“ሰላም ውላስ ውላ ሰላምስ” ናው ቹዋ እንፅኼንትስ እዝባዊ ሰላማዊ ሴልፍ ካስጙኻ

አለሚቱ የኔት

ብሄረሰቡ ቺፅጝፂዳ ምንግስት ካስጝፃማጊ ዝኩኽሳ እጐ ማንዲፅጙሳ እርምጄ ዴጌፋው ሰላማዊ ሴልፍ ካስጛ::

ብሄረሰቡ ቺፅጝፂዳ አግስታንኩ 9 ወረድካዳስታ ኬቴሙ ቺፅጝፂዳጊ እዝባዊ ሰላማዊ ሰልፍ ካስጛ:: እዝባዊ ሴልፍዳ አግስቱንኩ ዝኩዋንትካ ዙሙኑውስታጊ ምንግስት ካቢትጚስ ዲግሳውሳ ሰላሙሳ እቑዌ ዴጌፍጝስስታ ሰላም ማንዲፅጝስ ጐንዳ ቲሬንኩ አኽⶓ ጌሌፅጝሴኽ ሰላማዊ ሴልፍሾ ፉኑዊ::

ሰላም ይጋሪው አብት አኽⶓ ቶኬምጝስ ሰላም አቲጛስ ሚንችካ ዙራሙሬ ባይፅካማ ስዴታ ፊⶓ፣ አቒው ይወት ድስⶓ፣ ካሜናንትካ ካኒ ስራዳ ካሜንⶓስታ ስራስሪ እንጉስ ማንዳኑሳ ክንቴ ክንትጝስ ቼጌርስትⶓኪላ ዝኩዋንትካ ቶኬምካ::

እምፕል አሜትዴስ ጃላ ክልልታ ፌቴርስትኹ ጋቻ ብሄረሰቡ ቹፅጝፂዳኪላ ሼውታ ስፍሪዴስ ስፍሬ ሼውታ እንዜጝትጝጝስ ካላቲንታ ፄውⶓ ሴልፍዳ አግስቱንኩ አቕ ዲብስካ:: እስጜ ሰላሙሳ ችግሮ ይጋሪስ ካላካልጝጝስ ፋይ ዝኩክስታ ምንግስትሊ ሰላምስ ይጋሪስ ቲሪⶓ ካንትፅጝስ ሴልፍዳ ፊⶓኪላ ዙሜካ:: ሰላሞ ማንዲፅጝስ ምንግስት ካቢትጚስ ዲግሳውሳ ሰላሙሳ እቑዌ ዶንጌቱንኩ አይልካ ዲግካማ ሰላሞ ጌምፅጝ ፋይፃንቲ አኽⶓኪላ ዲብስካ::

ዶንጌቱንኩ አይልካ ሰላማውካ አቕዳ ታምፃኒሳ ጅምላ አቖ ኩⶓ፣ ቤዴሎ፣ ግፎ፣ ችፍቻፌስታ ዜሬፍስትⶓኪላ ማልጜ አዌጌዛንኩ አኽⶓ ዙሜካ::

ሴልፍዳ ፉንኩ እምፕልታቕ ኑኑውስታጊ እዝብ ፋያው ልማቶስታ ልግሶ እንቲታኪ ጝንቺፋ ምኽምኽፃማጊ ዝኩኽ ዝኩዊኒው ክብርናቲ አሬኬዛታ ፄውጝ ቱስታዌኽ::

ካስጙኽ ሰላማዊ ሴልፍዳኪላ “ምንግስት ሰላም ቼሜትጛታ ካስጝፃውሳ እርምጄ ዴጌፍኔ፣ ሰላማውካ አቖ ግፍስ ኩዋማ ፒፕዳ ፄውስታውሳ ግፎ አዌጌዝኔ፣ ክንትⶓ ፋኔ፣ ምንግስት ክንቲ ጝንካዋ ድፃንቲ ኬችዴስ ማንዳይስ” ንጝስ ድምፆ እንኮኽፅካ::

ብሄረሰቡ ቺፅጝፂ እንጃቢሪ ኬቴምዳ ካስጙኽ እዝባዊ ሰላሙ ሴልፍዳ አግስቴካማ እንፅኼንቶ ፌያፌይጝፁንኩ ብሄረሰብ ቺፅጝፂው ቹዋ ቺፅጝፃንቲ አቶ ቴዎድሮስ እንዳለው ጌሌፁኑውስታጊ አሜቶ እጂኹ ሰላሙ ችግር እንጃቢሪ ኬቴሙ ቺፅጝፂሰ እሳንጛማ እምፕልታቕ ኬፍንኹ ችግራኻ ቱዋቲንታ እዝብ፣ ካላካልጚው ሰራዊቲስታ ሚሊሻው አባልካ ኬፍንኹሳ ክራፊትጜ ፄዌካኽ::

እዝብ ናካኪላ ቤዴራ ካንትኽሳ ይጋሪውሳ ቲቢቢርጜ ይስፅጝስ እንሳ ድፂውሳ ቴግባሮ ዳላዌኽ ንጝ ቱስታው አኽⶓኪላ ቹዋ ቺፅጝፃንቲ ቶኬምካ:: ምንግስት ይስጙኽ እጐ ኬቤርፅጝሾ ቱⶓ ጌሌፁንኩ ቺፅጝፃንቲ ዶንጌቱንኩ አይልካ ሰላሙሳ እቑዌ ቻቤልካማ ሰላሙ ጉላሊሾ ዙራንታ ናካኪላ እቑዊ ዲግስካ::