ግብሮ ኩፕፅጝ ሚፂው ፅ/ጝናሱ ይቪቺስ እይስታው አላፍት ጋቲ ዊያኽ “አዩ ጉዋጉሲ ወረዳው ሚፂ ፅ/ጝና”

ታደለ አጋጄ

አዮ ጉዋጉሲ ወረዳ እምስትኹ ባጄት አሜትዳ 192 ሚሊዮን 34 ሻይ 68 ብሮ ኩፕፅጝስ አኬድስታማ 52 ሚሊዮን 765 ሻይ 765 ብር ላንቡሳ ኺስታ ኩፒⶓ ወረዳው ሚፂ ፅፌት ጝናሱ አላፊ አቶ ያረጋል ምናየሁ አቕፄካ::

እንኪላ ሊኽዴስ 27 ትኩሚ 48 ታፋ አኽⶓ ጌሌፅካ::

ሚፄ ኩፕፅጝስ ካሊፃንኩ ሊሊትጙንኩ ሚፂ ኩፓው ዳድካዴስ ሚፄ ኩፕፅካማጊ አግስታንኩ አኽⶓ ጌሌፅካ::

ፋይስታውሳ ላካሳ ሚፄ ኩፕፅጝስ ካሌካያሱ ሰላሙስታ ፄትቲው ችግርስ አኽⶓ ቶኬሙንኩ አቶ ያረጋል ሚፂው ፅፌት ጝና ሊሊትጙንኩ ዙራሙርካሾ ልቕልቓማ እንፃኽስታቲታ ሰላሙ ችግር ፅንጋኻ አኽⶓ እርዳትፅካ::

ወረዳዳ ፌይኹ አሜትዳ ሊሊትጙንኩ ኬቤልካዴስ ፌኔኬልጛሺንክ ዙራሙርካዴስ ሚፄ ኩፕፅጝስ ካሊስታያሱ አኽⶓኪላ ቶኬምካ::

ቤዴራ ሊሊትጙንኩ ዙራሙርካዳ ጊፅሳሺንኩ ጌፄንካ እሊውሳ ስፍሬ ባይፅካማ ካስጝ ዴሜካ ዜሬቕቲኒ ሚፂ ኩፓታ ምክኒያታ አኽⶓ ቶኬምካ::

ሊሊትጙንኩ ኬቤልካዴስ ይንቱንኩ ግብሮ ኬያንትካሊ ኩስጝጚውሳ ሜንድሬኾ ካስጝፅጝስ ግብር ዎክትስ ኩፓት ቱትጚዳ ታምብⶓኪላ ጌሌፅካ::

ሊሊትጙንኩ ኬቤልካዳ ብቲውሳ ግብሮ ኩፕፅⶓ ጄሜሩንኩ አኽⶓ ጌሌፅካ::  ፌይኹ አሜትዳ ሰላሙስታ ፄትቲው ችግራኻዳ እሺንኩ ሊሊትጙንኩ ዙራሙርካዳ ጉድ ሰላሙ አኺኒ ፌቴርስትኹ አኽጝስ ፋይስታውሳ ፅሬቶ ፄውጝስ ሚፄ ኩፕፅጝስ እንፃኽስታንኩ አኽⶓ አቶ ያረጋል ጌሌፅካ::

ሚፂ ዎክትስ ኩፓውላስ ምንግስትኩ እንፃኽስታንትካስ ኬይስታው ደሞዚ፣ እምፕልታቕ ጉሻኑ ልማቱ ካሲስጊ ዙርሜ እይጝስ ውላ ጛርት አቕ “እን ግብሮ ኬታው ይጛርትጛሲያኽ ንካማ አምንጝስ ወክትስ ግብሮ ኬይስ ቱስታው ጉዳዬኽ” ንካ::

አይኪ አቒ እንፃኽስትኹ ልክስ ምንግስትስ ግብሮ ኬይጝ አጌራዊ ግዴቲያኽ ኑንኩ አቶ ያረጋል ኬይስታው ግብር ዙራማ ጛጂሱ ልማትስ እሼው አኽⶓ እርዳትፅካ::

ቴሳስ 30/2017 ም.አሳኺስታ ውላ ግብሮ ኬያንትካዴስ ግብሮ ኩፕፅጝስ ፅሬቶ ፄዋንኩ አኽⶓኪላ ጌሌፅካ::

እምስትኹሳ እክዶ ሳኪትጝፅጝስ ዴሜካ ጉንቤት 30/2017 ም/አሳኺስታ ኩፕፅጝስ እንፃኽስታንኩ አኽⶓ ጉሽካ::

ግብሮ ኩፕፅጝ ጌቢው ፅፌት ጝናስ ይቪቺስ አይስታው አላፍት ጋቲዊያኽ ኑንኩ አቶ ያረጋል ውላ ኾትካጊ ግብሮ ኩፕፅጝስ እኖጂሊ ትኩቶ እይካማ እንፃኽስትጝ ዝኮ ንካ::

ሚፂ ኩፕናውላስጊ ዋሺኒኪ ምንግስቱ ኾት እንፅኼ አኮሜችጝስ ካላቲው አኽጝስ ሚፂ ኩፕናታ ውላጊ አሬባሬብጜ ፄውጝ ፋይፃው አኽⶓ ጉሽካ::

ውላጊ ግብሮ ኬያንትካ ዴሜካ ዎክትስ ግብሮ ኬያንታ እቑዌ ፌያፌይጝፄካ::

አዮ ጉዋጉ ወረዳ 01 ኬቤሊዳ ጊፁ እንፅኺዳ አሴሜርጜካማ አግስታንኩ አቶ ብርሃኑ ደነከው ግብሮ ወክትስ ኬይጝስ ሽልማቴ አግፅⶓ ድኹዌካ::

ግብሮ ዎክትስ ኬይጝ አጌራዊ ግዴቲያኽ ኑንኩ ጊፂኒ ብርሃኑ ግብር ኬይስታውላስጊ ልማት ያኻ ሰላሞ አንትጝስ ካሊስታቲው አኽⶓ ዙሜካ::

እምፕልካ እምፕልካ ጌፄንካዳ ጊፅስጝስ አግፃኑዴስ ጃላ ጌንዜብዴስ  ጃላ ግብሮ ኬታን እስትⶓ ቶኬሙንኩ አላፊ እንታኮው ዲብ ክቼታ ሜድሬኽዳ እሳቦ ጉሽⶓ ዲብስካ::

ክልልታ ፌቴርስትኹ ፄትቲው ችግር ጊፁ ልቕልቕቲዳ ኬፍቲኔ ቻኒስቶ ፌቴርⶓ ድኹዌካ::

ቤዴራ ሊሊትጙንኩ ኬቴምካዴስ ሼኬቶ አግጝስ ጊፅሳሺንኩ አኽⶓ ዲብስካ ናካዳ ኩፅኒ ዳድ ልምትጝ ፋይንታ ጊፁሳ እንፅኼ አኮሜቻቲንታ ፅንጋኻ አኽⶓ ጉሽካ::

ዳድዳ ሼኬት ዜሬፍስትጝ፣ ጊፂኒ አጌትስታማ ብሮ ኬይጝስታ እሊኩ ችግርካጊ ዝኩⶓ ቶኬምካማ ምንግስት ሰላም ሴፌናታ እጎ ኬቤርፃያታ ካሲካ::