ጉዳትስ ቤዴራፍንካ

ዘውዴ በካሉ

ሰላሙ ዳንጉዊኒ ኬሴትስትጝስ ክልልታ እምፕልታቑ ማቤራዊው፣ ኢኮኖሚውስታ ፖለቲካው ልቕልቕቲዳጊ ቻኒስቶ ፉሪፃማ ሳኑስታ:: እምፕል ዙራሙሪዳ ሰላም ድሳኒጊ ጛርት አቕዴስ ጄሜራማ ዙራሙሬ ናማኪ አጌሮ አዌክጝ ይጉላኬኽ:: ሰላም ብርስ አኹኪ ዋይሚስ ቲኪስታቲዊያኽ:: እንፃኽስታማ ቱጝስ፣ አኬድኹሳ እክዶ አኮሜችጝስ፣ ዜሩኽሳ አሊቤ ኩፕፅጝስ፣ ጊፅሳማ ፊቲስጝስስታ ዋሺኔኪ ኩምችንካዋ አኮሜችጝስ ሰላም ፋይፄ::

ሰላም እላ ያኹኒ አቒያ ኩክልኹሳ ስጙጝሰኪላ ቼጊርፂያኽ:: ዲጊ ጊዝዴስ ናቴ አጌርዳ ናማኪ አማኻሪ ክልልዳ ፌቴርስትኹ ሰላሙ ችግር ሚንችካውሳ ጝኖ ቤዴላ:: አፌሩኑ አብት ንብሬት ድሳ:: አቕ አካሎ አቴካ:: እንሱ ችግርስ ሚሊዮንስ ቼፍስታንኩ ማቤር አቕ እሺኑሳ ዙራሙሬ ባይፅካማ ሴዴድስትካ:: አሜሬታማ እሊውስ ፊታሺኹ እዝብ ትቡሳ ታፎ ካንታንታ ያኻ:: ክብሪ አቒው ይዎት ድሳ::

ሰላም ይንታውኪ ድሳውኪ አቕ እንፃኽስታኑ ቴግባርስያኽ:: ሰላሙ አባላምቲ እምፕል አቒ ጚጛራሊ ሰላም ያኻኒ እሊው አቒሊ ሰላማ ያኼ:: አጌራው አችስ ይቶፒያው እገ ምንግስት ኹንስስታ ስራስሪስ ቱስታውሳ ሜብቶ ቱንዚ 35ዴስ 36ዳ እሳንስ እንኩራ:: ሰላም ሴፌንኹ አኹኪ ቼሜትጙኽ ዙራሙርካዳ ኹንስታ ስራስሪ ማቤራዊስ፣ ይኮኖሚስስታ ፖለቲካስ ቴኬምስታንታ ይስጝፅጝዴስ ድምክና ልማትስ ቴኬምስታንታ ያኻንታስታ ውላ ቱዊ ልቕልቕቲዳ አሴቴፍጛንታ አክሞ ፌቴሬ::

ፌይንኩ አሜትካዳ ጄሜራማ አማኻሪ ክልልዳ እንቲታኪ ብሄረሰቡ ቺፅጝፂዳ ሊሊትጙንኩ ዙራሙርካዳ ፌቴርስትኹ ሰላሙ ችግርስ ሚንችካ አቕ እሺኑዴስ ፌኔኬልጝጝ፣ አፌሩኑሳ አብት ንብሬቶ ዜሬፍስትጝስታ ዌዴምጝ እንቲታኪ አቒው ይዎት ድስጝ ዜኔጌስታላ::

እንታኮው አኺኒ ፌቴርስታኒ ሚንቺትስ ጉዲስታንኩ ዴሜካ ኹንስታ ስራስሬኽ:: ዙራሙሬ ባይፅካማ ፌኔኬልጛኑ ጊዝዳ እምፕላ ቹዋ ጄርካዋ ባታታ፣ እሌቱሳ ኬሌቦስታ ስዮ እምቴውላ ካስጝስ ካላላ::

ጄርካዋ ቡያታ ሴዴድስትጝ ዴሜካ ይዝኩዊያኽ:: እንጚ ጊዝይ ችግርስ ታምባንኩስታ ጉዲስታንኩኪላ ኹንስታ ስራስሪያኽ::

ስልኪስ ዙሚትጝፅኑክ እንጃቢሪ ኬቴሙ ዝኩዋንታ ዊዛሮ ታየች ዘለከ ሰላም ውላዴስጊ ጃላ ኹንስስታ ስራስሪስ ፋይፃንቲ አኽⶓ ዙሜካማ ፌያንኩ ጊዝካዳ ብሄረሰቡ ቺፅጝፂዳ ፌቴርስትኹ ሰላሙ ችግርስ ውላጊ አቒ ጉዲስቱኒኪላ ኹንዳስታ ስራስሪዳ ታምብኹ ቻኒስት ኬፍቲኒ አኽⶓ ጌሌፅካ:: እምፕላ ቹዋ ጄርካዋ ባታታ ሴዴድስትጝስ ካሜንትኹሳ ጄሮ ባይጝስ ካላቲት አኽጝስ ጄርካዋ ቡያታ ሴዴድስትጝ አንኩሊዳኪ ያኻ ሼው ፅንታዳ ቻኒስቶ ታምፅⶓኪላ ዙሜካ::

ፌቴርስትኹ ሰላሙ ችግር ምክንያታስ ቹትካ ጝኖ ባይፅካማ ፊጝስ ስራስሪስ ሼውታ ፋያኑሳ እይጝስ ካላኑውላ ይጉጝስ ቹትካዳ ችንኬቶ ፌቴርⶓኪላ ዊዛሮ ታየች እንክርፄካ::

ታንቡንኩ ኹን ጄርካኪላ ሙሬ ባይፅካማ ፋኒስ ጝርጃስ ዴፌርስትጝ ጌቴምጝስ ፍንሾሱሳ ይዎቶ ጉስጝስ ፅንጋኻ አኽⶓ ድኹዌካ::

ዊዛሮ አስናከች ዘላለም አዊ ብሄረሰቡ ቺፅጝፂ አንኪሺ ጉዋጉሲ ወረዳዳ ዝኩዋንትካኽ:: ሰላም አዌክስትጝስ ካሜናንትካ ሼውታ አክምኒው ጉትፕሾ ካስጝስ ካሌካያስኩ አኽⶓስታ ዳድ ልምትጝስ ሼውታ ጌቤላ ካስጝስ ቼጌርስትካማ ሳኑስትⶓ ድኹዌካ::

ሰላሞ ቼሜትጝፅጝ ጝንዴስ ጄሜራው አኽⶓ ዙሙንኩ ዊዛሮ አስናከች ኹና ጄርካዋኪ ያኻ ጜራሳ ድፂ ቴግባርዳ እሼቲንታ፣ ሰላሞ ዙማንታስታ ሰላሞ ያጋውሳ እንፅኼ እንፃኽስታንታ አላፍቶ ፊትጝጝ ቱስታው አኽⶓኪላ ዊዛሮ አስናከች ዲብስካ:: ሰላም ቼሜትጛታ ሊሊትጙንኩ ኩፕትካዳስታ እምኔትኩ ስፍርካዳ ውላጊ ታምቦ ፊትጛታ ካንቴ እይካ::

አዊ ብሄረሰቡ ቺፅጝፂው ኹኑስታ ስራስሪ ሜምሪው አላፋ ዊዛሮ አምባነሽ ስሜነህ ሰላም ውላ ማይቤር አቕስ ፋይፃንቲ ያኹኒኪላ ኹንስታ ስራስሪ ሰላሙ ዳንጉዋኒስ ማልጜ ቤዴልስታንትካ አኽⶓ ጌሌፅካ:: አጌርዳ ሰላም ድሳኒ ዎሬም ጁዋኒ አባላምቴ ሼው ፅንታስ ጉዲስታንኩ ኹንስታ ስራስሪ አኽⶓ እርዳትፅካ::

ኹንስታ ስራስሪ ዎሬምዳ አሴቴፍጜካማ ሴብትጛቲንኩ፣ ጊጜካማ አሜሌትጝስ ካላቲንኩ አኽጝስ ዎሬሙ ድምፅ እንኮኽስትኹ ቺፋ አንኩሊ ፉሬ አግፃቲው አኽⶓኪላ አላፋ እርዳትፅካ:: ስራሰሪ አፄብካሊ ውታኺዳ እንክርጝስ፣ ቹትካ ጌቤላኪ ያኻ ብሽታና ሰላምስ ፌካማ ዙርጝስ፣ ዜርቕቲኒ ዝኩዊኒው አችዳ ዝኩንኩ ኹን ጊፅስካማኪ ያኻ ጌቤልዴስ ጌቤልሾ ልቕልቕ ንካማ ዝኩዊኔ ጉስጝስ ሰላም ውላውጊ ስር አኽⶓኪላ ዊዛሮ አምባነሽ ጌሌፅካ::

ስራስሪ ፋያኑሳ ክንቴ ሼውታ ክንትጝስታ ፌካማ እንክርጝስኪላ ሰላሙ ዳንጉዊኒ  ሼው ፅንታዳ ቻኒስቶ ፉሪፃማ  ሳኑስትⶓ አላፋ ቶኬምካ::

ዙራሙሪዳ ሰላም ድሳኒ ዳድ ልምታው፣ኾትካ አግልግሎቴ እያቲንኩ አኽⶓ ጉሽንኩ ዊዛሮ አምባነሽ ካሜናንታ ቹዋ ክምንቱ ወክትዳ እክምኒውሳ አግልግሎቴ አግፅጝስ፣ አምቡላንሱሳ አግልግሎቴ አግፅጝስ ቼጌርፃው አኽⶓ እርዳትፅካ:: ጋቻው ምክንያቲስ ሚንችካ ቹትካው ይወት ፌይጝሰ ስራስሪ ጉዳትስ ታምብካማጊ አግስታንኩ አኽⶓኪላ አላፋ ጌሌፅካ::

አግልግሎቴ እያንኩ ኾትካ ልምትጝ፣ ፋይስታውሳ አክኼ እሊው ዙራሙሪዴስ አግጝስ ዳድ ልምትጝ፣ ስራስሪ ቑንዳስታኒ ስፍሪዴስ ስፍሪሾ ካፃማ እክምኒውሳ አግልግሎቴ አግፅⶓ አቲጝ ሰላሙ ዳንጉዊኒሰ ኬሴትስትኹ አኽⶓኪላ ሜምሪው አላፋ ጌሌፅካ::

ብሄረሰቡ ቺፅጝፂዳ ሊሊትጙንኩ ዙራሙርካዳ ፌቴርሰትኹ ሰላሙ ዳንጉዊኒስ ሚንችካ ሜስሪ ጝንካ ልምትⶓ ጉሹንኩ ዊዛሮ አምባነሽ ኹንዳ ክርፂ ቺፅጝፂውሳ ችግሮ ፌቴራማጊ አኽⶓ ጌሌፅካ:: አክማ ጋቲንኩ ንካማ ታክስጝስስታ አረጊግጚ እላ አኽጝስ አግልግሎቲ እላ ንጝስ ኹንዴስ ብቴ፣ አብት ንብሬቶ ዜሬፍካማጊ አኽጝስ ሰላም ቼሜትጛማ አግልግሎቴ ቲሪፁንኩ  ሜስሪ ጝንካ አግልግሎቴ ጄሜርካማ ኹኑስታ ስራስሪው ሜምሪኪላ ኹኑዳ ኬምፕዳ ያኻማ እንፃኽስትጝስ እክድ እምስትⶓ እርዳትፅካ::

ሰላሞ ቼሜትጝፅጝስ ኹን ጝንዳ ሰላሞ ክንትፃንታ፣ ብሽታንዳኪ ያኻ ሊሊትጙንኩ እምኔትኩ ስፍርካዳስታ ኩፕትካዳ እንቲታኪ ጌቤልዳ ሰላሞ ዙማንታ፣ጄርካኪ ያኻ ጝርጃ ድፂ ቴግባርዳ እሼቲንታ  ክንትፅጝስ ሰላሞ ቼሜትጝፅጝስ አላፍቶ ፊትጛንታኪላ ዊዛሮ አምባነሽ እንፅኼንቶ ፌያፌይጝፅካ::

አሬሳቻንቲ አሬሳማ አሜሬታታ፣ ጊፂኒ ጊፅሳማ ፊቲሳታ፣ አቕ ሰላምስ ፌካማ ሰላምስ ቱዋንታስታ ውላ ቱዊ ልቕልቕቲዳ ሰላም ሴፌናታ ውላጊ ማቤርአቕ ሰላምስ ዜቦ ቲሬንታ ታክስፁንኩ ዊዛሮ አምባነሽ ቲሪትጙኽ ሰላሙ ካውንስልሊ አብርታ እንፃኽስታንታኪላ እንፅኼንቶ ፌያፌይጝፅካ::