ትራንፑሳ ጝኖ ማንዳንኩ ሮቦትካ

አለሚቱ የኔት

አሜሪካው ፕሬዝዳንታዊ ዴክቶ ማንዲጙ ሜስሪ ጝና ሴክሬት ሰርቪስስ ቴኬምስታንኩ ቴክኖሎጅካዴስ እምፕል ዲጊስ ቦስተን ዳይናሚክስስ ግቢትስትኹ “ስፖት” እስትኹ ሮቦቱ ግሴጜኽ::

እንሮቦትኪላ ፍሎሪዳዳ አግስታውሳ ጐሌልስታንቲ ፕሬዝዳንት ዶናልድ ትራምፑ ግዲታሚ ዝኩፂስታ ፍትኽፂ ስፍሪ ያኹኽ ማራላጐኖ ዜዌዌርጛማጊ ማንዱስ ካንትስታ::

እኒ ግሴጝካ ወሬሙሳ ሜሳሬ ዶንጌትካያ፤ ሪሞትስ አኹኪ ቤዴራማ ጌቴምስታይኹ ቴክኖሎዴሴኽ ልቕልቕናኑ::

እንጚ ስፍሪዳ ዙራዙራንኩ አቕኪላ እኒጛ ሮቦቱ ግሴጝካዋ ካንቱኒዴስ እምፕሎ ትዛዞ ሲፍጝ ቱስቴ:: እን ትዛዝኪላ “ኔክፄንኪ” ናዌኽ::

ስፖት እስትኹ እንጚ ሮቦቱ ግሴጝ ማራላጐኖ ዙራዙራማጊ ማንዱስ ካንትፃው ቪዲዮ ዙሚትጝፃንታ ያኻ::

ሴክሬት ሰርቪሱ ቤዴራሱ ዴክቱ አባል እሺንኩ ሮን ዊሊያምስ አምናኑውስታጊ ሜስሪ ጝንካ ድምክኒስ ቲንኪክጜ ፄዋታ ፄዋኑላስ ይጉዌካያኪ እስታ::

ዊልያምሰ ናኑውስታጊ ማራላጐ ሚንች ቤን ካንትስታዌኽ:: እንስ ዴሜካ ሮቦቱ ግሴጝካ ማልጜ ቴኬማንትካኽ:: እኒ ሮቦቱ ግሴጝካ እንዴስ ፋሌንጋኪላ ሊሊትጙንኩ ስፍርካዳ ካንትጝስ ካሊናኩ አኽⶓኪላ ዙሜካ::

ዊልያምስ እርዳትፁኑውስታጊ ሮቦቱ ግሴጝካ ሴክሬት ሰርቪስዳ ይቢቻ ያኻውላስ አሌሙ ዙሪዳ ዝኩንኩ እጉ ኬቤርፃንትካስታ ወታድርካውላዳ ትክምዳ እሺⶓ ጄሜርካ::

ስፖት ፋማ ቱጝስ ካላው ሮቦቱ ግሴጝ አኽጝኪላ ቶኬምስታ:: ደረጄ ፊⶓስታ ጌምⶓኪላ ካሌ:: ፅባብ ስፍሪዳ ዋትጛ ልቕልቕንጝስ ካላው አኽⶓኪላ ያቔ::

ልምትኹሳ አብጂሌ ብስጝስኪላ ካሌ:: ኬሴቶ ካንታማ ሺሽጝስ ካሊⶓኪላ ዴክቱ ሜስሪ ጝናስ 75 ሻይ ዶላሮ ፍሽካማ ጄዋንታ ፄውⶓ ሴክሬት ስርቪሱ እዝብ ታምትጚው አላፊ “ሮቦቱ ግሴጝካው ዴክቱ አኹኪ ስላሊው ቴክኖሎጂ ጌቴምስታይኩስታ ጛጂሱሳ ዴክቱሳ እርምጄ እርዳትጝስ ግቢትስቱንኩ አኽጝኪላ ቶኬምስታ::

ንባሮ አግፅንኹኪ ቢቢሲዴሲያኽ::