እጋፊ ዳድስ እይስትኹ ብቲ ዙራታ ፄውስትኾ

ታደለ አጋጄ

እንጃቢሪ ኬቴሙ ቺፅጝፂዳ 66 ሻይዴስጃላ ካሬ ሜትር ብቲ እጋፊ ዳድስ ጛርት አቕስ እይስትⶓ ኬቴሙ ቺፅጝፂ አቕፅኾ::

እጋፊ ዳድስ ብቴ እዩንኩ አመራርካዳ እርምጂ ካፅስትጝኪላ ጌሌፅስታ::

አዊ ብሄረሰቡ ቺፅጝፂ እንጃቢሪ ኬቴሙ ቺፅጝፂዳ 2015 ም/አሜታዳ አምሊ አርፊዴስ ጄሜራማ ቑታቑቲስ አችትጙንኩስ እይስትኹሳ ብቴ እጋዊ አኽⶓ ቼሜትጝፅጝስታ እጉሳ ዙርሜ እይጝስ ላጛ አርፍካስ ካስጙስ እጂኹ ፅናት አሌድስታማ ኬቤሊው አመራርስስታ ጉዳይ ካንታው አካልስ ይፋ ፄውስታ::

ስንብቶ እንጃቢሪ ኬቴሙ ቺፅጝፂዉ ውላ አመራርካ፣ ባንጂ ወረዳ ፍት፣ ኬቴሙ ፖሊሱ አካልካ፣ ጉባይ ኮሚቴዉ አመራርካስታ ኬቤሊኩ አመራርካ አግስቱኑዳ ላጛ አርፍካስ ካስጙስ እጂኹ ፅናትዳ ኩስጚ ካስጛ::

ፅናቱሳ ዋይሜ ዲግሱንኩ እንጃቢሪ ኬቴሙ ቺፅጝፂው እንፅኺውስታ ስልታኒ ፅፌት ጝናሱ አላፊ አቶ የኮዬ ትላሁን እምፕልታቕ ጊዝቺፋ ጉሻንኩሳ ካስካዋ ፍታዋ ያኹኽ ዳድስ ዙርሜ እይጝስስታ እጉሳ ሴግቴንቶ ኬቤርፅጝስ ይንታውስ አችትጛንኩሳ ዎታትካዋ እርዳትጝስ ፅናቶ ፄውጝስታ ኬቤሊው አመራርስ እንቲታኪ ጉዳይ ካንታው አካልስ ዲግስጝ ማልጛ ፋይፃንቲያኽ ኑንኩ አቶ የኮዬ 2015 ም/አታዳ አምሊ አርፊዴስ ጄሜራማ ቑታቑቲስ ፌያፌይጙንኩ ስፍርካዳ ካስጙኽ ፅናትዳ እጋፊ ዳድስ ኬቤሊውስታ ኬቴሙ ቺፅጝፂው አመራሩሳ ሜሜሬ ታሲጝስ 331 ስፍርካ ንጝኪ 66 ሻይ 444 ካሬ ሜትር ብቲ 446 ጛርት አቕስ አይስትⶓ ቼሜትጝፁንኩ አኽⶓ ጌሌፅካ::

እንፅኺውሳ ድሎ ፌቴርጝስ ሜዜጌብስትካማ ስልታኔ ካፅጝ ዝኮስኩስ እንፅኺውስታ ስልታኒው አላፍካስ፣ ኬቴሙ ትክትሊ ከንቲባስ፣ ኬቴሙ ስሩ ልማት ፅፌት ጝናሱ አላፊስ ኬቤሊው ማይኬሉ ቴቤቤርጝፃንትካስ ኩታ ዳብዳቢስ እይስትⶓ አቕፄካ::

185 ስፍርካ ፕላንዴስ ሴጋ ማኒፋክቸሪንግ፣ ዳድ፣ ክንቲ ጝናስታ ዎታትካው ፍትኽፂ ቱስታ ጋቲው ዳድስ ፌያፌይጜካማ እይስትⶓኪላ እርዳትፅካ::

እንፅኺ ድሉ ቴኬምስታንትካ ሜሜሪ ስሬታስ 200 ካሬ ሜትር እይስትጝ ዝኮስኩስ 1500 ሜትሮ ኺስታ አብትዌንካስ፣ ኬቴምኩ ዝኩዋንትካ ጋቲንኩ አቕስ፣ እንቲታኪ ኬቤሊው አመራሩ ድንግሬንካስስታ ጚቓሱ ስምስ ብቲ ካፅስትⶓ ጌሌፅካ::

ኩስጝጚዳ አሴቴፍጙንኩ አመራርካ እዩኑ ካንቲስ እንታኮውሳ ፂዌ ፌፄሙንኩ አመራርካ እዝቡሳ ትክሞ ፌይፃማ እይጝስ፣ አላፍቶ ጛርቱ ትክምስ እሽፅጝስስታ ደላልካሊ እምፕልትጝስ ስልታኖ ቱስታ ጋቲው ዳድስ እሽፅጝ ቱስታ ጋቲው አኽⶓ እርዳትፅካ::

እንጃቢሪ ኬቴሙ ቺፅጝፂው አችትጚ ዜርፉ አላፋ ትሩወርክ በላይ ጄሜርስትኹ ቡንካ ፓርቲው ሜርህዴስ ሴጋ ያኹኽ፣ ዳዴኹስታ ጉዳ ጋቲው እንፃኽስትጝጚ እንቲታኪ አግልግሎቴ እይጝዳ ካንትስታው ችግር ፌይስታቲው ጉዳይ አኽⶓ ጌሌፅካ:: ፅናቱ ዋይሚ ስሬታስኪላ ዴዴጝ ጊዝስ እዝብሊ አኽጝስ ፖላቲካውሳ እርምጄ ካፅጝስ ካሲስታንቶ ቼሜትጝፅጝ ቱስታው አኽⶓ ጌሌፅካ::

አዊ ብሄረሰቡ ቺፅጝፂው ጊፅስታ ጌቤል ልማት ፅፌት ጝናሱ አላፊ አቶ ያረጋል ያየህ ፅናቱሳ ዋይሜ ጋሺጝስ ካሲ እዝቡ አኽጝስ ፅናቱ ዋይሚኪላ እዝብስ ዲግጝ ፋይፃው አኽⶓ ቶኬምካ::

እንጃቢሪ ኬቴሙ ቺፅጝፂው ቤዴራንቲ ትክትሊ ከንቲባ አቶ የኔአለም ዋሴ ፅናቱ ጉሽፂ ሜድሬኽዳ ጁኽ እዝቡ ካሲ አኽጝስ ጉዳ ጋቲውሳ እንፅኼ እንፃኽስታንኩ አመራርካ ክቺጝ ፋይፃው አኽጝስ ኮሚቴ ቲሪትጛማ ፅናት ፄውስትⶓ ቶኬምካማ ቴግባርዳ አሴቴፍጜካ እስቱንኩ አመራርካዳ ፖላቲካው እርምጂ ካፅስትⶓኪላ ጌሌፅካ::

ይንታውስኪላ ዎንጀሉስታ ቺፅጝፂው ካሲስታንት አግስትኹ ንባር ስሬታስ ሲፋው አኽⶓ ጌሌፅካማ እዝብ ኬምፕዳ ቲሬታ ካሲካ ኑስ እንጃቢሪ ኮምኒኬሽኑ ንባር::