ሰላምስታ ክንቲ

ዘውዴ በካሉ

ክንቲ ፍንሾሱ ዝኩዊኒው ጊዙሳ አብጂሌ ብስፂ ኩልፌኽ::እምፕል አጌራው ልግስኒኪላ አንትጝስ ካላው ክንትኹ አቒው አይል ዝኩዋኔኽ::ክንቴ ክንትጝ ዴሜካ አጌራው ሰላሙ አኺኒ ስ ወሴናንቴኽ፡፡

ቴቤቤርጙንኩ ምንግስታትካው አችቱ ንባር ቶኬማውስታጊ አሌምዳ 222 ሚሊዮንዴስ ጃላ ስራስሪ ክንቲ ማድዴስ ሴጋ ያኼካ::እስጜኪላ ሲፍፅኹ ሊሊትጙንኩ ፍትሬትኩ ኬሴትካስስታ ዙራሙሪ ቺፍ ኬሴትስታው ጋቻ ምክንያትታ ቶኬምስታ::አማኻሪ ክልልዳ  ፌይኹ አሜትዳ ጄሜርኹ ሰላሙ ችግር  ክንቲው ዜርፍዳ ኬፍቲኔ ቻኒስቶ ታምፅጝ አቕስቴ::ክንታንትካ ክንቲው ማድዴስ ሴጋ ያኼካማ፤ ሚንችካ ክንቲ ጝንካ ልምትካማ ሴኔቤትካ::እን ሰላሙ ችግርስ አጌራው አችስ ላጛ ትኩሚ ዋልታ ሚሊዮን ክንታንትካ፤ ክልሉ  አችስ ዴሜካ ሹኻ ሸዳይዴስ ጃላ ያኻንኩ ክንቲ ጝንካ ክንቲው ቴርትዴስ ሴጋ ያኼካማ እጂካ:: አዊ ብሄረሰቡ ቺፅጝፂዳኪላ ሰላሙ ችግርስ ሚንችካ ክንቲ ጝንካ ልምትካማ ሴኔቤትካ:: 2017 ም.አሜቱ ክንቲው ዝቤንዳ ዝኩኽሳ ክንትጝ ክንትፅጙሳ ካስቶ ካንትኹስ ዴሜካ ስልኪስ ዙሚትጝፅኑክ ክቻዴስ ጉዋንጉዊ ወረዳ ፂሪጊ ትክላሊ ላጛንቲ አች ክንቲ ጝናሱ ክንታንቲ የቻለ ሙሉከን 2017 ም.አሜቱ ክንትጝ ክንትፅጙ አኺኒ ካስጛማጊ አኽⶓ ድኹዋ፡፡

ክንታንቲ የቻለ እምፕላንቲ ቤንዴስ ጄሜራማ 11 ንቴ ቤኖ ኺስታ ጊሲ ክንቲ ጝናዳ ክንቱስ እጂⶓ ድኹዋማ እጂኹ ክንቲ ጝና ሰላሙ ችግርስ ልምትጝስ   ፂሪጊ ትክላሊ ላጛንቲ አች ክንቲ ጝናዳ ክንቴ ሲፍጛማጊ አኽⶓ ዙማ::ሰላሙ ችግር  ክንቲው ዜርፍዳ ኬፍቲኔ ቻኒስቶ ታምፅⶓ ዙሙኽ ክንታንቲ ፂሪጊ ክንቲ ጝና እንዳርማኪ ክንቲው  ንባር  ዲጋውላስ ሰላም ቼሜትጛኒ ክንታኒስ እሺኑ ክንቲ ጝናዴስ ንባሮ ዲግሲኒምባ ኺስታ ክንታንካ ክንቲዴስ ሴጋ አኻቲንታ ሚንችካ ክንታንትካዋ ቻቤላማ ክንትፃማጊ አኽⶓኪላ እንክርፃ፡፡

ሰላሙ ችግርስ እሊው ክንቲ ጝናዴስ ይንቱንኩስኪ ያኻ ክንቲ ጄሜራማ እጂኒዴስ ፋሌንጋ ይንቱንኩ ክንታትካስ ክንታኑላስ ፌዩኽስ ፊቲ ጊዝስ ክንትፄካማጊ አኽⶓ ክንታንቲ የቻለ ዙማ::ክንቲ ጝና ልምትጝስ ክንቲውሳ ድሎ አግፄካያስኩ ክንታትካኪላ ክንቲውሳ ድሎ አግፃንታ ፄውጝ ቱስታው አኽⶓ ጉሹኽ ክንታንቲ እሺኹ ክንቲ ጝናሳ ባይፅጝ ቤዴራ እሺኹ ክንቲስ ዝኩኽ ትኩትዴስ ሴጋ ፄዋማጊ አኽⶓ እንክርፃ፡፡

እሊት ክንታንታ አልጋነሽ አሰፋ 2017 ክንቲው ዝቤንዳ ሜስኬሩምዴስ ጄሜርካማ ላምቡሳ ኺስታ ስጋታ ጋቲታ ክንትካማጊ አኽⶓ ድኹታ::

ክንትፃንትካ ውላ ዋኽትጜካማ ክንትፄካጊ አኽⶓ ድኹቱት ክንታንታ ላጛ ክንቲኩ አይኔትካዋ ጄሜርካያስኩ አኽⶓ ዲብስታ::12ንቲ ቤንቲ ክንታንታ አኽⶓ ድኹቱት ክንታንታ ልኺትጛኑ አጌሩ አችስ አኽጝስ ቴግባርስ ክንትጝስ ያኻው ዋኽትጙኽ ላብራቶሪው ሜሳሪስታ ኬሚካል እላቲው አኽⶓ እንክርፄ::

ፌይኹ አሜትዳ እሺኹ   ሰላሙ ችግር እን አሜትስኪላ ካቢስቲታ እንቲታኪ እሊኩ ክንቲ ጝንካዳ ካንፅስታማጊ ዝኩኽ ክንቲ ጝናሱ ልምትጝ ጌቴማቲታ ውላጊ ማቤር አቕ ሰላምስ ዜቦ ቲሬንታ እንፅኼንቶ ፌያፌይጝፄ፡፡

ክንትፃንቲ አሰፋ አይናለም ፂሪጊ ትክላሊ ላጛንቲ አች ክንቲ ጝናሱ ክንትፃንቲያኽ::ፂሪጊ ክንቲ ጝና ሰላሙ ስጋታኻዳ ያኻማኪላ ክንትጝ ክንትፅጙሳ ካስቶ ካስጝፃማጊ አኽⶓ ዙሜካ::ፂሪጊ ክንቲ ጝና ጉዋንጉዊ ወረዳ ያኹኒኪላ ዳንግሊስስታ ፋግቲ ለኮማ ወረዳስ ዲጊ አኽጝስ እኒ ወረድካዳ ክንቲ ልምታስኩስ ፂሪጊ ክንቲ ጝና ስጋታኻዳ ያኻማኪላ ክንትፃማጊ አኽⶓ ድኹዌካ::

ፌይኹ አሜትዳኪላ ክልልታጊ ፌቴርስትኹ ሰላሙ ችግርስ ሚንችካ ክንቲ ጝንካ ልምትካስኩኒስ ፂሪጊ ክንቲ ጝና ሰላምስ ክንቴ አሌድⶓኪላ ዙሜካ፡፡

2017 ም.አሜት ክንትጝ ክንትፅጙ ካስት ጄሜሩኒዴስ ላጛንቴ አርፌ አሌድⶓ ጉሹንኩ ክንትፃንቲ አሰፋ ሊሊትጙንኩ ምክንያትካስ እንግርቱንኩ ክንቲው ጛርካዋኪላ ሾፌንጝስ ፊቲ ጊዝስ ክንትፅካማጊ አኽⶓ ዲብስካ::ክንታትካ ፌይኹሳ ክንቲውሳ ጛሬ አንቤብካማ እርዳትስትጝስኪ ያኻ እይስታውሳ ጝን እንፅኻሳ እንፃኽስትጝስ ሜፃፍ እንፂጝ ዝኩⶓ ጉሹንኩ ክንትፃንቲ እንሳ ችግሮ ኽይጝስ ክንትፃንትካ ፃርኪ ሳክዳ ፃፊጝስስታ ኮፓ ፄዋማ ክንታንትካስ እይጝስ እንፃኽስትካማጊ አኽⶓ ዲብስካ::ክንታትካ እሊው ክንቲ ጝናዴስ ይንቴካማጊ አኽጝስ ክንትፂ ቤኑ እንፂጝ ዝኩⶓ ክንትፃንቲ ካንቴ እይካ፡፡

ፌይኹ አሜትዳ ሰላሙ ችግራኻዳ ያኼካማኪላ ፂሪጊ ክንቲ ጝናዳ ክርፂ ዋይሚ ሜዜጌብስትⶓ ድኹንኩ ክንትፃንቲ አሰፋ 2017ም.አሜት ክንቲ ዝቤንዳኪላ እንዴስ ጃላ እንፃኽስታንታ ክንታንትካ ክንቲዳ ትኩቶ እይካማ ክንታንታ ውላጊ ማቤር አቕ ሰላሞ ማንዲጝዳ ትኩታ ፄውጝ ቱስታው አኽⶓ ታክስፅካ፡፡

ጉዋንጉዊ ወረዳዳ ፂሪጊ ትክላሊ ላጛንቲ አች ክንቲ ጝናሱ ጛሪ አቶ ያረጋል ታደላ 2017 ም.አሜቱ ክንትጝ ክንትፅጙ ቴርት ጄሜሩኒዴስ ላጛ አርፋሳ ቼፍፅⶓ ጌሌፅካ::2017 ም.አሜቱ ክንቲው ዝቤንዳ እምፕል ሻይ 900 ክንታንትካዋ ሜዜጌብካማ ክንትፅጝስ እክድ እምስታሺኹ ያኹኒኪላ እምፕል ሻይ 195 ክንታንትካ ክንቲው ማድዳ አግስቴካማ ክንትፅካማጊ አኽⶓ እርዳትፅካ::

ፂሪጊ ክንቲ ጝናዳ ክንታንኩ ክንታንትካዴስ ድምክና 200ዴስ ጃላ ያኻንኩ ክንታንትካ እሊው ክንቲ ጝናዴስ ይንቴካማ ክንቴ ሲፍጜካማጊ አኽⶓኪላ እርዳትፅካ፡፡

ወሌን ክንቲ ጝንካ ልምትጝ ፂሪጊ ክንቲ ጝናዳ ሰላሙሳ ስጋቶ ቺፃማጊ አኽⶓ ጉሹንኩ አቶ ያረጋል ስጋታኻዳ ያኼካማኪላ ፄትቲኩ አይልካ ማንዴካማጊ ክንቴ ሲፍፅⶓ ድኹዌካ::

ክንታንትካ እክዱ ሜቴንስ ሜዜጌብስታኑላስ ይጉኑኪላ እሊው ክንቲ ጝናዴስ ይንቱንኩ ክንታንትካ ዴሜክስታኒ ወንቤሩስታ ክንትፂ ቤኑ እንቲታኪ ሜፃፉ እንፂጝ ዝኩⶓ ክንቲ ጝናሱ ጛሪ ጌሌፅካ::11ንቲስታ 12ንቲ ቤንኩ ማይቤራዊ ሳይንስኩ ክንታንትካስ ሜፃፍ እላያኹኒኪላ ኮፓ ፄውጝስ ችግሮ ኽይⶓ ቶኬምካ::

ፂሪጊ ክንቲ ጝናዳ ክንትፃንትካው ችግር ዝኩⶓ ዲብሱንኩ ክንቲ ጝናሱ ጛሪ እንሳ ችግሮ ኽይጝስ ክልልዴስኪ ያኻ ብሄረሰቡ ቺፅጝፂዴስ እይስትኹ ሜሜሪስ ዲግጛውሳ ክንቴ ክንትፃንኩ ክንትፃንትካ ክንትፃንታ ፄውⶓ ጌሌፅካ::ክንትፃንትካው እንፂጝ ዝኩኽ አኽጝስ ዴሜክስታንታ ብሄረሳቡሳ ቺፅጝፄ ኺስታ ካሲካማጊ አኽⶓ እርዳትፅካ::ፌይኹ አሜትዳ ፂሪጊ ክንቲ ጝናዳ ክርፂ ዋይሚ ሜዜጌብስትⶓ አቶ ያረጋል ጌሌፅካ::

አዊ ብሄረሰቡ ክንቲው ሜምሪው አላፊ አቶ ደስታው አለሙ 2017 ክንቲው ዝቤንዳ ፌይኹ አሜትዳ ልምስትካሺንኩ ክንቲ ጝንካዋ ብስፅጝስ ክንቴ ጄሜራንታ እንፃኽስቴካማጊ አኽⶓ ጌሌፅካ::2017 ም.አሜትዳ 400 ሻይዴስ ጃላ ክንታንትካዋ ሜዜጌብጝስ ብሄረሰቡ ቺፅጝፂው አችስ አክድ እምስትⶓ ጉሹንኩ አቶ ደስታው 135 ሻይዴስ ጃላ ያኻንኩ ክንታንትካ ክንቲው ማድዳ አግስታንኩ አኽⶓ እርዳትፅካ::

አዊ ብሄረሰቡ ቺፅጝፂዳ 610 ክንቲ ጝንካ ዝኩⶓ ድኹንኩ አቶ ደስታው 350 ክንቲ ጝንካ ሰላሙ ችግርስ ልምትⶓ ጌሌፅካ::ሰላም ቼሜትጙኽ ዙራሙሪሾ ካስካማ ክንታንኩ ክንታንትካዋስታ እጂካማ ክንቲ ጄሜርስቱኒዴስ ይንታንኩሳ ክንታንትካዋ ሜዜጌብካማጊ አኽⶓ ጌሌፅካ::ብሄረሰቡ ቺፅጝፂታጊ ክንቲው አክኽካው ግብአቱ ዲግስጝጚው ችግር ዝኩⶓ ጉሹንኩ አቶ ደስታው ሴስታዴስ 12ንቴ ቤኖ ኺስቴ ዝኩንኩ ክንታንትካስ ያኻውሳ ክንትፄ ሜፃፎ ደሴዴስ አግጝስ ፋይስቱኒኪላ ሰላሙ ችግርስ ዲግስጝስ ቼጌርስትⶓ ጌሌፅካ::