበበ ቢኪላስ ኬፍፅⶓ ጄሜርትኹሳ ወርኩሳ ሜዳልያዋ ማሞ ወልዴስ ሳኪትጝፄታ1972 ሙኒኩሳ ልኺትጜ ላጛ ናስስ ድላ ጋቲታ አጌርሾ ዙርቱስ 1976ስ ልኺትጚዴስ ሴጋ ታኻ።

1980 ሞስኮውሳ ልኺትጜ 45 አትሌትካስ ልኺትጝቱት ይትዮፕያ አንኮ ሻይስታ ፅካ ሻይ ሜትሩ ጊጚው ሊክ ምሩፅ ይፍተርስ ላጛ ወርኮ ጉሽጝስ ካሌ፡፡

አሜትዴስ አሜቶ ጊጚስ አቕስታንታ ታኻታጊ ቲንቱት ይቶፕያ 1984 ስታ 1988 ኦሎምፒኩሳ ልኺትጜ ቤንጝታውላ ይጉጝስ ካሌ።

1992 ባርሴሎናዳ ካስጙኽሳ ልኺትጜ ላጛርጛ አትሌትካስ ወኬልጝስ 10000 ሜትርስ ደራርቱ ቱሉ ወርኮ ኬፍፅጝዴስ ድምክና ላጛ ናሶ ጉሽጝስ ትክላሊስ ሹኻ ሜዳልያዋ ኪፍፄታ አትሌቲክስስ 33ንታ ታኻታ ልኺትጜ አሊዲት አጌራ ታኻ። 1996 አትላንታውሳ ልኺትጜ 10ሻይ ሜትርስ ሀይሌ ገብረስላሴስ ወርኮ ጉሽቱስ ማራቶኑ ልኺትጚስ ፋቱማ ሮባ እሊውሳ ወርኮ ጉሽታ።

እኒ ትንታግ ጊጛንትካስ ስሞስታ ክብሮ ኬፍፄታ አቕስታንቶ አግፂት ይቶፕያ 2 ሻይ  ሲድኒውሳ ልኺትጜ ላጛርጛ ዋልታ አትሌትካስ ወኬልስትጝስ ሴዛ ወርኮ፣ እምፕሎ ብሮስታ ሹኻ ናሶ ኬፍፅጝስ አትሌቲክሱ ልኺትጚስ ላጛርጛንታ ታኻታ አሊዴ።

ልኺትጚዳ ወርኮ ጉሹንኩሳ አትሌትካዋ ካንትናኒ ገዛኽኝ አበራ ማራቶንስ፣ ሀይሌ ገብረስላሴስታ ደራርቱ ቱሉ 10ሻይ ሜትሩ ጊጚስ ሚልዮን ወልዴስ ዴሜካ አንኮ ሻይ ሜትርስ ወርኩሳ ሜዳልዋ ጉሽካ።

ማራቶኑ ልኺትጚዴስ ድምክና ፅካ ሻይስታ አንኮ ሻዩ ልኺትጚስ አሜትዴስ አሜቶ አቕስታንቶ አግፄታጊ ቲንቱት ይቶፕያ 2004 አቴንሱ ልኺትጚዳ ላጛ ወርኮ፣ ሹኻ ብሮስታ ላጛ ናሶ ትክላሊስ ላጜታ ሜዳልያ ዌና አጌራ ታኻ። ላርጛ ዋልታ ልኺትጛትካዴስ እምፕል ከነኒሳ በከለ ፅካ ሻይ ሜትርስ ወርኮ ጉሹስ መሰረት ደፋር ዴሜካ አንኮ ሻይ ሜትሩ ጊጚስ ወርኩሳ ሜዳልያዋ ኬፍፄ። 2008 ኦሎምፒክሱ ልኺትጚዳ ላጛርጛ ላጜታ አትሌትካ አሴቴፍጙንኩ ያኻኒስ ልኺትጚዳኪላ ሲድኒዳ ሜዜጌብስትኹ ወርኩ ሚንቺት ቤጂንግዳ ካቢስታ።

እን ልኺትጚዳ ከነኒሳ በከለ 10ሻይስታ አንኮ ሻይ ጊጚው ልኺትጚስ ወርኮ ጉሹስ ትሩነሽ ዲባባሾስ 10 ሻይስታ አንኮ ሻዩ ጊጚስ ወርኮ ጉሽጙስ እሊውሳ ታሪኮ ፃፌ። 2012 ኦሎምፒኩ ልኺትጚዳ መሰረት ደፋር አንኮ ሻይስ፣ ትሩነሽ ዲባባ ፅካ ሻይስ፣ ቲኪ ገላና ለንደንዳ እሊውሳ ታሪኮ እንፃኽስቴካ።

2016 ልኺትጚዳ አልማዝ አያናስ እምፕሎ ወርኮ አግጝስ ካሊት ይቶፕያ ወርክዴስ ድምክና ላጛ ብሮስታ አንኮ ናሶ ትክላሊስ ሶኼታ ሜዳልያዋ ታጋ።

2020 ቶኪዮውሳ ልኺትጜ ቤንጙንኩ 38 አትሌትካዴስ እምፕል ሰለሞን ባረጋ እምፕሎ ወርኮ ጉሹስ እሊው እምፕል ብርስታ ላጛ ናስኪላ እሊኩ አትሌትካስ ሜዜጌብስታ። ቤዴራሱ አትሌቲክሱ ታሪክስ 23ወርኮ፣ 12ብሮስታ 23ናሶ ኬፍፅጝስ ትክላሊስ 58 ሜዳልያዋ ኬፍፅጝስ አትሌቲክሱ ታሪክዳ እንጅኩዌ።

2024 ኦሎምፒኩ ልኺትጚዳ ሹኻፅካ ሴዛ አትሌትካስ ወኬልስትጝስ ልኻ ዊድፄ ቡንካዋ ፄውታታጊ አግስቴት ይቶፕያ ቤዴራሱሳ ታሪኮ ሲፍፄትማ ሲፍፃቲቲይ ናውሳ ዴሜካ አብርታ ካንትናኻኽ ናውሳ ንባሮ ኦሎምፒክሱ ማቤራዊ ታምትጝፂው ፍንዴስ አግፅና።