እንጉስ ማንዲስታው

ዘውዴ በካሉ

አጌራኻዳ ሊሊትጙንኩ ኮንክካ፣ ባይልካ፣ ታሪክስታ እሴትካ አግስታና:: እምፕል ዙራሙሪዳ አኹኪ ስፍሪዳ አግስታንኩ ማቤር አቕ ጛውሳ ባይሎ፣ ወጐስታ ታሪኮ ጌሌፃኑ ጛው ያኹኽ ወክት ዝኮ:: ጋያኪ አማኻሪ ክልልዳ ሊሊትጙኽሳ ወጐ፣ ባይሎ፣ ኮንኬሰታ ታሪኮ ካንትፃንኩ ብሄር ብሄረሰብካ አግስታኑ አኽጝስ እምፕልታቕ እምፕልትስስታ ኪቪቪርጚስ ባሎ ይጋሪስ ኬቤርፃና::

ችኹ ወክት አሌድስታማ፣ እሪ ኔኬቴማጊስታ ብን ዳንጉዋማጊ አንትጝሊ እምትጛማ ጋያኪ እስካዊ አሜቱ ዋዚሚ ታምብⶓ ጌሌፅጝስ ካንካና አቪቪስ ግዲቴ::  ሰሜኑ ዳብዚሾዳ ኬቤርስታው አንቓ አንቓው ባል አኹኪ ሻደይ፣ አሸንድዬ ሶለሉ ባልኪላ ኬቤርስታው ናሲ አርፊዳኽ :: ሻዳዩ ታሪክ ዋግስታ ላስታ፣ ትግራይ ራያ ኮቦ ዙራሙሪዳ ባሉሳ ታሪካዌ ጂሚርጜ ካንትኹስ ኪሳኪስካውላስ እሳንስ ድኹስታውያኽ:: ታሪክኪላ ክድስት ድንግል ማሪያሙ ጌድልሊ እምትጙኽ አኽጝ ዙሚስታየ::

ብሽታንኩ ታብልኪላ ሻዳይ ባሉሳ ጂሚርጜ እመቤቴሊ እምትጝጝዴስ ፌይኹስ ባልኪላ ሚንቺትስ ኹን ጄርካስ ይቢቺ ኬቤርስታውያኽ::

አሜት ቺፋ ናሲ 16 ጌርክዴስ ጄሜራማ አንቓ አንቓ እምፕልትስ አደባባይዳ ኬቤርፃኑ ሻደይ፣ አሸንድዬስታ ሶለሉ ባልያኽ:: እን ባል ሊሊትጙንኩ ዙራሙርካዳ ሊሊትጙኽ ስምስ እቑስቱኒኪስ ታሪክስታ ባሉ ቴርት ኩፂ ምስሊያኽ::

ሻደይ፣ አሸንድዬስታ ሶለሉ ባል አማኻሪ ክልል ዋግ ሹምካት ኬቴማ  ሰኮታዳ፣ ኮቦ ዙራሙርካዳስታ ላሊበላዳ እንቲታኪ ትግራይ ክልልዳ ልቓ ዙራሙሪዳ ኬቤርስታው አንቓ አንቓው ባሌኽ:: ሻደዩ ባል ትግራይ ክልልዳ አሸንዳ፣ ሰኮታዳ ሻደይ፣ ላሊበላዳ አሸንድዬ እንቲታኪ ኮቦዳ ሶለል እስታማ ኬቤርስቴ:: እን ባል አንቓ አንቓ አደባባይዳ ብሩኽ አኺኒስ ኬቤርፃኑ ባል ያኹስ ፌይኹ አሜትዳ እሺኹሳ አኺኔጊ  ፌይካማ እስካዌ ቴስፊውሳ አሜቶ ቻቤልጝስ ቴርትⶓ ጌሌፃኑ ባሌኽ::

ሻደይ፣ አሸንድዬስታ ሶለል ባል አንቓ አንቓ ምንጊዴስ ኪቻ ኔፃኔትስ አደባባይዳ እሼኑ ጌርክ አኽጝስ ዋሺኒኪ ድሚው አችዳ አግስታንኩ ኹን ኬችስ ኬችስ ያኼካማ እምፕልትስስታ እንካንጝጚስ ኬቤርፃኑ ባሌኽ::

ሻደይ፣ አሸንድዬስታ ሶለሉ ባል አንቓ አንቓ እንካናኑሳ ትዳሩስ አፄቦ ጐሌላኑ ባልኪላኽ:: ሻደይ፣ አሸንዳስታ ሶለሉ ባል ኬቤርስትጝስ አሻንዳ አኹኪ ሻደይ እስታው ስም እይስትኹኪላ ችኹ ወክትዳ ዋጋው አሸንዳ እስታማ እቑስታው ቴክልዴስያኽ:: አሸንዳው ቴክል ኻፄ እሳን ያኻማ ሊጊሲሚስታ ስርዴስ ፉቺ ያኹስ እሊው አካሉ ቤን ዴሜካ ኻፄ ፄጌራው ክዩ  አይኔትያኽ:: እን አሸንዳው ኻፂ ሻደይ አሸንደዬስታ ሶለሉ ባል ኬቤርስታው ወክት ታምባኒ አንቓ አንቓ እምፕልትስ ያኼካማ አሸንዳውሳ ኻፄ ኬውካማ ጌሜድዳ ዛንጌርፅካማ እንፄውጝስ ይውዳ ዶንጌትካማ ሌዋዴስ ፃንጌኻሾ ዙራዙርካማጊ ልቕልቕ ንጝስ ጅሜ ጅሜካማጊ ጐዴባና:: እኒጚ ባልዳ ጅምስታንኩ  ጅምካኪላ

አሸንድዬ አሻንዳ አበባ

እርግፍ እንደ ወለባ

ንካማጊ ጝን ጝና ዙሬካማጊ ጅማና::

እንቲታኪላ ጅሜ ቻቤልጜካማጊ

አሸንዳ በሉ

አሸንዳ

አሸንዳ ብዬ

አሸንዳ

ለባሌ ብዬ

አሸንዳ

ጐመን ቀቅዬ

አሸንዳ

አረ አረረብኝ

አሸንዳ

እናንተ ሆይ

አሸንዳ

አሸንዳ በሉ

አሸንዳ……. ንካማጊ ስራስሪዴስ ጄሜርካማ ጛው ድሚው አችታ ሹማጌል ኹኖኺስታ ኬችስ ኬችስ ያኼካማ ሙሬ ሙሻኒስ ብሮ፣ ታዮ፣ ፍያሎ፣ እንኬ፣ ስልኼሰታ እሊውሳጊ ኩፕፅካማ ባሎ ብሩኽ አኺኒስ ኬቤርፃና::

እንሳ ባሎ ኬቤርፃኒስ ኽሳንትካ አቕኾ ካስካማ ጅሜ ጅማና:: እንጚኪላ

አስገባኝ በረኛ

አስገባኝ ከልካይ

እመቤቴን ላይ

ንካማ ጅማኒ አብጅሌ ብስካያና:: አብጅሊ ብስስታማ ጝንሾ ቱኒዴስ ፋሌንጋ ጝን አቖ አሜሴጌንⶓ ጄሜራና::

ከፈረስ አፍንጫ ይወጣል ትንኝ

እስይ የኔ ጌታ ጤና ይስጥልኝ

ምድር ጭሬ ጭሬ አወጣሁ ማሰሮ

እሰይ የኔ እመቤት ድልድል ወይዘሮ ንጝስ   ጋሼካማጊ ዝሮ ኹዋው ዜሚስ ጅማና::

አሸንድዬውሳ ባሎ ኬቤርፃኒስ ኪቪቪርጚስ፣ ይጉዌ ካሲጝሰ፣ እምፕልትስ ዝኩⶓ ቻሱሳ ቴስፌ ካንትፃኑ ባልያኽ:: እን ባል ባይልዴስ ድምክና አይማኖቱ እሚኪላ ዝኮ:: እንክሪ ጄሜርስቱስኪላ ብሽታንሾ ካስካማ ያኹስ ቤዴራሱ ጊዝዳ እንቴርት ጄሜርስታው አጌር አኹኪ ዙራሙሬ ቺፅጝፃንትካ ብሽታንሾ ካስካማ ጄሜርፅጝስያኽ:: ናካ ናካ ዴሜካ ዙራሙሪኩ ኽሳንትካ አቕ ብሽታንሾ ካስጝስ ጄሜርፃና::

ሻደይ አሸንድዬስታ ሶለሉ ባልዳ ስራስሪዴስ ኽሳንትካዋኺስታ ድሚ ጌጌዋውይላስ ባሉ ጌሌፅካ ያኹንኩስ ስይካዋስታ ሚትካዋ ሴይካማ ግዲትካማ ካንትስትና:: ባልስኪላ እስካዌ ስዮስታ ሚቴኽ ጄዋኑ፣ እስካዌ ጄውጝስ ካላቲንኩ ዴሜካ ዝኩኽሳ ቑፅካማ ፅንኩቶ ሴይካ ሜትካማ እሼና:: ጛሪ ፄፄፋሳ ጋሜ፣ ኩንቾስታ ፄጌርጙንኩሳ ጊቢትስትካ ቴርትካማ ባሉሳ ክብሮ ካንትፃና:: ኩንቾስታ ጋሜ ጛሪዳ ጊቢትስታንኩ አኹኪ ፍሽስታንኩ ድሚው አች 10 አሜትዴስ ኩክራ ያኹንኩ ያኻኒስ ድሚ 10 ዴስ 15 አሜቶ ያኹንኩ አንቓ አንቓ ዴሜካ ታፍዳ አምባሮስታ ኽስጝ ኑንኩ ቲባንካዋስታ አንኩዋኺውሳ ግዶ ፄዋና:: ጛሪ ጊቢቲው አይኔትኪላ ድሚው አችታጊ ጝርጄ ሚፁንኩስታ ሚፅካያስኩ ንጝስ ጛው ያኹኽ ሺሽፂስ ጊቢስታና::

ሻደይ አሸንድዬውስታ ሶለሉ ባል አይማኖቱሳስታ ባይሉሳ እሴቶ እሜማ ኬቤርስታው አንቓ አንቓው ባል አኽጝስ ሊሊትጙንኩ ዙራሙርካዴስ ጐቤናንትካኪላ ይንታና:: እን ባል ቱሪስቱ ጉስፃ ያኻማ ሚፂው አሊ ያኻማጊኪላ አጌላጌሌ::