ፍትሬቱሳ ማዳባሬ ቴኬምስትጝስ ምርታምት ዴሜካማጌኽ

አለሚቱ የኔት

አዊ ብሄረሰቡ ቺፅጝፂ ባንጂ ወረዳ አስቑኒ አቡ ኬቤሊዳ ፍትሬቱሳ ማዳባሬ ቴርስጝስ ቴኬምስታንታ አኽⶓ አሬሳቻንትካ ዙሙና::

ፌዩንኩ አሜትካዳ ምንግስት ግብርኒው ዜርፍስ እይኹ ኬፍቲኒ ትኩትስ አሬሳቻንቲው አክም ዴሜካማጊ ይንታ:: ጊዝቺፋ ዴሜካማጊ ይንቱኽሳ አሬሳቻንቲው ማዳባሪውሳ ፋዩ ዋኽትጝፅጝስ ባርኾቼዴስ ቱዋው ኬሚካሉ ማዳባሪዴስ ድምክና አሬሳቻንቲ ዙራሙሪዳ አግስታንኩ ፄግካዴስ ቴኬምስትጝስ ፍትሬቱሳ ማዳባሬ አሜሬታታኪላ እሳን እንፅኺ እንፃኽስስቱስ እጄ::

ባንጂ ወረዳ አስቑኒ አቡ ኬቤሊው ዝኩዋንቲ አሬሳቻንቲ ተፈራ አባየ ፍትሬቱሳ ማዳባሬ ቴርስጝስ ምርቶስታ ምርታምቶ ዴሜክጙሳ እንፅኼ ካስጝፅⶓ ጄሜሩኒዴስ ሊጊሲሜ አሜቶ ቼፍፅⶓ ዙሜካ::

አቓ ግብሬ ማዳባሬ ቴኬምስትጝስ ብቲው አሉምት ኔኬታማጊ አንትጝስ ማዳባራ ጋቲታ ዜርጝስ ቼጌርስትካሺኑ ጊዝ እሺⶓኪላ አሬሳቻንቲ ተፈራ ታክስካ:: ፍትሬቱሳ ማዳባሬ ቴርስካማ ቴኬምስትጝሾ ቱጝስ ኩፅኒ አቓ ግብሪ ማዳባሪስ ፍሻኑ እሺኹሳ ጌንዜቦ ክብስጝስስታ ብቲው አሉምትኪላ ጊዝዴስ ጊዞ ዙራማ ምርታምት ዴሜካማጊ አንትⶓ ሼውንⶓ እንክርፄካ:: ምርታምት ዴሜክጝስታ ብቲው አሉምት ዙርጝ ዴሜካ ይስካማ ትኩትስ እላፎ ፍትሬቱሳ ማዳባሬ ቴርስጝሾ ዙራታ ፄውⶓኪላ ቶኬምካ:: ጝሺሱ ወክትስኪላ አኹዋቲ ልማታስ እሼውሳ ብቲዴስ ሴጋ ቴርስስታውሳ ኮምፖስቶ ቴርስካማ ቴኬምስትጝስ ቴርትⶓኪላ አሬሳቻንቲ ተፈራ ድኹዌካ::

እሊው ኬቤሊው ዝኩዋንትካ አሬሳቻንቲ ተሾመ አለሙ ቤዴርካማ ኮምፖስቶ ቴርስⶓ ጄሜሩንኩ አሬሳቻንትካዴስ ዴሶ ካፅጝስ ኮምፖስቶ ቴርስካማ ቴኬምስትጝስ አቓ ግብሬ ማዳባሬ ጄውጝስ ፍሻኑሳ ጌንዜቦ ይጉፃይኹ አኽⶓ እንክርፄካ:: ፍትሬቱሳ ማዳባሬ ቴርሳማ ቴኬምስትጝ ብቲው ሶኼንት ዙራማ ካጋሺኹ ብቲ ዙራማ ጉዶ ምርቶ ዋግፅጝስ ካሊⶓኪላ አሬሳቻንቲ ተሾመ ዙሜካ::

ባንጂ ወረዳ ግብርኒ ፅ/ጝናዳ ሴብል ልማት ኬቹ ጉሳንታ ዊ/ሮ ደጊቱ ሀይሉ ኑኑውስታጊ ባንጂ ወረዳዳ 20 ኬቤልካ ዝኩና:: እኒ ኬቤልካዳ 6 ሻይ 923 ሄክታር ብቲ አሬስስታው ዝኩⶓኪላ ዊ/ሮ ደጊቱ ጌሌፅካ::

ወረዳታ 2017/18 ምርቱ ዝቤንስ ያኻው 426 ሻይ 764 ሜትር ኪዩብ ኮምፖስቶ ቴርስጝስ እክድ እምስታማ ብቲዴስ ሴጋ 224 ሻይ 450 ሜትር ኪዩብ ኮምፖስት ቴርታማ ዲግⶓ እርዳትፅካ:: ወረዳዳ አግስታው ሚንች ብቲው ኽብፂ አሲድስ ፂኪስትኹ አኽⶓስታ እስጜ ኬሽጝፅጝስስታ ኽብፂውሳ አሉምቶ ዙርፅጝስኪላ ውላጊ አሬሳቻንትካ ብቲዴስ ሴጋስታ ብታኻዳ ቴርስስታውሳ ማዳባሬ /ኮምፖስቶ/ ቴርሳንታ ውማይቴንካ እርዳቴ ፄውቱትጚዳ ታምብⶓኪላ ዊዛሮ ደጊቱ ጌሌፅካ::

አሬሳቻንትካ ኮምፖስቶ ቴኬምስትጝስ ፌዩንኩ ሹኻ አሜትካዳ ጌቴማሺኹሳ አቓ ግብሪ ማዳባሪውሳ ችግሮ ፌይጝስ ካሊⶓ ቶኬምካማ እምፕል አሬሳቻንቲ 20 ሜትር ኪዩብ ኮምፖስቶ ቴርሳታ ዳብዚ እምስታሺኹዴስ ድምክና በርሚ ኮምፖስቶኪላ ቴርሳንታ ፄውስታማጊ አኽⶓ ዊዛሮ ደጊቱ እርዳትፅካ::

ፍንሾስኪላ አሬሳቻንትካ ኮምፖስት ዊዳፌ ኽብፂውሳ አሉምቶ ኬሽጝፃውስታ ምርታምቶ ዴሜካያው አኽⶓ እርዳትስትጝስ ኮምፖስቶ ቴርስጝዳ ትኩቶ ፄውጝ ቱስታው አኽⶓኪላ ዊ/ሮ ደጊቱ ታክስፅካ::

ቤዴራ ኮምፖስቶ ቴኬምስትካማ አሜሬቱኑ አሬሳቻንትካውሳ ሴብሎ ገበሬውሳ ባሎ ቴርስጝስ ጐቤኑኑ ወክትስኪላ ኬሻንቲ ቲሪዳ አግስታው አኽጝስ አቓ ግብሬ ማዳባሬ ፍትሬቱ ማዳባሪሊ ቴርቴራ ቴኬምስትጝ ፋይፃንቲ አኽⶓኪላ ዊ/ሮ ደጊቱ ጌሌፅካ::