አሌሙ ክብሪ ሩዝ

አለሚቱ የኔት

ሩዝ ሴብሉ አይኔትካዳ ሜዴብስታው ያኹስ እምፕላ ልኩዋ ሩዙ ሴብልዴስ 100ዴስ 200ኺስታ ሩዙሳ ኩፔ እሚ:: አቒያ ሩዞ ምግብኔትስ ቴኬምስትⶓ ጄሜሩኒዴስ 10 ሻይ አሜቶ ናቔ:: ኬፍቲኒ እኻኺስ ሾፌንስትካማ እሺንኩ ሩክምስራኩ አጌርካ እኻኺ ኬሌታማ ዋልኽ ብቲ ሚንቹስ አኽጝ አምንስቴ:: እን ስፍሪ ጝሺ ህንድ፣ ኢንዶንዥያ፣ ቻይናስታ ጃፓን እናው ዙራሙሪያኽ::

ኪሉስ 13 ሻይ ብርዴስ ጃላ ፍሻው ጃፓኑ ሩዝ “ኬንሜማይ ፕሪሚየም” ናው ስያሚ እይስትኹ ሩዝ አሌሙ ዲኒክፂ ማዝጌብዳ እንኩርስታ /ፃፊስታ/::

አሌሙ ክብሪ ሩዝ ታምኒዴስ ፌይኹስ ፋይበርስስታ ቪታሚን 1 ሚዲቢኒ ፉቺ ሩዝዴስ እፅፍስ ኽሴ እስታ::

ሩዝ አሌምዳ ሚንችካ ክችጙኽ ዋይሚስ ሾሜታና እስታው ምግቤኽ:: ሊሊቲ ፄዌንትስታ ሜልክ ዝኩኽ ሩዝ ኩፅኒ እሺው ዋይሚዴስ ማልጜ ኽሴ::

ጃፓኑ “ቶዮ ራይስ ኮርፖሬሽንዳ” አሜርትስታው ሩዝ አሌሙ ዲኒክፂው ሜዝጌብዳ ፃፊስታ::

“ኬንሜማይ ፕሪሚየም” እስታው ስያሚ እይስትኹ ሩዝ አንኩዋ አሌም አቩቑ አችስ ፃንኩትስ ሽልማቲ አግፁንኩ ሩዝካው ዜርካዋ ፃምርስጝስ ፌቴርስቱኼኽ::

ሩዞ አሜሬታንቲ ኩባንያ 17 አሜትዴስ ቤዴራ አቕትጝፅኹ ዝቤናዊ ቴክኖሎጂ አንኩዋ ሩዙ ዜርካው ሊሊቲ ታምኒስታ ሜልክ ዝኩዋታ ፄዋማ ቴርስጝስ ዋልቲ አርፋሳ ዊዴ እስታ::

አሌሙ ክብሪ ሩዝ ፋላፋልስቱስ አልማዞ ፄጌራውሳ ኩፒ ፊጝኪላ ፋው ፍሺስ ሜቴናታ ፄዌ::

“ኪንሜማይ ፕሪሚየም” ሊሊቲ ታምኒዴስ ፌይኹስ ፋይበርስስታ ቪይታሚን ቢ1 ሚዲቢኒ ሩዝዴስ እፅፍስ ኽሳው አኽጝኪላ ቶኬምስታ::

ዴስስትኹ ፉቺሩዝዴስ ዋልታ እፅፍስ ቑንዜ ካላካልጝጙሳ አክሞ አድርፃንኩስታ ቲኖ ማንዳንኩ ፄኬስካ ዲብካዋ እሚጝ ጌሌፅስትኹ ያኹስ፣ ቑፅስትኹስታ ፁቕስቱስ ዴስፃው ኽሪ ዝኩኽ አኽጝኪላ ጌሌፅስታ::

አሌሙሳ ክብሬ ሩዞ አሜሬታው ጃፓኑ ኩባንያ ፃንኩትስ አሌም አቩቑሳ ሽልማቴ አግፁንኩ ሩዙሳ ዜርካዋ አሬሳቻንቲዴስ ጄውስ ዴስስትኹ ፉቺ ሩዝዴስ ላጚቲ እፅፉሳ ዋይሜ ዴሜካማ ጄዋው አኽጝ ቶኬምስታ::

ንባር አግስትኹኪ ኦዲት ሴንተራልዴሴያኽ