አኹ ዲባው ካሲ

ታደለ አጋጄ

ምንግስት እምፕልታቖ ፅንኩት ዝቒው አኹስ ቴኬምስታንታ ያኻንታ ኬፍቲኔ ባጄቶ ሜዴብጝስ ኬቴሙስታ ጌፄሩ ዙራሙርካስ አኹሳ ቦንቤ ግቢትጝስ ታምብስታንታ ያኻታ እንፃኽስታማጊ ያኹኒውላ ሊሊትጙንኩ ዙራሙርካዳ ግቢትስትኹ ፅንኩት ዝቒው አኹ እምፕልታቕስ ፋይስታውሳ አግልግሎቴ እያውላስ አቤሌሽስታማ ትክምዴስ ሴጋ ያኹስ ካንትስቴ:: ጋያኪ ኬቴሙ ዙራሙሪዳ ዝኩዋንኩ እምፕልትቕ ፅንኩት ዝቒውሳ አኾ አቲጝስ ቼጌርስታኒስ ካንትስታና::

“ወተር ኤድ” እስታው አችቱ ንባር ካንትፃውስታጊ ይቶፒያዳ ሊኽዴስ 60 ታፋ ያኻው እዝብ ጛ ዙራሙራዳ ፃንኩቶ ማንዱኹሳ አኾ አግፃላ:: ፅንኩት ዝቒው አኹ ችግርስ ኬሴትስታንኩ ቑንዝካስ አሌምዴስ 289 ሚሊዮን ስራስሪ አሜት ቺፋ፣ 800 ስራስሪ ጌርክቺፋ እምፕል ስር ላጛ ሴኮንድ ቺፋ ክራው አኽⶓ አችቱ ንባር ካንትፄ::

ቴቤቤርጙንኩ ምንግስትካው አችት አውሮፓው ዝቤን ቼፋታ 2030 ም/አሜታስ ፅንኩት ዝቒውሳ አኾ አምፕልታቕስ ታምብስታንታ ፄውጝስ አምስትኹ ግብ ሊሊትጙንኩ ምክንያትካስ ሳኪትጝጝስ ካሊስታያሱ አኽጝ ጌሌፅስታ::

አዊ ብሄረሰቡ ቺፅጝፂ ዚጋሚ ወረዳ ክላጅ ኬቴምኩ ዝኩዋንትካ ፅንኩት ዝቒውሳ አኾ አቲጝስ ቼጌርስትካማጌኽ::

አቶ ተረፈ ዘሌ ዚጋሚ ወረዳ ክላጅ ኬቴሙ ዝኩዋንትካኽ:: ኬቴምዳ አምፕልታቕ ፃንኩቶ ማንድኹሳ አኾ አግፅጝስ ቼጌርስታንኩ አኽⶓ ቶኬምካማ ኬቴምዳ ግቢትስታማ አግልግሎቴ እያማጊ ዝኩኽ ቦንቢው አኹ ቺዊው አይኔት አኽጝስ እምፕልታቑ ቲንዳ ኬፍቲኔ ችግሮ ሲፍፃማጊ አኽⶓ ዙሜካ::

አቶ ተረፈ ኑኑውስታ ክላጅ ኬቴምዳ ሊጊሲማ ጊዝስ ግቢትስትኹ ላጛ ቦንቢው አኹ አግስቴ:: እምፕል ፅንኩት ዝኩኽ ያኹስ ላጛንቲ ዴሜካ ፃንኩቶ ማንዲያሱ ቺዊው አይኔት ዝኩኽ አኹ አኽጝስ እምፕልታቕ ሊሊትጙንኩ ቑንዝካስ እምስትጝስ ቲንዳ ኬፍቲኔ ቲኑሳ ችግሮ ሲፍፅⶓ ቶኬምካ::

ኬቴምዳ ዝኩዋው እዝቡ ቼፍ ሚንቺጝስ እምፕልታቕስ አኹ ታምባማጊ ጋቲው አኽⶓ ጉሽካ::

አኹ ብብራንቲስ ሺንኪስታው አኽጝስ ብብራንቲው ዋይሚ ዴሜክጝሊ እምትጛማ እምፕልታቕ አኹስ ኬያኑ ጌንዜብ ኬፍቲኒ አኽⶓ ዙሜካ:: አኽጝስኪላ ቦንቢው አኹ ሜብራቱ አይልስ ግቢትስታማ እምፕልታቕ ኬያኑ ኬፍቲኒ ጌንዜቡሳ ፍሼ ይጉፃያታ ካሲካ::

ኬቴምዳ አግስታንኩ እምፕልታቑ ሚንቺት ግምትዳ ቱዋማስታ ፅንኩት ዝቒው አኹ አቲጛስ ቼጌርስታንኩ እምፕልታቕስ ውላ እዝቦ ቴኬምስታንታ ፄዋው ቦንቢው አኹ ግሽስታማ አግልግሎቴ እያታ ካሲካ::

እሊት ክላጅ ኬቴሙ ዝኩዋንታ ዊዛሩ የሻረግ መኰነን ቦንቢዴስ ቴኬምስታኑ አኹዳ አሻዌ ፄጌራው ዲብ አግስታው አኽⶓ ቶኬምጝስ ቴኬምስትኑ አኹ ፃንኩቶ ማንዳያሱ አኽጝስ እምፕልታቕ ሊሊትጙንኩ ቑንዝካስ እምስታንኩ አኽⶓ ድኹዌካ::

ዊዛሩ የሻረግ ኑኑውስታጊ ኬቴምዳ ቴኬምስታኑ አኹ ፃንኩቶ ማንዳያሱ አኽጝስ እምፕልታቑ ቲንዳ ጉዳቶ ታምፃ:: እምፕሎ ጄሪካኖ አኾ አግፅጝስ 20ዴስ 30  ብሮ ኺስታ ኬያንኩ አኽጝስ ቼጌርስትⶓ ዙሜካ::

ቦንቢው አኹ ቺዊው አይኔት አኽጝዴስ ድምክና ሶኼትዴስ እምፕላኒ አግፃንኩ አኽⶓ ቶኬምካ::

ግሽስታማ እምፕልታቕስ አግልግሎቴ እያማጊ ዝኩኽ ቦንቢው አኹ ፃንኩቶ ማንዳያሱ አኽጝስ ፃንኩቶ ማንዱኽ ያኻታ፣ ውላ እምፕልታቕስ ክችክቻ ታምባታስታ ድምክኔ ቦንቢው አኹ ግሽስታማ አግልግሎቴ እያታ ካሲካ ዊዛሩ የሻረግ::

አቶ አንተነህ ብርሃን ክላጅ ኬቴሙ ዝኩዋንትካ ያኻኒስ ኬቴምዳ ምንጊሱ ጊዝዳ ግቢትስትኹ ላጛ ቦንቢው አኹ አግስታው አኽⶓ ዙሜካ:: ናካዳ  እምፕልታቑ ቼፍ ማልጛ ዴሜካማጊ አኽጝስ እሊው ቦንቢው አኹ ግቢትስትጝ ቱስታው አኽⶓ ጉሽካ::

አምፕልታቕ ቴኬምስታኑ ቦንቢው አኹ ቺዊው አይኔት ዝኩኽ አኽጝስ እምፕልታቕ ብንዴስ እቼ ዳዶ እንዜጝጝስ አኾ ችምባንኩ አኽⶓኪላ ዙሜካ::

ቤዴራ ኬቴምዳ ሊሊትጙንኩ ስፍርካዳ ቦንቢውሳ አኾ ግሽፅጝስ ፅሬት ፄውስቱኒውላ አኹ አግስትጝስ ካሊስታያሱ አኽⶓ ቶኬምካ::

ዚጋሚ ወረዳው አኹ ፅፌት ጝናሱ አላፊ አቶ ኤሊያስ ትላሁን ክላጅ ኬቴምዳ 1993 ም.አታዴስታ 2003 ም/አሜታዳ ግሽስትኹ ላጛ ፍሩ አኹ አግስታው አኽⶓ ጌሌፅካ:: ላጝጊጊ ፍሩ አኹ አምፕልታቕስ አግልግሎቴ እያማጊ አኽⶓ ቶኬምካማ እምፕል ፍሩ አኹ ቺዊው አይኔት አኹ አኽጝስ እምፕልታቑ ቲንዳ ችግሮ ያጋው አኹ አኽጝ ቼሜትጝⶓ እርዳትፅካ::

ሚንች ጌንዜቡ ፍሺ ፄውስታማ ግቢትስትኹ አኹ ልምትጝዴስ ኪቻ ፃንኩቶ ማንዱኽ አኹ ያኻታ እንፃኽስትጝስ ካሊስታው አኽⶓ ጌሌፅካ::

እሊውሳ ፍሩሳ  አኾ ግሽጝስ እምፕልዳ አሌቔትጝፅጝስ ፃንኩቶ ማንዱኽ አኹ ያኻታ እንፃኽስስታው አኽⶓ እርዳትፅካ::

ዲጊ ጊዝስ አኹ ግሽስታማ አግስትጝስ ካሊስታያሱ አኽⶓ ቶኬሙንኩ አላፊ እሊው ዙራሙሪዴስ እንዜጛውሳ አኾ ቦንቢስ አግጝስስታ  እምፕልዳ አሌቔትጝፅጝስ ፃንኩቶ ማንዱኽ አኹ ያኻማ እምፕልታቕ ቴኬምስታንታ ፄውስታው አኽⶓ ጌሌፅካ::

ኬቴምዳ ሊሊትጙንኩ ዙራሙርካዳ ዝኩኽ ዙራሙርካስ አኹ ታምባማጊ ጋቲዊያኽ:: ኬቴምኩ ዝኩዋንትካ ሊኽዴስ 25 ታፋዴስ ጃላ አኻቲንኩ አኾ ቴኬምስታንኩ አኽⶓኪላ አላፊ እርዳትፅካ::

ዲጊ ጊዝስ ላጛ ዲብ ማንዲስቴ ኑንኩ አላፊ እምፕል ኬቴምዳ እምፕልታቕስ አኹ አግስታውሳ ዳዶ ፅናትዳ እምፕልታቖ አሴቴፍጝፅጝስ እንፃኽስትጝ ያኹስ ላጛንቲ ዴሜካ ፃንኩቶ ማንዲያሱ አኹ ፃንኩቶ ማንዱኽ ያኻታ ፄውስታው አኽⶓ ጌሌፅካ::

አምፕልታቕ ዲጊስ ፄውስታው ፅናትዳ አሴቴፍጝጝስ ልቓ ጌንዜቡ ፍሺስ አኹ አግስታውሳ ዳዶ ቶኬምጝ ቱስታው አኽⶓ ታክስፅካ::

ግቢትስትኹ አኹ ቦምቢ ብብራንቲስ እንፃኽስታው አኽጝ ኾት 250ዴስ 300 ሻዮኺስታ ጌንዜቦ ፍሻዉ አኽⶓ እርዳትፅካ:: አኽጝስኪላ እምፕልታቕ እምፕል ሜትር ኪዩቭ አኹስ 140 ብርዴስ ጃላ ጌንዜቦ ኬይጝ ኬፍቲኒስ ይኮኖሚዳ ቻኒስቶ ታምፅⶓ ጌሌፅካ::

አኹ ኤሌክትሪክስ እንፃኽስታታ ፄውጝስ ቴርቱኑ ጊዝዳ ክልልዳ ፌቴርስትኹ ፄትቲው ችግር ፅንጋኻ ያኻማ ይጉⶓ እርዳትፅካ::

2017 ም/አታዳ ትራንስፎርመር ጄውስታማ አኹ አሌክትሪክስ እንፃኽስታታ ፄውስታው አኽⶓኪላ ቶኬምካ::

ሊሊትጙንኩ እርዳታንትካ አችትካ እምፕልታቑ አኹሳ ችግሮ ኽይጝስ እንፃኽስታንታ ፄውጝ ቱስታው አኽⶓኪላ ታክስፅካ::