እል ብራናሳ ቲካው

አለሚቱ የኔት

ቻይናዳ 17 ሚሊየንዴስ ጃላ እል ብራናሳ አቱንኩ አቕ አግስታንኩ አኽⶓ ንበርካ ቶኬማና ::

እል ብራናሳ አቱንኩ አቖ ዳዶ ጉሳዉ  ዋልታ ልኩ ዌና ሮቦት አቕዴስ እይስታዉ ድምፁ ትዛዝስ እንዳራኪ ችግራ ጋቲታ እንዜጝጝስ ካሌ ::

ቻይናዉ ሻንጋይ ጂአዎ ቶንግ ዩኒቨርሰቲ እል ብራናሳ አቱንኩሳ ዳዶ ጉሳዉሳ እስካዌ ሮቦቱሳ ቴክኖሎጄ አቕትጝፃ::

ዋልታ ልኩ ዌና ሮቦት ዳዶ ቶኬማዉ ሴንሰር፣ ሌዘሩ ራዳር ቴክኖሎጂስታ ናቭጌሽኑ ሲስተም  ጌቴምስታይኹ ያኹስ አቒዴስ እይስታዉ ድምፁ ትዛዝስ ታክሱኑ ብቲዳ እንዳራኪ ችግራ ጋቲታ ታምፅጝስ ካላዌኽ እስታ::

ቴክኖሎጂዉ ፌቴራንትካ ክቻዴስ እምፕል ፕሮፌሰር ጃዉ ፌንግ ሮቦት ሊሊትኑስኪ እንዝጚስ እሎ ቲካማ አጌላጌልጝስ ካላዌኽ ንካ::

ትራፊኩሳ ሜብራቶ ስታ እሊኩ ዴክቱ ቴንኬክፅካዋ ሼዉ ናማ ያቓዉ ሮቦት ድምክኒስኪ ዳዳ ዝኩዋንኩ  ቼጌርፅካ አኼንካዋ ሺሽጝስ እል ብራና ጋንኩሳ ዳድዳ ጌቴማዉ ኬሴትዴስ ካላካልጛየ እስታይኹዌኽ ::

ሮቦት ዝኩዋዉ ኬቴምዳ ዝኩንኩ ሜፃፍ ጝንካ፣ ምንግስቱ ኾትካ፣ እምኔት ጝንካስታ እሊኩጊ ኢንተርኔትሾስ ሜዜጌባማ እንኩራዉ ያኹስ አቕዴስ እይስታዉ ትዛዝ ስሬታስ እንዜጝጝስ ካላዌኽ ::

ቴክኖሎጂዌንካ ሮቦት ጌቴምስታይኹ ዋልታ ልኩካ ሜሴናክልካዋ፣ አሜቻቲንኩ ዳድካዋስታ ደረጅካዋ ችግራጋቲታ እንዜጛታ ፄዋንኩ አኽⶓ ቶኬምካ ::

እንዴስ ፌይኹስኪላ ሜቴንስትኹ እንዝጚዉ አሬኽት ሰከንድስ ሹኻ ሜትርካዋ እንዜጝጝስ ካላዉ ያኹስ ፋይፃንትታጊ ጜዋና ፋያዉ እንዝጚዉ ሜቴንስ አሬኻታ አኹኪ ልቡ ናታ ድኹስታዉሳ ትዛዞ ቻቤሌ::

ድምክኒስኪ እል ብራናሳ አቱንኩዳ ቲኑ ችግር ስታ ታክሲል ኬሴት ጌቴሙስ ጌቴምስታይኹ  አላርምስ እርዳቲዉሳ  እቑዌ ፄዉጝስ ካሌ::

ሲጂቲኤኑ ዜጌቢታጊ ቻይናዳ 17 ትኩሚ 31 ሚሊዮን እልብራናሳ አቱንኩ አቕ አግስታንኩ ያኹስ ዴስስ እልብራናሳ አቱንኩ ቴኬምስታኑ ዳዶ ቶኬማንቲ ዜንግዴስ ፌይኹስ ሴሌቴኑንኩ ግሴጝካዋ ዳዶ ጉስጝስ ቴኬምስታና:: ያኻማ ኩፅኒ ጝሺሱ ወክትስ ቻይናዳ አግስታንኩ ሴሌቴኑንኩ ግሴጝካዉ ቼፍ 40 ሻይ ይቢችካኽ::

እኒ ግሴጝካስ ስልታኒስስታ እምትጙንኩ ጉዳይካ ካሴው ፍሺሾዴስ እስካዊ ሮቦቱ ቴክኖሎጂ ጌቤልሾ ቱስ ጎሌልስታንታ አኽጝ ድኹስታ::

ሮቦት ጝሺሱ ወክትስ ሙካሪዳ ያኹስ ዩኒቨርሲቲ ጌቤልስ ጌና ዲግሳዉላ ይጉኒኪላ 20 ትዛዝካዋ ቻቤልⶓ ጌሌፃ:: አሌም አቩቑ አችስ 50 ሚሊዮን እል ብራናሳ አቱንኩ  ዝኩጝ ድኹስቴ እኒ ክቻዴስኪላ ሊኽዴስ 85 ታፋሳ ላኬንኩዳ  እንፁኒ አርፊዴስ እምፕላኒ ሊሊትጙንኩ  ኬሴትካ ጌቴማና:: ንባሮ አግፅንኹኪ አልአይንዴሴኽ::