ኽሳንቲ ጊጚው ጂሚርጚ

ታደለ አጋጄ

አሜት ቺፋ አዲስ አበባዳ ካስጛው ኽሳንቲ ጊጚ ይቶፒያዳ አፍሪካዴስ ኽሳንቲስታ አሌም አቡቑ አችስ ቢዲሪዳ ቶኬምስታው ዳዱ ልኺትጚዴስ እምፕሊያኽ።

ጊጚ 1994 ም.አሜታዳ ጄሜርስትኹ ጊዝዴስ ጉሽፃማ ይቶፒያው ኩራት፣አትሌትካው አግፅፂስታ ኒኩኽ ማቤርአቖ ጁትጝፅጝስ ምሳላ ያኻማ ሲፋ።

እሊኩ አሌምኩ ቤንካዴስ ካንቱክሳ ጉድካ ዲብካ አጌርሾ አግጝስ ቦዜናቲው ጄግኒ አትሌት ሻለካ ሀይሌ ገብረስላሴ ኽሳንቲ ጊጚውሳ አሳቦ ፍልቕፅኹ ዩናይትድ ኪንግደሙ “ኖርዝ ግሬት ራን “ ናውሳ ጁፃ ፄውጝስያኽ።

ይቶፒያው ኽሳንቲ ጊጚ አሌሙ አትሌቲክሱ ፌዴሬሽንስታ እሊኩ ሚንችካ አችትካስ አቕስቶ አግፅኹ ያኹስ ቲንዌና ማቤር አቖ ፌቴርጝስ ፣ማይቤራዊ ኪሲስ፣ ዙራሙሬ ስንክርስትጝዴስ ማንዲጝስ ፌዩንኩ 23 አሜትካዳ ኬፍቲኔ ፍሼ ፄዋ።

አባላምቲ ኽሳንቲ ጊጚ ይቶፒያዳ ዳር አርፊ 1994 ም.አሜታዳ አዲስ አበባዳ ጄሜሩስ አቕስቱንኩ አትሌትካዋ ዴሜካማ 10 ሻይዴስ ጃላ አሴቴፍጙንኩ ያኹስ አባላምቲ ጝርጃው 10 ሻይ ሜትሩ ዊፃንቲ አትሌት ሻለካ ሀይሌ ገብረስላሴ እሺኾ።

ኽሳንቴ ጊጜ ሊሊታ ፄዋው አቕስቱንኩ አትሌትካ፣አትሌቲክስዳ አሴቴፍጝስ ቴስፊ ዝኩክ ሌጌሳታምብካስታ ውላ እምፕልታቕኩ ቤንካ አሴቴፍጛኑ አኽጝሲያኽ። ዲጊስ ስራስሪውሳ ልኺትጜ ካስጝፅጝስ ውላቱዊ ቴሳትፉ ያኻታ ፄውስታ።

ኽሳንቲ ጊጚ አዲስ አበባዳ ይቪቻ ዎሴንስታማ ይጉዋው ያኻውላስ ባርዳርዳስታ ሀዋሳ ፄጌራንኩ ክልልኩ ኬቴምካዳ ምስሊ ልኺትጚ ቴርቴ።

አፍሪካው አችስ ሚንች ሻይስ ቼፍስታንኩሳ አሴቴፍጝፅጝዴስ ፌይኹስ ሚንችካ እምፕልቴካማ ባይሎ ሌጌፃኑስታ ጅሚስ ፍትኽ ናኑ ሜንድሬኽያኽ።

ንባር፡- ኢቢሲ ስፖርትዴስ ካፅስትኹያኽ፡፡