አኾ ቱስቲስ ቴኬምስቱንኩ

ታደለ አጋጄ

ይቶፒያ ፌዩንኩ አሜትካዳ አኾቲ ልማቱ እንፅኺስ ሊሊቴ ትኩቶ እይጝስ አሜቶ ዋኾ ስፍሪ ስፍራስ ክቤንኩ ብንካዋ ቴኬምስትጝስ አሬሰቻንትካ ኬሽኹሳ ዝኩዊኔ ጉሳንታ ግብርኒው ዜርፍስ ጉድ እንፅኺ አኮሜችስታማጊያኽ::

እሳን እርሺው ብቲስታ ሚንች አቒ አይል ዝኩት ይቶፒያ ዝኩኽሳ አቒውሳ አይሎ ቴኬምስታማ ኬሽኹሳ ዝኩዊኔ ጉስጝስ እንቲታኪ ምግቡሳ ዋስትኔ ቼሜትጝፅጝስ አኾቲ ልማቱ እንፅኺስ ካንትስታማጊ ዝኩኽ ኪሲ ማልጛ ጋሺፃዊያኽ::

አጌራው ኢኮኖሚው ስር ያኹኽ ግብርኒው ዜርፍ ዲጊ ጊዝዴስ ናቴ አኾቲው ልማትስ ጉድ ኪሲ ሜዜጌብስታማጊ ያኹስ ባርኾቼውሳ እርዳቴ  ፋይጝዴስ ኪቻ ዝኩኽሳ አብቶ ቴኬምስትጝስ ድኽቱ ታሪክዴስ ፊጝ ቱስታው ጉዳያኽ::

2016/2017 ም/አሜታሱ ምርቱ ዝቤንዳ ሊሊትጙንኩ ዙራሙርካዳ አኾቲ ልማቱ እንፅኺዉ ልቕልቕቲ ጄሜርስታ::

ስልኪስ ንባሮ ታምፁንኩ ባንጂ ወረዳ አስቑኒ አቡ ኬቤሊዉ አሬሳቻንትካ አኾቲስ ሊሚፃኑ ሴብልስ እርሼ አሬሴካማ ዜርጝስ ቴርትካማጊ አኽⶓ ዙሜካ::

አሬሳቻንቲ መላኩ አድማስ ባንጂ ወረዳ አስቑኒ አቡ ኬቤሊው አሬሳቻንቲ ያኻኒስ አኾቲስ ሊሚፃኑሳ ብቴ ጉድጛ አሬሴካማ ዜርጝስ ቤዴራ ቴርቶ ፄዌካማጊ አግስታንኩ አኽⶓ ዙሜካ::

አሬሳቻንቲ መላኩ አኾቲስ ስንዳዮ ቢራውሳ ስምኬ፣ ዱኒዜስታ እሊኩ ቴክልካስታ ኩፓኩፒኩሳ አይኔትካ ዜራና:: አሜት ቺፋ ኬሽኹሳ ምርቶ ዋግፅጝስ ቴኬምስታንታ ያኼካማጊ አኽⶓ ዙሙንኩ አሬሳቻንቲ አሜሬቱኑ ምርትስኪላ ጛጛርትጛሱ ምግብስ እሽፅጝዴስ ፌይኹስ ጌቤልስ ዲግሳንኩ አኽⶓ እንክርፄካ::

ኬቤሊዳ ስንዳይስታ ዱኒዚ እሳንስ አኾቲስ ሊማው ሴብል አኽⶓ ዙሙንኩ አሬሳቻንቲ ንጙዊኒ ዎክትዳኪላ አኾቲስ ኬሽኹሳ ምርቶ አግፅጝስ ይስካማ እንፃኽስታንኩ አኽⶓ ድኹዌካ::

አሜትዴስ ላጚኒስታ ሹኺኒ ሊሚፃኑ ብቲ ዝኩⶓ ቶኬምካማ ፌይኹ አሜትዳ ጉልሊ ዜሩስታ ግባቱ ችግር እሺⶓኪላ ጉሽካ::

2016/2017 ምርቱ ዝቤንዳ ስንዳዩ ጉልሊ ዜር ዲጉኒውላ ዋይሚ ማልጛ ዴሜክጝስ  እሊውሳ ዜሮ ጄዌካማ ዜርጝስ ጌዴድስታንኩ አኽⶓ ዙሜካ::

ግብርኒኩ ውማይቴንካ ሙሬኺስታ ካስጝስ እርዳቴ ፄዋንኩ አኽⶓ ቶኬሙንኩ አሬሳቻንቲ ጉልሊ ዜሮ ቴኬምስትካማ ዜራንታስታ ኬሽኹሳ ምርቶ አግፃንታ ኩስጝፃንኩ አኽⶓኪላ ድኹዌካ::

ንጙዊኒ ወክትዳ ዳላው ግባት ዲግⶓ ቶኬሙንኩ አሬሳቻንቲ መላኩ አኾቲስ ሊሚፃኑ እምፕል ሄክታር ያኻው ብቲ ዝኩⶓኪላ እንክርፄካ:: ዝኩኽ እምፕል ሄክታር ብቲዳኪላ ጉባሬ፣ ስንዳዮ፣ ቢራውሳ ስምኬ፣ ዱኒዜስታ እሊኩሳ ሴብልካዋ ሊሚፃንኩ አኽⶓ ቶኬምካ::

ቤዴራ እምፕሎ አይኔቶ ሴብሎ ዜርጝስ ትክሞ አግፃቲንኩ እሺንኩ አኽⶓ ዙሙንኩ አሬሳቻንቲ መላኩ ናካዳ ጌቤልስ ማልጛ ፋይስታንቲ ያኹኽሳ ሴብሎ አሜሬትጝስ ቴኬምስታንታ አኽⶓ ዲብስካ::

እሊው አስቑኒ አቡ ኬቤሊው አሬሳቻንቲ ተፈራ አባዬ አኾቲስ ቤዴራ ቴርቶ ፄውⶓ ጄሜሩኑ ሹምቤ ጉሹኑ ሜስኬሩም 17ዴስ ጄሜርካማ አኾቲውሳ እርሼ ካቢትጝፄካማጊ አሬሴካማ ዜሮ ዜርጝስ  እሬ ብሳውሳ ጊዞ ማንዲትጛንኩ አኽⶓ እንክርፄካ::

አሬሳቻንቲ ተፈራ ዝኩኽ ልቓ ብቲዳ ስንዳዮ፣ ዱኒዜ፣ ጉባሬስታ እሊኩ ቴጋንኩኩ ቴክልካዋ አኾቲስ ሊሚፃና::

ዝኩኹሳ ጌሜዳ ብቴ አሬሴካማ ላስላስፅⶓ ቶኬሙንኩ አቶ ተፈራ ኬሽኹሳ ምርቶ አሜሬትጝስ ኮምፖስቶ ቴርስጝስ ቴኬምስታንኩ አኽⶓ ዙሜካ::

ቤዴራ አኾቲስ ሊሚፃኑ ጊዝዳ ጉልሊ ዜርስታ ግባቱ ችግር እሺⶓ ቶኬሙንኩ አሬሳቻንቲ ተፈራ ንⶓ ኩፅኒ ፋይስታውሳ ላካ ግባት ዲግⶓ ዙሜካ::

ንጙዊኒ አሜትዳ ጉልሊ ዜር ዲጉኒውላ አሬሳቻንትካው አክምዴስ ጃላ ዋይሚው ድምክኒ ዝኩⶓ እንክርፄካ::

እምፕል ኪሎ ግራም ስንዳይ ሊኻ ሹኻፅካ አንኮ ብሮኺስታ ዋይስታው አኽጝስ አሬሳቻንትካ ጄዌካማ ዜርጝስ አክም እላቲኩ አኽⶓ ዙሜካ::

አኾቲስ ሊሚፃኑዳ ሴብልዳ እንዳርማኪ ፍትሬቱ ኬሴት ታምባቲው አኽⶓ ቶኬሙንኩ አሬሳቻንቲ ቑንዚ ኬሴትስታው ያኹኒውላ እጆ ጄዌካማ ቴኬምስታንኩ አኽⶓ ዙሜካ::

አስቑኒ አቡ ኬቤሊው ግብርኒው ውማይቴና የመንግስት ፈተነ ኬቤሊዳ 441 ሄክታር ብቲ አኾቲስ ሊማው አኽⶓ ጌሌካ::

አኾቲስ ሊማው ብቲዳ እሳንስ ስንዳይ፣ ዱኒዚስታ እሊኩ ቴጋንኩ ቴክልካ ሊማንኩ አኽⶓ ቶኬሙንኩ ግብርኒው ውማይቴና አሬሳቻንትካ ስንዳዮ ክላስተርስ ሊሚፅጝስ ቴኬምስታንኩ አኽⶓ እርዳትፅካ::

አሬሳቻንትካ ጉልሌ ዜሮ ሚዲቢኒ ዜርሊ ካንትጝፃኒ ዋይሚው ድምክኒ ዝኮ:: ቤዴራሱዴስ ኩፂ ዋይሚ ዴሜካ ያኼስጉ ኬሽጝጙኽ ዜር አኽጝስ ጊፂኒ ዋያውሊ ካንትጝፃኒ ዋይሚ ማልጛ ድምክኒ ዝኩⶓ ግብርኒው ውማይቴና ኽይትጝፄካ::

አሬሳቻንትካ ኬሽኹሳ ምርቶ አሜሬትካማ ቴኬምስታንታ ያኻንታ አሬሳቻንትካ አግፃኑ ስፍሪዳጊ ጉልሌ ዜሮ ጄዋካማ ቴኬምስታንታ ኩስጜ ቤንጝፃንኩ አኽⶓኪላ ቶኬምካ::

አኾቲስ ሊማው ሴብልስ አሬሳቻንትካስ ዳላው ሜቴንስ አቓ ግብሪው ማዳባሪ ዲግⶓ ጉሽካ::

አስቑኒ አቡ ኬቤሊዳ አኹ ዝቤናዊ ዳድስ ግቢትስትጝስ ይጉዋው ዲብ ዝኩኒውላ አሜቶ ዋኾ አኹ ዝኩኽ ዙራሙሪ አኽጝስ ሚንችካ ሴብልካ አኾቲስ ሊማንኩ አኽⶓ እርዳትፅካ::

ባንጂ ወዳው ግብርኒ ፅፌት ጝናዳ አኾቲው ቴኬምስትጚ ኬቹ ጉሳንቲ አቶ አምሳሉ አንተነህ 2016/2017 ም/አታሱ ምርቱ ዝቤንዳ ቤዴራ እሺኹሳ ዳንጉኔስታ ይሴን ኬምፖ ጋማጋምጝስ አሬሳቻንትካሊ፣ ኬቤሊውስታ ወረዳው ግብርኒው ውማይቴንካሊ ልቕልቕቴ ፄውጝስ ቤዴራ ቴርቱ እንፅኺ ጄሜርስትኹ አኽⶓ ጌሌፅካ:: ወረዳታጊ 3ሻይ 792 ሄክታር ብቲ አኾቲስ ሊሚፅጝስ አኬድስትⶓ እርዳትፅካ::

ላምቡሳኺስታ 3ሻይ 660 ሄክታር ብቲ አሬስስትⶓስታ 12 ሻይ 649 አሬሳቻንትካ አኾቲው ልማቱ እንፅኺስ አሴቴፍጛንኩ አኽⶓ ጌሌፅካ::

አሬሳቻንትካ ጉሻኑ ጉልሊ ዜር ኬቤርጝ ኩፅኒ አጌርታ ይንቱኽ አኽⶓ እርዳትፅካ::

ጉልሊ ዜር ቤዴራ ዲጋሺኹዴስ ዋይሚ ማልጛ ዴሜክⶓ ቶኬምካማ አሬሳቻንትካ ጉልሌ ዜሮ ጄዌካማ ቴኬምስትጝስ አክም እላቲኩ አኽጝስ ጉሺስ ካፅካማ ቴኬምስታንታ ፄውስትⶓ ቶኬምካ::

አቶ አምሳሉ አሊዲዳኪላ አሬሳቻንትካ ግባቶ ቱስቲስ ቴኬምስትካማ ዜርጝ፣ ጉልሌ ዜሮ ቴኬምስታንታ፣ ሴብሎ ክላስተርስ ዜርጝስ ኬሽኹሳ ምርቶስታ ምርታምቶ አግፃንታ እንፅኼንቶ ፌያፌይጝፄካ::