ስምስ እቑትጛንኩ አፍሪካሱ እኒካ

አለሚቱ የኔት

አሌምዳ ቹዋስ ሹኻ አይኔትካ እኒዉ ዜር አግስታና:: ˝ሳቫናህ” እኒ አኹኪ ሊጊሲሚ  ክይ አግስታዉ ዙራሙሪዳ አግስታዉ አፍሪካዉ ካዌኑ እኒስታ እስያዉ እኒ እስትጝስ እቑስታና::

እኒካ ሊጊሲሚ እንኮኺስ፣ እርኩዊስስታ ኩንቢስ ቹዋስ አቕስታና:: እኒ ብቲዳ አግስታንኩ እንሴስካዴስ ድንጉልትስ ልኺትጛንቲ አግስታው ካዌኑ እንሴሲያኽ::  አፍሪካዉ እኒ እስትጝስ እቑስታዉ ጝርጂ እኒ ሹኻ ሜትራሳ ላኬዉሳ ቲሬ ፃይኹ ያኹስ ሲዚ ሻይዴስ 7 ሻያ አንኩዋ ኪሎ ግራሞ ዴሜካ ይዝኩቶ ሚንዛናንኩ አኽⶓ ንቫርካ ቶኬማና::

አፍሪካዳ አግስታንኩ እኒካ ስምስ እቑትጜካማጊ ቱትጛንኩ አኽⶓኪላ እስካዊ ፅናቱ ዋይሚ ቶኬማ::

ኮሎራዶ ስቴቱ ዩኒቨርሲቲ አፍሪካዉ እኒካ ጛስ ጛዋ ቱትጛኑሳ ስሙሳ እቑፄ ቴኬምስታንኩ አኽⶓ ይፋ ፄዋ::

ኮሎራዶ ዩኒቨርሲቲዉ ምዳር ፅንታዉ  ማራማርጛንትካስ ይፋ ያኹኽ እሳካዊ ንባርስ እኒካ ጊሪምፂ አኺኒስ ሊሊትጙኽ ስያሚስ እቑትጛንኩስታ እቑፂስ እያኑ ዙርሚኪላ እምፕል እሊዉዴስ ሊሊቲ ስም ዝክኹ አኽⶓ ካንትፃዉ  አኽⶓ ቶኬማዌኽ::

ማራማርጛንትካኪላ እኒካ ቱትጛ ኑ ዳድስ ፂኒስጝስ ካስጝፁኑ ሲፍጝጚስ አቕ እንኮኽጝስ ቺጊርፂ ያኹኽ ድምፅስ እንፅኼንቶ ቻቤልጛኒስስታ እንስኪላ ዙርሜ እያኒስ ሼዉ ንⶓ ቶኬምካ::እኒካ እይስትኹ ስምስ እቑስታኒስ ኩምቤስታ እንኮኼ ልቕልቕፅጝስ ዙርሜ እያንኩ ያኹስ ሲፍፅጝስኪላ እቑዊኹ እኒሾ ዲግጝስ ቱትጛንኩ አኽⶓ ፂኒሳንትካ ጌሌፅካ::

እኒካ እቑፂስ ቴኬምስታኑ ድምፅ ስም አኽⶓ ቼሜትጝፅጝስ ሊሊትጙኽ ድምፁ  ማራማርፄ ማሽኖ ሳይንቲስትካ ትክምዳ እሽፁንኩ ያኹስ ሊኽዴስ 28 ታፋሳ  ያኻዉሳ ጊዞ ዋሺኒ ስም ዋሺኒ እኒስ እይስትኹ አኽⶓ ክችክቺስ ጌሜቱንኩ አኽጝኪላ ጌሌፅስታ::

ኬንያ ኢምቦሲሊ ፓርክዳ ካስጙኽ ፅናትስ እኒካ አቒ ይሪታጊ ስምካዋ ቴኬምስታንኩ አኽⶓ ቼሜትጝፅኑኒኪላ ዉላጊ እኒካ ስምስ ቱትጛና ናዉዳ ትክሊልጝፂዳ ታምብጝስ ድምክኒ ምርምሪ  ፋይፃንቲ አኽⶓ ማራማርጛንትካ ጌሌፅካ::

ማራማርጛንትካ እን እስካዊ ምርምሪዉ ዋይሚ ኪላ እኒካ ማቤራዊ ቱትጚ ዝኩክ ፍትሬትካ አኽⶓ ቼሜትጝፅⶓ ጌሌፅካ:: በከከን አኹኪ ፓሮትካስታ ዶልፊንካ ቱትጚዉሳ ስሞ ቴኬምስትጝስ ካላና ናዉስ ምዳር ፅንታዉ ማራማርጛንትካ ምስልካ ምርምርካዋ ካስጝፄካማጊ አግስታና::