ታፍዳ ዝኩኽ ምንድራሺው እጁ

ምንድራሺው ቑንዚ 17ንቲስታ 18ንቲ ዝቤን ቤናዳ ኬሴትስታሺኹ ወረርሽኝዴስ ቤዴራንቲ አኽⶓ ንባርካ ቶኬማና:: አጌርታ 1957ም/አ ኬሴትስታሺኹ ምንድራሺው ቑንዚ ማልጜ ይዝኩዊ አኽጝኪላ ጌሌፅስታ:: ቑንዚ እሳንጛማጊ ካሳቲታ ፄውስቱኽ እንፃኽስትጚስኪላ ዝቤንካስ ኩዋንታ አኽጝስ አቕስታው ምንድራሺ ቑንዛው እሳንጝጙሳ ሜቴኖ ቼፍጝጝስ 2010 ም/አሜታሳኺስታኪላ 10 ቑንዝካው ትርትዴስ ፋሺኾ:: ናካዳ ኩፅኒ ባርዳር ኬቴሞ ዴሜካማ ሚንችካ ክልሉ ዙራሙርዳ እሳንጛማ እምፕልታቕ ቲኑ ችግራኻዳ ቱዋንታ ፄዋ::

2010 ም/አሜታዴስ ናቴ ምንድራሺውሳ ቑንዜ ቼፍጝጝስ እይስትኹ አሌም አቩቑኪ ያኻ አጌራዊ ትኩት ዜሬቕቴና አኽጝ ቑንዚ ዙራማ አጌሬሽታ ድሎ ብሳ:: ምንድራሺው ቑንዚ ጊዝዴስ ጊዞ ዴሜካማጊ ሚንች ቲኑ ጉትፕካው ቹዋ ቴግባር ያኻማጊ ይንታ:: ሚንችካ ዙራሙርካዳኪላ ታክስፃንታ ቲኑ ችግራ አኽጝስ ዝኩኽ ዝኩዊኒው ክብርናቲሊ ፍታና ያኻማጊያኽ::

አማኻሪ ክልሉ እምፕልታቕ ቲን ኢንስቲትዩቱ ንባር ቶኬማውስታጊ ምራብ አማኻሪዳ ምንድራሺ ቑንዚው እሳንጝጙ ሜቴን ኬፍናማጊ ይንታ:: ክልልታኪላ ሌኽዴስ 70 ታፋ ምንድራሺ ቑንዚው እሳንጝጙሳ ታምቦ ካፃንኩ 40 ወረድካዋ ሺሽጝስ ቑንዜ ቼፍጝጝስ ፅሬት ፄውስታማጊ አኽጝኪላ ቶኬምስታ::

ምንድራሺ ሚቓያውሳ እሩብፄ ስፍሬ ሺሻማ እምፕልታቖ አሴቴፍጝፅጝስ ዙራሙሪው ቼፍጝጚ እንፅኼ ትኩትስ እንፃኽስትⶓ ባይጝ፣ አይር እግልታው ኪስስትጝ፣ ኻጉሳ አጐበሮ ቱስቲስ ቴኬምስትⶓ ባይጝ፣ ምንድራሺ ቐንዛው እሳንጝጝስ ምክንያትታ ቶኬምስታና:: ቑንዚው እሳንጝጝስ ምክንያትታ ቶኬምስቱንኩሳ ክችሳማ ቑንዜ ካላካልጝጝ ውላውጊ አላፍቲያኽ:: ሳሴርስ ቑንዜ ቤዴራማ ካላካልጝጝስ ካሊስቱስ ውላጊ ቑንዚስ ፂኪሰታማ ፋይፃንታ ጋው ፍሺስ ቼጌርስትጝኪላ ቱስታ ጋቲዊያኽ:: ዙራሙሪዳ ዝኩኽሳ ጊጊሴ ሼቴፍጝስታ፣ ዳዊስ ስጙስትኹሳስታ ዋልኽ ዙራሙሬኪላ ፃንኩስጝስ ምንድራሺ ቑንዚዴስ ጛሬ ማንዲጝ ቱስቴ:: እይስታውሳ አጐበሮ ወሌጁኒውላ ቑፃማስታ ሳኻማ ቴኬምስትጝስ ሚቓያሰ ኹስታማ ቑንዚስ ፂኪስትጝዴስ ቤዴራማ ካላካልጝጝ ቱስቴ:: ምንድራሺ ቑንዛሳ ካላካልጝጝስኪላ ፋንኩ ሊሊትጙንኩ ዝማቺኩ ቴግባርካዋ ውላጊ አላፍትስ ፊትጝጝ ቱስቴ::