አኹዋቲ ልማታሱ አንፅኺ ዲጊዴስ ናቴ ቴግባርሾ ቱስታማጊ ዝኩኽ ቴግባርያኽ:: አማኻሪ ክልሉ ግብርኒ ቢሩው ንባር ቶኬማውስታጊ ክልልታ 70 ሚሊዮን ሄክታርዴስ ጃላ አኹዋቲስ ሊሚጝስ ካላው ብቲ ዝኮ:: ያኼስጉ እምፕልታቑ ታክስጚ እንፂጛስ ኩፅኒ 14 ሚሊየን ሄክታርዴ ኽሳያሱ ብቲ ይቢቺ አኹዋቲስ ሊማው አኽጝ ቶኬምስታ::
አሬሳቻንቲው ሊሚፅጙ እንፃኽስትጚ እሪው አኹሊ ኩራርጙኽ አኽጝስ አግፃኑ ምርት እምፕላጋይ አኽጝስ ቴኬምስታንታ ያኻኑውላስ ሴጝካ::
ቤዴራሱ ታክስጚዴስ ፊጝስ እሌትዴስ እሌቶ ምንግስት እያውሳ ሜሜሬ ሲፍጝስ እሪስ አሜሬትስታው ምርትዴስ ድምክና ሙሪ ቺፋ አላባሊስ ክቢስ ሴጙኽሳ አኾ ቴርስጝስ አኹዋቲ ልማት እንፅኻሾ ቱስታማ አሬሳቻንቲኪላ ቴኬምስታንታ ያኻማጌኽ:: እን እንፃኽስትጚዴስ አግስታው ምርትስ ቴኬምስታንታ አኽⶓ ሼውንጝስኪላ ክቤው አኹ ቱስቲስ ልማትስ እሼታ ፄውስትጝስ ዴዴክ ግቢትስታማ አግስታው አኹስ ቴጋንኩ ቴክልካዋ አሜሬትጝዴስ ፌይኹስ ሴብሎ አሜሬትጝሾ ቱስታማ ምርታምት ዴሜካማጌኽ:: አኹዋቲስ ሊማው ሴብል ዴሜካ ችኻ አሜሬትስቱስ ታንባው እኻኺውስታ ንፋሱ ጉዳት አግፃቲው አኽጝስ ችኻ አሜሬትስታውዴስጊ ኬሻንቲ ምርትኪላ አግስታዌኽ:: አኽጝስኪ ውላጊ ቱስቲስ ሙሪ ቺፋ ክቤውሳ አኾ ቴኬምስትጝስ ቴጋኑሳ ትክልቴስታ ሴብሎ አሜሬትጝስ ምግቡሳ ዋስትኔ ቼሜትጝፅጝ ፋይፄ:: ምግብስ ጛሬ ካሊጝ ዴሜካ ጝንዴስ ፊታማ ትብስ ያኻውሳ ፊቲስጝስ ካሊፃዊያኽ:: እንኪ ውላዋጊ ቴኬምስታንታ ፄዋውሳ ድሎ ብሳዌኽ:: አኹዋቲ ልማት እንፅኻ ይሳማ እንፃኽስትጝስ አሜሬትስታው ምርትስ ጛርትዴስ ፌይኹስ እሊውሳ ቴኬምጝስ ካሊፃው ቴግባር አኽጝስ ውላጊ ትኩቶ እያማ እንፃኽስትጝ ቱስታው ቴግባሬኽ::