ሰላሙ ዳንጉዊኒ ኬሴሉ ጌቤሉ ታምትጚዳ ቻኒስቶ ፌቴራማጊያኽ

ታደለ አጋጄ

ዲከረንስ ችግኝ ፋግቲ ለኮማ ወረዳው ዝኩዋንትካስ ቹዋ ሚፂው አግፅፂያኽ:: አምሉ አሻሪውሳ ሜርሃ ግብሮ ቤዴርካማ ጄሜርጝስ እሊኩ ዙራሙርካስጊ ምሳላ ያኹንኩዊያኽ:: ዲከረንስ ችግኝዴስ ኬሴሎ ኬሴልፅካማ ዋይጝስ ሚንችካ እምፕልታቕ ቴኬምስታንታ ያኼካ::

ችግኞ ፌልስጝ፣ ቴኬልጝ፣ ታምብኹሳ ኮቻማ ኬሴልፅጝ፣ ኬሴልፁኑሳ ዴሜካ ጌቤልስ ዲግስጝስ ኽሳንትካዴስ ዎታትካዋ ኺስታ ቹዋ ኢኮኖሚው አግፅፃ ያኻማ እጂኹያኽ:: ያኼስጉ እን እንፅኺው ዜርፍስ ሚንቺትስ ቴኬምስታንትካ እሺንኩ ዙራሙሪኩ ዝኩዋንትካ ዲጊ ጊዝዴስ ናቴ ወረዳዳ ኬሴትስትኹ ሴላሙ ችግር ምክንያታስ ዜርፍዳ አሴሜርጙንኩ አቕ አግፃሺኑ ኢኮኖሚው ልቕልቕቲ ማልጛ ኔኬትⶓ ዙሜካ::

አውጚው ቴሌቪዥንሊ እጂጜ ፄውንኩ ፋግቲ ለኮማ ወረዳዳ ኬሴሉ ዜርፍዳ አሴሜርጜካማ እንፃኽስታንኩ አቶ የሻምበል ሽበሺ ዙሙኑውስታ ኬሴል እንዴስ ቤዴራ ዋይስታሺኹዴስ ቕፂታ::

ሰላሙስታ ፄትቲው ችግር ኬሴትስትጝዴስ ቤዴራ ሚንችካ እምፕልታቕ ኬሴሎ ጊፅስጝስ ቴኬምስታንታ አኽⶓ ቶኬሙንኩ አቶ የሻምበል ናካዳ ኩፅኒ ኬሴሉ ዋይሚ ማልጛ ቕፂታማ ትክሞ አግፄካማጊ ጋቲው አኽⶓ ዲብስካ::

“ምንጊዴስ ናካ ዋይሚ ማልጛ ኔኬታ:: እምፕል ውጋቢ ብቲዳ ዝኩኽ ችግኝ 5 ሻይ ብርስ ዋይስታው አኽጝስ ማልጛ ቕፂ:: ዎክቶ ማንዳማ ካሴውሳ አቱኻ” ናኒስ ናኪኒ ዎክትዳ ዝኩኽሳ ጌቤሉሳ አኺኔ ዙሜካ::

ቤዴራ ሚንችካ አቕ ጛጛርትጛሳ ኪሱኑ ሚንችካ ዴሜካ ዝኩፄ ጝኖ ግቢቱኑ ዲከረንስ ችግኝዴሰ ክሴሎ ዋይጝስ አኽⶓ ድኹዌካ::

ናኪኒ ወክትዳ ቴኬልስትኹ ዲከረንስ ችግኝ ጄዋንቴ አታማስታ ጌቤል ቕፂታማ ሶኬታ አሚቲስታ ፅካ አሜቲ ቲሬማ ይጉⶓ ዙሜካ:: ኬዜንስትኹ ችግኙ ኬሴልኪላ ጝንጝናዳ ዝኩⶓ ቶኬምካ::

ወታት በጐሰው ዲከረንስ ችግኞ ኬሴልፃማ ዋይጝስ አግፃው ትክምዴስ ፌይኹስ ችካ ዎታትካስ እንፅኺው ድል ፌቴርስታማ ቴኬምስታንታ ያኹኑ ዜርፍ አኽⶓ ድኹዋ::

ሰላሙስታ ፄትቲው ችግር ኬሴሉ ጊፅዳ አሴሜርጙንኩ ጛርት አቖ ኬቤርፅኹ አኽⶓ ቶኬሙኽ ዎታት በጐሰው ሚንችካ ጌፄንካ ጌቤል ቕፂታኒ ላጛ አሜታሳኺስታ ጝንዳ ኬዜንካማ እንኩርⶓ ዙማ::

ዳድ ልምትጝ፣ ሰላሙስታ ፄትቲው ችግር ኬሴትስትጝሊ እምፕልታማ ኬሴሉ ቕፂትጝዳ ኬፍቲኒ ያኹኽሳ ቻኒስቶ ፌቴርⶓ ድኹዌካ::

ፋግቲ ለኮማ ወረዳው ሚፂ ፅፌት ጝናሱ አላፊ አቶ በለው አስፈራው ሰላሙ ችግር ኬሴሉ እንፅኺዴስ አግፃሺኑሳ ሚፄ ማልጛ ጉዲⶓ ጌሌፅካ:: ሰላም እሺኹ ጊዝዳ አባላምቲ ኩርማን አሜትዳ 40 ሚሊዮን ብሮኺስታ ሚፄ ኩፕፃሺንኩ አኽⶓ ቶኬምካማ ናካዳ አባላምቲ ኩርማን አሜትዳ ኩፑኽ ሚፂ ዜሬቕቲ አኽⶓ እርዳትፅካ::

ቤዴራ እሺኹ እንፅኺው ልቕልቕቲስ ሲፍጙኽኩ አንኩዋ አሜትካስ ሽልማቴ አግፅⶓ ቶኬሙንኩ አላፊ ናኪኒ ዎክትዳ ኩፅኒ ሰላሙ አኺኒ ሚፄ ኩፕፅጝዳ ኬፍቲኒ አችስ ጉዲⶓ እርዳትፅካ::