ሚድዋይፍካው ማቢሪ ቹትካውስታ ስራስሪው ክርጝ ኔኬታታ እንፃኽስታማጊያኽ

አለሚቱ የኔት

ይቶፒያው ሚድዋይፍካው ማቢሪ ፄዋው እርዳቲስታ ሲፍጝጚ ቹትካውስታ ስራስሪውሳ ክርⶓ ኔኬትጝስ ጉዋል ንኹ ፍሺ ዝኩኽ አኽⶓ ቲንኩ ውማይቴንካ ጌሌፁና::

ስንብቶ ባህርዳር ካስጙኽ ሚድዋይፍካው ማቢሪው ኩስጚዳ አግስቴካማ ኩስጜ ካስጝፁንኩ ስሞ ጌሌፅጝስ ፋየካያስኩ አዊ ብሄረሰቡ ቺፅጝፂ ጉዋጉሲ ሽኩዳድ ወረዳው ቲኑ ውማይቲኒ ወረዳታ ቲኑ ዜርፍዳ ጌቴማንኩ ዳንጉንካዋ ዋኽትጝፃማ ቹትካውሳስታ ስራስሪውሳ ክርⶓ ይጉፅጝስ ሚድዋይፍካው ማቢሪ እርዳቴ ፄውⶓ ዲብስካ::

ወረዳዳ አግስታንኩ ቲን ውማይቴንካውሳ አቕቶ ዴሜክጝስ ካሊፃንኩ ሊሊትጙንኩ ስልታንካዋ እያው አኽⶓኪላ ውማይቲኒ ቶኬምካ:: ካሜንፃንትካ ውማይቴንካው ዳንጉዊኒ እሺኹሳ ችግሮ ጌጌውጝስኪላ ውማይቲኔ ኬፄራማ ቲሊሊ ቲን ጉትፕዳ ሜዴብጝስ ቹትካ አግልግሎቴ አግፃንታ ፄዋማጊ አኽⶓኪላ ውማይቲኒ ድኹዌካ::

ዙራሙሪዳ ሰላሙ ችግር ዝኩጝሊ እምትጛማ ኩፅኒ እሳንስ አግልግሎቴ አግፅጝስ ካላንኩ ቹትካዳ ፅንጋኻ ያኻማጊ አኽⶓኪላ ውማይቲኒ ዲብስካ:: ቲን ጉትፕዳ እሺኹ ግባቱሳ ዳንጉዊኔ ልቓስኪላ ያኹኒ ጌጌውጝስ ካሊፃውሳ ዲግስጝስ እርዳቴ ፄውⶓ ውማይቲኒ ቶኬምካ::

ሲስተር ማሬ ነጋ ዴሜካ እንጃቢሪ ኬቴሙ ቺፅጝፂ ቹትካስታ ዎታትካው ኦፊሰራ ዙሙኑውስታጊ ሚድዋይፍካው ማቢሪ ሊሊትጙንኩ ስልታንካዋ እይጝስ ውማይቴንካ አቕቶ ሌጌፅካማ ቹትካዋ ውማይስ እርዳታንታ ፄዋማጊ አኽⶓ ዲብስካ::

ውማይቲንካስ እይስታንኩ ስልታንካዋ ቴግባርዳ እሽፅጝስ ክምንት ችግራስ ክራንኩ እሺንኩ ቹትካውሳስታ ስራስሪውሳ ቼፎ ኔኬትጝስ ካሊⶓኪላ ሲስተር ማሬ ድኹዌካ::

ኬቴሙ ቺፅጝፂዳ ጝናቑሳ ቲኑሳ አግልግሎቴኪላ 100 ፐርሰንትዴስ ጃላ ታምባሺኹ አኽⶓስታ አሜትዴስ ናቴ ኩፅኒ ፌቴርስትኹ ሰላሙ ዳንጉዊኒስ ላጛ ቲንኩ ጉትፕካ ልምትጝስ ኔኬትⶓ ሲስተር ማሬ ዲብስካ:: ቹትካዋስታ ስራስሪዋ እንካናው እላቲው አኽጝስ ጛጂስ ፄውስታው እንፅኺዳ ፅንጋኻ አኽጝ ቱስታቲው አኽⶓኪላ ቶኬምካ::

ቲኑ ሜምሪዳ ቹትካውስታ ዎታትካው ኦፊሰር አቶ አዲሱ ቢረሰው ጌሌፁኑውስታጊ ይቶፒያው ሚድዋይፍካው ማቢሪ ብሄረሰቡ ቺፅጝፂዳ ላጛ ወረድካዋ እሜማ እንፃኽስታማጊያኽ:: ጉዋጉሲ ሽኩዳድ ወረዳዳ ቲሊሊ ቲን ጉትፓሳስታ ጃዊ ወረዳዳ ጃዊ ቲን ጉትፓሳ እሚጝስ ስልታኔ እይጝስስታ ምንግስት ዋኽትጝፅጝስ ካላያስኩሳ ግባትካዋ ዋኽትጝፅጝስ እርዳቴ ፄዋማጊ አኽⶓ አቶ አዲሱ እርዳትፅካ:: እሊኩ  ፋይፃንኩ እርዳትካዋኪላ ሊሊትጙንኩ እርዳታንትካ አችትካዴስጊ አግጝስ እርዳቴ ዋኽ ባጀት ሜዴብስታቲው አኽጝስ ግባቱ ዳንጉዊኒ ጌቴማው አኽⶓ ጌሌፅካማ ካሊስታውሳ ላካሳጊ አግስታው ጌንዜብስ ፋይፃንኩ ግባትካዋ ጄዋማ ስፍሪዴስ ስፍሪሾ እንዜጝትጝፅጝስ ኩፅኒ ዳድ ጊዝ ቺፋ ልምትጝ እንፅኺዳ ፅንጋኻ  አኽⶓኪላ አቶ አዲሱ እንክርፄካ::

ዝኩኽሳ ሰላሙሳ ችግሮ ካይጝስኪላ ውላጊ ቲኑሳ እንፅኼ እርዳትስታማ እርዳትጝስ ጐንዳ አኽጝ ቱስታው አኽⶓ አቶ አዲሱ ታክስፅካ::