ልዴት ባሉ አይማኖታዊ ኪቢርጚ

አለሚቱ የኔት

ይቶፒያው ኦርቶዶክስ ብሽታና ኪቢርፄኩ አይማኖታውካ ባልካ ክቻዴስ ልዴቱ ባል እምፕሊያኽ:: ልዴቱ አኹኪ ጊኒው ባል አሜት ቺፋ ኬቤርስታውስታ ስራስሪዴስ ኽሳንትካዋኺስታ እንጉስ ማንዳኑ ባሊያኽ:: ልዴት ባሉሳ አይማኖታዌ ኪቢርጜ ካንትኹስኪላ ቤዴራ አውጚው ሬዲዩንሊ እጂጜ ፄውንኩ እንጃቢሪ ኬቴምዳ አግስታንኩ ወንጌሉ ክንትፃንቲ አበባው አምሳያ እሳንስ እርዳትፁኑሳ አንቤብፅጝስ ፃፊናና ዲግስናኽ ክርፂ ንባብ::

ልዴቱ ባል ኬቤርስታው ጚው ያኹኽ እምኔትሊ ታምትጚ ዝኩኼኽ:: እምኔትሊ እምትጙኽ ምክንያቲኪላ ድቫን አዳምስታ ሄዋኖ ፌቴራማ ክብርስ ገነትዳ ዝኩዋንታ ፄዋኒ ገነትዳ ዝኩዋኒስ ድቫን ኹዌንኪ ንኹሳ እፀ-በለሶ ኹጝ ምክንያታስ 5 ሻይ 500 አሜታሳ እንዳ ብቲዳ ኪፂስታንታ ፍርዶ ቻቤልካማ እንጚ ጊዛይ ድቫን እይኹስ ካልኪዳንስ 5 ሻይ 500 አሜት ፌፄምስታኒ አዳም 99 አሜቶ ንሳየ ቱዋማ ጄርጄራዴስ ካሜንስታታ እንዴስ ሌግዴስ ፍሻኻኽ ናማ ካሎ ቱኽ ስሬታስ ድንግል ማርያምዴስ እየሱስ ክርስቶስ ካሜንስትⶓስታ እን ባልኪላ ልዴቱ አኹኪ ጊኒው ባል እስታማ ኬቤርስታው አኽⶓ ሜምሪ አበባው እርዳትፅካ::

ድባን አዳምስ ቱኽ ካል ስሬታስኪላ አቒያ ዘላለም ሲኦልዳ ቱዋማ ዝኩዋቲታ ፄውኽ አኽⶓስታ አቒውዴስ እሺዴስ እሼ ንፍስዴስ ንፍሶ አሌቔትጛማ ክምካው ድቫይዳ ካሜንስትኹ ምክንያቲ ዴሜካ ድባኖ ካዌንዴስ ኩዋዋ ክምካሊ አግፅናና ኩስኪ ሴጌድናኻኽ ናው ትንቢቱ ሜፃፍ ዝኩኽ አኽⶓስታ እን ትንቢት ፌፄምስታታ ታክስስታማ አኽⶓ ሜምሪ አበባው ጌሌፅካ:: እሊው ዴሜካ ድባን እንፃንቴኪ ያኻ ኽሳንቴ እንካናው አኽⶓስታ አሌሙጊ አቫላሚ አኽⶓ ካንትፅጝስ ክምካው ሞሬፅዳ ካማንስትⶓ ድኹዌካ::

እን ልደቱ ባልታዋኪላ ሰባሰገልካ ኢየሱስ ክርስቶስ ካሜንስትⶓ ድኹስ ዝኩኽሳ ኮኬብስ ቼፋኒስ ሴጝካማ ቤዋስ  ጉስሱትካማጊ እስራኤል ቤተልሄም እስቴትዳ ክምካው ሞሬፁ ዙራሙሪዳ ካሜንስትኹሳ ኢየሱስ ክርስቶሶ ካንታ ወርኮ፣ እታኖስታ ከርቤዋ እሚካማ ካሳኒስ ዙራሙሬ ቺፅጝፃው ንጉስ ሄሮድስ እሺኾ አፋይ ካታኑ ናኒ ካሜንስትኹሳ ኢየሱስ ክርስቶሶ ናኒ ሼውዳ ድኬ ታክስጝስ ውን አኽⶓ ቼሜትጝፂካማ እየስ ኪላ ድቑዋን ናማ ካሳኒስ ኩፅኒ ሰባሰገልካሊ ሄሮድሱ እንፅኺኒ አብርታ ካስጝ ጌሌፅስታማ ጉርጉሞ ኬውካማ እንጅኩስ ጛሬ ኽቴናቴ እንክራኒስ እሺኑሳ ታክስፅጝስ ናካኪላ ጊኒ እንክራ ንካማጊ ዳባዋ እንክራኑ እንጚዴስ ይንቱኽ አኽⶓኪላ ሜምሪ አበባው እንክርፄካ::

ልዴቱ ባልኪላ ትንቢቱ ጌርክ፣ ትእትኒው ጌርክኪላ እስቴ:: አቒ ጄራዴስ ካሜንስትጝስ ትእትኔ ካንትፃ፣ እን ጌርክ ዝማሪው ጌርክኪላ እስቴ አቒጄራስታ መላይክትካ ይጋሪስ ዜሜሩኑ ጌርክ አኽጝስ:: ምስራቹስታ ስቶቲው ጌርክኪላ እስትጝስ አቕስቴ ጊኒው ባል::

አዊ ብሄረሰቡ ቺፅጝፂዳኪላ ጊኒው ባል ኬቤርስቱስ አፍሌንካ ፅልካ ስራስሪ እንጅኮስታ ዳቫዋ ቴርሳኑ ቤዴርካማኽ:: ቹትካስታ ታብል ዴሜካ ጝናኻዳ ባሎ ኬቤርፅጝስ ካሊፃንኩ ቤዴራ ቴርትካዋጊ አኮሜቻና:: ታብል እሺስ ያኻውሳ ጌንዜቦ፣ ቹትካ ጝናኻዳ ፋይፃንኩ ምግብስ ያኻንኩሳጊ ቤዴርካማ ቴርስጝ አሜትቺፋ ካስጝፃኑ ቴግባሪያኽ::

ዋዚሚዴስ ጄሜራማ ጝኖ ቴርስጝስ ጉዝጉዝስ ያኻውሳ ቤርቤሮስታ ስኔ ቴርስጝስ ቹትካ ኽቴናቴ ንጝስ ጝንዳ ሊሊቲ እንኮኽስቶ ፌቴራና:: ባልታዋኪላ ኢየሱሱሳ ካሜንስትⶓ ምክንያታ ፄውጝስ ባይልታ ዴስታማ ማርያሙ እስታማ ኾሺው ብኹሪ ስግላስ ክምካው ድባይዳ ብኹርስታማ ኹስቴ:: ሙሪ ሙራዳ ኩች ንጝ አፌሩኽጊ ዲጋማ አሜት ባል ብራማ ኬቤርስቴ:: ሳትዴስ እንግራ ዴሜካ ጝርጃ አንዱኮስታ ዳባዋ እሚካማ ውታኺሾ ካስጝስ ላጛ ኬችስ ቤንስትካማ ዳባ እንክራዋ ልኺትጛና:: ዊፅኹ ኬችኪላ አያሆሆ ናማጊ ጅሚስ ውታኼ ብርፄ::

እን እንክሪዳ ኹን አሴቴፍጛኑውላስ ይጉኒኪላ ዳሪዳ ያኼካማ ኩፅኒ እንክሬ ካንትጝስ ፍትኽንጝ ጌጌውስታላኪ:: ዳቫ እንክራዳኪላ ጛስጛዋ ዳቫስ አኹኪ እንጁክስ ታይጝጚ ጌቴማኒ ኪሞ እሚጝኪላ እላቲው አኽጝ ባይልታ ድኹስቴ:: ዳቫ እንክራዴስ ፋሌንጋ ዊፅኹኪ ያኻ ዊፅስትኹ ኬች ይጋሪስ አኽጝስ አያሆሆ አያሆሆ ንካማጊ ጅምጝስ ብሽታንሾ ካስካማ ድቫኖ አሜሴጌንካማ እምኔቱ ታብልስ ዳቔርስትካማ አሜቶ ታምፃታ ፆሌትስ ካሲካማ ሙሪሾ ዙራና::

ብሽታንዴስ ሙሪሾ ዙራኒስ ዴሜካ ፌይኹ አሜትዳ ሳሊስትኹ አቒኾ ቱጝስ ጅሜካ እንክሬካማጊ ቴርስቴሮ ጝን ቺፋ ጅሜካማጊ ዙራኒስ ቻና:: ላጛኒ ቻ ዴሜካ ስሌቶ ቻቤሉኑ ጝን ዌናሱሳ ሴብሉሳ ምርቶ አፄድጝስ፣ ሳቢጝስስታ ጐግልጝስ እርዳታኑ ባይልኪላ ዝኮ:: እን ባል ኬቤርስቱስ ኩፅኒ ውላጊ አክምታ ዝኩኽ እላቲውስ ቤንጝፅጝስ፣ ቑንዳስትካማ ኻግዳ ዝኩንኩሳ ካሲጝስ አኽጝ ቱስቴ:: ቲቪቪርጚስታ እርዳትጚ ዝኩኒዴስ ችግርኪላ ሳሴርታው አኽጝሲያኽ