እንጃቢሪ ልኩ ኩታ ኬች

ታደለ አጋጄ

እንጃቢሪ ኬቴሙ ልኩ ኩታው ኬች ልቕልቕቴ ጄሜርኾ፡፡

እንጃቢሪ ኬቴሙ ልኩ ኩታው ኬች ዋይሚስታ አኽጝስ ካላታ እርዳቲ ፋይፃንቲ አኽⶓ ኬቴሙ ስፖርት ፅ/ጝና ጌሌፅኾ፡፡

እንጃቢሪ ኬቴሙ ልኩ ኩታው ኬች ቤዴሩንኩ ጊዝካዴስ ጄሜራማ ይቶፒያው ኬፍቲኒ ሊግዳ አሴቴፍጛማጊ አግስታው ኬችያኽ፡፡ ፌዩንኩ አሜትካዳ ባጄቱስታ እሊኩ  ምክንያትካስ ልኺትጚዴስ እቼማ እጄ፡፡

ንጙዊኒ አሜትዳ ኩፅኒ ሌጌሳታምብካዋስታ ዴስ ዝኩክ እንክራንትካዋ አሌቔትጝፅጝስ ትክምቲ 4ዴስ ጄሜራማ አዲስ አበባዳ ዴስጝጜ ፄውⶓ ጄሜርⶓ ሴሌቴንፃንቲ አብርሃም ጌሌፅካ፡፡

ኬች ዴስጝጜ ፄውጝስ እንግርትጝ ክሌብ ፋያኩ እንክራንትካ እሊው ኬችሾ ካስⶓ እርዳትፅካ፡፡

ኬቾ ፋያስታው ላካስ አችትጝፅጝስ ካሊስታያሱ አኽⶓ ቶኬሙንኩ ሴለቴንፃንቲ ዴስ ዝኩክስ እንክራንትካዋ እሚጝስ ኬፍቲኒ ሊጉሳ ልኺትጜ ጄሜርⶓ ጌሌፅካ፡፡ ላጛ እንክርካዋ ፄውጝስ ላንጊጊ እንክርካዋ ዊፅጝስ ጉሴካማጊ አኽⶓኪላ ቶኬምካ፡፡

ፌይኹ አሜትዳ ልኺትጚዳ አሴቴፍጛኑላ እጂካማ ንጙዊኒ አሜትዳ ልኺትጚሾ ዙርጝስ ልኺትጜ ካስጝፄካማጊ አኽⶓ ቶኬሙንኩ ሴሌቴንፃንቲ እን አሜትዳ ኬች ልኺትጛንታ ያኻማ  እጄታ ፄውጝ አኽⶓ ጌሌፅካ፡፡

ይንታው አሜትዳ ኬቾ ኬሽጙኽ ዳድስ አችትጝፅጝስ ኩርፄንትስ አኽⶓ እርዳትፅካ፡፡

እሊኩ ኬችካሊ ካንትጛኒ ኬችዳ ባጄቱስታ ወክታዊ ፄትቲው አኺኒ ቻኒስቶ ታምፅⶓኪላ ጌሌፅካ፡፡

ናካዳ ኬች አሴቴፍጛማጊ አግስታው አይሌንካ ኬችካሊ አኽጝስ እንክሪው ካስትዳ ሜዜጌብስታው ዋይሚስ ዎሴንስታው አኽⶓ ቶኬምካ፡፡

አዲስ አበባ ኬቴምዳ አግስታንኩ ክልልኩ ካሜንስታንትካ ኬች እንክሬ ፄዋው ጊዝዳ ድጋፎ ፄዋንታ ሴሌቴንፃንቲ እቑዌ ፌያፌይጝፄካ፡፡

ልኩ ኩታው ኬችስ መኪና እላቲው አኽጝስ ልኩስ እንዜጜካማጊ ዴስጝጜ ፄዋንኩ አኽⶓኪላ ቶኬምካ፡፡

እንጃቢሪ ኬቴሙ ቺፅጝፂዳ ስፖርት ፅፌት ጝናሱ አላፊ አቶ ማስተዋል ፈንቴ እንጃቢሪ ኬቴሙ ልኩ ኩታው ኬች ኬቴምዴስ ሌጌሳታምብካ እንክራንትካዋ እሚጝስ ልኺትጜ አዲስ አበባዳ ፄዌካማጊ አኽⶓ እርዳትፅካ፡፡

እን አሜትዳ ሊግዳ ልኺትጛንታ ያኼካማ እጄንታ ፄውጝ አኽⶓ ጌሌፅካ፡፡

ኬችዳ ባጀቱስታ ዴስጝጜ ፄዋኑ ውታኺዉ ችግር ዝኩⶓ ቶኬምካማ እንጃቢሪ ኬቴምስታ እንጃቢሪ ዩንቨርሲቲ እርዳቴ ፄዌካማጊ አኽⶓ እርዳትፅካ፡፡

ይንታው አሜትዳ ሊሊትጙንኩ ዳድካስ ሚፄ ኩፕፅጝስስታ ፕሪሚየር ሊግሾ ሌጌሳንታ ፄውጝስ ይስጙኽ እንፅኺ እንፃኽስታው አኽⶓ ጌሌፅካ፡፡