አማኻሪ ክልሉ ግብርኒ ቢሩው ንባር ቶኬማውስታጊ ትክላሊስ አጌራው ምርት አማኻሪ ክልሉ ምርት ሊኽዴስ 34ታፋዴስ ጃላ ታምብ ዝኩኼኽ:: እንዴስ ድምክና ባርኾቼው ጌቤልስ ዲጋንኩ ምርትካዳ ክልል ቤዴራንቲ ቶኬምስታንቴኽ::
ክልልዳ ሴላሞ አቲጝ ኬሴትስቱኒዴስ አሜት ፌያ:: እንኪላ ክልሎስታ ዝኩዋንትካዋ ዜርፋ ሚንቺ ችግርካስ ታምፃ:: ችግርኪላ ክልልዴስ ፌይኹስ አጌርታጊኪላ ኬፍቲኔ ጉዳቶ ሲፍፃማጌኽ:: ክልልዳ ዝኩኽ ጋቻው ምክንያቲስ ድክጜ ጉዲስትካማጊ አግስታንኩ ዜርፍካ ክቻዴስ ግብርኒው እንፅኺ ቶኬምስቴ፤ አሬሳቻንቲ እንፅኼ ቱስቲስ አኮሜቻቲታ ፄውጝዴስ ጃላ ቴኬምስታንትካስ ዲግስጝስ ካላቲታ ፄዋ::
አማኻሪ ክልሉ ግብርኒ ቢሩው ንባርታጊ ንጙዊኒ ምርቱ ዝቤንዳ 5 ትኩሚ ላጛ ሚሊዩን ሄክታርዴስ ጃላ ብቲ አሬስስታማ ሊሊትጙንኩ ሴብሉ ዜርካስ ሾፌንስታ:: እንሳ ሴብሎ ዴሜካ ወክቶ ማንዳያሱ እሪ እሉዋማ ጉዳቶ ታምፅጝዴስ ቤዴራ ኩፕፃማ ጝና ሚፅጝ ቱስቴ:: ወክቶ ማንዳያሱ እሪ እሉኒጊ ታንቡኽሳ ምርቶ አንጌፍጝስስታ ጐግልስትኹሳኪላ ያኹኒ ፆፃ አቤሌሽጝ ይጉዋላኪ፤ እንጊ ችግር ታምጝዴስ ቤዴራ ኩፅኒ እፅድስ ታንቡንኩ ሴብልካዋ ዝክኹ ዴስስትኹ ባይልስ ውቢሪስኪ ያኻ ጌንዜብስ እርዳታንትካዋ አፄዳንታ ፄውጝስ ወክትስ ኩፕፅጝ ፋይፃንቴኽ:: ወክቶ ማንዳያሱ እሪስ ምርት ኔኬትኾ ንጝ ዴሜካ ጊዝዴስ ጊዝ ባስጛማጊ ዝኩኽሳ ዝኩዊኒው ክብርናቲ ባሳማጊ ካሳታ ፄዌ፤ እን ዴሜካ ውላውሳጊ ጝኖ ኔክፃው ጉዳያኽ::
ሚንችትስ ምርት ኩፕንጝስ ካላው ኪላ አቒው ግርብሴኽ:: አኽጝስኪ አሬሳቻንትካ ጝናቑሳ ግርቦ ቴቤቤርጝስኪላ ያኹኒ ምርቶ ጊዛታስ ኩፕፅጝ ቱስታዌኽ:: ምርቶ እሪ አቤሌሻቲታ ጊዛታስ ኩፕፅጝ አወሳኪ ኩስጜስታ ጉሽጝፃንቴ ፋያው ጉዳይ ያኻውላ ውላውጊ አሬሳቻንቲውዳ አንኩሊዳ ትኩቶ አግፅጝ ቱስታው ዲቢያኽ::
ሴብሎ አፄዳማ ጐግልጝ ይቪቻ ያኻውላስ ካጋማ አፄድስትኹሳ ምርቶ እሜ ኪዳማ ጐተሪሾ ሚፅጝኪላ ፋይፄ::
ጐግልስታማ እንኩርስትኹ ምርትኪላ ያኹኒ ፆፃ አቤሌሽታትስታ ድኬ ታክስጜ ፃይኹ አቒስ ሌግስ ጋቢትጝኪላ ጌቴምጝ ካላው አኽጝስ ወክትስ ኪዳማ ምርቶ ጝና ሚፅጝ ቱስቴ:: እሳን ሴብል ብታሳ ፃይኹ ኢንቨስተርኪላ ያኹኒ እስጜ ምርቶ ዝቤናዌ ቴክኖሎጄ ቴኬምስታማ አፄድፃማ ኪዲጝስ ምርት ጝንሰ ቱዋታ ፄውጝ ፋይፄ:: ምርቶ ወክትስ ኩፕፅጝ ቤዴርት እይስትጝ ቱስታው ቴግባሬኽ:: ምርቶ ወክትስ ኩፕፅጝስ ትኩቶ እይጝኪላ ቱስቴ:: ጉዝም ካሴውሳ ጉዝማስ ናኑ እንታኮውሳኽ ፤