ጛርጊስ ጛርጉንኩ

ታደለ አጋጄ

ይቶፒያ ጛርጊው ምርትስ አሌምዴስ ቢዲሪዳ ቶኬምስታንኩ አጌርካ ክቻዳ ሚዲብስቴት ታኹስ አፍሪካዴስ ዴሜካ አባላምቲ አችዳ አግስቴት አኽⶓ 2011 ም/አሜታዳ ሪፖርተር ሜፄቱ ንባር ቶኬሜ:: ይቶፒያዳ አሜትስ 550 ሻይ ቶንዴስ ጃላ ጛርጌ አሜርትጙ አክም ዝኮ:: ጛርጊው ምርትስ ፋይስታውሳ ላካ ትኩት እይስታውላስ ይጉኒውላ አጌራው አሜቱ ጛርጊው ምርት 64 ሻይ ቶን ጛርጊ አግስቴ:: አፍሪካዴስ አግስታው ትክላሊ አሜቱ ጛርጊው ምርትዴስ ይቶፒያ ሊኽዴስ 25 ታፋ ያኻውሳ ሾፌንታት አኽⶓ ንባርካ አንቤብፃና::

አሜሪካ አውሮፓው እዝቡ ቼፍታ 2015ዴስ 2016 ኺስታ ሊኽዴስ 44 ታፋ፣ ምስሊ አሜትስ እንግሊዝ 17 ታፋ ፅኻራው አብት ድስⶓ ሲኤንኤን ፍሽኹ ንባር ቶኬሜ:: ፅኻራስ ሊሊቴ ትኩቶ እይጝስ እንፃኽስቴት ፈረንሳይ ፅኻራዋ ድፃውሳ አሪሚውሳ እጆስታ እሊውሳ ኬሚካሎ አጌራኻሾ ቱዋቲታ ፄውታ::ሚንችካ አጌርካ እርሺው ሴብልስስታ ጛርጊውሳ ምርቶ ፃምርሳማ እንፃኽስትጝስ ካሊፃውሳ ሴሎ ፌቴርጝዴስ ፌይኹስ ምግቡሳ ዋስትኔ ቼሜትጝፅጝስ ፅሬቶ ፄዌካማጌኽ:: ይቶፒያኪላ ዝኩኽሳ ጛርጊውሳ ምርቶ ፃንኩቶ ማንዱኽ ዳድስ ባርኾቼሾ እንፃኽቴ:: ጛርጊው ምርትስ ትኩት እይስታማ እንፃኽስቱኒጊ ቡንታስታ ስሊትታ አጌራውሳ ኢኮኖሜ ሌጌፅጝስ ካሌ::

ፅኻራዴስ አግስታው ጛርጊ እምፕልታቕስ ሚንቾ ትክሞ እዬ:: እኒጛ ክቻዴስ ጛርጊ እሚኹ አኹ ሜቴን ማልጛ ዜሬቕቲኒ አኽጝስ ሃይድሮጂን ፐር ኦክሳይድ እስታው ባክቴሪያ ፌቴርስታቲታ ካላካልጛውሳ ኬሚካሉሳ እምፕልቶ እሜ::ጛርጊ አኽዳ ቲንስ ቴኬማንቲ ያኹኽሳ ፂኪሴ ዲቦ “አንቲ ኦክሳይዶ” እሚኹ አኽጝስ ምግብስ ይቪቺ ያኻውላስ ሚንቺትስ እጁ ያኻማ አጌላጌሌ:: ብሪውሳ ሺንኬ አካላታኻዳ አግስታውሳ ኮሊስትሮሉሳ ሜቴኖ፣ ሽኩዋር ቑንዛውሳስታ ሼውሳ ቲኖ ቼፍጝጜ::ፅኻራዋ ስኹፅጝ ጛርጊው ምርትስ አግስታው ሚፂዴስ ድምክና ፅኻራ አቪቬ ሌኬምጝስ ፄውታው ልቕልቕቲስ ፍትሬቱሳ ሚዛኖ ማንዳማ እጂፅጝስ ኬፍቲኒ ታምብ ዝኩኽያኽ፡ፅኻራ ዙራሙሪው አይር እግልታውሳ ኪሴ ካላካልጝጝስ ኬፍንኹ ፍሺ ዝኩት ታኹስ ዋሺኒኪ ፍትሬቱ አብትዳ እንዳራኪ ጉዳቶ ታምፃቲት አኽⶓ ሊሊትጙንኩ ፅናትካ ቶኬማና::ፅኻራዋ ስኹፅጝስ አግስታውሳ ጛርጌ ምግብስ እሽፅጝዴስ ፌይኹስ ጛርጌ ባርኾቼሾ እንፃኽጝስ ኢኮኖሜ አግፅጝስ ካላዊያኽ::

አዊ ብሄረሰቡ ቺፅጝፂዳ አግስታንኩ ዙራሙርካ ሚንቺትስ ፅኻራዋ ስኹፅጝስ አሜቻው አይር እግልታ ዝኩኽ አኽጝስ ሚንችካ አሬሳቻንትካ ግብርኒው እንፅኺሊ ኬምፕስ ኬምፖ ፅኻራ ስኹፅጝዳ አሴሜርጜካማ ኬሻንቴ ዝኩዊኔ ጉሴካማጊ አግስታና::

ጉዋንጊ ወረዳ ዋይከላ ኬቤሊው ዝኩዋንቲ አቶ አደራ ወርኬ አውጚው ራዲዩንሊ ስልኪስ ፄውኑ እጂጚዳ ፅኻራዋ እሩብፅጝስ ትክሞ አግፅⶓ ድኹዌካ:: ሞየሽ እስታው ፕሮጀክት አችትጝፅጝስ ፅኻራዋ እሩብፅጙ እንፅኺዳ አሴሜርጛንታ ፄዋ:: አባላምቲዳ ፅኻራዋ ስኹፅጙ እንፅኺሾ ቱኒኪላ ሞየሽ ፕሮጀክት ፅኻራዋ እሩብፅካማ ቴኬምስታንታ እስትጝስ እን እንፅኺሾ ቱⶓ ቶኬምካ:: እንስኪላ ትክሞ አግፄካማጊ አኽⶓ ዲብስካ:: ኬቤሊታ ሚንችካ አቕ ፅኻራዋ እሩብፅጙ እንፅኺሾ ቱⶓ ቶኬሙንኩ አቶ አደራ ጛርትስኪ ያኻ አችትጜካማ እንፃኽስታንኩ ጛርት አቕ ዝኩⶓ ድኹዌካ::

አባላምቲዳ እን እንፅኺሾ ቱዋኒስ ፅካ አንኪሚ ፅኻራ እሚጝስ ጄሜርⶓ ዙሙንኩ አቶ አደራ ናካዳ 15 ዴስ 20  አንኪሜኺስታ ፅኻራዋ እሩብፅጝዳ አግስታንኩ አኽⶓ ዙሜካ::

ፅኻራው ጛርጊ አሜትዴስ ላጚኒ ኬውስታው አኽⶓ ዙሙንኩ አቶ አደራ ፅኻራው ሚንችትስታ እንፂጝታ አግስታው ጛርጊው ሜቴን ዎሴንስታው አኽⶓ ዙሜካ::

ፅኻራዋ እሩብፅጝስ አግፃኑሳ ጛርጊውሳ ምርቶ ጌቤልሰ ዲግስጝስ ቴኬምስታንታ አኽⶓኪላ ድኹዌካ::

“ፅኻራ ክዮ ፋያላ፤ ሚንቾ ስፍሬ እሜላ፣ ምርክቴው ዎክትዳ ጐርዳ ፅኻራስ ያኻውሳ ምግቦ ቴርስኑኒ ዋሻኪ ካላ” ናኒስ ፅኻራ ስኩፅጝ እሊው እንፅኺዴስ ሳሴርስ እንፃኽስትጝስ ካሊስታው አኽⶓ ድኹዌካ::

ቤዴራ ባይላዊ አንኪሚዳ ፅኻራዋ ስኹፅጙ ዴስ እሺⶓ ቶኬምካ:: ናካ ኩፅኒ ግብርኒው ውማይቴንካውሳ ኩስጜ ቻቤልካማ ባይሉ አንኪሚዴስ ዝቤናዊ አንኪሚሾ ካይፅጙሳ እንፅኼ አኮሜቻንኩ አኽⶓ ዲብስካ::

ሴዛ ዝቤናዊ አንኪሚ ዝኩⶓ ጉሹንኩ አቶ አደራ ፅኻራዋ እሩብፅጝስ ኬሽኹሳ ትክሞ አግፃንታ ግብርኒኩ ውማይቴንካውሳ ኩስጜ ቻቤልጝስ ቴኬምስታንታ አኽⶓ ዲብስካ::

እሊው ኬቤሊው ዝኩዋንቲ አቶ አለባቸው ጋሺ ግብርኒው እንፅኺዴስ ኬምፕስ ኬምፖ ፅኻራዋ እሩብፅጝስ ኬሽኹሳ ትክሞ አግፅⶓ ዙሜካ::

ፅኻራዋ ስኹፅጙሳ እንፅኼ ጄሜሩኑ ታብሊ ፅኻራዋ ቼውስስታ እሩብፁስ ካንትጝዴስ ጁዌካማ አኽⶓ ቶኬምካ::

ቤዴራ ባይሉ አንኪሚዳ ፅኻራዋ ስኹፅⶓ ጄሜርⶓ ቶኬምካ አቶ አለባቸው ናካዳ ምንግስት እይኹ ዝቤናዊ አንኪሚዳ ፅኻራዋ እሩብፅካማጊ አግስታንኩ አኽⶓ ዲብስካ::

ፅኻራዋ እሩብፅጙ ዴስ እላቲኩ እሊኩ አሬሳቻንትካስጊ ጚውሳ ዴሶ ቤንጝፅጝስ ፅኻራዋ እሩብፃንታ ፄውⶓኪላ ድኹዌካ::

ዋይከላ ኬቤሊው ግብርኒ ፅፌት ጝናዳ እንሴስካዉ አብት ልማቱ ውማይቲኒ አስረስ ታመነ ኬቤሊዳ ፅኻራዋ እሩብፅጙ እንፅኺዳ አሴሜርጙንኩ ጛርት አቕስ ፕሮጄክትካ እርዳቴ ፄዋንኩ አኽጝስ ፃንኩቶ ማንዱኹሳ ጛርጌ ጌቤልስ ዲግስጝስ እንፃኽስስታማጊ አኽⶓ ጌሌፅካ::

ፅኻራዋ እሩብፃኑ ጊዝስ ዎክቶ ማንዳያሱ እሪስታ ሴብልዳ አሬችስታው ኬሚካል ፅኻራዳ ጉዳቶ ታምፃው አኽⶓ እርዳትፅካ:: ውማይቲኒ ሴብልዳ አሬችስታው ኬሚካል ፅኻራ እሩብታው ስፍሪዴስ 3 ኪሎ ሜትር እቺትዳ ያኻታስታ አሬቻኒስ ትንካኬ ፄዋንታ እምፕልታቕስ ሼውቴ ፌቴርካማጊ አኽⶓ እርዳትፅካ::

ፅኻራ ጛርጌ እይጝ ይቪቻ ያኻውላስ ሴብሎ ዴኬልፅጝስ ቴኬምታት አኽⶓኪላ ጌሌፅካ::

ግብርኒ እንፅኺዳ ሚንቾ ብቴ ካሴውላስ፣ ሚንቾ ግርቦ ካሴውላስ ፅሊ ብቲዳ ሚንቾ ዋይሚ እያው አኽጝስ አሬሳቻንትካኪ ያኻ ዎታትካ ቴኬምስታንታ ያኻንታ ጁትጝፃንኩ አኽⶓ  አቶ አስረስ ቶኬምካ::

ጉዋንጊ ወረዳው ግብርኒ ፅፌት ጝናዳ እንሴስካው ዋይሚውስታ ሜኑ ኬቹ ጉሳንቲ እስማኤል ጀብሪል ጌሌፁኑውስታጊ ወረዳታጊ ፅኻራው እንፅኺዳ እይስትኹ ሊሊቲ ትኩትስ አሬሳቻንትካስታ ዎታትካ ቴኬምስታንታ ያኻንታ ፄውስታማጌኽ::

ወረዳዳ እርዳታኒስ እሺንኩ ፕሮጄክትካ ሰላሙስታ ፄትቲው ችግርስ ፊⶓ ቶኬምካማ ወረዳው ግብርኒ ፅፌት ጝና ይስጝፃማ እንፃኽስታማጊ ያኹኒውላ ፕሮጄክትካው እርዳቲ ሲፉኒ ኩፅኒ ሚንችካ እንፅኺ እላቲኩ ዎታትካስ እንፅኺው ድል ፌቴርስታታ ፄዋው ዜርፍ አኽⶓ ቶኬምካ::

አሪሚዳ አሬችስታውሳ ኬሚካሎ ካንትኹስ አሬሳቻንትካስ ሼውቴ ፌቴርካማጊ አኽⶓኪላ እርዳትፅካ::