ታሪካዊ ሶኼት

ቴሳስ 14ዴስ 18/1988 ም/አ ኺስታ ዝኩኽ ጌርክ አዊው እዝብስ ታሪካዊ ጌርኪያኽ:: አውጜ ፁፉ ቴርትሾ ካይጝፅጝስ ኮንኪው ታሪኩስታ ባይሉ ሲምፖዚየም አንኩዋ ጌርክካስ ፌዴራሉ ምንግስትዴስ፣ አማኻሪ ክልሉ አመራርካዴስ፣ ዋግኽምራ ብሄረሰብ ቺፅጝፂው፣ ኤርትራ ብሌን አገውካ አርጐባው ወኬልስታንትካዴስ አሴቴፍጙኑ ብሩኹስታ ዜኔግስታቲው ቴርት ካስጛ::

እን ባይሉስታ ታሪኩ ሲምፖዚየሙ ባልዳኪላ አዊ ባይሉ ኬች ቲሪትጛታ አሳብ ጁዋማ ሊሊትጙኽ ቴርት ፄውስቱስ እጄማ 1990 ም/አሜታስ ባይሉ ኬች ይፋስ ቲሪትጙኻ:: እን ባይሉ ኬች ቲሪትጝጝ ዴሜካ ትቤብስ ብሄረሰብ ቺፅጝፂኩ ባይሉስታ ወጐ ዲግስጝስ ኬፍንኹሳ ፍሼ ፄዋ:: አውጚው ኮንኪስ ጅምካዋ ፍሽጝስ አዊ እዝቡሳ ጉድቦስታ ልቕልቕቴ አሌምዳ አቕስታታ ፄውጝስኪላ ባይል ኬቹ ፍሺ ኬፍቲኔኽ:: እንጚ ታሪኩስታ ባይሉ ሲምፖዚየም ካስጝⶓ ሲፋማኪላ 1989 ም/አ አውጚው ኮንኪስ ክንቲ እይስትⶓ ጄሜርኾ:: አውጚስ ላኹ ናማ ጄሜርኹ ክንቲ ዴሜካ ናካዳ ዩኒቨርሲቲው አችስ እይስትⶓ ጄሜራ::

አውጚው ኮንኪ ፁፍስ እሺⶓ ጄሜሩኒዴስ ፋሌንጋ 1989 ም/አ አውጚው ኮንኪስ አማኻሪ ሚንችካ ታምትጝፂው አችትዳ አማኻሪ ሬዲዩንስ 1997 ም/አ ሶኼትስ 15 ደኪካስ  አውጚስ ፕሮግራም ፌያፌይጝⶓ ጄሜርኹ ናካዳ ሶኼትስ ሲዚ ሳታሳ ፌያፌይጝጝስ ካላ::

አውጚው ኮንኪስ ፃፊስቴት ቺርቤዋ ጋዜታ አርፊዴስ ላጚኒ 8/ሶኼታ ፍንስ 2003 ም/አ አቲምስቴታ አንቤባንትካስ ታምብⶓ ጄሜርትኾ::

አማኻሪ ቴሌቪዥንስ ዴሜካ 2008 ም/አ ሶኼትስ 30 ደኪካስ አውጚው ቴሌቪዥኑ ፕሮግራም ፌያፌይⶓ ጄሜራማ ናካዳ ሶኼትስ 28 ሳታሳ ፌያፌይጛማጌኽ::

አውጚው ኮንኪስ ሬዲዩንስ፣ ጋዚቲስ፣ ቴሌቪዥንስስታ ኦንላይንስ ፌያፌይጝጝፅጝዴስ ፌይኹስ ናካዳ አሚኮኪላ አውጚኩ ቴርትካዋ ማቤር አቕ ዩቲዩብስ፣ ፌስቡክስ፣ ድረገፅስስታ፣ ቲክቶክስ አግፃንታ ፄዋማጌኽ:: ናካ እንዳ ታምብጝስ ጉሽፃያኹኽ አዊ ባይሉስታ ታሪኩ ሲምፖዚየም ኬቤርስትጝኪላ 29 አሜቶ ቼፍፃ::

ኽሳንቲ አዊ ባይሉ ኬች ዴሜካ ቲሪትጙኒዴስ 27 አሜቶ እሜ:: እንሳላካ ፅሬትስ እንዳ ታንቡኽሳ አውጚውሳ ኮንኬ፣ ባይሎስታ ወጐ ማንዲጝኪላ ውላውጊ አላፍት አኽጝስ ታምቦ ፊትጝጝ ቱስቴ::