ቤዴርጝ ቱስታው ዙርሚ

አለሚቱ የኔት

አማኻሪ ክልልዳ ፌቴርስትኹ ችግርስ ጄሜርስትኹ ጋቻ አሜትዴስ ጃላ ቼፍፃ:: እን ጋቻ ዴሜካ ሚንችካውሳ ጝኖ ኩፋኩፋ:: እምፕልታቑ ዝኩዊኒ ፃንጌኽታ አቒያ ፃንጌኽታ::  አፌሩኽ ንብሬት ወዴማ:: ክብሪ አቒው ይወት ድሳ:: ማቤራውካ ኾትካዳ ልቓ እስታቲው ድፂ ታንባ፣ እምፕልታቑ እሴት ሺሺርስታማ እኑስ እኖ አምንጜ አቲና:: ቼጌርስትኹስስታ ቑንዳስትኹስ ታንባያው ድሳማ ሚንችካው ይወት ፌያ:: ክልልታ ጌቴሙኽ ሰላም አቲጛ አዊ ብሄረሰቡሳ ቺፅጝፄኪላ ኔክፅጝስ ፊቴ አሜሬታንቴስታ ቤንጛማ ኹጝስታ እርዳትጛማ ዝኩጝስ አቕስታውሳ አዊውሳ እዝቦ ዝኩዋው ዙራሙሪዴስ ፌኔኬልጛማ ትቡሳ ታፎ ካንታታ ፄዋ::

አዩ ጉዋጉሲ ወረዳ ጐሪ ኬቤሊዴስ ፌቴርስትኹ ጋቻው ምክንያቲስ ሙሬ ባይፅካማ ስዴትስ ታምብካሺንኩ እምፕልታቕ ምንግስት ካስጝፅኹ ልቕልቕቲስ ዙራሙሪው ሰላም ዙራማ ስዴታ ፉንኩ እምፕልታቕ ሙሪሾ ቱዋንታ ፄውስታማጌኽ:: ሬዲዩኑ ቤንሊ ስልኪስ እጂጜ ፄውንኩ ጐሪ ኬቤሊው ዝኩዋንቲ አቶ ብርሃኑ አታላይ ዶንጌቱንኩ አይልካዴስ ታንቡኽ ጋቻስ ሙሬ ባይፅካማ ስዴታ ፌካማ እጂⶓ ዲብስካ:: ናካ ኩፅኒ እዝብስታ ምንግሰት ካስጝፅኹ ኩስጚስ ስዴታ ፉንኩ እምፕልታቕ እሺኑ ሙሪሾ ዙራንታ ፄውስትⶓ ድኹዌካ:: እን ያኹስ ኩፅኒ ዋኽትጝጝ ቱስታኩ ዲብካዴስ ቲኑ ጉዳይስ ትኩት እይስታያሱ አኽⶓ ቶኬምካ:: ዙራሙሪው አይር እግልታ ኩል አኽጝስ ምንድራሺው ቑንዚስ ማልጛ ፂኪሰትካማጊ አኽⶓኪላ አቶ ብርሃኑ እንክርፄካ::

እን ቑንዚስ ፂኪስታንኩ ክቻዴስኪላ ስራሰሪስታ ሹማጌልካ ሚንችትስ ክርⶓ ድኹዌካ:: ካሜናንትካኪላ ዲጊዳ ካሜንፅጙሳ አግልግሎቴ እያንኩ ቲንኩ ውማይቴንካ እላቲንኩ አኽጝስ 10ዴስ ጀላ ክርⶓኪላ ዲብስካ:: እንጉፂ ጝን እላቲው አኽጝስ ቹትካኪላ ካሜናኑ ውታኺዳስታ ካኒ ስራዳ አኽⶓኪላ አዜንፃውስ ዙሚትጚስ ድኹዌካ::

ዊ/ሮ ሽታየ አለማየሁ ኪላ ጐሪ ኬቤሊው ዝኩዋንትካዴስ ዲጊስ ሙሪሾ ዙሩንኩ ቹትካ ክቻዴስ እምፕልካኽ:: ዋኽ ጝንዴስ ፌካማ ፃንቑናስስታ ምርኪስ ታምብጝዴስ ፌይኹስ ናቔኑሳ ጝኖ አቲጝስ ካኒስራዳስታ ደጀሰላምዳ እንጉታንኩ አኽⶓ ዝኩኽሳ ችግሮ ካቲ ላሌቑሰ ዙሜካ:: ባስዳ ባሳ ናኑውሰታጊ ፌኔኬልጝጝስ ጌቴማው ምርኪዴስ ፌይኹስ ሼርካማ ጌርክ ታንባኒ ካሜንጝስ ያኻው ቲኑ ጉትፕ እላ አኽጝስ ካኒ ስራዳስታ ካዌናኻዳ ካሜናንኩ አኽⶓ ድኹዌካ:: ድምክኒስኪ ስራስሪኩ ያኻ ሹማጌልካ ምንድራሺ ቑንዛስ ቑንዳስታኒስ እሜ አግልግሎቴ አግፃቲንኩ አኽጝስ ክሪስ ታምብⶓኪላ ዊዛሮ ሽታየ ዲብስካ::

አቶ ምናየሁ ዘሩ ጐሪ ኬቤሊው ቺፅጝፃንቲ ጛሾስ ፌይኹ አሜትዳ ጛ ኬቤሊዳ ጌቴምኹ ሰላሙ ችግርስ ሚንችካው ንብሬትስታ ምርት ሌግስ ብብርⶓ ድኹዌካ:: እርዳቲ እስታማ አይሰታሺኹኪላ ያኹኒ ዲጊዴሰ ናቴ ኬውጝጝስ ሙሪሾ ዙሩንኩ እምፕልታቕ ችግራኻዳ አኽⶓ ዲብስካ::

ስዴታ ፌካሺንኩ እምፕልታቕ ሙሪታ ዙራንታ ፄውስትጝ ክርፂ አኽⶓ ቶኬምካማ ሙሪሰ ዙሩንኩስ ኩፅኒ ቲኖ ማንዲጝስ ካሊፃንኩ አግልግሎትካ እይሰታቲንኩ አኽጝስ ሚንችትስ ቑንዚስ ፂኪስታንኩስታ ክራንኩኪላ ዝኩⶓ ሼውንⶓ እንክርፄካ:: ቑንዳስቱንኩሳ ቲኑ ጉትፕ አግስታው አንቢሊ ቲን ጉትፕሾ ካፅጝስ ውላ ትራንስፖርቱ ችግር ዝኩጝስ ድኹዋሪስ እንዜጝትጝፃንኩ አኽⶓ ድኹዌካ::

አዮ ጉዋጉሲ ወረዳ ቲን ፅ/ጝናሲ አላፊ አቶ ተመስገን ፈንታውን ኑኑውስታጊ ሙሪዴስ ፌካሺንኩ እምፕልታቖ ሙሪሾ ዙራኒስ ቲንኩ ውማይቴንካኪላ ቱዋንታ ፄውስታ:: ወረዳታጊ ጋቻ ፌቴርስቱክ ኬቤልካዳ አግስታንኩ አቕስ ፌኔኬልጜካሺንኩ ሙሪሾ ዙራኒስ ቲኑሳ አገልግሎቴ አግፃንታ ቲንኩ ጉትፕካዳ ፋይፃውሳ ዋኽትጝፅጝሰ ቴኬምስታንታ ፄውስታማጊ አኽⶓ ጌሌፅካ:: ኩፓርስታ ዙሪዳ አግስታንኩ ዳዲስታ አርቢት ኬቤሊው ዝኩዋንትካሰ ኩፓር ቲን ጉትፐዳ፣ ጐሪሰታ ሶሪት ኬቤልካው ዝኩዋንትካ ዴሜካ አንቢሊ ቲን ጉትፓዳ አግልግሎቴ አግፃንታ ፄውⶓ እንፅኺ አኮሜችስትⶓኪላ አቶ ተመሰገን እርዳትፅካ::

ጐሪ ኬቤሊታ ጁኽሳ ችግሮ ካንትኹስ ዴሜካ ኬቤሊዳ እሺኹ ቲን አክስቴንሽኑ ጉትፕ ሌግስ ብብሩኽ አኽጝስ ቲን አክስቴንሽንኩ ውማይቴንካ ቼካ እሺካማጊ አግልግሎቴ እይጝስ ካሊስታቲው አኽጝስ ዳንጉዊኒ ዝኩጝስ ካላው አኽⶓ ቶኬምካ:: አንቢሊዳ አግስታው ቲኑ ጉትፕስ ኩፅኒ 16 ያኻንኩ ውላ ዜርፍስጊ አጌላጌልጝስ ካላንኩ ቲንኩ ውማይቴንካ ዝኩⶓ እርዳትፅካ:: እምፕልታቕ እንዜጝትጝፂ እላ አኽጝስ ቼጌርስታንኩ አኽⶓ አምኔካማ ጐሪ ኬቤሊዳ ጛርቱሳ ጝኖ ክራይትጝስ ውማይቴንካ ቴርሰ ካስካማጊ አጌላጌላንታ ፄውጝስውላ ዲኪቲ ጝን እላ አኽጝስ ካሊስታውላስ ይጉⶓ ጌሌፅካ:: ሊሊትጙንኩ ክትባትካዋስታ ሳሴር እክምንካዋኪላ ኬቤሊሾ ካስካማ ድንኩዋንዳ እያንኩ አኽⶓ ታክስፅካማ ካሜናንትካ ኩፅኒ አንቢሊ ቲን ጉትፕሾ ካስጝስጃጊ አግልግሎቴ አግፃቲንኩ አኽⶓኪላ እርዳትፅካ::

አሊዲዳኪላ ፍታና ያኻማጊ ዝኩኽ ምንድራሺውሳ ቑንዜ እጁስ ይቪቺስ ካላካልጝጝስ ካሊስታቲው አኽጝስ ዙራሙሪውሳ ፃንኩቶ ማንዲጝስስታ አጐበሮ ክችክቺስ ቴኬምስትጝ ፋይፃንቲ አኽⶓኪላ አቶ ተመስገን እንፅኼንቶ ፌያፌይጝፄካ::

አዮ ጉዋጉሲ ወረዳው ቹዋ ቺፅጝፃንቲ አቶ ገበየሁ በሪሁን ጌሌፁኑውስታጊ ወረዳዳ አግስታንኩ አንኩዋ ኬቤሊው ዝኩዋንትካ ፌኔኬልጜካሺና:: ዲጊስ ካስጙኽ ሙሪሾ ዙርፅጙ ቴግባርስ ኩፅኒ ውላጊ ዙራንታ ፄውስትⶓኪላ ጌሌፅካ:: ሙሪሾ ዙሩንኩሰ ዴሜካ ክልሉ ምንግስትስታ እምፕልታቑ 276 ኩንታል ሹንቤ፣ ሲዚሻይ ዚንጐ ኮርኮሮሰታ 261 ኪሎግራም ሚስማሮስታ ካኔ ኩፕፅጝስ እርዳትጝስ ካሊስትⶓ አቶ ገበየሁ እርዳትፅካ::

ቲኑሳ ጉዳዩ ካንትኹስኪ ኬቤሊዳ እሺንኩ ቲን ኤከስቴንሽንኩ ውማይቴንካ ሰላሙ ችግር ምክንያታስ አንጚዳ ቻ እሺጝስ ካሌካያ አኽⶓኪላ ጌሌፅካ:: አንቢሊ ኬቤሊሾ ካስካማ ውላጊ ፌኔኬልጛንትካ ችግራ ጋቲታ አኬምስታንታ ኩፅኒ እርዳቲስ ይንታውሳ ሀብቶጊ ቲን ጉትፑ ግባትስ እሽፃንኩ አኽጝስ ቴኬምስትጝስ ካላንኩ አኽⶓ አቶ ገበየሁ ቶኬምካ:: ሹኻ ሊኻ ሻይዴስ ጃላ ያኻው ብር እጁ ጄውስታማ ቲኑ ጉትፕሾ ቱⶓኪላ ጌሌፅካ:: ውማይቴንካው ችግር ጌቴማቲታ ወረዳው ባጀትስ ውማይቴኖ ኩንትራቲስ ኬፄርካማ አግልግሎቴ እይካማጊ አኽⶓኪላ አቶ ገበየሁ እርዳትፅካ::