ታምራት ቶላስታ ጊጚ

ደመላሽ መለሰ

ሴኒ አሊዳዳ ይቶፒያው አትሌቲክስ ፌዴሬሽን ፓሪስ ኦሎምፒክዳ ልኺትጛንኩ አትሌትካውሳ ስሞ አቕፁኽ ያኹስ ጎሌልስቱንኩ አትሌትካው ፍንዳ ታምራት ቶላው ስም ማንዲትጛንትካው ቤንዳ እሺኾ:: እን አኽጝስ ታምራት ኦሎምፒኩሳ ልኺትጜ አሴቴፍጛው አኽⶓ ቼሜትጝፃያ እሼኾ::

ሲሳይ ለማ፣ ዴሬሳ ገለታስታ ከነኒሳ በከለ ጝርጃው ማራቶኑ ልኺትጚስ ይቶፒያዋ ወኬልካማ ልኺትጚስ ጎሌልስቱንኩ ያኻኒስ ታምራት ቶላ ዴሜካ ልኺትጛንትካዳ ታምባውሳ ችግሮ ማንዲትጛንታ ያኻ:: እን አኽጝስ ቤዴርካማ ጐሌልስቱንኩ አትሌትካ አግፁኑሳ ድሎ ቴኬምስትጝስ ፋይፃውሳጊ ቤዴራ ቴርቶ ፄዋኒስ ሴኔቤትካ::

ታምራት ይንታው ማሊስታላኽ ንጝስ ቴስፌ ኬዋውላ ዴስጝጜ ጛጂሊ እምፕልትስ ፄውስ ሴኔቤታ::

ልኺትጚዳ ቱዋማ ልኺትጜ ቤንጝጝስ እሊኩ አትሌትካውሳ ድሎ ልምⶓ ፋያያሱ ሲሳይ ለማ ጊጚውሳ ድሎ ታምራት ቶላስ ፌይፃማ እይጝስ ልኺትጚዴስ ሴጋ ያኻ:: ጚው ልኺትጚዴስ ሴጋ አኽጝ ዴሜካ ዋይሜ አቲጝስ ጛሬ ድርቡኽ ይቶፒያው አትሌቲክሱ ኬች ጛሬ ጉሽታ ምክንያታ ያኻ::

ማራቶኑ ልኺትጚስ ፋይፃውሳ ቤዴራ ቴርቶ እንፃኽስቱስ እጄ:: ዴስጝጜ አብርታ እንፃኽስታማጊ እሺኹ ሲሳይ ቦስተንዳ ታምቡኽ ልኩ ቑንዚ ምክንያታስ ፓሪስዳ ልኺትጛቲው አኽⶓስታ ታምራት ልኺትጜ ቤንጛታ ናውሳ ካሴ ካሲⶓ እንኮኹኻ:: ሲሳይ እን ልኺትጚ ይሾሰጊ ይጉዋችኼስ እንት ልኺትጚ ናውሳ ውሳኔ ታምፃውላ ይጐኩኒጊ  እሳ ድሎ አግፅጝሰ ካላላ እሽቱኻ ኑስ ቢቢሲስ ንባሮ ታምፅኹ ታምራት ሲሳይ እንሳ ውሳኔ ወሴናውላ ይጐኩኒጊ ፓሪሶ ካንታማ ዙርጝዴስ ፌይኹ ድል እላ እሺኾ::

ናሲ 4/2016 ም.አ ፓሪስ ኦሎምፒኩ ልኺትጚ አሌድስትጝዴስ እምፕል ጌርክ ይጉስ ላጛ ብርስ ጚኹቺስ ወርኮ አታማ ፍዴ ካንታውሳ ኬቾ ታምራት ወርኮ ኬፍፅጝስ ታምሮ እንፃኽስታማ ይቶፒያ ጛሬ ጉሽታታ ፄዋውሳ ዋይሜ ሜዜጌብፃ::

ታምራት ልኺትጜ ዊፅጝ ጚኹቺ ያኻውላ ቤዴራ ሜዜጌብስትኹ ኦሎምፒኩሳ ክብራ ወሰኖ 02፡06፡26 ያኹኽ ሳትስ ቱጝስ ሳቶ ኬሽጝፃማ እሊውሳ ታሪኮ ፃፋ::

ታምራት 2008 ብራዚል ሪዮ ዴ ጄኔሮዳ ካስጙኽ ኦሎምፒኩሳ ልኺትጜ 10 ሻይ ሜትር ጝርጃውሳ ጊጜ ቤንጝጝስ ናሱሳ ሜዳሊያዋ ኬፍፅጝ አቕስታው ያኹስ ንⶓ ዴሜካ ማራቶንስ ኽሳንቴ ድሎ ሜዜጌብፃ:: እንስ ዋይሚስ ዴሜካ አፄብ ሲሳይ ለማ ውሌቲ ዌና አኽⶓ ዴሜካማ ዙማ::

ታምራት ያጉኽሳ ሜዳሊያዋ ይውስታ አጌራው ያኻውላስ አፄቡ ሲሳዩዌኽ ኑስ ሊሊትጙንኩ ማቤራዊ ታምትጝፅካስ ንባሮ ታምፃ::

34 አትሌትካ አሴቴፍጙኑ ፓሪስ ኦሎምፒኩ ልኺትጚዳ ይቶፒያ ሹኻ ብሮስታ እምፕሎ ወርኮ ሜዜጌብፅጝስ አሌምዴስ 47ንታ ታኻታ ልኺትጜ አሊዲስ ዋይሜ ያጉንኩሳ ልኺትጛንትዋ ካንትናኒ በሪሁ አረጋዊ 10 ሻይ ሜትሩ ጊጚስ፣ ፅጌ ዱጉማ 800 ሜትሩ ዴዴጝ ጊጚስ፣ ትግስት አሰፋ ማራቶንስ ብሮ ኬፍፃኒስ አትሌት ታምራት ጚኹቺ ወርክስ አጄብስትኹ አትሌታ ያኻ::