ፋይስታንቲ ቴክል

ታደለ አጋጄ

አሌምዳ ዝኩንኩ  እዝብካ ክቻዴስ ሹኻ ቢሊዮን ያኻንኩስ አብቱ አግፅፂያኽ:: ሹኻ ሚሊዮን ዶላርዴስ ጃላ አሌሙ ጊፅዳ እሳንስ ልቕልቕኔ::

ዴንስ ሾፌንስትኹ አሌሙ ብቲዴስ 36 ሚሊዮን ሄክታርዴስ ጃላ ብቴ ሾፌና:: እምፕል ትኩሚ ሹኻ ቢሊዮን ያኻው ዜርፍ ዝኩኽ አኽጝ ዙሚስቴ:: አሬኽትስ ሌጌሳው፣ ጚጛራሳ አዴሳው፣ እሳንስ ዋጋዉ ፣ ዜሬቕቲኒ ዋይሚ፣ ዙራሙሬ ማንዲጙስታ ግዲፅጙ፣ ድኽቶ ኔኬትጙስታ ፄጌርጙንኩ ሺሽፅካ ባይርካስታ ዜርፋ ሚንች ትክምስ ማልጛ ፋይስታንቲያኽ አኒኒ::

ይቶፒያዳ እምፕል ሚሊዮን ሄክታር ብቲ አኒኒው ቴኬልስ ሾፌንስትኹያኽ:: ሚሊዮንስ ቼፍስታንኩ ይቶፒያንካስ ዝኩዋኒስ ሚፂው አግፅፂ ያኻማ አጌላጌሌ:: ይቶፒያዳ ዝኩኽ ዴኑ ሜቴንዴስ ሊኽዴስ 3 ትኩሚ 5 ታፋ ያኻው ታምብ ዝኮ::

አማኻሪ ክልልዳ አኒኒው ካኒ ሚንቺትስ አግስታንኩ ክልልካ ክቻዴስ ቶኬምስቴ:: ዴሬኹሰታ ኩሉ አኒኒ እስታንኩ ላጛ አይኔት ዜርካ አግስታና:: ኩሉ አኒኒው ዜር ምራብ አማኻሪ ኩሉ ዙራሙሪዳ አግስታው ያኹስ ዴሬኹ አኒኒ እስታው አኒኒው ዜር ዴሜካ አዊ ብሄረሰቡ ቺፅጝፂው ዙራሙሪዳ አግስታንኩ ዴሬኹ ዙራሙርካዳ ሚንችትስ ዋጌ::

ኪቢርስቲንኻ አንቤባንትካ ናካስ እንቶጂስ አንቤብፅጝስ ፋንኹ አዊ ብሄረሰቡ ቺፅጝፂው ዙራሙሪዳ አኒኒው ቴኬል ብሄረሰቡ ቺፅጝፂው እምፕልታቑ ባይልሊ ዝኩኽሳ ታምትጜ፣ ቴክል እያውሳ ትክሞሰታ አኒኒውሳ ቴክሎ ሊሚፅጝስስታ ማንዲጝስ ፄውስታማጊ ዝኩኽሳ ልቕልቕቴ ካንታውስ አማኻሪ ክልሉ ምንግስት ኮሙኒኬሽን ቢሩ አቴምፅኹ ሜፄትዴስ አግፅንኹሳ ንባሮኽ::

አኒኒው ቴክል እያው ትክምዴስ እምፕል ባይልሊ ዝኩኽ ታምትጚያኽ:: አኒኒው ቴክልዴስ ጊቢትስታንኩ ሊሊትጙንኩ ጝንኩ አጌላጌልፅካ አክኽካ ብሄረሰቡሳ ባይሎ ካንትፃው ዳድስ እንፃኽስስታና::

አዊው እዝብስታ አኒኒው ቴክል እምፕል ሳንቲሙ ላጛ ፍንካታ ይስጙኽ ታምትጚ ዝኩኽ አኽⶓስታ እዝብኪላ አኒኒዴስ ሊሊትጙንኩሳ አክኽካዋ እንፃኽስታማ ቴኬምስትጝ እጂኹ ዴስ ዝኩⶓ ባይልስታ ቱሪዝሙ ሜምሪዳ ማሌፋማ ሊፊው ውማይቴኒ አቶ ዘውዱ ጋሻው ዙሜካ::

አኒኒዴስ ግቢትስታንኩ አክኽካዋ ካንትኑስኪላ አሪውሳ ጉሊንቲ፣ ኮሌምሼሽ አንኪ እንኩርስታው ምሱብ፣ ወንቤር፣ ኻግስታ ቲሪምቢዜ ቶኬምስታና:: አኒኔ ቴኬምስትጝስ ጝንኩ አጌላጌልፅካ አክኽካዋ እንፃኽስትጙ ዴስ አዊው እዝቡ ባይልስታ ዴስ ናካዳ ዝቤናዊ ያኹኽ ዳድስ እንፃኽስስታታ ፄውስታማጊ አኽⶓ ውማይቲኒ ዙሜካ::

ጝንኩ አጌላጌልፅካ አክኽካ ዝቤናዊ ዳድስ ግቢትስታንታ ባይሉስታ ቱሪዝሙ ሜምሪ አሜሬታንትካስ ስልታኔ እይጝስ፣ ባይሎ ባይፃኑላሰ እንፃኽስታንታ እርዳቴስታ ሲፋሲፍጜ ፄዋማጊ አኽⶓኪላ ጌሌፅካ::

አኒኒዴስ ግቢትስቱንኩሳ አክኽካዋ ባዛርዳሰታ እሊው ታፍ ትቤብ እንፅኽካው ዋይምካዋ አቕትጝፅጙ ሜድሬኽዳ እክድስ ቴርስጝስ አቕትጝፅጙ እንፅኺ እንፃኽስስታማጊ አኽⶓ ዙሜካ:: ያኼስጉ እን ዳላው ጋቲው አኽጝስ ምርትካዋ አቕትጝፅጙ፣ አሜሬታንትካዋ ሴሌቴንፅጝዳስታ እርዳትጝዳ ሚንቾ እንፃኽስትጝ ፋይፃው አኽⶓ ጌሌፅካ::

ዎታት ፈንታቢል ትሩነህ አዊ ብሄረሰቡ ቺፅጝፂዳ እንጃቢሪ ኬቴም 01 ኬቤሊ ዋግኽምራ አደባባይ ዙራሙሪዳ “ፈንታቢል ዝቤናዊ አኒኔ ግቢትፂ አችት” ናውሳ ብሳማ እንፃኽስታማጊ አግስታውያኽ:: አኒኒዴስ አክኽካዋ ግቢትጝስ እንፃኽስትⶓ ጄሜሩኒዴስ ላጚቲ አሜታሳ ቼፍፃ:: እኒጛ አሜትካዳኪላ ሚፄ ሌጌፅጝስ፣ ውማዩሳ ካሌቕቶ ኬፍፃማ ቴኬምስታንታ አኽⶓ ዙማ:: ናካዳ 500 ሻይዴስ ጃላ ያኻውሳ አብቶ አጌላ::

ውማዩስታ አቕቱሳ ክንቴ አኒኒው ዲዛይኑስታ ማሌፋ ማሊፊው ዙሪዳ ሊሊትጙንኩ ጊዝካስ ምንግስትኩ ኾትካስታ እሊኩ አችትካ እዩኑ ስልታኒዳ ፄውኽ ቴሳትፉስ ቴኬምስታንታ ያኻ::

እንፅኺ ድላሳ ፌቴርጝዳኪላ ጝን አቖስታ እሊኩ ዎታትካዋ ቴኬምስታንታ ፄዋ:: እሊኩ ክቻ እንፃኽስታንኩ ሚንችካ ዎታትካዋ አሴቴፍጝፅጝስ 600 ሻይዴስ ጃላ ብሮ ሚፄ አግፄካማ ቴኬምስታንታ ያኻንታ ፄዋ::

ዎታት ፈንታቢል እይስታንኩ ስልታንካ ዴዴጝ ጊዝስ አኽጝስ ዳላውሳ አቕቶስታ ካሌቕቶ እሚጝስ ካሊፃቲው አኽጝስ ዝቤናዊ ሜሳሪስ ሊጊሲሚ ጊዙ ቴግባሩ ዴስጝጚ ምንግስትስ ያኻ እሊኩ አችትካስ እይስታታ ካሴ::

“አኒኔ ግቢትጝስ ቴኬምስታኩ ማችድ፣ ምካይ፣ መጋዝስታ ማርቴሎ ፄጌርጛንኩ ሳሴርስታ እንግራ ይጉካ ሜሳርካስ ሳሴርካ ጝንኩ አክኽካዋ ግቢትጝስ ዎሴንስታታ ይኩዋላ” ና::

ይንታውስ ጛርትሰኪላ ያኹኒ አቕቶስታ ውማዬ ሌጌፅጝስ አኒኒውሳ እንፅኼ ዝቤናዊ አችሾ ሌጌፅጝስ አኒኒውሳ ፋብሪኬ ብስጝስ ፋያው አኽⶓ ዲብሳ:: እንስኪላ አኒኒዴስ አግሰታው ዜርፋ ሚንቺ ትክም ሳኪትጙኽ ያኻታ ትኩት ፋይፃው አኽⶓ ዙማ::

ናካዳ አኒኒ ካኒው ዲግስጝጚዳ እንፂጝ እላ ያኹኒውላ ይንታውስ ኬሴትስትጙ ድል ዝኩጝስ ካላው አኽጝስ አሬሳቻንትካ ቴክሎ አንኬባንኬብጝዳስታ ሊሚፅጝዳ ትኩቶ እይካማ እንፃኽስታንታ ይስጝፅጝ ቱስታው አኽⶓ ድኹዋ::

ናካዳ አሜሬትስታንኩ አኒኒኩ ዋይምካዳ ጌቤሉ ታምትጚው ችግር እላ አኽⶓኪላ ዙማ:: “ፋያኑሳ አኒኒዴስ ግቢትስትኹ አክኼ ስፍሬኺስታ ይንቴካማ ካፃና:: እንኪላ ሊሊትጙንኩ ኢግዚቪሽኑ ሜድሬኽዳ ፄውስትኹ አቕትጝፅጙ እንፅኺሲያኽ:: እንሳ ፄውኽኪላ አዊ ብሄረሰቡ ቺፅጝፂው ባይሉስታ ቱሪዝሙ ሜምሪስታ አማኻሪ ሚዲያ ኮርፖሬሽን ኬፍ ንኹሳ ፍሼ እንፃኽስቴካ” ኑስ ሚዲያስ አቕትጝፅጙ እንፅኺ አኮሜችስትⶓ ጌሌፃ:: አቕትጝፅጙ እንፅኺስ ኬሽኹ ጌቤሉ ታምትጚ ፌቴርስታይኹ አኽጝስ ምስጋኔ ዲግሳ::

አኒኒው ካኒ ፋይስታንት ዴሜካማጊ አንትጝሊ እምትጛማ ይንታውስ ቴክሎ እጂፅጝስ ካሊስታው ቱስታው ዳድስ ሊሚፅጝስ፣ አንኬባኬብጝስስታ ማንዲጝስ ካሊስታኒያኽ ኑንኩ ዴሜካ አዊ ብሄረሰቡ ቺፅጝፂው ግብርኒው ሜምሪው ፍትሬት አብቱ ልማት ማንዲጚው ኬቹ ጉሳንቲ አቶ አዲሱ ስማቸውያኽ::

አምሉ አሻሪው ሜርሃ ግብርስኪላ እሊው ችግኙ ቴክልታ አኒኔ ሊሚፅጝስታ አንኬባኬብጝስ ማንዲጝ ቱስታው አኽⶓ ቶኬምካ::

ናካዳ ዞንታ ዝኩኽ 39 ታፋ ዴኑ ሜቴንዴስ 5 ታፋ አኹኪ 20 ሻይ ሄክታር ብቲዴስ ጃላ አኒኒው ቴክልስ ሾፌንስትኹ አኽⶓኪላ ጌሌፅካ::

ብሄረሰቡ ቺፅጝፂታጊ ሚንቺትስ አግስታንኩ ላጛ አይኔትካ አኒኒኩ ዜርካ አኽⶓ እርዳትፅካ::

200 ኢንተርፕራይዝካ አኒኒው ቴክልስ አብቱ አግፅፃ ፄዌካማ ጛጛርትጛሳስታ ጝናአቖ ቺፅጝፄካማጊ አኽⶓኪላ እርዳትፅካ::

260 ዴስ ጃላ እምፕልታቕኩ ቤንካ ፍካዶ ካፅጝስ አኒኔ ሊሚፅጝስ ምንግስትስ፣ ጛርት አችትካስስታ አሬሳቻንትካስ ዋይጝስ ቴኬምስታንታ ያኹንኩ አኽⶓኪላ አላፊ ጌሌፅካ::

35 ሻይዴስ ጃላ አሬሳቻንትካ ፍትሬትስ ዋጉኽሳ ማንዲጝስስታ አንኬባኬብጝስ እንቲታኪ ቴኬልካማ ሊሚፅጝስ ቴኬምስታንኩ አኽⶓኪላ እርዳትፅካ::

አኒኒው አብት አቶ አዲሱ ጊሊፂታጊ ሴሌቴንኹ ውማይቲኒስ ጉስስትጝስ ምንግስት ትኩቶ እይጝ ቱስቴ:: እንጃቢሪ ዩንቨርስቲዳ አኒኒው ዙሪዳ ፅናቶ ካስጝፅኹ ክንትፃንቲ እሱባለው ክንዴ አውጚው ኦንላይንሊ ፄውኑ እጂጚዳ አዊው እዝብ አኒኔ ምንጊዴስ ጄሜራማ እንዝርቴ፣ ምኩሌ፣ ችኻሌ፣ ጋዚኔ፣ ሳንኮ፣ አንኪሜስታ እሊኩሳ አክኽካዋ ግቢትጝስ ቴኬምስቱስ እጂⶓ ዙሜካ:: ትክላሊስ አዊው እዝብ “አኒኒዴስስታ ሹምቢው ምርትዴስ ዝጉዊስታው እላኪ” ናው እጂኹ ካንቲ ዝኩⶓኪላ ቼሜትጝፄካ::

አዊው እዝብ አኒኔ ቴኬሉስስታ ኬውስኪላ ሊሊቲ እጂኹ አቕት ዝኩⶓኽ ጌሌፁኑ:: አኒኒ ጉልቔ አፌሩኽ ዎክትዳ ኬውስታላኽ ኑንኩ ክንትፃንቲ እሩብጝስ ያኻቲው አኒኒ ጎሌሌስታማ ኬውስታው አኽⶓ ድኹዌካ::

ብሄረሰቡ ቺፅጝፂዳ አኒኒው ምርት ናካ ኔኬታማጊ አኽⶓ ዙሙንኩ ክንትፃንቲ እሱባለው ምርምሪኩ ኾትካ አኒኒውሳ ዜሮ ኬሽጝፅጝስ ምርት ዴሜካታ ፄውጝ ቱስታው አኽⶓ  እርዳትፅካ::